Jeremias la para atu koʼalia kona-ba Jeová

Dala ruma, ema goza ka sai hirus ba ita kuandu ita koʼalia kona-ba Jeová. No ida-neʼe bele halo ita hakarak para atu koʼalia kona-ba Jeová. Dala ruma ó mós sente hanesan neʼe ka lae?— Bíblia konta kona-ba mane joven ida neʼebé besik para atu koʼalia kona-ba Jeová maski nia hadomi tebes Jeová. Mane neʼe naran Jeremias. Mai ita aprende kona-ba nia.

Kuandu Jeremias sei joven, Jeová fó-hatene nia katak nia tenke fó avizu ba povu hodi sira para atu halo buat neʼebé aat. Ida-neʼe susar ba Jeremias, no nia mós taʼuk. Nia dehan ba Jeová: ‘Haʼu sei labarik. Haʼu la hatene atu koʼalia saida.’ Maibé Jeová hatete: ‘Keta taʼuk. Haʼu sei ajuda ó.’

Tan neʼe Jeremias komesa fó avizu ba povu hodi hatete katak se sira la troka sira-nia hahalok, sira sei hetan kastigu. Tuir ó-nia hanoin, povu halo tuir Jeremias ka lae?— Lae. Sira goza Jeremias no sai hirus ba nia. Ema balu mós hakarak oho nia! Oinsá mak Jeremias sente?— Nia sai taʼuk no dehan: ‘Haʼu sei la koʼalia tan kona-ba Jeová.’ Maibé nia rende an duni ka lae?— Lae, nia la rende an. Jeremias hadomi tebes Jeová toʼo nia la bele para atu koʼalia kona-ba Jeová. No tanba Jeremias la rende an, Jeová proteje nia.

Porezemplu, tempu ida mane aat sira soe tun Jeremias ba kuak kleʼan neʼebé nakonu ho tahu. Jeremias la iha hahán no bee. Mane aat sira-neʼe hakarak atu husik Jeremias iha fatin neʼe hodi nia mate. Maibé ho Jeová nia ajuda nia konsege sai!

Saida mak ó bele aprende husi Jeremias nia ezemplu?— Maski dala ruma Jeremias sente taʼuk, maibé nia la para atu koʼalia kona-ba Jeová. Kuandu ó koʼalia kona-ba Jeová, karik ema sei goza ka sai hirus ba ó. Karik ó sai moe ka taʼuk. Maibé labele para atu koʼalia kona-ba Jeová. Jeová mós sei ajuda ó hanesan nia ajuda Jeremias.