Timóteo hakarak ajuda ema

Timóteo mak mane joven ida neʼebé kontente atu ajuda ema. Nia bá fatin barak atu ajuda ema seluk. Tan neʼe, Timóteo iha moris neʼebé diʼak no kontente. Ó hakarak rona kona-ba ida-neʼe ka lae?—

Timóteo sai boot iha sidade Listra. Kuandu nia sei kiʼik, nia avó-feto Luisa no nia inan Eunike hahú hanorin nia kona-ba Jeová. Nuʼudar Timóteo sai boot, nia hakarak ajuda ema seluk atu aprende kona-ba Jeová.

Kuandu Timóteo sei joven, Paulo husu nia atu laʼo-rai hamutuk ho nia atu haklaken iha fatin seluk. Timóteo hatán: ‘Sin!’ Nia prontu atu bá no ajuda ema seluk.

Timóteo laʼo-rai ho Paulo atu bá sidade ida iha rai-Masedónia naran Tesalónika. Sira tenke laʼo dook no saʼe ró atu bá fatin neʼe. Kuandu sira toʼo fatin neʼe, sira ajuda ema barak atu aprende kona-ba Jeová. Maibé ema balu sai hirus no koko atu baku sira. Tan neʼe, Paulo no Timóteo presiza sai no haklaken iha fatin seluk.

Fulan balu liutiha, Paulo husu Timóteo atu fila fali ba Tesalónika atu haree se irmaun-irmán sira iha neʼebá mak diʼak ka lae. Timóteo presiza duni hatudu aten-brani atu bá fali iha sidade perigu neʼe. Maski nuneʼe, Timóteo bá tanba nia hanoin barak kona-ba irmaun-irmán sira iha neʼebá. Kuandu nia fila fali husi sidade Tesalónika, nia hatoʼo mensajen diʼak ba Paulo katak irmaun-irmán sira iha Tesalónika mak diʼak tebes!

Timóteo serbisu hamutuk ho Paulo ba tinan barak. Paulo mós hakerek iha ninia karta katak Timóteo mak ema ida neʼebé diʼak liu atu haruka ba kongregasaun sira. Sin, Timóteo hadomi Jeová no ema.

Ó mós hadomi ema no hakarak ajuda sira aprende kona-ba Jeová ka lae?— Se ó mós hanesan neʼe, ó bele iha moris neʼebé kontente no diʼak tebes, hanesan Timóteo!