LISAUN 2
Nafatin laran-metin ba malu
“Buat neʼebé Maromak tau hamutuk, ema keta haketak.”—Marcos 10:9
Maromak Jeová hakarak ita atu ‘hatudu laran-metin’. (Miquéias [Mikha] 6:8) Ida-neʼe importante tebes liuliu iha moris kaben nian tanba feen-laʼen presiza laran-metin ba malu atu bele tau fiar ba malu. No tau fiar ba malu mak importante atu bele haburas domin.
Ohin loron, feen-laʼen barak fahe malu tanba la laran-metin ba malu. Atu proteje Ita-nia moris kaben nian, Ita tenke hakaʼas an atu halo buat rua tuirmai neʼe.
1 HAREE MORIS KABEN NIAN NUʼUDAR BUAT NEʼEBÉ IMPORTANTE
BUAT NEʼEBÉ BÍBLIA HANORIN: “Buka-hatene loloos buat sira neʼebé importante liu.” (Filipe 1:10) Ita-nia moris kaben nian mak buat ida neʼebé importante duni. Ita tenkesér fó atensaun ba ida-neʼe.
Maromak Jeová hakarak Ita atu hafolin Ita-nia kaben no “moris haksolok” hamutuk. (Eclesiastes [Pengkhotbah] 9:9) Maromak lakohi Ita atu okupadu demais toʼo la fó tempu ba Ita-nia kaben, maibé Ita tenke buka dalan atu fó ksolok ba malu. (1 Korinto 10:24) Hafolin Ita-nia kaben no halo nia sente katak Ita presiza tebes nia iha Ita-nia moris.
BUAT NEʼEBÉ ITA BELE HALO:
Gasta tempu beibeik hamutuk ho Ita-nia kaben, no bainhira hamutuk, fó atensaun tomak ba nia
Iha buat hotu, labele hanoin deʼit Ita-nia an, maibé hanoin saida mak diʼak ba imi naʼin-rua
2 PROTEJE ITA-NIA LARAN
BUAT NEʼEBÉ BÍBLIA HANORIN: “Ema neʼebé hateke beibeik ba feto ida toʼo kaan nia, ema neʼe halo ona sala-foʼer ho feto neʼe iha ninia laran.” (Mateus 5:28) Nuneʼe, se ema ida hanoin beibeik kona-ba hahalok la morál, tuir loloos ema neʼe la laran-metin ona ba ninia kaben.
Jeová hatete katak ita tenke ‘proteje ita-nia laran’. (Provérbios [Amsal] 4:23; Jeremias [Yeremia] 17:9) Atubele halo nuneʼe, ita presiza kuidadu ita-nia matan. (Mateus 5:29, 30) Ita bele halo tuir Maromak nia atan Job nia ezemplu. Job halo aliansa ho ninia matan, ka promete ba nia an atu nunka hateke ba feto hodi kaan nia. (Jó [Ayub] 31:1) Halo desizaun neʼebé metin atu nunka haree pornografia no labele hatudu sentimentu gosta ba ema seluk neʼebé laʼós Ita-nia kaben.
BUAT NEʼEBÉ ITA BELE HALO:
Ita hakarak ema hotu atu haree katak Ita hadomi ema ida deʼit, neʼe mak Ita-nia kaben
Hanoin Ita-nia kaben nia sentimentu. Se Ita besik ba mane ka feto seluk no halo Ita-nia kaben sente ladiʼak, hadook an kedas husi ema neʼe