Oinsá atu hanorin oan sira iha dalan neʼebé diʼak

Bainhira Maromak Jeová harii arranju família nian, ninia hakarak mak atu inan-aman sira tau matan ba oan. (Koloso 3:20) Neʼe duni, nuʼudar inan-aman, imi iha knaar importante atu hanorin oan atu hadomi Jeová no atu sai ema neʼebé hatene kaer responsabilidade. (2 Timóteo 1:5; 3:15) Imi tenke buka-hatene oan sira-nia hakarak no hanoin. No mós, imi rasik nia ezemplu mak importante tebes. Maromak nia Liafuan tenke iha imi-nia laran uluk mak foin imi bele hanorin ida-neʼe ba oan sira.​—Salmo (Mazmur) 40:8.

1 HALO FASIL BA OAN ATU KOʼALIA BA IMI

BUAT NEʼEBÉ BÍBLIA HANORIN: “Tenke lalais atu rona, neineik atu koʼalia.” (Tiago 1:19) Importante ba oan sira atu sente katak sira bele hakbesik imi hodi koʼalia nakloke. Oan sira presiza hatene katak imi prontu atu rona kuandu sira hakarak koʼalia buat ruma. Se imi buka fatin hakmatek no la husik buat ruma atu hanetik imi koʼalia ho sira, sira sei sente fasil atu fó sai sira-nia hanoin. (Tiago 3:18) Maibé, se oan sira hanoin katak imi sei hatún ka kritika sira, karik sira sei la koʼalia buat hotu ba imi. Tan neʼe, hatudu pasiénsia nafatin no fó-hatene beibeik katak imi hadomi sira.​—Mateus 3:17; 1 Korinto 8:1.

BUAT NEʼEBÉ ITA BELE HALO:

• Kuandu oan presiza koʼalia buat ruma, sempre prontu atu fó tempu hodi rona

• Koʼalia beibeik ba oan sira. Labele hein toʼo problema mosu mak foin koʼalia ba sira

2 KOKO ATU KOMPRENDE SAIDA MAK LOLOOS SIRA HAKARAK

BUAT NEʼEBÉ BÍBLIA HANORIN: “Ema neʼebé hatudu matenek iha buat ruma sei hetan buat diʼak.” (Provérbios [Amsal] 16:20) Dala ruma, imi presiza atu la rona deʼit ba sira-nia liafuan, maibé buka-hatene loloos saida mak sira sente iha laran. Baibain, joven sira koʼalia naranaran deʼit ka koʼalia hodi la hanoin uluk. Bíblia hatete: “Kuandu ema ida hatán kona-ba buat ruma antes nia rona, nia beik.” (Provérbios [Amsal] 18:13) Tan neʼe, keta sai hirus lalais.​—Provérbios (Amsal) 19:11.

BUAT NEʼEBÉ ITA BELE HALO:

• Maski oan sira koʼalia saida deʼit, labele korta sira ka sai hirus kedas

• Hanoin fali imi sente oinsá no saida mak importante ba imi bainhira imi sei kiʼik hanesan sira

3 OAN PRESIZA HAREE IMI IHA HANOIN IDA DEʼIT

BUAT NEʼEBÉ BÍBLIA HANORIN: “Haʼu-nia oan, rona ba dixiplina husi ó-nia aman, no keta husik ó-nia inan nia lei.” (Provérbios [Amsal] 1:8) Maromak Jeová fó kbiit ba aman no inan atu hanorin oan sira. Tan neʼe, imi tenke hanorin oan sira atu respeitu no halo tuir imi. (Éfeso 6:1-3) Oan sira bele haree kuandu inan-aman la “sai ida deʼit iha sira-nia neon”. (1 Korinto 1:10) Entaun, se imi-nia hanoin la hanesan kona-ba buat ruma, labele diskute malu iha oan sira-nia oin tanba ida-neʼe sei hamenus sira-nia respeitu ba imi nuʼudar inan-aman.

BUAT NEʼEBÉ ITA BELE HALO:

• Koʼalia ba malu no konkorda kona-ba oinsá atu fó dixiplina ba oan sira

• Se Ita ho Ita-nia kaben iha hanoin la hanesan kona-ba hanorin oan sira, koko atu komprende Ita-nia kaben nia hanoin

4 HALO PLANU HAMUTUK

BUAT NEʼEBÉ BÍBLIA HANORIN: “Hanorin labarik tuir dalan neʼebé diʼak ba nia.” (Provérbios [Amsal] 22:6) Atu bele hanorin oan ho susesu, ida-neʼe presiza tempu no hakaʼas an. Ita presiza halo planu hamutuk hodi fó treinu no dixiplina ba oan sira. (Salmo [Mazmur] 127:4; Provérbios [Amsal] 29:17) Dixiplina laʼós fó kastigu deʼit, maibé mós presiza hanorin oan sira atu komprende tanbasá mak imi halo lei ruma ba sira. (Provérbios [Amsal] 28:7) No mós, hanorin sira atu hafolin Jeová nia Liafuan no buka atu komprende ninia matadalan sira. (Salmo [Mazmur] 1:2) Hodi halo nuneʼe, imi sei ajuda imi-nia oan sira atu iha laran neʼebé moos.—Ebreu 5:14.

BUAT NEʼEBÉ ITA BELE HALO:

• Ajuda oan sira atu fiar-metin katak Maromak iha duni no sira bele tau fiar ba nia

• Ajuda oan sira atu hatene ida-neʼebé mak hahalok aat no oinsá sira bele hasees an husi buat sira-neʼe, hanesan buat aat sira neʼebé iha internét. Hanorin sira atu hasees an husi ema aat neʼebé hakarak estraga sira