Katuas sira neʼebé tau matan ba bibi-lubun

BAINHIRA Jesus halaʼo ninia serbisu haklaken iha rai, nia hatudu katak nia mak “bibi-atan diʼak”. (João 10:11) Kuandu Jesus haree ema-lubun laʼo tuir nia, nia “hanoin tebes sira, tanba nia haree katak ema hanehan no la tau matan ba sira, no sira hanesan bibi neʼebé bibi-atan la iha”. (Mt 9:36) Pedro no apóstolu sira seluk haree Jesus nia domin ba ema. Jesus la hanesan duni ho ema Izraél nia bibi-atan falsu neʼebé la tau matan ba Maromak nia bibi sira no husik sira laʼo namkari no sai hamlaha iha dalan espirituál. (Eze 34:7, 8) Jesus sai ezemplu diʼak tebes kona-ba hanorin no tau matan ba Maromak nia bibi sira, toʼo nia mós fó ninia moris atu salva sira. Ezemplu neʼe hanorin apóstolu sira oinsá atu ajuda ema fiar-naʼin sira atu fila fali ba Jeová, sira-nia “bibi-atan no ida neʼebé tau matan ba [sira-nia] moris”.​—1 Ped 2:25.

² Loron ida, Jesus esplika ba Pedro katak fó-han no tau matan ba bibi sira mak importante tebes. (João 21:15-17) Jesus nia liafuan book tebes Pedro, no liutiha tempu balu, Pedro mós fó konsellu ba katuas sira iha kongregasaun Kristaun, hodi hatete: “Tau matan ba Maromak nia bibi-lubun neʼebé iha imi-nia liman, serbí nuʼudar katuas, laʼós hodi obriga an, maibé ho hakarak rasik iha Maromak nia oin, laʼós tanba hakarak manán buat ruma ho laran-makerek, maibé ho laran tomak, laʼós hodi domina Maromak nia ema sira neʼebé nia entrega ona ba imi, maibé sai ezemplu ba bibi-lubun.” (1 Ped 5:1-3) Ohin loron, katuas kongregasaun sira mós presiza halo tuir Pedro nia konsellu neʼe. Hanesan Jesus, katuas sira prontu no hakarak hatudu ezemplu diʼak ba bibi-lubun hodi dirije sira atu halo Jeová nia serbisu.​—Ebr 13:7.

³ Ita agradese tebes ba katuas kongregasaun sira neʼebé simu knaar liuhusi espíritu santu. Ita hetan benefísiu barak tanba sira tau matan mai ita. Porezemplu, katuas sira hametin ita no hatudu interese ba ema ida-idak iha kongregasaun. Semana-semana, sira dirije reuniaun sira ho badinas hodi ajuda ita hotu hametin ita-nia relasaun ho Maromak. (Rom 12:8) Katuas sira hakaʼas an atu proteje bibi-lubun husi perigu oioin, hanesan husi ema neʼebé kontra lia-loos, hodi nuneʼe ita bele sente seguru. (Isa 32:2; Tito 1:9-11) Sira-nia ezemplu kona-ba haklaken ho badinas anima ita atu nafatin ativu iha serbisu haklaken fulan-fulan. (Ebr 13:15-17) Jeová hametin kongregasaun liuhusi mane sira-neʼe, neʼebé sai “nuʼudar prezente”.​—Éf 4:8, 11, 12.

KRITÉRIA ATU SERBÍ NUʼUDAR KATUAS

⁴ Atu kongregasaun hetan ajuda neʼebé sira presiza, mane sira neʼebé simu knaar atu serbí nuʼudar katuas tenke kumpre kritéria neʼebé hakerek iha Bíblia. Só deʼit kuandu sira kumpre ona kritéria mak ita bele dehan katak sira simu knaar liuhusi espíritu santu. (Após 20:28) Tuir loloos, kritéria husi Eskritura atu serbí nuʼudar katuas Kristaun mak aas, tanba serbí nuʼudar katuas mak responsabilidade boot no sériu. Maski nuneʼe, mane Kristaun sira bele kumpre duni kritéria sira-neʼe se sira hadomi Jeová no hakarak Jeová uza sira. Ema seluk presiza haree ho klaru katak sira aplika duni matadalan no konsellu husi Bíblia iha sira-nia moris loroloron.

⁵ Apóstolu Paulo temi kritéria ba katuas sira iha ninia karta primeiru ba Timóteo no mós iha ninia karta ba Tito. Iha 1 Timóteo 3:1-7, hatete: “Se mane ida hakaʼas an atu simu knaar nuʼudar katuas, nia hakarak halo serbisu neʼebé diʼak. Katuas ida tenke halaʼo nia moris ho didiʼak atu ema la hetan razaun atu duun nia, tenke iha feen ida deʼit, kontrola ninia hahalok, iha hanoin neʼebé loos, moris iha dalan neʼebé loos, simu ema ho laran-diʼak, iha kbiit atu hanorin, la lanu-teen, la halo violénsia, la ulun-toos, la istori malu, la hadomi osan. Nia tenke tau matan ba ninia família iha dalan neʼebé diʼak, no ninia oan sira halo tuir no hatudu hahalok diʼak, tanba se mane ida la hatene tau matan ba ninia umakain rasik, oinsá mak nia sei tau matan ba Maromak nia kongregasaun? Nia laʼós ema neʼebé foin sai fiar-naʼin, atu nuneʼe nia la sai foti an no simu tesi-lia neʼebé Diabu mós simu ona. Liután neʼe, nia tenke iha naran diʼak ho ema neʼebé laʼós parte ba kongregasaun, atu nuneʼe ema labele hatete aat nia no nia la monu ba Diabu nia lasu.”

⁶ Paulo hakerek ba Tito: “Haʼu husik ó hela iha Kreta, atu nuneʼe ó bele korrije buat sira neʼebé la loos no foti katuas sira iha sidade ida-idak, hanesan haʼu hanorin ona ó atu halo: Atu sai katuas ida, mane ida tenke halaʼo ninia moris ho didiʼak atu ema la hetan razaun atu duun nia, tenke iha feen ida deʼit, ninia oan sira mak fiar-naʼin, neʼebé ema la duun katak sira moris arbiru ka kontradór. Nuʼudar Maromak nia atan, katuas ida tenke halaʼo ninia moris ho didiʼak atu ema la hetan razaun atu duun nia, la halo tuir deʼit ninia hakarak rasik, la hirus lalais, la lanu-teen, la halo violénsia, no la buka atu manán buat ruma ho laran-makerek, maibé nia gosta simu ema ho laran-diʼak, hadomi buat diʼak, iha hanoin neʼebé loos, iha hahalok loos, laran-metin, kontrola an, no bainhira nia hanorin nia tenke kaer metin ba Maromak nia liafuan neʼebé ema bele tau fiar, atu nuneʼe nia bele anima no hametin ema hodi hanorin buat neʼebé loos no bele korrije sira neʼebé koʼalia kontra.”​—Tito 1:5-9.

⁷ Maski kritéria atu serbí nuʼudar katuas haree hanesan susar atu kumpre, maibé irmaun sira labele dada an atu simu knaar neʼe. Bainhira irmaun sira hatudu hahalok Kristaun neʼebé Maromak hakarak katuas sira atu hatudu, neʼe sei book ema seluk mós atu halo buat neʼebé hanesan. Paulo hakerek katak mane sira-neʼe mak hanesan “prezente” atu “bele ajuda ema santu sira laʼo tuir dalan loos, atu serbí ema seluk, no atu hametin Kristu nia isin-lolon toʼo ita hotu sai ida deʼit iha fiar no hetan koñesimentu neʼebé loos kona-ba Maromak nia Oan-Mane, atu sai hanesan ema boot, neʼe katak sai maduru hanesan ho Kristu”.​—Éf 4:8, 12, 13.

⁸ Ema neʼebé sai katuas tenke maduru, laʼós idade kiʼik liu ka laʼós ema neʼebé foin sai fiar-naʼin. Maibé sira mak ema neʼebé iha ona esperiénsia kona-ba moris nuʼudar ema Kristaun, iha koñesimentu barak kona-ba Bíblia, komprende buat neʼebé kleʼan husi Bíblia, no hatudu domin neʼebé loos ba kongregasaun. Sira aten-brani atu koʼalia no korrije ema neʼebé halo sala, hodi nuneʼe sira bele proteje bibi sira husi ema neʼebé hakarak atu aproveita bibi sira. (Isa 32:2) Ema hotu iha kongregasaun bele rekoñese katak katuas sira mak ema maduru iha dalan espirituál, no hanoin tebes Maromak nia bibi sira.

⁹ Sira neʼebé kumpre kritéria atu serbí nuʼudar katuas hatudu ona matenek kona-ba oinsá atu halaʼo moris loroloron nian. Se katuas ida kaben ona, nia tenke kaer metin ba Bíblia nia matadalan kona-ba moris kaben, katak tenke iha feen ida deʼit no tau matan ba ninia família iha dalan neʼebé diʼak. Se katuas nia oan sira mak fiar-naʼin, halo tuir no hatudu hahalok diʼak, no ema la duun katak sira moris arbiru ka kontradór, neʼe sei book ema seluk iha kongregasaun atu tau fiar no hakbesik ba nia hodi buka konsellu no matadalan kona-ba moris família no moris Kristaun. Katuas ida mós tenke halaʼo ninia moris ho didiʼak atu ema la hetan razaun atu duun nia, nia tenke iha naran diʼak, neʼe inklui mós iha naran diʼak ho ema neʼebé laʼós parte ba kongregasaun. Hodi halo nuneʼe, ema sei la iha razaun loos atu duun nia kona-ba hahalok sala ruma neʼebé bele hafoʼer kongregasaun nia naran. Se irmaun ruma foin simu dixiplina tanba sala sériu ruma, nia labele serbí nuʼudar katuas. Katuas ida nia ezemplu diʼak bele book ema iha kongregasaun atu halo tuir nia, no mós book sira atu fiar katak nia sei tau matan ba sira iha dalan espirituál.​—1 Kor 11:1; 16:15, 16.

¹⁰ Mane sira neʼebé kumpre kritéria atu serbí nuʼudar katuas kongregasaun halaʼo knaar neʼebé hanesan ho katuas sira iha Izraél neʼebé Bíblia temi nuʼudar “matenek no iha esperiénsia”. (Deut 1:13) Maski katuas Kristaun sira laʼós ema neʼebé perfeitu, maibé ema iha kongregasaun no komunidade koñese sira nuʼudar ema neʼebé diʼak no hamtaʼuk Maromak, tanba durante tempu balu sira hatudu ona katak sira moris tuir Maromak nia prinsípiu. Sira moris ho hahalok loos, tan neʼe sira bele koʼalia nakloke ba kongregasaun.​—Rom 3:23.

¹¹ Mane sira neʼebé kumpre kritéria atu serbí nuʼudar katuas hatudu katak sira bele kontrola sira-nia hahalok ka toman no dalan neʼebé sira trata ema seluk. Sira laʼós ema fanátiku. Maibé sira hatudu liuhusi sira-nia moris loroloron nian katak sira bele tetu didiʼak no kontrola an. Sira kontrola an kuandu han, hemu no halo atividade halimar nian. Sira mós kontrola an kuandu hemu tua atu nuneʼe ema la duun katak sira hemu lanu ka lanu-teen. Bainhira ema hemu tua toʼo labele hanoin ho loos, susar ba nia atu kontrola an, no nia la iha kbiit atu tau matan ba kongregasaun nia presiza espirituál.

¹² Atu mane ida bele tau matan didiʼak ba kongregasaun, nia presiza halaʼo moris iha dalan neʼebé loos no la runguranga. Nia hatudu katak nia iha toman diʼak liuhusi dalan neʼebé nia hadiʼa an, tau matan ba ninia uma, no halaʼo atividade loroloron. Mane hanesan neʼe sei la demora atu halo serbisu ruma. Nia hatene saida mak nia presiza halo no halo planu atu kumpre ida-neʼe. Nia kaer metin ba Maromak nia prinsípiu sira.

¹³ Katuas ida labele ulun-toos. Nia tenke serbisu ho unidade hamutuk ho irmaun seluk iha grupu katuas. Nia tenke iha hanoin neʼebé loos kona-ba ninia an, no la obriga ema seluk atu halo buat ruma. Tanba la ulun-toos, nia la hanoin katak ninia opiniaun mak loos liu, no mós la hanoin katak nia matenek liu fali ninia maluk katuas sira. Nia rekoñese katak ema seluk mós iha hahalok no abilidade kapás neʼebé nia rasik la iha. Katuas ida hatudu katak nia la ulun-toos hodi foti desizaun tuir Bíblia, no hakaʼas an atu halo tuir Jesus Kristu nia ezemplu. (Flp 2:2-8) Katuas ida la istori malu ka halo violénsia maibé hatudu respeitu ba ema seluk hodi haree sira boot liu fali nia. Nia la halo tuir deʼit ninia hakarak rasik hodi sempre obriga ema seluk atu halo tuir deʼit ninia hanoin ka dalan atu halo buat ruma. Nia la hirus lalais, maibé nia prontu haburas dame bainhira hamutuk ho ema seluk.

¹⁴ Nuneʼe mós, mane neʼebé kumpre kritéria atu serbí nuʼudar katuas tenke iha hanoin neʼebé loos. Neʼe katak nia hanoin didiʼak no la ansi atu halo desizaun ruma. Nia komprende didiʼak ona Jeová nia prinsípiu sira no oinsá atu aplika. Ema neʼebé iha hanoin neʼebé loos mós prontu atu simu konsellu no matadalan. Nia laʼós ema neʼebé laran-makerek.

¹⁵ Paulo fó-hanoin ba Tito katak katuas ida tenke hadomi buat diʼak. Nia tenke iha hahalok loos no laran-metin. Katuas ida presiza hatudu hahalok sira-neʼe liuhusi dalan neʼebé nia trata ema seluk, no mós hodi hamriik metin atu apoia buat neʼebé loos no diʼak. Nia sempre laran-metin ba Jeová no sempre kaer metin ba prinsípiu sira neʼebé loos. Ema bele tau fiar ba nia katak nia sei la fó sai buat neʼebé segredu. Nia mós gosta simu ema ho laran-diʼak, hodi prontu atu fó tempu, forsa no sasán atu ajuda ema seluk.​—Após 20:33-35.

¹⁶ Atu bele kumpre didiʼak ninia knaar, katuas ida presiza iha kbiit atu hanorin. Paulo hatete ba Tito katak bainhira katuas ida hanorin, “nia tenke kaer metin ba Maromak nia liafuan neʼebé ema bele tau fiar, atu nuneʼe nia bele anima no hametin ema hodi hanorin buat neʼebé loos no bele korrije sira neʼebé koʼalia kontra”. (Tito 1:9) Nia iha abilidade atu esplika iha dalan neʼebé lójiku, hatudu evidénsia, hatene atu hatán bainhira ema la konkorda, no hatene aplika eskritura sira iha dalan neʼebé halo ema seluk fiar no hametin sira-nia fiar. Katuas ida presiza uza ninia kbiit atu hanorin iha tempu neʼebé diʼak no mós iha tempu susar. (2 Tim 4:2) Katuas ida presiza iha pasiénsia atu bele korrije ho laran-maus ema neʼebé halo sala, ka ajuda ema neʼebé duvida atu bele tau fiar fali no motiva nia atu halo buat neʼebé diʼak tanba fiar. Bainhira irmaun ida iha kbiit atu hanorin iha ema barak nia oin ka atu hanorin ema ida deʼit, neʼe mak evidénsia katak nia kumpre ona kritéria importante neʼe.

¹⁷ Importante tebes ba katuas sira atu hatudu laran-manas iha serbisu haklaken. Sira presiza hatudu ho klaru katak sira mós hakaʼas an atu halo tuir Jesus neʼebé tau uluk serbisu haklaken iha ninia moris. Jesus hatudu interese ba ninia dixípulu sira hodi ajuda sira sai haklaken-naʼin neʼebé diʼak. (Mc 1:38; Lc 8:1) Maski katuas sira okupadu, maibé se sira hakaʼas an atu haklaken beibeik, ida-neʼe anima kongregasaun tomak atu halo tuir sira-nia ezemplu. Bainhira katuas sira haklaken hamutuk ho sira-nia família no mós ema seluk iha kongregasaun, rezultadu mak ida-neʼe sei “anima no hametin” ema.​—Rom 1:11, 12.

¹⁸ Dala ruma ema ida hanoin katak kritéria atu serbí nuʼudar katuas mak susar tebes atu kumpre. Tuir loloos, la iha katuas ida mak bele kumpre kritéria sira-neʼe iha dalan neʼebé perfeitu. Maski nuneʼe, katuas ida labele falta hahalok ruma husi kritéria sira-neʼe toʼo ida-neʼe haree hanesan fraku neʼebé sériu. Katuas sira hotu iha hahalok no matenek neʼebé la hanesan. Rezultadu mak, nuʼudar grupu ida, sira iha hahalok diʼak hotu neʼebé sira presiza atu bele tau matan no dirije Maromak nia kongregasaun ho didiʼak.

¹⁹ Kuandu grupu katuas rekomenda irmaun ida atu serbí nuʼudar katuas, sira presiza hanoin didiʼak apóstolu Paulo nia liafuan neʼebé hatete: “Haʼu koʼalia ba ema hotu iha imi-nia leet atu la hanoin nia an diʼak liu fali buat neʼebé loos, maibé atu hanoin ho neon neʼebé loos tuir fiar neʼebé Maromak fó ona ba imi ida-idak.” (Rom 12:3) Katuas ida-idak tenke haree ninia an kiʼik liu fali ema seluk. Katuas ida labele sai hanesan “ema neʼebé laran-loos liu” bainhira hanoin kona-ba irmaun ida kumpre kritéria ka lae. (Ecle 7:16) Grupu katuas sira presiza hanoin kona-ba kritéria husi Bíblia bainhira sira deside se irmaun ida hatudu ezemplu diʼak no moris tuir kritéria hotu maski laʼós ho perfeitu. Bainhira rekomenda irmaun ida, katuas sira komprende katak ema hotu mak sala-naʼin, sira la todan ba sorin no la laran-makerek. Sira hafolin Jeová nia prinsípiu sira neʼebé loos no hanoin kona-ba kongregasaun nia diʼak. Bainhira hanoin kona-ba rekomendasaun, sira sei halo orasaun hodi husu Maromak atu fó matadalan liuhusi espíritu santu no haree didiʼak se irmaun neʼe kumpre kritéria husi Eskritura ka lae. Neʼe mak responsabilidade neʼebé sériu, tan neʼe katuas sira tenke halo tuir Paulo nia konsellu: “Keta tau liman ba mane ruma ho ansi.”​—1 Tim 5:21, 22.

HAHALOK HUSI MAROMAK NIA ESPÍRITU

²⁰ Mane sira neʼebé kumpre kritéria husi Bíblia atu serbí iha kongregasaun, hatudu sai ho klaru katak espíritu santu mak dirije sira, no hatudu hahalok husi Maromak nia espíritu iha sira-nia moris loroloron nian. Paulo fó sai hahalok sia neʼebé mai husi espíritu santu, neʼe mak “domin, ksolok, dame, pasiénsia, laran-diʼak, hahalok diʼak, fiar, laran-maus no kontrola an”. (Gal 5:22, 23) Bainhira katuas sira hatudu hahalok sira-neʼe, neʼe fó kmaan ba irmaun-irmán sira no ajuda kongregasaun atu halaʼo serbisu sagradu ho unidade. Sira-nia hahalok no mós rezultadu husi sira-nia serbisu hatudu sai katak sira simu sira-nia knaar liuhusi espíritu santu.​—Após 20:28.

SIRA HABURAS UNIDADE

²¹ Importante tebes atu katuas sira serbisu hamutuk hodi haburas unidade iha kongregasaun. Karik katuas ida-idak iha jeitu ka hahalok neʼebé la hanesan. Maski dala ruma sira la konkorda malu bainhira koʼalia hamutuk kona-ba asuntu ruma, maibé sira bele nafatin iha unidade tanba sira rona ba malu ho respeitu. Se desizaun ruma la kontra Bíblia nia matadalan, katuas ida-idak tenke prontu atu simu katuas seluk nia hanoin no apoia grupu katuas nia desizaun. Bainhira katuas ida haraik an no prontu atu simu desizaun, neʼe hatudu katak nia halo tuir “matenek husi lalehan” no matenek neʼe “buka dame” no “la ulun-toos”. (Tgo 3:17, 18) Katuas ida labele hanoin katak nia mak importante liu fali katuas seluk, no labele koko atu domina katuas seluk. Kuandu katuas sira serbisu hamutuk nuʼudar grupu, tuir loloos sira serbisu hamutuk ho Jeová atu ajuda kongregasaun.​—1 Kor, kap. 12; Kol 2:19.

HAKAʼAS AN ATU SIMU KNAAR

²² Diʼak tebes se mane Kristaun neʼebé maduru hakarak sai katuas kongregasaun. (1 Tim 3:1) Maibé atu serbí nuʼudar katuas, nia tenke prontu atu halo serbisu no halo sakrifísiu. Neʼe katak nia tenke fó ninia tempu atu ajuda irmaun-irmán sira, no tau matan ba sira-nia presiza espirituál. Se irmaun ida hakaʼas an atu serbí nuʼudar katuas, neʼe katak nia hakaʼas an atu kumpre kritéria neʼebé hakerek iha Bíblia.

SITUASAUN BELE TROKA

²³ Irmaun ida neʼebé serbí kleur ona nuʼudar katuas, dala ruma bele sai moras ka hasoru situasaun seluk neʼebé hanetik nia atu halaʼo ninia knaar nuʼudar katuas. Karik tanba idade boot, nia labele tan kumpre ninia knaar balu nuʼudar katuas. Maski nuneʼe, se irmaun neʼe kontinua serbí nuʼudar katuas kongregasaun, irmaun-irmán sira presiza respeitu nafatin nia. Nia la presiza rezigna an tan deʼit ninia limitasaun. Nia merese nafatin atu simu respeitu neʼebé kleʼan, hanesan katuas kongregasaun seluk neʼebé hakaʼas an atu serbí no uza sira-nia kbiit atu tau matan ba bibi-lubun.

²⁴ Maibé se irmaun ida sente katak diʼak liu ba nia atu rezigna an tanba ninia situasaun troka no hanetik nia, nia bele deside atu halo nuneʼe. (1 Ped 5:2) Maski nuneʼe, ita presiza respeitu nafatin nia. Nia nafatin bele halo buat diʼak iha kongregasaun, maski nia la serbí tan nuʼudar katuas.

KATUAS SIRA-NIA RESPONSABILIDADE IHA KONGREGASAUN

²⁵ Katuas sira kaer responsabilidade oioin iha kongregasaun. Porezemplu, katuas balu serbí nuʼudar koordenadór ba grupu katuas, sekretáriu, koordenadór ba serbisu haklaken, katuas neʼebé dirije Estudu Livru Haklaken, no koordenadór ba Reuniaun Moris Kristaun no Haklaken. Sira barak mós serbí nuʼudar katuas ba grupu haklaken iha kongregasaun. Katuas sira bele halaʼo knaar sira-neʼe ba tempu kleur. Maibé se katuas ida muda, sai moras toʼo labele tan halaʼo ninia responsabilidade, ka la kumpre ona kritéria husi Bíblia, entaun grupu katuas bele hili katuas seluk atu troka nia. Iha kongregasaun sira neʼebé ladún iha katuas barak, dala ruma katuas ida presiza halaʼo knaar rua ka liu, toʼo tempu neʼebé iha irmaun seluk kumpre ona kritéria atu serbí nuʼudar katuas.

²⁶ Koordenadór ba grupu katuas mak dirije enkontru katuas nian. Nia ho haraik an serbisu hamutuk ho katuas sira seluk atu tau matan ba Maromak nia bibi-lubun. (Rom 12:10; 1 Ped 5:2, 3) Nia tenke hatene oinsá atu organiza buat hotu ho didiʼak, no bele dirije ema ho badinas.​—Rom 12:8.

²⁷ Sekretáriu mak tau matan ba kongregasaun nia relatóriu, karta no formuláriu sira. Nia mós fó-hatene ba katuas sira seluk kona-ba karta ka informasaun importante. Se presiza, katuas seluk ka atan ba kongregasaun neʼebé iha abilidade bele ajuda sekretáriu.

²⁸ Koordenadór ba serbisu haklaken mak organiza serbisu haklaken no fó matadalan kona-ba oinsá atu halaʼo serbisu neʼe. Nia halo oráriu atu vizita beibeik grupu haklaken hotu. Kada fulan, nia vizita grupu ida. No baibain nia halo ida-neʼe iha findesemana ida. Bainhira kongregasaun iha haklaken-naʼin uitoan deʼit, no grupu haklaken ladún barak, nia bele vizita grupu ida-idak dala rua iha tinan ida nia laran. Durante ninia vizita, nia mak sei dirije reuniaun atu organiza serbisu haklaken, haklaken hamutuk ho grupu neʼe, no ajuda haklaken-naʼin sira atu halo vizita fali ka estuda Bíblia ho ema.

KATUAS BA GRUPU HAKLAKEN

²⁹ Katuas ba grupu haklaken nia knaar mak importante iha kongregasaun. Ninia responsabilidade inklui: (1) tau matan didiʼak ba ema ida-idak iha ninia grupu iha dalan espirituál, (2) ajuda ema ida-idak iha ninia grupu atu hola parte beibeik iha serbisu haklaken ho laran-manas no haksolok, no mós (3) ajuda no treinu atan ba kongregasaun iha ninia grupu atu hakaʼas an kumpre kritéria atu bele hetan responsabilidade liután iha kongregasaun. Grupu katuas mak sei hili katuas ida-neʼebé mak bele kumpre responsabilidade tolu neʼe ho didiʼak.

³⁰ Katuas ba grupu haklaken nia knaar mak sériu, tan neʼe se bele katuas sira mak tenke halaʼo knaar neʼe. Maibé, atan ba kongregasaun neʼebé iha abilidade mós bele halaʼo knaar neʼe toʼo katuas ida bele troka nia. Ita bolu atan ba kongregasaun neʼebé halaʼo knaar neʼe nuʼudar atan ba grupu haklaken, tanba nia seidauk serbí nuʼudar katuas iha kongregasaun. Maibé nia presiza halo tuir matadalan husi katuas sira kuandu halaʼo ninia knaar.

³¹ Katuas ba grupu haklaken nia responsabilidade importante ida mak atu sai ezemplu diʼak kona-ba haklaken. Ninia ezemplu atu haklaken beibeik ho badinas no laran-manas sei anima ema seluk iha grupu. Bainhira haklaken-naʼin sira haklaken hamutuk, sira bele ajuda malu no anima malu. Tan neʼe, diʼak atu halo reuniaun hodi organiza serbisu haklaken iha tempu neʼebé diʼak ba ema maioria iha grupu. (Lc 10:1-16) Katuas neʼebé tau matan ba grupu tenke haree katak nia sempre iha mapa neʼebé toʼo ba irmaun-irmán sira atu haklaken bá. Baibain, nia mak dirije reuniaun atu organiza serbisu haklaken no organiza haklaken-naʼin sira. Bainhira nia la iha, nia tenke arranja katuas seluk, ka atan ba kongregasaun ida atu dirije reuniaun neʼe. Maibé se la iha katuas ka atan, nia bele husu haklaken-naʼin ida neʼebé iha ezemplu diʼak atu dirije reuniaun neʼe. Atu nuneʼe, haklaken-naʼin sira bele hetan matadalan neʼebé sira presiza.

³² Bainhira koordenadór ba serbisu haklaken atu halaʼo ninia vizita, katuas ba grupu haklaken tenke halo planu nanis kona-ba neʼe. Nia presiza fó-hatene ba ninia grupu kona-ba vizita neʼe, atu nuneʼe haklaken-naʼin sira bele hein namanas hodi hetan benefísiu husi ida-neʼe. Bainhira ema hotu iha grupu hatene kona-ba vizita neʼe, sira bele apoia ho laran tomak.

³³ Grupu haklaken ida-idak iha kongregasaun presiza iha haklaken-naʼin uitoan deʼit. Neʼe ajuda katuas ba grupu haklaken atu koñese didiʼak ema hotu iha ninia grupu. Nia mós hanoin ema ida-idak hanesan bibi-atan neʼebé hadomi bibi sira. Nia hakaʼas an ajuda no anima ema atu haklaken no asiste reuniaun sira. Nia mós hakaʼas an atu ajuda ema ida-idak hametin sira-nia relasaun ho Maromak. Sira neʼebé moras ka sente depresaun sei hetan benefísiu husi katuas ba grupu haklaken nia vizita. Hodi fó konsellu ka sujestaun ruma, neʼe bele book ema balu atu hakaʼas an hetan priviléjiu iha kongregasaun hodi nuneʼe sira bele ajuda maluk sira seluk. Katuas ba grupu haklaken hakaʼas an atu ajuda ninia grupu rasik. Maibé nuʼudar katuas no bibi-atan, nia mós hanoin no hadomi ema hotu iha kongregasaun no prontu atu ajuda sira hotu neʼebé presiza.​—Após 20:17, 28.

³⁴ Katuas ba grupu haklaken mós iha responsabilidade atu halibur relatóriu haklaken husi sira neʼebé iha ninia grupu. Depois, nia presiza fó relatóriu sira-neʼe ba sekretáriu. Haklaken-naʼin ida-idak bele ajuda katuas ba grupu haklaken se sira la demora atu hatama sira-nia relatóriu. Sira bele fó kedas ba katuas neʼebé tau matan ba sira-nia grupu ka bele tau iha kaixa ba relatóriu sira iha Reuniaun-Fatin.

KOMISAUN ADMINISTRASAUN BA KONGREGASAUN

³⁵ Koordenadór ba grupu katuas, sekretáriu, no koordenadór ba serbisu haklaken mak serbí nuʼudar Komisaun Administrasaun ba Kongregasaun. Sira tau matan ba knaar balu. Porezemplu, komisaun neʼe aprova ema atu uza Reuniaun-Fatin ba kazamentu ka funerál, no deside kona-ba haklaken-naʼin sira sei tuir grupu haklaken ida-neʼebé. Komisaun neʼe mós aprova aplikasaun ba pioneiru regulár, pioneiru estra no knaar sira seluk. Komisaun neʼe halaʼo serbisu hodi tuir grupu katuas nia desizaun hotu.

³⁶ Baibain sukursál mak fó sai matadalan kona-ba knaar espesífiku neʼebé irmaun sira-neʼe presiza halo. Sukursál mós fó matadalan ba katuas neʼebé dirije Estudu Livru Haklaken, koordenadór ba Reuniaun Moris Kristaun no Haklaken, no mós katuas kongregasaun seluk.

³⁷ Grupu katuas iha kongregasaun ida-idak halo enkontru beibeik atu koʼalia kona-ba buat neʼebé mak bele ajuda kongregasaun atu laʼo ba oin iha dalan espirituál. Bainhira katuas área vizita, katuas sira sei halaʼo enkontru hamutuk ho nia. Liután neʼe, katuas sira arranja tan enkontru maizumenus fulan tolu liutiha husi tempu neʼebé katuas área vizita. Katuas sira mós bele arranja enkontru iha tempu naran deʼit neʼebé presiza.

HAKRUʼUK BA SIRA

³⁸ Katuas sira mak ema neʼebé la perfeitu. Maski nuneʼe, Bíblia haruka ita hotu iha kongregasaun atu hakruʼuk ba sira tanba neʼe mak Jeová nia arranju. Sira sei hatán ba Maromak kona-ba sira-nia hahalok hotu. Sira reprezenta Maromak no ninia ukun. Ebreu 13:17 hatete: “Halo tuir sira neʼebé dirije imi iha imi-nia leet no hakruʼuk ba sira, tanba sira kontinua tau matan ba imi nuʼudar ema neʼebé sei hatán ba Maromak, atu nuneʼe sira bele tau matan ba imi ho haksolok laʼós ho halerik, tanba ida-neʼe sei lori buat aat ba imi.” Jeová uza ninia espíritu santu atu hili irmaun ida hodi serbí nuʼudar katuas, nuneʼe mós Jeová sei uza espíritu santu neʼe atu hasai irmaun ida husi ninia knaar nuʼudar katuas se nia la hatudu hahalok neʼebé mai husi Maromak nia espíritu, no nia la kumpre tan kritéria husi Bíblia iha ninia moris loroloron.

³⁹ Ita hafolin tebes katuas kongregasaun sira neʼebé hakaʼas an no hatudu ezemplu diʼak. Kuandu Paulo hakerek ba kongregasaun iha Tesalónika, nia hatete: “Maun-alin sira, agora ami husu imi atu hatudu respeitu ba sira neʼebé serbisu makaʼas iha imi-nia leet no sira neʼebé dirije imi iha Naʼi no fó konsellu ba imi. Hatudu bá katak imi hafolin tebes sira no hadomi sira tanba sira-nia serbisu.” (1 Tes 5:12, 13) Katuas sira mós halo serbisu barak atu tau matan ba kongregasaun, no neʼe halo fasil liu mai ita atu serbí Maromak ho kontente liután. Iha Paulo nia karta primeiru ba Timóteo, nia mós esplika kona-ba hahalok neʼebé ema iha kongregasaun tenke hatudu ba katuas sira. Nia hatete: “Hatudu respeitu neʼebé kleʼan liu ba katuas sira neʼebé tau matan didiʼak ba kongregasaun, liuliu sira neʼebé serbisu makaʼas atu koʼalia no hanorin.”​—1 Tim 5:17.

RESPONSABILIDADE SELUK IHA ORGANIZASAUN

⁴⁰ Dala ruma, katuas balu simu knaar atu serbí nuʼudar membru ba Grupu neʼebé Vizita Pasiente. Katuas seluk serbí nuʼudar membru ba Komisaun neʼebé Komunika ho Ospitál. Sira vizita ospitál no doutór sira atu fó informasaun kona-ba tratamentu neʼebé la uza raan no anima doutór sira atu kontinua ajuda Testemuña ba Jeová. Katuas seluk bele apoia Maromak nia Ukun hodi ajuda harii Reuniaun-Fatin ka Salaun ba Asembleia, ka serbí nuʼudar membru ba Komisaun ba Reuniaun Boot. Ita agradese tebes ba irmaun sira-neʼe tanba sira prontu atu halo serbisu makaʼas no uza sira-nia tempu ba serbisu neʼe. Loos duni, ita hotu sei “kontinua hafolin ema hanesan neʼe”.​—Flp 2:29.

KATUAS ÁREA

⁴¹ Grupu Administradór mak fó knaar ba katuas sira neʼebé kumpre kritéria atu serbí nuʼudar katuas área. Sukursál sei arranja katuas sira-neʼe atu vizita kongregasaun sira tuir sira-nia área ida-idak. Baibain sira vizita kongregasaun dala rua iha tinan ida nia laran. Dala ruma, sira mós vizita pioneiru sira neʼebé serbí iha fatin neʼebé dook husi kongregasaun. Sira halo planu kona-ba kongregasaun ida-neʼebé mak sira sei vizita uluk. Sira fó-hatene planu neʼe ba kongregasaun ida-idak hodi ema hotu bele hetan benefísiu husi sira-nia vizita.

⁴² Koordenadór ba grupu katuas mak ajuda organiza buat oioin kona-ba katuas área nia vizita hodi nuneʼe bele hametin irmaun-irmán hotu nia relasaun ho Maromak. (Rom 1:11, 12) Bainhira koordenadór ba grupu katuas simu ona informasaun kona-ba katuas área no katuas área nia feen nia vizita (se nia kaben ona), no kona-ba sira-nia presiza, koordenadór sei arranja hela-fatin no buat seluk neʼebé sira presiza liuhusi irmaun sira iha kongregasaun. Bainhira organiza ona buat hotu, koordenadór sei fó-hatene kongregasaun, no mós katuas área, kona-ba arranju sira-neʼe.

⁴³ Katuas área sei kontaktu koordenadór ba grupu katuas kona-ba oráriu ba reuniaun sira, inklui mós oráriu ba reuniaun atu organiza serbisu haklaken. Oráriu sira-neʼe sei organiza tuir katuas área nia sujestaun no matadalan husi sukursál. Ema hotu presiza hatene nanis kona-ba oras no fatin neʼebé sei halaʼo reuniaun sira hamutuk ho kongregasaun, pioneiru sira, katuas no atan ba kongregasaun, no mós reuniaun atu organiza serbisu haklaken.

⁴⁴ Iha loron-tersa lokraik, katuas área sei haree Kongregasaun nia Kartaun ba Haklaken-naʼin sira, relatóriu kona-ba ema neʼebé asiste reuniaun, lista ba mapa haklaken, no relatóriu kona-ba kongregasaun nia osan. Buat sira-neʼe hotu sei ajuda katuas área atu hatene kongregasaun nia presiza, no mós oinsá mak nia bele ajuda irmaun sira neʼebé tau matan ba relatóriu sira-neʼe. Koordenadór ba grupu katuas presiza halo arranju atu fó sedu relatóriu sira-neʼe ba katuas área.

⁴⁵ Durante katuas área nia vizita, nia sei koko atu koʼalia ho irmaun-irmán ida-idak bainhira tuir reuniaun, haklaken, han hamutuk, no iha tempu seluk. Nia sei halaʼo reuniaun ho katuas no atan ba kongregasaun hodi fó konsellu husi Bíblia, fó sujestaun balu, no hametin sira atu kaer didiʼak sira-nia responsabilidade hodi tau matan ba Maromak nia bibi-lubun. (Prov 27:23; Após 20:26-32; 1 Tim 4:11-16) Nia mós sei halaʼo reuniaun ho pioneiru sira atu anima sira no mós ajuda sira ho problema ruma neʼebé sira hasoru kona-ba haklaken.

⁴⁶ Se kongregasaun iha asuntu ruma neʼebé presiza katuas área nia ajuda, durante semana neʼe nia bele koko atu ajuda katuas sira ka ema neʼebé envolve iha asuntu neʼe, depende ba ninia tempu. Se labele rezolve asuntu neʼe iha semana ida nia laran, nia bele ajuda sira atu buka matadalan husi Bíblia neʼebé aplika ba situasaun neʼe. Se presiza sukursál nia ajuda, katuas área hamutuk ho katuas sira presiza hakerek informasaun hotu iha karta no haruka ba sukursál.

⁴⁷ Bainhira katuas área vizita kongregasaun, nia sei tuir reuniaun hotu iha kongregasaun neʼe. Dala ruma iha mudansa ba reuniaun sira hodi tuir matadalan husi sukursál. Katuas área sei hatoʼo diskursu sira atu anima, motiva, hametin no hanorin kongregasaun. Nia sei hakaʼas an ajuda kongregasaun atu haburas domin ba Jeová, Jesus Kristu, no organizasaun.

⁴⁸ Bainhira katuas área vizita, ninia objetivu ida mak atu anima ita haklaken ho badinas no mós fó sujestaun diʼak ba ita. Karik irmaun-irmán barak iha kongregasaun bele halo mudansa ba sira-nia oráriu atu bele aumenta sira-nia haklaken durante semana neʼe. Porezemplu, karik sira bele foti pioneiru estra durante fulan neʼebé nia vizita. Sira neʼebé hakarak haklaken hamutuk ho katuas área ka ninia feen bele halo arranju nanis. Ita bele hetan benefísiu barak hodi konvida katuas área ka ninia feen atu halaʼo vizita fali ka estudu Bíblia ho ita. Sira hafolin tebes ita-nia hakaʼas an atu apoia arranju neʼe durante semana neʼebé sira vizita.​—Prov 27:17.

⁴⁹ Tinan-tinan, sukursál arranja asembleia rua iha área ida-idak. Katuas área mak kaer responsabilidade atu organiza no halaʼo asembleia sira-neʼe. Katuas área sei hili irmaun ida atu sai koordenadór ba asembleia, no irmaun seluk atu sai asistente koordenadór ba asembleia. Sira serbisu hamutuk ho katuas área atu organiza no tau matan ba asembleia. Hodi halo nuneʼe, katuas área bele fokus liu atu tau matan didiʼak ba asembleia nia programa. Katuas área mós sei hili irmaun seluk neʼebé iha abilidade atu tau matan ba departamentu oioin. Bainhira asembleia ida-idak remata, nia mós arranja irmaun sira atu verifika osan. Tinan ida dala ida, bainhira halaʼo asembleia, reprezentante husi sukursál sei sai oradór vizitante. Dala ruma, tanba irmaun-irmán sira presiza laʼo dook atu bele tuir asembleia ka tanba fatin atu halaʼo asembleia mak kiʼik deʼit, entaun área ida bele fahe ba parte balu no halaʼo asembleia iha fatin ketaketak.

⁵⁰ Fulan-fulan, katuas área presiza hatama diretamente ninia relatóriu haklaken ba sukursál. Se kongregasaun neʼebé nia vizita labele taka fali osan neʼebé nia uza ba transporte, ai-han, hela-fatin, ka ba ninia presiza seluk atu bele halaʼo ninia knaar, entaun nia bele husu sukursál atu fó fali osan neʼebé nia gasta. Katuas área sira fiar katak se sira tau uluk Jeová nia Ukun, Jeová sei fó buat neʼebé sira presiza loroloron, hanesan Jesus promete. (Lc 12:31) Diʼak se irmaun-irmán sira hanoin nafatin kona-ba sira-nia priviléjiu atu hatudu laran-diʼak ba katuas área sira neʼebé kontinua ajuda ita ho laran-metin.​—3 João 5-8.

KOMISAUN BA SUKURSÁL

⁵¹ Iha mundu tomak, sukursál ida-idak husi Testemuña ba Jeová iha Komisaun ba Sukursál. Irmaun naʼin-tolu ka liu neʼebé maduru no kumpre kritéria espirituál mak sai membru ba komisaun neʼe. Sira tau matan no dirije serbisu haklaken iha sira-nia sukursál nia territóriu. Membru ida husi komisaun neʼe mak serbí nuʼudar koordenadór ba Komisaun Sukursál.

⁵² Komisaun ba Sukursál tau matan ba buat neʼebé iha ligasaun ho kongregasaun hotu iha sukursál nia territóriu. Komisaun ba Sukursál tau matan no dirije serbisu atu haklaken liafuan diʼak iha sukursál nia territóriu tomak. Komisaun ba Sukursál organiza kongregasaun sira no área sira hodi fó matadalan tuir buat neʼebé sira presiza. Komisaun ba Sukursál mós tau matan ba misionáriu sira, pioneiru espesiál, pioneiru regulár, no pioneiru estra. Bainhira halaʼo asembleia ka reuniaun boot, Komisaun ba Sukursál sei halo arranju oioin no fó knaar ba irmaun sira atu “halo buat hotu iha dalan neʼebé loloos no tuir arranju”.​—1 Kor 14:40.

⁵³ Iha rai balu, irmaun balu simu knaar atu serbí nuʼudar membru ba Komisaun Rejionál hodi bele ajuda tau matan didiʼak ba serbisu iha rai neʼe. Komisaun neʼe simu no halo tuir matadalan husi Komisaun ba Sukursál. Komisaun Rejionál tau matan ba Betel no família Betel, karta no relatóriu sira, no atividade haklaken iha rai neʼe. Komisaun Rejionál serbisu hamutuk Komisaun ba Sukursál atu habelar liafuan diʼak kona-ba Maromak nia Ukun.

⁵⁴ Grupu Administradór mak hili irmaun hotu neʼebé serbí iha Komisaun ba Sukursál no Komisaun Rejionál.

REPREZENTANTE HUSI SEDE-JERÁL

⁵⁵ Dala ruma, Grupu Administradór arranja irmaun sira neʼebé kumpre kritéria atu vizita sukursál sira iha mundu tomak. Irmaun neʼebé halo knaar neʼe mak reprezentante husi sede-jerál. Ulukliu ninia serbisu mak atu fó laran-manas ba família Betel no ajuda Komisaun ba Sukursál atu rezolve problema ka pergunta sira kona-ba serbisu haklaken no hanorin. Irmaun neʼe mós sei koʼalia hamutuk ho katuas área balu no dala ruma mós koʼalia hamutuk ho misionáriu sira. Nia sei koʼalia ho sira kona-ba sira-nia problema no presiza. Nia mós anima sira atu kontinua haklaken no hanorin.

⁵⁶ Reprezentante husi sede-jerál hakarak tebes atu hatene kona-ba rezultadu husi serbisu haklaken no atividade seluk neʼebé kongregasaun sira halo iha sukursál nia territóriu. Se tempu iha, nia mós bele vizita eskritóriu tradusaun sira iha sukursál nia territóriu. Kuandu nia vizita sukursál ida, nia mós sei hakaʼas an atu haklaken.

IRMAUN SIRA TAU MATAN HO DOMIN

⁵⁷ Ita hetan benefísiu barak husi irmaun sira neʼebé halo serbisu makaʼas hodi tau matan didiʼak mai ita ho domin. Bainhira ita kontinua hakruʼuk ba sira neʼebé simu knaar atu tau matan ba Maromak nia bibi-lubun, ita serbisu hamutuk ho Kristu Jesus, Ulun ba kongregasaun. (1 Kor 16:15-18; Éf 1:22, 23) Rezultadu mak Maromak nia espíritu santu sei kontinua dirije kongregasaun hotu iha mundu tomak, no ita hatudu katak ita sadere ba Bíblia atu dirije ita.​—Sal 119:105.