Atan ba kongregasaun halo serbisu importante

APÓSTOLU PAULO hakerek karta ba kongregasaun Filipe hodi dehan: “Paulo no Timóteo, Kristu Jesus nia atan, hakerek ba ema santu hotu iha Filipe neʼebé ida deʼit ho Kristu Jesus, no mós ba katuas no atan ba kongregasaun sira.” (Flp 1:1) Iha karta neʼe, Paulo temi kona-ba atan ba kongregasaun sira. Iha tempu neʼebá, mane sira-neʼe halaʼo knaar importante atu ajuda katuas sira iha kongregasaun. Ohin loron, atan sira mós halo hanesan. Sira halo serbisu neʼebé ajuda katuas sira no ajuda kongregasaun atu laʼo ho diʼak.

² Ita koñese atan ba kongregasaun sira iha Ita-nia kongregasaun ka lae? Ita hatene serbisu neʼebé sira halo atu ajuda Ita no mós kongregasaun tomak ka lae? Jeová hafolin tebes sira-nia serbisu. Paulo hakerek: “Mane sira neʼebé serbí iha dalan neʼebé diʼak, sira hetan naran diʼak no koʼalia nakloke kona-ba fiar iha Kristu Jesus.”​—1 Tim 3:13.

KRITÉRIA ATU SERBÍ NUʼUDAR ATAN BA KONGREGASAUN

³ Atan ba kongregasaun tenke moris tuir morál no hahalok Kristaun, hatudu katak ema bele tau fiar ba sira, no sira mós tenke halaʼo didiʼak sira-nia knaar. Apóstolu Paulo esplika ho klaru kona-ba kritéria neʼe kuandu nia hakerek ba Timóteo: “Atan ba kongregasaun mós tenke sériu, la laran-makerek, la hemu tua barak, la buka atu manán buat ruma ho laran-makerek, kaer metin ba segredu santu kona-ba fiar ho konxiénsia neʼebé moos. No mós, koko uluk nia atu haree se nia diʼak ba knaar neʼe ka lae; tuirmai nia bele serbí nuʼudar atan, tanba ema ida la iha razaun atu duun nia. Atan ba kongregasaun tenke iha feen ida deʼit, tau matan ba ninia oan sira no ninia umakain iha dalan neʼebé diʼak.” (1 Tim 3:8-10, 12) Bainhira katuas sira rekomenda irmaun ida atu sai nuʼudar atan, sira tenke haree se irmaun neʼe kumpre duni kritéria husi Bíblia. Neʼe proteje kongregasaun atu ema labele koʼalia aat kongregasaun bainhira mane sira-neʼe simu knaar.

⁴ Maski idade ka joven, atan ba kongregasaun badinas atu hola parte iha serbisu haklaken fulan-fulan. Sira halo tuir Jesus hodi hatudu laran-manas atu haklaken. Neʼe haleno mós Jeová nia hakarak atu salva ema hotu.​—Isa 9:7.

⁵ Atan ba kongregasaun presiza hatudu ezemplu diʼak kona-ba dalan neʼebé sira hatais, hadiʼa an, koʼalia, hanoin no mós hahalok. Sira iha hanoin neʼebé loos, tan neʼe ema seluk respeitu sira. Sira mós iha hanoin neʼebé sériu kona-ba sira-nia relasaun ho Jeová no sira-nia priviléjiu ka knaar espesiál atu serbí iha kongregasaun.​—Tito 2:2, 6-8.

⁶ Mane sira-neʼe presiza hetan “koko uluk” atu haree se sira kumpre kritéria ka lae. Antes sira simu knaar neʼe, sira hatudu ona katak sira badinas no prontu atu serbí kongregasaun. Sira hatudu katak sira tau uluk Maromak nia Ukun iha sira-nia moris, sira hakaʼas an atu kaer didiʼak knaar no priviléjiu naran deʼit neʼebé sira simu. Sira hatudu ezemplu diʼak atu ema seluk iha kongregasaun bele banati-tuir.​—1 Tim 3:10.

SERBISU OIOIN NEʼEBÉ SIRA HALO

⁷ Atan ba kongregasaun halo serbisu oioin atu ajuda irmaun-irmán sira iha kongregasaun, hodi nuneʼe katuas sira bele uza tempu barak liután atu hanorin no tau matan didiʼak ba Maromak nia bibi sira. Bainhira grupu katuas fó knaar ruma ba atan ba kongregasaun, sira hanoin uluk kona-ba atan ida-idak nia abilidade, kbiit no kongregasaun nia presiza.

⁸ Hanoin toʼok kona-ba serbisu balu neʼebé atan ba kongregasaun halo. Karik atan ida bele simu knaar atu tau matan ba publikasaun sira hodi ita hotu bele simu publikasaun neʼebé ita presiza no mós atu uza iha serbisu haklaken. Atan seluk bele simu knaar atu tau matan ba kongregasaun nia osan ka mapa haklaken. Atan seluk tan simu knaar atu tau matan ba mikrofone, ekipamentu áudio nian, serbí nuʼudar asistente, no atu ajuda katuas sira iha dalan seluk tan. Atu hamoos no hadiʼa Reuniaun-Fatin envolve serbisu oioin, tan neʼe dala barak atan ba kongregasaun mak simu knaar atu tau matan ba serbisu sira-neʼe.

⁹ Iha kongregasaun balu, atan ba kongregasaun ida simu knaar ida deʼit. Maibé iha kongregasaun seluk, atan ida bele simu knaar balu. Dala ruma, atan rua ka liu mak halaʼo knaar ida. Maibé bainhira atan ba kongregasaun la toʼo atu tau matan ba serbisu hotu, grupu katuas bele hili irmaun seluk neʼebé hatudu ezemplu diʼak no hetan ona batizmu atu tau matan ba serbisu sira-neʼe. Hodi halo nuneʼe, irmaun sira-neʼe sei simu treinu neʼebé sei ajuda sira iha futuru kuandu sira sai atan ba kongregasaun. Se la iha irmaun sira, irmán ida neʼebé hatudu ezemplu diʼak bele halo knaar balu, maibé klaru katak irmán neʼe labele serbí nuʼudar atan ba kongregasaun. Irmaun ka irmán neʼebé hatudu ezemplu diʼak mak sira neʼebé ita bele banati-tuir sira-nia hahalok no dalan neʼebé sira adora Maromak. Sira hatudu ezemplu diʼak kona-ba tuir reuniaun, haklaken, moris família nian, atividade halimar, hatais, hadiʼa an no hahalok seluk.

¹⁰ Iha kongregasaun neʼebé la iha katuas barak, atan ba kongregasaun neʼebé iha abilidade bele ajuda halo entrevista ba ema neʼebé hakarak atu hetan batizmu hodi husu pergunta sira kona-ba Bíblia nia hanorin sira. Pergunta sira-neʼe mak iha Apéndise “Parte 1​—Hanorin Kristaun”. Maibé katuas ida mak tenke halaʼo “Parte 2​—Moris Kristaun” tanba neʼe koʼalia kona-ba ema nia hahalok no moris privadu.

¹¹ Dala ruma grupu katuas bele halo mudansa ba atan sira-nia knaar se presiza. Maibé, diʼak liu se atan ida halaʼo knaar neʼebé hanesan ba tempu balu hodi nuneʼe nia bele hetan esperiénsia no hatene oinsá atu halaʼo knaar neʼe ho didiʼak.

¹² Depende ba situasaun, karik katuas sira bele fó knaar seluk tan ba atan ba kongregasaun neʼebé laʼo ba oin no “ema hotu bele haree ho momoos” kona-ba neʼe. (1 Tim 4:15) Se la iha katuas barak, atan ba kongregasaun bele hetan knaar nuʼudar asistente ba katuas grupu haklaken nian, ka dala ruma nia bele tau matan ba grupu ida hodi halo tuir matadalan husi katuas sira. Atan ba kongregasaun bele hatoʼo parte balu iha Reuniaun Moris Kristaun no Haklaken, inklui mós dirije Estudu Bíblia iha Kongregasaun se presiza, no mós bele hatoʼo diskursu públiku. Atan sira mós bele hetan priviléjiu seluk tan tuir kongregasaun nia presiza no se sira kumpre kritéria atu halaʼo knaar neʼe. (1 Ped 4:10) Atan ba kongregasaun tenke prontu atu ajuda katuas sira.

¹³ Maski sira-nia serbisu la hanesan ho katuas sira-nian, maibé sira-nia serbisu iha folin boot tanba neʼe mak serbisu sagradu ba Maromak no importante atu ajuda kongregasaun laʼo ho didiʼak. Bainhira atan ba kongregasaun halaʼo didiʼak sira-nia knaar, no iha ona abilidade nuʼudar bibi-atan no mestre, grupu katuas bele rekomenda sira atu serbí nuʼudar katuas kongregasaun.

¹⁴ Se Ita mak irmaun joven ka foin hetan batizmu, Ita hakaʼas an atu kumpre kritéria atu serbí nuʼudar atan ba kongregasaun ka lae? (1 Tim 3:1) Tinan-tinan Testemuña ba Jeová aumenta ba beibeik, tan neʼe presiza irmaun sira neʼebé kumpre kritéria husi Bíblia atu kaer responsabilidade iha kongregasaun. Hakaʼas an atu simu responsabilidade liuhusi haburas hakarak atu ajuda ema seluk. Dalan ida atu halo nuneʼe mak hodi hanoin kleʼan kona-ba Jesus nia ezemplu. (Mt 20:28; João 4:6, 7; 13:4, 5) Se Ita sente ona ksolok tanba fó ba ema seluk, neʼe sei aumenta liután Ita-nia hakarak atu ajuda kongregasaun. (Após 20:35) Entaun, sai prontu atu halo serbisu oioin hanesan ajuda ema seluk, ajuda hamoos no hadiʼa Reuniaun-Fatin, ka taka estudante seluk nia knaar iha Reuniaun Moris Kristaun no Haklaken kuandu sira la mai. Ema neʼebé hakaʼas an atu simu responsabilidade, presiza haburas hahalok neʼebé mai husi Maromak nia espíritu santu liuhusi iha toman atu estuda Bíblia mesak. (Sal 1:1, 2; Gal 5:22, 23) Liután neʼe, irmaun ida neʼebé hakaʼas an atu simu knaar ruma, presiza hatudu katak ema bele tau fiar ba nia no nia laran-metin kuandu halaʼo knaar ruma iha kongregasaun.​—1 Kor 4:2.

¹⁵ Atan ba kongregasaun simu knaar liuhusi espíritu santu atu ajuda kongregasaun. Ema hotu iha kongregasaun bele hatudu katak sira hafolin atan sira-nia serbisu hodi apoia sira kuandu sira halaʼo sira-nia knaar. Hodi halo nuneʼe, kongregasaun hatudu agradese ba Jeová nia arranju atu tau matan didiʼak ba ninia umakain.​—Gal 6:10.