“Halo buat hotu-hotu ba Maromak nia glória”

NUʼUDAR Maromak nia atan, ita hotu iha obrigasaun atu fó glória ba Maromak liuhusi ita-nia liafuan no hahalok. Apóstolu Paulo hakerek matadalan tuirmai: “Se imi han, hemu, ka halo buat seluk, halo buat hotu-hotu ba Maromak nia glória.” (1 Kor 10:31) Atu bele halo nuneʼe, ita tenke kaer metin ba Jeová nia matadalan kona-ba morál. Matadalan sira-neʼe hatudu sai Jeová nia hahalok neʼebé perfeitu. (Kol 3:10) Ita tenke banati-tuir Maromak nuʼudar ninia povu neʼebé santu.​—Éf 5:1, 2.

² Apóstolu Pedro fó-hanoin ba ema Kristaun kona-ba neʼe, hodi hakerek: “Nuʼudar oan neʼebé halo tuir Maromak, labele hatudu tan hahalok neʼebé tuir imi-nia hakarak aat neʼebé uluk imi iha bainhira imi seidauk hatene Maromak, maibé imi-nia hahalok hotu tenke santu hanesan Maromak Santu neʼebé bolu imi, tanba hakerek nanis ona: ‘Imi tenkesér santu, tanba haʼu santu.’” (1 Ped 1:14-16) Hanesan ema Izraél iha tempu antigu, ema hotu iha kongregasaun Kristaun presiza santu nafatin. Neʼe katak sira presiza moos nafatin hodi hakaʼas an atu la halo sala no la halo tuir mundu nia hanoin. Maromak haketak ona sira atu halo serbisu sagradu ba nia.​—Éx 20:5.

³ Atu bele santu nafatin, ita presiza halo tuir Jeová nia ukun-fuan no prinsípiu sira neʼebé fó sai iha Bíblia. (2 Tim 3:16) Liuhusi estuda Bíblia, ita aprende ona kona-ba Jeová no ninia dalan sira, no ita hakbesik liután ba nia. Ita fiar duni katak ita presiza buka uluk Maromak nia Ukun no tau uluk Maromak nia hakarak iha ita-nia moris. (Mt 6:33; Rom 12:2) Ita konsege halo nuneʼe tanba ita hatudu hahalok foun.​—Éf 4:22-24.

MOOS IHA DALAN ESPIRITUÁL NO MORÁL

⁴ Dala ruma la fasil atu moris tuir Jeová nia matadalan kona-ba morál. Ita-nia inimigu, Diabu Satanás, hakaʼas an book ita atu husik lia-loos. Dala ruma susar atu halo tuir Jeová nia matadalan tanba influénsia husi mundu aat neʼe no mós tanba ita hotu mak sala-naʼin. Atu bele moris tuir ita-nia dedikasaun, ita presiza luta makaʼas. Bíblia fó-hanoin ita atu la hakfodak bainhira hasoru susar ka bainhira ema kontra ita. Ita sei hetan duni terus tanba halo buat neʼebé loos. (2 Tim 3:12) Maibé, ita bele kontente nafatin maski hasoru terus, tanba neʼe hatudu katak ita halo tuir Maromak.​—1 Ped 3:14-16; 4:12, 14-16.

⁵ Maski Jesus mak perfeitu, maibé nia aprende atu halo tuir liuhusi ninia terus. Jesus nunka monu ba Satanás nia tentasaun sira, ka hakarak buat neʼebé mundu oferese. (Mt 4:1-11; João 6:15) Jesus nunka hanoin atu husik buat neʼebé loos. Maski mundu odi nia tanba nia hatudu laran-metin, maibé nia kaer metin ba Jeová nia matadalan kona-ba morál. Antes Jesus mate, nia fó avizu ba ninia dixípulu sira katak mundu mós sei odi sira. Husi tempu neʼebá toʼo ohin loron, Jesus nia dixípulu sira hasoru susar, maibé sira sai aten-brani tanba hatene katak Maromak nia Oan-Mane manán ona mundu.​—João 15:19; 16:33; 17:16.

⁶ Atu la sai parte ba mundu neʼe, ita tenke kaer metin Jeová nia matadalan kona-ba morál, hanesan Naʼi Jesus halo. Ita la envolve an iha mundu nia asuntu polítiku ka asuntu sosiál, no ita mós tenke hasees an husi mundu nia morál neʼebé aat. Ita hotu hakaʼas an atu halo tuir konsellu iha Tiago 1:21: “Soe tiha buat foʼer hotu no hahalok aat hotu, no ho laran-maus simu Maromak nia liafuan neʼebé nia kuda daudaun iha imi, liafuan neʼebé bele salva imi.” Liuhusi estuda Bíblia no tuir reuniaun sira, ita bele “simu Maromak nia liafuan neʼebé nia kuda” iha ita-nia neon no laran, no ita sei la buka buat neʼebé mundu neʼe oferese mai ita. Dixípulu Tiago hakerek: “Imi la hatene ka? Sai belun ho mundu halo imi sai Maromak nia inimigu. Tan neʼe, ema naran deʼit neʼebé hakarak sai belun ho mundu neʼe, nia halo ninia an sai Maromak nia inimigu.” (Tgo 4:4) Tan neʼe, Bíblia fó konsellu neʼebé klaru mai ita atu kaer metin ba Maromak nia matadalan kona-ba morál no haketak an nafatin husi mundu neʼe.

⁷ Maromak nia Liafuan fó avizu mai ita atu hasees an husi hahalok la morál no hahalok neʼebé lori moe. Bíblia dehan: “Iha imi-nia leet keta temi hahalok sala seksuál, hahalok oioin neʼebé la moos, ka hahalok kaan-teen, tanba buat sira-neʼe la loos ba ema santu sira.” (Éf 5:3) Entaun ita lakohi hanoin kona-ba buat neʼebé foʼer, buat neʼebé lori moe, ka buat neʼebé la morál, no mós ita sei nunka temi buat sira-neʼe kuandu koʼalia ho ema seluk. Hodi halo nuneʼe, ita hatudu katak ita hakarak kaer metin ba Jeová nia matadalan neʼebé loos no moos kona-ba morál.

MOOS IHA DALAN FÍZIKU

⁸ Ita tenke moos iha dalan espirituál no morál, maibé importante mós atu moos iha dalan fíziku. Iha Izraél antigu, Maromak neʼebé santu haruka ema Izraél atu tau matan sira-nia hela-fatin atu moos nafatin. Ohin loron, ita tenke moos nafatin atu nuneʼe Jeová “labele haree buat ruma neʼebé aat” husi ita.​—Deut 23:14.

⁹ Bíblia mós hatudu katak moos iha dalan fíziku iha ligasaun ho buat neʼebé santu. Porezemplu, Paulo hakerek: “Maluk doben sira . . . mai ita hamoos ita-nia an husi buat hotu neʼebé hafoʼer isin no neon, no sai santu loloos hodi hamtaʼuk Maromak.” (2 Kor 7:1) Tan neʼe, ema Kristaun hakaʼas an tau matan ba sira-nia isin-lolon atu moos nafatin hodi hariis beibeik no fase sira-nia roupa. Maski situasaun iha rai ida-idak la hanesan, maibé baibain ita hotu bele hetan bee no sabaun atu hariis no mós fó-hariis ita-nia oan.

¹⁰ Baibain ema iha ita-nia komunidade koñese didiʼak ita tanba ita haklaken beibeik. Tan neʼe, se ita-nia uma mak moos no la sabraut iha laran no iha liʼur, neʼe sei fó sasin diʼak ba ema iha ita-nia komunidade. Família tomak presiza apoia malu atu halo nuneʼe. Irmaun sira presiza tau matan didiʼak ba sira-nia uma no kintál atu buat hotu moos no kabeer, neʼe halo ema seluk iha hanoin neʼebé loos kona-ba Jeová. Bainhira ulun ba família halo ida-neʼe no mós ajuda ninia família atu adora Jeová, neʼe hatudu katak nia tau matan didiʼak ba ninia umakain. (1 Tim 3:4, 12) Irmán sira mós iha responsabilidade atu tau matan ba buat oioin atu moos nafatin, liuliu iha uma-laran. (Tito 2:4, 5) Oan sira neʼebé hetan ona treinu sei hakaʼas an atu moos nafatin no tau matan ba sira-nia kuartu atu moos no kabeer. Hodi halo nuneʼe, família tomak bele apoia malu hodi haburas toman neʼebé diʼak kona-ba moos nafatin. Ema neʼebé iha toman atu moos nafatin mak prontu atu hela iha mundu foun iha Maromak nia Ukun okos.

¹¹ Ohin loron, Jeová nia povu barak uza sira-nia motór no karreta atu bá reuniaun. Iha área balu, transporte sira hanesan neʼe ajuda tebes ita atu bá haklaken. Maibé motór no karreta tenke moos nafatin no iha kondisaun diʼak. Ita-nia uma, motór ka karreta neʼebé moos, hatudu katak ita mak parte ba Jeová nia povu neʼebé santu no moos. Matadalan neʼe mós aplika ba ita-nia pasta haklaken no Bíblia.

¹² Ita-nia roupa no dalan neʼebé ita hadiʼa an mós presiza tuir Maromak nia prinsípiu sira. Ita sei nunka vizita ema-boot ho roupa neʼebé sabraut ka baibain deʼit. Nuneʼe mós ita presiza hili didiʼak roupa neʼebé ita hatais kuandu ita reprezenta Jeová iha serbisu haklaken ka iha palku leten. Ita-nia roupa ka dalan neʼebé ita hadiʼa an bele afeta ema nia hanoin kona-ba ita-nia adorasaun ba Jeová. Entaun, la diʼak atu hatais iha dalan neʼebé la hatudu respeitu ka la hanoin ema seluk. (Miq 6:8; 1 Kor 10:31-33; 1 Tim 2:9, 10) Tan neʼe, kuandu ita prepara an atu bá haklaken, tuir reuniaun, asembleia, ka reuniaun boot, ita presiza hanoin nafatin Bíblia nia konsellu kona-ba moos iha dalan fíziku no hatais ho respeitu. Ita sempre hakarak fó glória no hahiʼi ba Jeová.

¹³ Ita mós presiza halo tuir matadalan neʼe kuandu vizita sede-jerál, ka sukursál husi Testemuña ba Jeová. Hanoin-hetan katak naran Betel signifika “Maromak nia uma”. Tan neʼe, ita-nia hatais no hahalok tenkesér diʼak hanesan bainhira ita tuir reuniaun sira.

¹⁴ Bainhira ita halaʼo atividade halimar, ita mós presiza hili didiʼak ita-nia roupa no dalan neʼebé ita hadiʼa an. Karik husu ba ita-nia an: ‘Haʼu sei moe atu haklaken iha dalan la formál tanba dalan neʼebé haʼu hatais ka lae?’

ATIVIDADE HALIMAR NIAN NEʼEBÉ DIʼAK

¹⁵ Tempu deskansa no halimar mak importante atu ita la sai estrese demais no bele iha saúde diʼak. Jesus mós konvida ninia dixípulu sira atu bá “fatin ida neʼebé la iha ema atu deskansa uitoan”. (Mc 6:31) Deskansa no halo atividade halimar nian bele halo ita kontente no fó ita forsa atu kontinua ita-nia serbisu loroloron.

¹⁶ Ohin loron iha atividade halimar nian oioin, tan neʼe ema Kristaun sira presiza hili ho didiʼak, no uza matenek husi Maromak kuandu halo atividade ruma. Maski ita hotu presiza tempu atu halimar, maibé neʼe laʼós buat neʼebé importante liu. Bíblia fó avizu katak “iha loron ikus sira”, ema sei “hadomi deʼit ksolok duké hadomi Maromak”. (2 Tim 3:1, 4) Atividade halimar nian barak mak la diʼak ba ema Kristaun neʼebé hakarak kaer metin ba Jeová nia matadalan kona-ba morál.

¹⁷ Ema Kristaun iha apóstolu sira-nia tempu tenke moris iha mundu neʼebé nakonu ho ema neʼebé buka deʼit ksolok. Iha teatru sira iha Roma antigu, ema gosta halibur hamutuk atu haree ema seluk hetan terus. Sira gosta haree ema halo violénsia, oho ema, no halo sala seksuál, maibé ema Kristaun sira iha tempu neʼebá hasees an husi buat sira-neʼe. Ohin loron atividade halimar nian barak mós inklui buat sira-neʼe no book ema atu halo tuir deʼit sira-nia hakarak aat. Ita presiza “kontinua haree didiʼak” oinsá ita halaʼo ita-nia moris, no hasees an husi atividade halimar nian neʼebé la morál. (Éf 5:15, 16; Sal 11:5) Maski dala ruma atividade halimar nian ida ladún sala, maibé karik fatin neʼebé ita halaʼo atividade neʼe mak la diʼak ba ema Kristaun.​—1 Ped 4:1-4.

¹⁸ Iha atividade halimar nian neʼebé diʼak ba ema Kristaun sira. Ema barak hetan rezultadu diʼak hodi halo tuir matadalan husi Eskritura no sujestaun diʼak sira husi ita-nia publikasaun.

¹⁹ Dala ruma família Kristaun balu bele konvida malu atu ransu hamutuk iha uma. Ka karik irmaun-irmán balu hetan konvite atu tuir festa kazamentu ka festa seluk. (João 2:2) Ema neʼebé halo arranju ba buat sira-neʼe mak iha responsabilidade atu tau matan ba atividade hotu. Presiza kuidadu kuandu ema barak halibur hamutuk. Dala ruma kuandu ema barak ransu hamutuk, karik ema balu sei halo hahalok neʼebé la diʼak tuir Bíblia. Porezemplu, sira han ka hemu demais, no dala ruma halo sala neʼebé sériu. Tan neʼe, ema Kristaun neʼebé matenek sei deside atu la konvida ema barak liu, no la halaʼo festa ba oras barak. Se ema Kristaun hemu tua kuandu sira ransu hamutuk ka halo festa, sira presiza haree didiʼak atu ema la hemu demais. (Flp 4:5) Kuandu ita hakaʼas an atu anima malu bainhira ransu hamutuk, ita sei la haree hahán ka hemu nuʼudar buat neʼebé importante liu.

²⁰ Diʼak tebes atu hatudu laran-diʼak ba malu. (1 Ped 4:9) Kuandu ita konvida ita-nia maluk Kristaun sira ba ita-nia uma atu han, hemu, ransu, no halimar hamutuk, diʼak atu konvida mós ema sira neʼebé la iha sasán barak. (Lc 14:12-14) No se ita simu konvite atu han, hemu, ka ransu malu, ita tenke halo tuir matadalan husi Marcos 12:31. Diʼak atu sempre hatudu agradese ba ema neʼebé hatudu laran-diʼak mai ita.

²¹ Ema Kristaun hotu haksolok ho bensaun oioin husi Maromak no kontente tanba sira bele “han-hemu no haksolok ho rezultadu hotu husi sira-nia serbisu makaʼas”. (Ecle 3:12, 13) Kuandu ita “halo buat hotu-hotu ba Maromak nia glória”, ema hotu neʼebé ransu hamutuk sei kontente tanba sira uza tempu neʼe atu anima malu.

ATIVIDADE ESKOLA NIAN

²² Edukasaun báziku iha eskola sira ajuda Testemuña nia oan sira. Bainhira sira tuir eskola, sira hakaʼas an atu aprende lee no hakerek ho didiʼak. Iha eskola, sira mós aprende matéria seluk tan no neʼe bele ajuda joven sira atu kumpre sira-nia planu espirituál. Durante eskola, sira presiza hakaʼas an atu ‘hanoin-hetan sira-nia Kriadór Boot’ hodi tau uluk buat espirituál.​—Ecle 12:1.

²³ Se Ita mak joven Kristaun neʼebé eskola hela, kuidadu atu la ransu beibeik ho joven sira neʼebé la hadomi Jeová. (2 Tim 3:1, 2) Jeová fó ona buat barak atu proteje Ita, no neʼe bele ajuda Ita atu hasees an husi mundu nia influénsia. (Sal 23:4; 91:1, 2) Entaun, atu proteje Ita-nia an, aproveita didiʼak buat neʼebé Jeová fó ba Ita.​—Sal 23:5.

²⁴ Atu bele haketak an husi mundu neʼe, joven Testemuña barak hili atu la hola parte iha atividade estra neʼebé halaʼo antes ka depois oras eskola nian, hanesan tama ekipa desportu ka buat seluk. Karik kolega eskola ka mestre sira la komprende tanbasá labarik sira-neʼe lakohi hola parte. Maibé buat neʼebé importante liu mak atu halo Maromak kontente duké ema. Neʼe katak Ita uza Ita-nia konxiénsia neʼebé hetan ona treinu husi Bíblia, no deside metin atu hadook an husi hahalok kompete malu ka nasionalizmu. (Gal 5:19, 26) Hodi rona ba inan-aman nia konsellu neʼebé bazeia ba Bíblia, no ransu deʼit ho irmaun-irmán sira iha kongregasaun, joven sira bele kaer metin ba Jeová nia matadalan kona-ba morál.

SERBISU NO KOLEGA SERBISU

²⁵ Ulun ba família iha responsabilidade atu tau matan ba sira-nia umakain. (1 Tim 5:8) Maski nuneʼe, nuʼudar Maromak nia atan, sira hatene katak importante liu atu buka uluk Maromak nia Ukun. (Mt 6:33; Rom 11:13) Hodi hatudu laran-metin ba Maromak no kontente ho buat neʼebé sira iha ona, sira sei la hanoin resin no la monu ba lasu kona-ba buka rikusoin.​—1 Tim 6:6-10.

²⁶ Ema Kristaun hotu neʼebé serbisu atu manán osan presiza hanoin kona-ba Bíblia nia prinsípiu. Bainhira ita serbisu atu sustenta ita-nia família, ita hakarak hatudu laran-moos no lakohi halo buat neʼebé kontra Maromak nia ukun-fuan ka governu nia lei. (Rom 13:1, 2; 1 Kor 6:9, 10) Ita hatene katak ransu ho ema aat mak perigozu. Nuʼudar Kristu nia soldadu ka dixípulu, ita lakohi envolve an iha negósiu ruma neʼebé kontra Bíblia nia prinsípiu, halo ita la neutrál, ka estraga ita-nia relasaun diʼak ho Maromak. (Isa 2:4; 2 Tim 2:4) Ita lakohi atu iha ligasaun ho Maromak nia inimigu, katak “Babilónia Boot” ka relijiaun falsu.​—Apok 18:2, 4; 2 Kor 6:14-17.

²⁷ Kaer metin ba Maromak nia matadalan kona-ba morál sei ajuda ita atu la uza tempu neʼebé ita halibur ho maluk Kristaun iha reuniaun atu koʼalia kona-ba ita-nia negósiu ka buka diʼak ba ita-nia an rasik. Razaun neʼebé ita halibur hamutuk iha reuniaun Kristaun, asembleia, no reuniaun boot sira mak atu adora Jeová mesak deʼit. Ita simu ai-han espirituál barak husi Jeová no kontente atu “bele anima no hametin malu”. (Rom 1:11, 12; Ebr 10:24, 25) Bainhira ita halibur hamutuk atu adora Maromak, diʼak atu koʼalia deʼit kona-ba buat espirituál.

UNIDADE NUʼUDAR EMA KRISTAUN

²⁸ Nuʼudar ema Kristaun, ita mós presiza ‘kaer metin nafatin unidade neʼebé ita hetan ona liuhusi espíritu hodi moris iha dame laran’. (Éf 4:1-3) Duké buka diʼak deʼit ba ita-nia an, ita ida-idak presiza buka atu halo buat diʼak ba ema seluk. (1 Tes 5:15) Ita haree ona ida-neʼe iha kongregasaun laran. Maski riku ka kiak, edukasaun boot ka kiʼik, husi rasa ka nasaun neʼebé la hanesan, maibé ita hotu moris tuir Maromak nia matadalan neʼebé hanesan kona-ba morál. Ema seluk mós bele rekoñese katak Testemuña sira iha unidade.​—1 Ped 2:12.

²⁹ Apóstolu Paulo esplika razaun ida tan tanbasá ita iha unidade. Nia dehan: “Iha isin-lolon ida deʼit no espíritu ida deʼit, nuneʼe mós Maromak bolu ona imi ba esperansa ida deʼit. Iha Naʼi ida deʼit, fiar ida deʼit, batizmu ida deʼit. Iha Maromak no Aman ida deʼit ba ema hotu. Nia aas liu buat hotu, nia uza ita hotu atu halaʼo ninia hakarak, no ninia kbiit book an iha ita hotu.” (Éf 4:4-6) Atu kumpre eskritura neʼe, ema hotu presiza komprende Bíblia nia hanorin sira iha dalan neʼebé hanesan, neʼe inklui hanorin báziku no hanorin neʼebé kleʼan, no mós rekoñese Jeová nuʼudar ita-nia Ukun-Naʼin. Klaru katak Jeová fó ona língua neʼebé moos ba ninia povu katak lia-loos, atu nuneʼe sira bele adora nia ho unidade.​—Sof 3:9.

³⁰ Ita hotu neʼebé serbí Jeová sente kontente tanba iha dame no unidade iha kongregasaun Kristaun. Ita haree ona Jeová nia promesa sai loos: “Haʼu sei tau sira hamutuk ho unidade, hanesan bibi-malae iha luhan laran.” (Miq 2:12) Ita hakarak haburas nafatin dame no unidade hodi kaer metin ba Jeová nia matadalan kona-ba morál.

³¹ Ita hotu kontente tanba Jeová simu ona ita atu tama iha ninia kongregasaun neʼebé moos. Maski ita presiza halo sakrifísiu, maibé ita kontente atu lori Jeová nia naran. Nuʼudar ita hametin ita-nia relasaun ho Jeová, ita mós hakaʼas an atu kaer metin ba ninia matadalan kona-ba morál, no ajuda ema seluk atu moris tuir matadalan sira-neʼe.​—2 Kor 3:18.