Hetan benefísiu husi Maromak nia arranju ulun nian

ATU bele halo Jeová nia hakarak nuʼudar organizasaun, importante tebes atu ita hakruʼuk ba Maromak, Ukun-Naʼin Boot Liu. Ita rekoñese ninia Oan-Mane Jesus nia pozisaun nuʼudar Ulun ba kongregasaun Kristaun. Ita mós halo tuir arranju ulun nian iha ita-nia moris loroloron. Ita hotu hetan benefísiu barak hodi halo tuir arranju neʼe.

² Maromak hahú arranju ulun nian iha jardín Eden. Ita bele haree ida-neʼe iha Maromak nia mandamentu neʼebé hakerek iha Génesis 1:28 no 2:16, 17. Kriatura moris hotu iha rai tenke halo tuir ema. Adão no Eva mós tenke halo tuir Maromak nia hakarak no rekoñese ninia podér. Bainhira halo tuir Maromak nuʼudar Ukun-Naʼin, neʼe lori dame no buat hotu sei laʼo ho loloos. Bíblia fó sai tan kona-ba arranju ulun nian iha 1 Korinto 11:3. Apóstolu Paulo hakerek: “Haʼu hakarak imi hatene katak mane ida-idak nia ulun mak Kristu, no feto nia ulun mak mane, no Kristu nia ulun mak Maromak.” Neʼe hatudu katak kriatura hotu presiza hakruʼuk ba sira-nia ulun, só Jeová deʼit mak la presiza.

³ Ema barak ohin loron lakohi simu ka la halo tuir arranju ulun nian. Tanbasá? Problema neʼe komesa iha jardín Eden bainhira ita-nia inan-aman primeiru ho neon lakohi hakruʼuk tan ba Maromak nuʼudar sira-nia ulun no hakarak sai livre. (Gén 3:4, 5) Maski nuneʼe, sira la hetan liberdade liután, maibé sai atan ba anju aat ida, Diabu Satanás. Akontesimentu neʼe hadook ema hotu husi Maromak. (Kol 1:21) Rezultadu mak ohin loron aat-naʼin mak ukun ema barak.​—1 João 5:19.

⁴ Bainhira ita aprende no halo tuir lia-loos husi Maromak nia Liafuan, ita sai livre husi Satanás nia influénsia. Nuʼudar Testemuña neʼebé batizmu ona, ita simu Jeová nuʼudar ita-nia Ukun-Naʼin Boot Liu. Ita konkorda ho Liurai David neʼebé rekoñese Jeová nuʼudar “ulun ba buat hotu”. (1 Krón 29:11) Sin, ita ho haraik an dehan: “Hatene bá katak Jeová mak Maromak. Nia mak Maromak neʼebé kria ita, no ita mak ninian. Ita mak ninia povu no bibi-malae neʼebé nia tau matan.” (Sal 100:3) Ita rekoñese katak Jeová mak kmanek liu no ita presiza hakruʼuk ba nia deʼit tanba nia mak kria buat hotu. (Apok 4:11) Ita serbí Maromak neʼebé loos, no ita halo tuir Jesus Kristu neʼebé hatudu ezemplu perfeitu kona-ba hakruʼuk ba Maromak.

⁵ Saida mak Jesus aprende husi terus neʼebé nia hasoru bainhira iha rai? Ebreu 5:8 hatete: “Maski nia mak oan-mane, maibé nia aprende atu halo tuir liuhusi terus neʼebé nia hasoru.” Jesus laran-metin nafatin hodi hakruʼuk ba ninia Aman iha lalehan maski hasoru susar. Liután neʼe, Jesus la halo buat ida tuir deʼit ninia hakarak rasik. Nia la koʼalia tuir deʼit ninia hanoin rasik no mós nia la buka glória ba ninia an rasik. (João 5:19, 30; 6:38; 7:16-18) Bainhira Jesus haklaken iha rai, nia hetan ksolok hodi halo ninia Aman nia hakarak maski ema fó-terus no kontra nia. (João 15:20) Jesus nafatin hakruʼuk ba Maromak. Jesus haraik an no nia prontu atu “mate iha ai-riin terus nian”. Jesus halo tuir Jeová iha buat hotu no ida-neʼe lori rezultadu diʼak oioin. Nia lori salvasaun ba ema, nia simu pozisaun neʼebé aas liu, no nia lori glória ba ninia Aman.​—Flp 2:5-11; Ebr 5:9.

ITA PRESIZA HAKRUʼUK BA SÉ?

⁶ Bainhira ita hakruʼuk ba Maromak no halo tuir ninia hakarak, neʼe ajuda ita atu la sai neon-susar no estrese hanesan ema sira neʼebé la hakruʼuk ba Jeová nuʼudar Ukun-Naʼin Boot Liu. Ita-nia inimigu, Diabu, kontinua buka atu manán ita. Diabu sei la manán ita, se ita hamriik metin hodi kontra nia, no ho haraik an hakruʼuk ba Jeová.​—Mt 6:10, 13; 1 Ped 5:6-9.

⁷ Iha kongregasaun laran, ita rekoñese Kristu nia pozisaun nuʼudar Ulun. Ita mós rekoñese podér neʼebé nia fó ona ba “atan laran-metin no matenek”. Neʼe afeta ita-nia hanoin no mós hahalok neʼebé ita hatudu ba malu. Se ita hakruʼuk ba Maromak nia arranju ulun nian iha kongregasaun laran, neʼe book ita atu halo tuir ninia Liafuan nuʼudar ita adora nia. Neʼe inklui ita-nia serbisu haklaken, tuir no hola parte iha reuniaun sira, ita-nia relasaun diʼak ho katuas sira iha kongregasaun, no mós apoia organizasaun nia arranju.​—Mt 24:45-47; 28:19, 20; Ebr 10:24, 25; 13:7, 17.

⁸ Se ita hakruʼuk ba Maromak, neʼe sei ajuda kongregasaun atu iha dame, sente seguru no la runguranga. Jeová nia povu banati-tuir ninia hahalok. (1 Kor 14:33, 40) Bainhira David haree tiha diferensa entre Jeová nia atan no ema aat, David ho kontente dehan: “Ksolok ba povu neʼebé adora Jeová nuʼudar sira-nia Maromak!” (Sal 144:15) Ita mós sente hanesan David tanba ita hetan benefísiu hodi sai parte ba Jeová nia organizasaun.

⁹ Iha moris kaben nian no iha família laran, “feto nia ulun mak mane”. No mane tenke hakruʼuk ba Kristu, no Kristu nia ulun mak Maromak. (1 Kor 11:3) Feen sira tenke hakruʼuk ba sira-nia laʼen, no oan sira tenke hakruʼuk ba sira-nia inan-aman. (Éf 5:22-24; 6:1) Bainhira ema ida-idak iha família laran halo tuir arranju ulun nian, família sei iha dame.

¹⁰ Laʼen sira tenke banati-tuir Kristu hodi hatudu domin bainhira halaʼo sira-nia knaar nuʼudar ulun ba família. (Éf 5:25-29) Se laʼen ida halaʼo didiʼak ninia knaar no la uza sala ninia pozisaun nuʼudar ulun, ninia feen no oan sira sei kontente atu hakruʼuk ba nia. Feen ida nia knaar mak atu sai nuʼudar ajuda-naʼin ka kompleta ninia laʼen. (Gén 2:18) Se feen ho pasiénsia apoia no respeitu ninia laʼen, ninia laʼen sei hafolin nia no neʼe lori glória ba Jeová. (1 Ped 3:1-4) Se feen-laʼen halo tuir Bíblia nia konsellu kona-ba ulun, sira hatudu ezemplu diʼak ba sira-nia oan kona-ba hakruʼuk ba Maromak.

¹¹ Se ita hakruʼuk ba Maromak, neʼe mós kona ita-nia hanoin kona-ba “autoridade sira” neʼebé “simu pozisaun oioin husi Maromak”. (Rom 13:1-7) Nuʼudar sidadaun neʼebé halo tuir lei, ema Kristaun selu taxa. Sira “fó ba César buat neʼebé César nian, no fó ba Maromak buat neʼebé Maromak nian”. (Mt 22:21) Liután neʼe, kongregasaun sira mós halo tuir lei sira kona-ba proteje dadus pesoál bainhira haklaken. Tanba halo tuir governu nia lei sira neʼebé la kontra Jeová nia ukun-fuan, neʼe ajuda ita atu tau fokus deʼit hodi uza ita-nia forsa no enerjia atu haklaken.​—Mc 13:10; Após 5:29.

¹² Bainhira ita hatudu respeitu ba Maromak nia arranju ulun nian, neʼe kona ita-nia moris tomak. Ita fiar katak iha futuru ema hotu sei hakruʼuk ba Jeová nuʼudar Ukun-Naʼin. (1 Kor 15:27, 28) Ema neʼebé ho kontente rekoñese Jeová nia direitu atu ukun no kontinua hakruʼuk ba nia sei hetan bensaun no Jeová sei simu sira.