KAPÍTULU 2
Bíblia mak livru husi Maromak
1, 2. Bíblia mak prezente espesiál ida husi Maromak. Tanbasá?
ITA sente oinsá kuandu simu prezente husi kolega ida? Ita kontente tanba hatene kolega neʼe hadomi Ita. Ita hakarak tebes atu loke prezente neʼe. Ita mós hatoʼo agradese ba nia.
2 Bíblia mak prezente espesiál ida husi Maromak. Bíblia esplika buat barak neʼebé livru seluk la esplika. Porezemplu, Bíblia fó-hatene ita katak Maromak kria lalehan, rai, no mós mane no feto primeiru. Bíblia mós fó matadalan sira neʼebé bele ajuda ita atu tahan hasoru problema oioin. Liuhusi Bíblia, ita bele hatene oinsá mak Maromak sei kumpre ninia hakarak atu halo mundu sai fatin neʼebé furak. Bíblia mak prezente neʼebé espesiál tebes!
3. Hodi estuda Bíblia, ita bele aprende saida?
3 Kuandu ita estuda Bíblia, ita sei hatene katak Maromak hakarak ita atu sai ninia belun. Bainhira Ita aprende liután kona-ba Maromak, Ita mós bele hakbesik liután ba nia.
4. Oinsá mak Bíblia la hanesan ho livru seluk?
4 Toʼo ohin loron, ema tradús ona Bíblia ba língua 3.000 liu, no prodús ona Bíblia barak tebetebes. Husi ema hotu iha mundu tomak, porsentu 90 liu mak bele hetan no lee Bíblia iha sira-nia língua rasik. No semana-semana, ema naʼin-1.000.000 liu mak hetan Bíblia! La iha livru seluk mak hanesan neʼe.
5. Tanbasá ita bele dehan katak Bíblia “mai husi Maromak”?
5 Bíblia “mai husi Maromak”. (Lee 2 Timóteo 3:16.) Maibé ema balu hanoin: ‘Tuir loloos, ema mak hakerek Bíblia. Entaun, oinsá mak ita bele dehan ida-neʼe mai husi Maromak?’ Bíblia hatán: “Ema koʼalia liafuan husi Maromak tanba espíritu santu book sira atu fó sai liafuan sira-neʼe.” (2 Pedro 1:21) Neʼe hanesan ho patraun ida neʼebé haruka ninia sekretáriu atu hakerek karta ruma. Karta neʼe fó sai sé-nia hanoin? Patraun nia hanoin, laʼós sekretáriu nian. Nuneʼe mós ho Bíblia, Maromak uza ema atu hakerek Bíblia atu fó sai Ninia hanoin. Tan neʼe, Bíblia mak “Maromak nia liafuan”.—1 Tesalónika 2:13; haree Apéndise 2.
Bíblia Sagrada Tradusaun Mundu Foun iha língua barak
BÍBLIA FÓ SAI INFORMASAUN NEʼEBÉ LOOS
6, 7. Tanbasá mak ita bele hatete katak Bíblia nia liafuan la kontra malu?
6 Iha Bíblia laran, iha livru kiʼik barak neʼebé ema oioin mak hakerek durante tinan 1.600. Husi ema neʼebé hakerek Bíblia, balu mak matenek-naʼin no balu ema baibain. Porezemplu, sira ida mak doutór. Balu tan toʼos-naʼin, peskadór, bibi-atan, profeta, juís no liurai. Maski ema oioin mak hakerek, maibé Bíblia nia liafuan husi primeiru toʼo ikus la kontra malu.a
7 Livru primeiru husi Bíblia esplika oinsá mak ema nia problema hahú. No livru ikus esplika oinsá mak Maromak sei rezolve problema sira-neʼe no halo mundu neʼe sai fali paraízu, neʼebé hanesan jardín furak. Bíblia fó sai ema nia istória durante tinan rihun ba rihun no hatudu katak Maromak sempre kumpre ninia hakarak.
8. Fó toʼok ezemplu neʼebé hatudu katak Bíblia fó sai informasaun loos kona-ba siénsia.
8 Maski Bíblia laʼós livru siénsia nian, maibé Bíblia sempre fó sai informasaun neʼebé loos kona-ba siénsia. Livru husi Maromak tenkesér hanesan neʼe, loos ka lae? Porezemplu, livru Levítico fó sai Maromak nia matadalan oioin ba ninia povu Izraél kona-ba oinsá atu prevene moras neʼebé bele daʼet, maibé liutiha tinan barak mak ema foin hatene ho loloos oinsá mak virus no baktéria bele lori moras oioin. Bíblia mós hanorin katak mundu la tara ba buat ida. (Job 26:7) No mós iha tempu uluk, ema barak hanoin katak mundu neʼe tetuk, maibé Bíblia hatete katak mundu neʼe kabuar.—Isaias 40:22.
9. Hakerek-naʼin sira-nia hahalok laran-moos hatudu saida kona-ba Bíblia?
9 Bíblia mós konta ho loloos istória kona-ba tempu uluk. Neʼe la hanesan ho livru antigu sira seluk. Porezemplu, ema neʼebé hakerek nasaun ida nia istória la konta kona-ba tempu neʼebé nasaun neʼe lakon funu. Maibé, ema neʼebé hakerek Bíblia konta ho loloos buat neʼebé akontese, inklui mós tempu neʼebé sira-nia nasaun Izraél lakon funu. Sira mós hakerek sira rasik nia sala. Porezemplu, iha livru Números, Moisés konta kona-ba sala boot neʼebé nia halo ona no mós dixiplina neʼebé nia hetan husi Maromak. (Números 20:2-12) Hakerek-naʼin sira-nia hahalok laran-moos hatudu duni katak Bíblia mai husi Maromak. Tan neʼe, ita bele tau fiar ba Bíblia.
LIVRU NEʼEBÉ NAKONU HO MATADALAN DIʼAK
10. Tanbasá mak Bíblia nia matadalan bele ajuda ita ohin loron?
10 Bíblia mai husi Maromak, no neʼe “diʼak atu hanorin, atu fó konsellu, atu halo loos buat hotu”. (2 Timóteo 3:16) Loos duni, Bíblia nia matadalan bele ajuda ita ohin loron. Nuʼudar Kriadór, Maromak Jeová hatene ita-nia hanoin no sentimentu. Nia hatene ita diʼak liu fali ita rasik, no hakarak ita atu moris kontente. Nia hatene buat neʼebé bele lori diʼak ba ita no buat neʼebé lori susar ba ita.
11, 12. (a) Iha Mateus kapítulu 5 toʼo 7, Jesus fó konsellu diʼak kona-ba saida deʼit? (b) Liuhusi Bíblia, ita bele hetan matadalan no prinsípiu kona-ba saida tan?
11 Iha Mateus kapítulu 5 toʼo 7, ita bele hetan konsellu diʼak oioin husi Jesus kona-ba oinsá atu moris kontente, oinsá atu iha relasaun diʼak ho ema seluk, oinsá atu halo orasaun no atu iha hanoin neʼebé loos kona-ba osan. Maski nia fó konsellu sira-neʼe tinan 2.000 liubá, maibé ninia liafuan sira-neʼe iha kbiit nafatin atu ajuda ita ohin loron.
12 Liuhusi Bíblia, Jeová mós fó matadalan no prinsípiu neʼebé ajuda ita atu halaʼo moris família neʼebé kontente, atu sai serbisu-naʼin neʼebé diʼak no atu moris dame ho ema seluk. Maski ita hela iha fatin neʼebé deʼit ka hasoru problema naran deʼit, maibé Bíblia nia matadalan no prinsípiu bele ajuda ita hotu.—Lee Isaias 48:17; haree Apéndise 3.
ITA BELE TAU FIAR BA BÍBLIA NIA PROFESIA
Livru Isaias husi Bíblia fó-hatene nanis katak Babilónia sei naksobu
13. Saida deʼit mak Isaias fó-hatene nanis kona-ba sidade Babilónia?
13 Bíblia nia profesia barak sai loos ona. Porezemplu, profeta Isaias fó-hatene nanis katak sidade Babilónia sei naksobu. (Isaias 13:19) Nia mós esplika oinsá mak ema sei manán sidade neʼe. Babilónia mak sidade neʼebé seguru tebes ho portaun boot no mota neʼebé haleʼu sidade neʼe. Maibé Isaias fó-hatene nanis katak mota neʼebé haleʼu sidade neʼe sei sai maran no portaun boot nakloke hela, no ema sei manán sidade neʼe maski la halo funu. Isaias mós hakerek nanis katak mane ida naran Ciro mak sei manán Babilónia.—Lee Isaias 44:27–45:2; haree Apéndise 4.
14, 15. Oinsá mak Isaias nia profesia sai loos?
14 Liutiha tinan 200 husi tempu neʼebé Isaias hakerek profesia neʼe, tropa sira hein iha sidade Babilónia nia liʼur hodi prontu atu ataka. Sé mak dirije tropa sira-neʼe? Hanesan profesia fó-hatene nanis ona, liurai Pérsia naran Ciro mak dirije. Maibé Isaias nia profesia kona-ba Babilónia sei naksobu sai loos duni ka lae?
15 Iha kalan neʼebé Ciro ho ninia tropa ataka Babilónia, ema Babilónia sira halo festa boot. Sira sente seguru tanba moru boot no mota mak haleʼu sidade neʼe. Maibé iha sidade nia liʼur, Ciro ho ninia tropa sira keʼe bee-dalan foun atu bee husi mota bele suli sai. Ikusmai, bee iha mota neʼe sai menus no soldadu Pérsia sira hakur mota. Maibé oinsá mak sira bele tama ba sidade neʼebé moru boot mak haleʼu? Hanesan Isaias fó-hatene nanis, sidade nia portaun nakloke hela, tan neʼe soldadu sira bele manán sidade neʼe maski la halo funu.
16. (a) Saida tan mak Isaias fó-hatene nanis kona-ba sidade Babilónia? (b) Oinsá mak Isaias nia profesia sai loos?
16 Isaias mós fó-hatene nanis katak ikusmai ema ida sei la hela tan iha sidade Babilónia. Nia hakerek: “Ema sei nunka hela tan iha Babilónia, no sidade neʼe sei nunka sai ema nia hela-fatin husi jerasaun ba jerasaun.” (Isaias 13:20) Profesia neʼe sai loos ka lae? Ohin loron, ita bele haree Babilónia antigu neʼebé naksobu ona maizumenus kilómetru 80 husi sidade Bagdade iha rai-Irake. Sin, Jeová halakon duni Babilónia “ho ai-saar halakon nian”.—Isaias 14:22, 23.
Sidade Babilónia neʼebé rahun ona
17. Tanbasá mak ita bele tau fiar ba Maromak nia promesa hotu?
17 Tanba profesia barak husi Bíblia sai loos ona, ita bele fiar katak buat seluk neʼebé Bíblia fó-hatene nanis kona-ba futuru mós sei sai loos. Ita bele fiar katak Jeová sei kumpre ninia promesa atu halo mundu sai fali paraízu. (Lee Números 23:19.) Sin, ita fiar ba “esperansa moris rohan-laek nian neʼebé Maromak promete ona iha tempu uluk kedas”, tanba “Maromak nunka bosok”.—Tito 1:2.b
BÍBLIA BELE TROKA ITA-NIA MORIS
18. Apóstolu Paulo hatete saida kona-ba “Maromak nia liafuan”?
18 Ita aprende ona katak Bíblia mak livru neʼebé la hanesan duni ho livru sira seluk. Eskritura sira iha Bíblia laran la kontra malu, no sempre fó sai informasaun neʼebé loos kona-ba siénsia no istória. Bíblia mós fó matadalan neʼebé diʼak mai ita, no profesia barak sai loos ona. Laʼós neʼe deʼit, apóstolu Paulo hakerek: “Maromak nia liafuan moris no iha kbiit boot”. Neʼe katak sá?—Lee Ebreu 4:12.
19, 20. (a) Oinsá mak Bíblia bele ajuda Ita atu hatene didiʼak Ita-nia an? (b) Oinsá mak Ita bele hatudu katak Ita hafolin Bíblia nuʼudar prezente diʼak husi Maromak?
19 Bíblia bele troka Ita-nia moris. Bíblia bele ajuda Ita atu hatene didiʼak Ita-nia an, Ita-nia hanoin no sentimentu. Porezemplu, karik ita hanoin katak ita hadomi Maromak. Maibé kuandu lee Bíblia, ita aprende katak domin neʼebé loos laʼós sentimentu deʼit, maibé tenkesér hatudu liuhusi hahalok. Atu hatudu sai ita-nia domin ba Maromak, ita presiza halo tuir buat neʼebé hakerek iha Bíblia.
20 Bíblia mak livru husi Maromak. Nia hakarak Ita atu lee, estuda no hadomi Bíblia. Ita presiza hafolin prezente neʼe hodi estuda Bíblia beibeik. Se Ita halo nuneʼe, Ita bele komprende Maromak nia hakarak ba ita ema. Iha kapítulu tuirmai, ita sei aprende liután kona-ba ida-neʼe.
a Ema balu dehan katak liafuan balu iha Bíblia kontra malu, maibé neʼe la loos. Haree livru Alkitab—Firman dari Allah atau dari Manusia? iha kapítulu 7. Livru neʼe husi Testemuña ba Jeová, no iha mós lian Portugés.
b Iha profesia barak tan husi Bíblia neʼebé sai loos ona. Apéndise 5 fó sai profesia balu kona-ba Jesus Kristu.