Abraão no Sara halo tuir Maromak

Ur mak sidade ida neʼebé besik sidade Babel. Iha neʼebá ema barak adora maromak oioin duké adora Jeová. Maibé iha mane ida iha Ur neʼebé adora deʼit Jeová. Ninia naran mak Abraão.

Jeová dehan ba Abraão: ‘Sai husi ó-nia uma no husik ó-nia família hodi bá rai neʼebé haʼu sei hatudu ba ó.’ Depois Maromak promete: ‘Ó sei sai nasaun boot, no haʼu sei halo família hotu iha rai hetan bensaun liuhusi ó.’

Abraão la hatene Jeová haruka nia atu bá neʼebé, maibé nia tau fiar ba Jeová. Entaun Abraão, ninia feen Sara, ninia aman Tera, no ninia sobriñu Lot, haloot sira-nia sasán no komesa halo viajen.

Abraão tinan 75 kuandu nia no ninia família toʼo iha rai neʼebé Jeová hakarak hatudu ba sira. Rai neʼe naran Kanaan. Iha neʼebá Maromak promete ba Abraão: “Haʼu sei fó rai neʼe ba ó-nia bei-oan.” Maibé Abraão no Sara idade ona no sira la iha oan. Entaun, oinsá mak Jeová nia promesa neʼe bele sai loos?