Jeová hili Josué

Moisés dirije ona nasaun Izraél ba tinan barak, no lakleur tan nia sei mate. Jeová dehan ba nia: ‘Ó sei la lori povu Izraél ba rai neʼebé haʼu promete. Maibé haʼu sei hatudu rai neʼe ba ó.’ Moisés husu Jeová atu hili ulun-naʼin foun neʼebé sei dirije povu. Jeová dehan: ‘Bá hasoru Josué, no fó-hatene katak nia mak sei sai ulun-naʼin.’

Moisés dehan ba povu katak lakleur tan nia sei mate no Jeová hili ona Josué atu dirije sira ba rai neʼebé Nia promete. Tuirmai Moisés dehan ba Josué: ‘Keta taʼuk. Jeová sei ajuda ó.’ Lakleur depois neʼe, Moisés saʼe ba Foho Nebo, no iha neʼebá Jeová hatudu rai neʼebé Nia promete ona ba Abraão, Isaac, no Jacob. Moisés tinan 120 bainhira nia mate.

Jeová dehan ba Josué: ‘Hakur Mota Jordaun, no tama ba rai-Kanaan. Haʼu sei ajuda ó hanesan haʼu ajuda ona Moisés. Ó tenke lee haʼu-nia Ukun-Fuan loron-loron. Keta taʼuk. Aten-brani bá. Halo tuir deʼit buat neʼebé haʼu haruka.’

Josué haruka espiaun naʼin-rua atu bá hafuhu sidade Jerikó. Iha istória tuirmai, ita sei aprende kona-ba buat neʼebé akontese iha Jerikó. Bainhira sira fila fali, sira hatete katak neʼe mak tempu diʼak atu tama ba rai-Kanaan. Tan neʼe iha loron tuirmai, Josué haruka povu atu prepara an. Depois, nia haruka amlulik sira neʼebé lori arka aliansa nian atu laʼo uluk no tama ba Mota Jordaun. Mota neʼe suli tun makaʼas. Maibé bainhira amlulik sira-nia ain kona bee, mota neʼe para kedas no sai maran! Amlulik sira laʼo ba mota nia klaran no hamriik iha neʼebá toʼo povu hotu hakur ba mota sorin. Milagre neʼe atu hanesan ho tempu neʼebé Jeová fahe Tasi Mean, loos ka lae?

Ikusmai, ema Izraél tama ba rai neʼebé Maromak promete tinan barak liubá. Sira bele harii uma no sidade. Sira bele halo toʼos atu kuda modo, uvas no ai-fuan oioin. Tan neʼe, Bíblia dehan katak rai neʼe iha susubeen no bani-been barak.