Josué no ema Gibeão

Ema iha Kanaan rona kona-ba buat neʼebé akontese iha Jerikó. Sira-nia liurai sira deside hamutuk atu halo funu hasoru povu Izraél. Maibé ema Gibeão iha planu seluk. Sira hatais roupa neʼebé bosan no bá hasoru Josué hodi dehan: ‘Ami mai husi rai dook. Ami rona kona-ba Jeová no buat hotu neʼebé nia halo ba imi iha rai-Ejitu no Moab. Favór, promete atu la ataka ami, no ami sei sai imi-nia atan.’

Josué fiar sira no promete atu la ataka sira. Maibé liutiha loron tolu, Josué hatene katak tuir loloos sira mak ema husi Kanaan. Josué husu ema Gibeão: ‘Tanbasá mak imi bosok?’ Sira dehan: ‘Tanba ami taʼuk! Ami hatene katak imi-nia Maromak Jeová mak halo funu hodi defende imi. Favór keta oho ami.’ Josué halo tuir ninia promesa no la oho sira.

Lakleur, liurai naʼin-lima husi Kanaan no sira-nia tropa bá atu halo funu hasoru ema Gibeão. Josué no ninia tropa laʼo kalan tomak atu bá salva ema Gibeão, no iha dadeer-saan sira komesa funu. Ema Kanaan komesa halai namkari. Maibé Jeová halo udan jelu-fatuk boot tun ba sira. Tuirmai, Josué husu Jeová atu halo loro-matan para metin. Tanbasá mak nia husu Jeová atu halo nuneʼe maski nia nunka haree ida-neʼe akontese? Tanba Josué tau fiar ba Jeová. Iha loron neʼebá, loro-matan para ba loron tomak toʼo ema Izraél manán liurai sira husi Kanaan no sira-nia tropa hotu.