Gideão manán ema Midian

Liutiha tempu balu ema Izraél la laran-metin tan ba Jeová no adora fali maromak falsu. Durante tinan hitu, ema Midian sempre estraga ema Izraél nia toʼos no naʼok animál sira. Atu hasees an husi ema Midian, sira subar iha fatuk-kuak no foho. Sira harohan ba Jeová husu ajuda. Tan neʼe, Jeová haruka anju ida bá hasoru mane joven ida naran Gideão. Anju neʼe dehan: ‘Jeová hili ó atu sai asuwaʼin ida.’ Gideão husu: ‘Oinsá mak haʼu bele salva ema Izraél? Haʼu ema baibain deʼit.’

Oinsá mak Gideão bele fiar katak Jeová hili nia? Nia nahe bibi-fulun iha rai no dehan ba Jeová: ‘Aban dadeer, se mahobeen habokon bibi-fulun maibé rai maran hela, neʼe katak Ita hili haʼu atu salva ema Izraél.’ Dadeer tuirmai, bibi-fulun bokon maibé rai maran hela! Entaun Gideão husu fali atu aban bibi-fulun neʼe maran maibé rai mak bokon. Bainhira neʼe akontese, Gideão fiar duni katak Jeová hili ona nia. Tan neʼe nia halibur tropa sira atu funu hasoru ema Midian.

Jeová dehan ba Gideão: ‘Haʼu sei halo ema Izraél manán. Maibé ó iha tropa barak tebes, neʼe bele halo imi hanoin katak imi manán funu neʼe tanba imi rasik nia forsa. Haruka tropa neʼebé taʼuk fila fali.’ Entaun mane naʼin-22.000 fila, no hela deʼit naʼin-10.000. Maibé Jeová dehan: ‘Sei iha barak demais. Lori sira ba mota, no haruka sira hemu bee husi mota. Hili deʼit ema neʼebé matan-moris bainhira hemu bee.’ Ikusmai hela deʼit tropa naʼin-300. Jeová promete katak sira sei manán hasoru tropa Midian naʼin-135.000.

Iha kalan neʼebá, Jeová dehan ba Gideão: ‘Agora mak tempu atu ataka ema Midian!’ Gideão fó ba tropa ida-idak dikur no buli boot neʼebé uza atu subar ahi-oan. Nia dehan ba sira: ‘Haree haʼu, no halo tuir buat neʼebé haʼu halo.’ Gideão huu ninia dikur, harahun ninia buli, no hiʼit saʼe ninia ahi-oan, no hakilar: ‘Jeová no Gideão nia surik!’ Ninia tropa naʼin-300 mós halo nuneʼe. Ema Midian sai taʼuk no halai arbiru. Tanba situasaun sai runguranga, ema Midian sira ataka malu. Dala ida tan, Jeová ajuda ema Izraél manán inimigu sira.