Ana halo orasaun atu husu oan

Mane Izraél ida naran Elkana iha feen naʼin-rua, Ana no Penina, maibé nia hadomi liu Ana. Penina iha oan barak no nia sempre goza Ana tanba Ana la iha oan. Tinan-tinan, Elkana lori ninia família ba tenda santu iha Silo atu adora Jeová. Loron ida kuandu sira iha neʼebá, Elkana haree katak Ana triste tebes. Nia hatete: ‘Keta tanis Ana. Ó iha haʼu. Haʼu hadomi ó.’

Tuirmai, Ana bá halo orasaun. Nia ho tanis husu ajuda ba Jeová. Nia promete: ‘Jeová, se Ita fó oan-mane ida mai haʼu, haʼu sei fó nia ba Ita, no nia sei serbí Ita iha ninia moris tomak.’

Amlulik Boot Eli haree Ana tanis, no nia hanoin katak Ana lanu. Ana hatete: ‘Haʼu-nia naʼi, haʼu la lanu. Haʼu iha problema boot, no haʼu koʼalia ba Jeová kona-ba neʼe.’ Eli rekoñese katak nia sala no dehan: ‘Haʼu hein katak Maromak sei fó buat neʼebé ó husu.’ Ana sente kmaan no fila fali. La toʼo tinan ida, nia iha oan-mane no hanaran Samuel. Neʼe halo Ana kontente tebes, loos ka lae?

Ana la haluha ninia promesa ba Jeová. Kuandu Samuel haketak ona susu, Ana lori nia bá atu serbí iha tenda santu. Nia hatete ba Eli: ‘Uluk haʼu halo orasaun kona-ba labarik neʼe. Haʼu hakarak entrega nia ba Jeová iha ninia moris tomak.’ Tinan-tinan, Elkana no Ana vizita Samuel no lori roupa foun ba nia. Jeová fó bensaun ba Ana hodi iha tan oan-mane naʼin-tolu no oan-feto naʼin-rua.