Templu ida ba Jeová

Kuandu Salomão sai liurai ba Izraél, Jeová hatete ba nia: ‘Saida mak ó hakarak haʼu atu fó ba ó?’ Salomão hatán: ‘Haʼu mak joven deʼit no la hatene atu halo saida. Favór fó matenek atu haʼu bele tau matan ba Ita-nia povu.’ Jeová dehan: ‘Tanba ó husu matenek, haʼu sei halo ó matenek liu iha mundu. Haʼu mós sei halo ó sai riku. Se ó halo tuir haʼu, ó sei moris naruk.’

Salomão komesa harii templu. Nia uza osan-mean, osan-mutin, ai, no fatuk-murak neʼebé kualidade diʼak liu. Mane no feto barak neʼebé matenek serbisu hamutuk. Liutiha tinan hitu, templu prontu ona atu dedika ba Jeová. Salomão hakneʼak besik altár neʼebé tau ona sakrifísiu no halo orasaun: ‘Oh Jeová, Ita-Boot merese fatin neʼebé boot liu no furak liu fali templu neʼe, maibé favór simu ami-nia adorasaun no rona ami-nia orasaun.’ Jeová sente oinsá kona-ba templu no Salomão nia orasaun? Depois Salomão remata orasaun, ahi tun kedas husi lalehan no han mohu sakrifísiu. Neʼe katak Jeová kontente ho templu neʼe. Bainhira ema Izraél haree, sira hotu haksolok.

Tanba Salomão matenek tebes, nia sai naran-boot iha Izraél tomak no iha rai seluk neʼebé dook. Kuandu iha problema ruma, ema sempre husu ajuda ba nia. Liurai-feto husi Sabá mós mai atu koko nia ho pergunta neʼebé difisil. Kuandu nia rona Salomão nia resposta, nia hatete: ‘Uluk haʼu rona deʼit istória kona-ba Ita-Boot, maibé haʼu la fiar. Loloos Ita matenek liu fali buat neʼebé ema konta. Ita-nia Maromak Jeová fó ona bensaun ba Ita.’ Iha tempu neʼebá ema Izraél hotu moris diʼak no kontente. Maibé lakleur situasaun troka.