Jeová mak Maromak loos

Nasaun Izraél husi suku sanulu iha liurai aat barak, maibé Acab mak ida neʼebé aat liu. Nia kaben ho feto laran-aat naran Jezabel neʼebé adora Baal. Sira oho Jeová nia profeta no halo povu barak adora Baal. Tan neʼe Jeová haruka profeta Elias atu hatoʼo ninia mensajen ba Acab.

Elias hatete ba Liurai Acab katak tanba ninia hahalok aat, udan sei la tau iha Izraél. Durante tinan tolu liu, ai-horis sira la moris no povu sai hamlaha. Depois, Jeová haruka Elias bá hasoru fali Acab. Acab hatete: ‘Susar hotu neʼe akontese tanba ó!’ Elias hatán: ‘Rai maran laʼós tanba haʼu, maibé tanba Ita-Boot adora Baal. Mai ita haree sé mak Maromak neʼebé loos. Halibur povu no Baal nia profeta iha Foho Karmel.’

Povu halibur hamutuk iha foho. Elias hatete: ‘Imi tenke halo desizaun. Se Jeová mak Maromak loos, halo tuir nia. Se Baal mak loos, halo tuir nia. Agora, imi Baal nia profeta naʼin-450, hasaʼe sakrifísiu bá hodi bolu imi-nia maromak. Haʼu mós sei hasaʼe sakrifísiu no bolu Jeová. Ida neʼebé sei hatán ho ahi mak Maromak neʼebé loos.’ Povu konkorda.

Baal nia profeta sira prepara sakrifísiu. Loron tomak sira bolu sira-nia maromak: ‘Oh Baal, hatán mai ami!’ Maibé Baal la hatán. Elias goza Baal hodi dehan: ‘Hakilar makaʼas liután. Karik nia toba hela no presiza ema ida atu fanu nia.’ Sira kontinua bolu Baal toʼo kalan, maibé la hetan resposta.

Elias tau sakrifísiu iha altár no fakar bee ba altár neʼe. Tuirmai nia halo orasaun: ‘Oh Jeová, favór halo sira hatene katak Ita mak Maromak loos.’ Jeová hatún kedas ahi husi lalehan no han mohu sakrifísiu neʼe. Povu hakilar: ‘Jeová mak Maromak loos!’ Elias hatete: ‘Keta husik Baal nia profeta halai!’ Iha loron neʼe, Baal nia profeta naʼin-450 mate.

Tuirmai Elias haree kalohan kiʼik mosu iha tasi. Nia hatete ba Acab: ‘Udan boot atu mai ona. Saʼe ó-nia kuda-karreta no fila ona.’ Lakleur kalohan komesa nakukun, anin huu, no udan tau makaʼas. Ikusmai, rai-hamlaha remata. Acab lori kuda-karreta halai makaʼas, maibé Elias halai makaʼas liu tanba Jeová mak ajuda nia. Maibé, problema sira neʼebé Elias hasoru hotu ona ka lae? Mai ita buka-hatene.