Feto-faluk nia oan-mane moris fali

Durante rai-hamlaha no udan la tau, Jeová dehan ba Elias: ‘Laʼo ba Sarepta. Feto-faluk ida sei fó ai-han ba ó.’ Kuandu Elias toʼo iha sidade neʼe nia portaun, nia haree feto-faluk kiak ida hili hela ai. Elias husu bee ba nia atu hemu. Bainhira feto-faluk neʼe atu bá foti bee, Elias husu tan: ‘Favór, lori mós paun fuan ida mai haʼu.’ Feto-faluk neʼe dehan: ‘Haʼu la iha paun. Haʼu iha deʼit trigu no mina uitoan ba haʼu no haʼu-nia oan-mane.’ Elias dehan: ‘Jeová promete katak se ó halo paun mai haʼu, ó-nia trigu no mina sei nunka mamuk toʼo udan tau fali.’

Feto-faluk neʼe fila ba uma no tunu paun ba profeta Elias. Ikusmai, hanesan Jeová promete ona, feto-faluk neʼe no ninia oan sempre iha hahán durante rai-hamlaha. Ninia trigu no mina iha sanan-rai nunka sai mamuk.

Liutiha tempu balu susar ida akontese. Feto-faluk neʼe nia oan hetan moras no mate. Inan neʼe husu Elias nia ajuda. Elias koʼus labarik neʼe no lori ba kuartu iha andár leten. Tuirmai, nia hatoba labarik neʼe iha kama no halo orasaun: ‘Jeová, favór ida halo labarik neʼe moris fali.’ Ikusmai labarik neʼe moris fali no komesa dada iis! Neʼe mak buat furak tebes tanba tuir Bíblia, toʼo tempu neʼebá seidauk iha ema mate neʼebé moris fila fali. Liután neʼe, feto-faluk neʼe no ninia oan mós laʼós ema Izraél.

Elias dehan ba feto neʼe: ‘Haree bá! Ó-nia oan moris fali ona.’ Feto neʼe kontente tebes no dehan ba Elias: ‘Ita mak Maromak nia atan duni, tanba Ita fó sai deʼit buat neʼebé Jeová haruka no neʼe sempre sai loos.’