Josias hadomi Maromak nia Ukun-Fuan

Josias sai liurai ba nasaun Judá bainhira nia tinan ualu. Iha tempu neʼebá, povu adora maromak falsu no halo buat oioin neʼebé liga ho májiku. Maibé bainhira Josias tinan 16, nia buka-hatene oinsá atu adora Jeová iha dalan neʼebé loos. Bainhira nia tinan 20, nia komesa halakon maromak falsu no altár sira husi nasaun Judá. No bainhira Josias tinan 26, nia halo arranju atu hadiʼa Jeová nia templu.

Iha templu laran, amlulik boot Hilquias hetan surat-tahan lulun neʼebé hakerek Jeová nia Ukun-Fuan, karik ida neʼebé Moisés rasik mak hakerek. Liurai nia sekretáriu Safan lori ida-neʼe ba Liurai Josias no hahú lee Ukun-Fuan ba nia. Kuandu Josias rona, nia hatene katak tinan barak ona povu la halo tuir Jeová. Liurai Josias dehan ba Hilquias: ‘Jeová hirus tebes ho ita. Husu ba Jeová saida mak ita presiza halo.’ Jeová hatán liuhusi profeta feto naran Hulda: ‘Povu Judá husik tiha haʼu. Sira sei hetan kastigu, maibé laʼós iha tempu neʼebé Josias mak ukun, tanba nia haraik an no prontu atu halo tuir haʼu.’

Bainhira Liurai Josias rona lia-menon neʼe, nia bá templu no halibur povu Judá. Tuirmai nia lee Jeová nia Ukun-Fuan ho lian makaʼas ba sira hotu. Josias no povu promete atu halo tuir Jeová ho laran tomak.

Ba tinan barak nasaun Judá la selebra Páskua. Bainhira Josias lee mandamentu neʼebé hatete katak presiza selebra Páskua tinan-tinan, nia dehan ba povu: ‘Ita sei selebra Páskua ba Jeová.’ Tuirmai, Josias prepara sakrifísiu barak no arranja kantadór sira iha templu. Ikusmai povu Judá selebra Páskua, no tuirmai halaʼo Festa Paun Fermentu-Laek nian ba loron hitu. Husi Samuel nia tempu, seidauk iha selebrasaun Páskua hanesan neʼe. Josias hadomi tebes Maromak nia Ukun-Fuan. Ó mós gosta aprende kona-ba Jeová ka lae?