Pedro nega Jesus

Bainhira Jesus hamutuk ho apóstolu sira iha kuartu iha andár leten, nia dehan: ‘Ohin kalan, imi hotu sei husik hela haʼu.’ Pedro hatán: ‘Maski sira seluk husik hela Ita, haʼu sei nunka husik Ita!’ Maibé Jesus dehan ba Pedro: ‘Antes manu kokoreek, ó sei nega haʼu ba dala tolu.’

Bainhira soldadu lori Jesus ba Caifás nia uma, apóstolu balu halai tiha. Maibé iha apóstolu naʼin-rua neʼebé laʼo tuir ema-lubun. Ida mak Pedro. Nia laʼo toʼo pátiu iha amlulik boot Caifás nia uma no tuur hodi haneruk ahi. Lakleur, atan-feto ida hateke ba Pedro no dehan: ‘Haʼu koñese ó. Ó mós hamutuk ho Jesus!’

Pedro dehan: ‘Lae. Haʼu la hatene ó koʼalia kona-ba saida!’ Pedro laʼo hakbesik ba portaun. Maibé atan-feto seluk tan haree nia no dehan ba ema-lubun: ‘Mane neʼe mós hamutuk ho Jesus!’ Pedro dehan: ‘Haʼu la koñese Jesus!’ Mane ida tan dehan: ‘Ó mós ida husi sira! Haʼu hatene husi ó-nia logat katak ó mak ema Galileia hanesan Jesus.’ Maibé Pedro jura hodi dehan: ‘Haʼu la koñese nia!’

Iha momentu neʼe kedas, manu ida kokoreek. Pedro haree Jesus hateke ba nia. Pedro hanoin-hetan Jesus nia liafuan. Nia sai ba liʼur ho triste no tanis makaʼas.

Iha tempu neʼebá, membru Sinédriu sira halibur hamutuk atu tesi-lia ba Jesus iha Caifás nia uma. Sira deside ona atu oho Jesus, no sira buka razaun atu halo ida-neʼe. Maibé sira la hetan sala ida husi Jesus. Ikusmai, Caifás husu Jesus: ‘Ó mak Maromak nia Oan ka?’ Jesus dehan: ‘Sin.’ Caifás dehan: ‘Ita la presiza buka razaun seluk tan. Nia koʼalia aat Maromak!’ Sira hotu konkorda katak Jesus tenke mate. Sira basa Jesus, tafui kabeen ba nia, taka ninia matan, no baku nia hodi hatete: ‘Se ó mak profeta, siʼik toʼok sé mak baku ó!’

Bainhira dadeer ona, sira lori Jesus ba fatin Sinédriu no husu dala ida tan: ‘Ó mak Maromak nia Oan ka?’ Jesus hatán: ‘Imi rasik mak dehan nuneʼe.’ Sira deside katak Jesus sala tanba koʼalia aat Maromak. Tuirmai sira lori nia ba Governadór Roma naran Pónsio Pilatos nia uma. Saida mak akontese tuirmai? Mai ita buka-hatene.