Jesus hili Saul

Saul mak sidadaun Roma neʼebé moris iha Tarsu. Nuʼudar ema Farizeu nia matenek kona-ba ema Judeu nia Ukun-Fuan, no odi ema Kristaun. Nia lori mane no feto Kristaun husi sira-nia uma no hatama ba komarka. Saul mós hamriik no haree bainhira ema-lubun tuda mate dixípulu Estevão.

Saul sente katak la toʼo atu kaer deʼit ema Kristaun iha Jeruzalein. Nia husu amlulik boot atu haruka nia bá sidade Damasku atu bele kaer ema Kristaun iha neʼebá. Bainhira Saul besik atu tama ba sidade, derrepente naroman nabilan haleʼu nia, no nia monu ba rai. Nia rona lian ida dehan: ‘Saul, tanbasá ó fó-terus mai haʼu?’ Saul husu: ‘Ita mak sé?’ Lian neʼe dehan: ‘Haʼu mak Jesus. Bá Damasku, no ó sei aprende buat neʼebé ó tenke halo.’ Iha tempu neʼe kedas, Saul sai matan-delek no ema tenke kaer ninia liman hodi lori nia tama ba sidade.

Iha ema Kristaun laran-metin ida naran Ananias iha Damasku. Liuhusi vizaun ida, Jesus dehan ba nia: ‘Bá Judas nia uma iha dalan naran Loos, no buka mane ida naran Saul.’ Ananias dehan: ‘Naʼi, haʼu hatene mane neʼe. Nia hatama dixípulu sira ba komarka!’ Maibé Jesus dehan: ‘Bá hasoru nia. Haʼu hili ona Saul atu haklaken liafuan diʼak iha nasaun oioin.’

Entaun Ananias hasoru Saul no dehan: ‘Saul, haʼu-nia maun, Jesus haruka haʼu atu loke ó-nia matan.’ Momentu neʼe kedas, Saul bele haree fali. Nia aprende kona-ba Jesus no hetan batizmu nuʼudar ema Kristaun no komesa haklaken iha sinagoga hamutuk ho maluk Kristaun. Imajina toʼok oinsá ema Judeu hakfodak kuandu haree Saul hanorin ema kona-ba Jesus. Sira dehan: ‘Neʼe mak mane neʼebé uluk haterus Jesus nia dixípulu sira, loos ka lae?’

Durante tinan tolu, Saul haklaken iha Damasku. Ema Judeu odi Saul no halo planu atu oho nia. Maibé ninia maluk sira rona kona-ba planu neʼe no ajuda nia atu halai. Sira tau nia iha bote boot no hatún nia liuhusi janela iha sidade nia moru.

Bainhira Saul bá Jeruzalein, nia koko atu halibur hamutuk ho maluk sira iha neʼebá. Maibé sira taʼuk. Entaun, dixípulu laran-diʼak ida naran Barnabé lori Saul bá hasoru apóstolu sira, no ajuda sira fiar katak Saul troka ona ninia hahalok. Saul komesa haklaken ho laran-manas hamutuk ho kongregasaun iha Jeruzalein. Ikusmai ema koñese nia nuʼudar Paulo.