LISAUN 15

Koʼalia ho fiar-metin

1 Tesalónika 1:5

SAIDA MAK ITA PRESIZA HALO: Koʼalia ho fiar-metin, no hatudu katak Ita fiar duni buat neʼebé Ita dehan mak loos no importante.

Prepara didiʼak. Estuda informasaun toʼo Ita komprende didiʼak oinsá Bíblia bele prova katak neʼe mak loos. Koko atu fó sai pontu importante ho liafuan balu neʼebé simples. Hanoin didiʼak oinsá informasaun neʼe bele ajuda rona-naʼin. Halo orasaun no husu Jeová nia espíritu santu.

Pratika ho lian makaʼas atu nuneʼe Ita bele komprende ideia sira iha Ita-nia neon no hadiʼa liután dalan neʼebé Ita hatoʼo informasaun.
Uza liafuan neʼebé hatudu fiar-metin. Duké lee deʼit liafuan husi livru ka nota, diʼak liu uza Ita-nia liafuan rasik. Hili liafuan sira neʼebé hatudu katak Ita fiar duni buat neʼebé Ita dehan.
Koʼalia ho laran-diʼak no husi laran. Koʼalia ho lian natoon. Se bele, hateke ba rona-naʼin nia oin.

Koʼalia ho fiar-metin la dehan katak la hanoin uluk antes koʼalia, koʼalia tuir deʼit Ita-nia hanoin, ka obriga ema atu simu deʼit Ita-nia hanoin maski la iha prova. Ita presiza koʼalia husi laran no hatoʼo ida-neʼe ho domin no hanoin ema.