Relijiaun falsu halo ema hanoin sala kona-ba Maromak

Se Maromak mak domin, tanbasá relijiaun sira neʼebé dehan katak sira reprezenta Maromak, halo hahalok neʼebé aat tebes? Resposta simples mak tanba relijiaun sira-neʼe falsu. Sira halo ema hanoin sala kona-ba Maromak. Oinsá mak sira halo nuneʼe? Maromak sente oinsá kona-ba neʼe? No saida mak nia sei halo ba relijiaun falsu?

1. Oinsá mak relijiaun falsu halo ema hanoin sala kona-ba Maromak liuhusi sira-nia hanorin?

Relijiaun falsu “troka lia-loos kona-ba Maromak ho lia-bosok”. (Roma 1:25) Porezemplu, maski Bíblia dehan katak tenke uza Maromak nia naran, maibé relijiaun barak la hanorin ema kona-ba naran neʼe. (Roma 10:13, 14) Ulun-naʼin relijiaun balu dehan katak buat aat akontese tanba Maromak nia hakarak. Maibé neʼe bosok. Maromak nunka halo buat neʼebé aat. (Lee Tiago 1:13.) Triste mak relijiaun sira-nia hanorin bosok halo ema barak dook husi Maromak.

2. Oinsá mak relijiaun falsu halo ema hanoin sala kona-ba Maromak liuhusi sira-nia hahalok?

Relijiaun falsu nia dalan atu trata ema la hanesan ho Jeová nia dalan. Bíblia hatete katak relijiaun falsu nia “sala sira sai barak tebes toʼo lalehan”. (Apokalipse 18:5) Tinan atus ba atus ona, relijiaun sira mete iha polítiku, apoia funu, no halo ka apoia violénsia neʼebé oho ema barak tebes. Ulun-naʼin relijiaun balu hakarak sai riku hodi husu ninia ema atu fó osan ba sira. Hahalok sira-neʼe hatudu duni katak sira la hatene Maromak, tan neʼe labele dehan katak sira reprezenta Maromak.​—Lee 1 João 4:8.

3. Maromak sente oinsá kona-ba relijiaun falsu sira?

Se Ita sente hirus ho relijiaun falsu nia hahalok sira, tuir Ita-nia hanoin, Jeová fali sente oinsá? Maski nia hadomi ema, maibé nia la kontente ho ulun-naʼin relijiaun sira neʼebé halo ema hanoin sala kona-ba nia no trata ema iha dalan neʼebé la diʼak. Maromak promete katak lakleur tan nia sei halakon relijiaun falsu hotu no “ema sei nunka hetan fali”.​—Apokalipse 18:8, 21.

KEʼE KLEʼAN

4. Laʼós relijiaun hotu mak Maromak simu

Ema barak fiar katak relijiaun sira mak hanesan dalan oioin neʼebé lori ita ba Maromak. Maibé neʼe loos ka lae? Lee Mateus 7:13, 14, depois koʼalia hamutuk kona-ba pergunta tuirmai:

• Saida mak Bíblia hatete kona-ba dalan neʼebé lori ba moris?

Loke VÍDEO, depois koʼalia hamutuk kona-ba pergunta tuirmai.

VÍDEO: Maromak simu adorasaun hotu ka lae?​—Vídeo badak (3:22)

• Bíblia dehan katak relijiaun hotu halo Maromak kontente ka lae?

5. Relijiaun falsu la haleno Maromak nia hahalok domin

Relijiaun falsu hafoʼer Maromak nia naran iha dalan oioin. Dalan ida mak hodi envolve an iha funu. Atu haree ezemplu ida, loke VÍDEO. Depois koʼalia hamutuk kona-ba pergunta tuirmai.

VÍDEO: Igreja sira apoia Funu Mundiál Segundu (2:22)

• Saida mak igreja sira halo durante Funu Mundiál Segundu?

• Ita sente oinsá kona-ba buat neʼebé sira halo?

Lee João 13:34, 35 no 17:16. Depois koʼalia hamutuk kona-ba pergunta tuirmai:

• Tuir Ita-nia hanoin, Jeová sente oinsá bainhira haree relijiaun sira envolve an iha funu?

• Buat aat barak akontese iha mundu neʼe tanba relijiaun falsu nia hahalok. Tuir Ita-nia haree, iha dalan saida deʼit mak relijiaun sira la haleno Maromak nia domin?

6. Maromak hakarak ema livre husi relijiaun falsu

Lee Apokalipse 18:4,a depois koʼalia hamutuk kona-ba pergunta tuirmai:

• Ita sente oinsá kuandu hatene katak Maromak hakarak ajuda ema neʼebé monu ona ba relijiaun falsu nia hanorin?

7. Kontinua aprende kona-ba Maromak neʼebé loos

Ita labele hanoin sala kona-ba Maromak tan deʼit hahalok aat husi relijiaun falsu. Hanoin toʼok oan ida neʼebé boot ona la halo tuir ninia aman nia matadalan neʼebé matenek, tuirmai nia sai husi uma no halo hahalok aat oioin. Aman neʼe la simu ninia oan nia hahalok aat sira. Tanbasá la diʼak atu duun aman neʼe kona-ba oan neʼe nia hahalok aat?

• Tanbasá la diʼak atu duun Jeová no para atu aprende kona-ba nia tan deʼit relijiaun falsu nia hahalok?

PONTU IMPORTANTE

Relijiaun falsu halo ema hanoin sala kona-ba Maromak liuhusi sira-nia hanorin no hahalok. Maromak sei halakon relijiaun falsu hotu.

Rezumu

• Ita sente oinsá kona-ba relijiaun falsu nia hanorin no hahalok?

• Jeová sente oinsá kona-ba relijiaun falsu?

• Saida mak Jeová sei halo ba relijiaun falsu?

BUKA-HATENE LIUTÁN

Haree dalan rua oinsá mak relijiaun barak la halo Maromak kontente.

“Relijiaun hotu mak hanesan deʼit ka lae? Relijiaun hotu ajuda ita hakbesik ba Maromak ka lae?” (Informasaun iha jw.org/tdt)

Tanbasá Jeová hakarak ita atu adora nia hamutuk ho ema seluk?

“Ita presiza tuir relijiaun ida ka lae?” (Informasaun iha jw.org/tdt)

Padre ida la kontente ho ninia relijiaun. Maibé neʼe la hanetik nia atu aprende kona-ba Maromak.

“Padre ida sai husi ninia igreja” (Informasaun husi Matan-moris bá!)

Ba tempu barak, relijiaun falsu hanorin lia-bosok sira neʼebé halo ema hanoin katak Maromak mak laran-aat no la interese ba ita. Haree saida mak Bíblia hatete kona-ba lia-bosok tolu.

“Lia-bosok neʼebé hadook ema husi Maromak” (Informasaun husi Livru Haklaken)