LISAUN 26
Tanbasá mak terus no buat aat akontese?
“Tanbasá?” Neʼe mak pergunta neʼebé baibain ema husu kuandu buat aat ruma akontese. Ita kontente tebes tanba Bíblia fó-hatene mai ita resposta ba pergunta neʼe!
1. Oinsá mak Satanás hamosu buat aat iha mundu neʼe?
Diabu Satanás kontra hasoru Maromak. Satanás hakarak sai ukun-naʼin, tan neʼe nia fó influénsia ba ema primeiru, Adão no Eva, atu apoia nia hodi kontra Maromak. Satanás halo ida-neʼe hodi bosok Eva. (Génesis 3:1-5) Nia halo Eva hanoin katak Jeová lakohi atu Eva hetan buat neʼebé diʼak. Nia hakarak ema hanoin katak sira sei moris kontente liu se sira la halo tuir Maromak. Satanás koʼalia lia-bosok primeiru ba Eva katak Eva sei la mate. Tan neʼe Bíblia bolu Satanás nuʼudar “bosok-teen no lia-bosok nia aman”.—João 8:44.
2. Adão no Eva hili atu halo saida?
Jeová hatudu laran-luak tebes ba Adão no Eva. Nia dehan sira bele han ai-fuan husi ai-hun hotu iha jardín Eden, maibé só ida deʼit mak labele. (Génesis 2:15-17) Maibé sira hili atu han ai-fuan husi ai-hun neʼebé Maromak bandu. Eva “hahú kuʼu ai-fuan neʼe no han”. Tuirmai Adão “mós han”. (Génesis 3:6) Sira la halo tuir Maromak. Tanba Adão no Eva mak perfeitu, tuir loloos fasil deʼit ba sira atu halo buat neʼebé loos. Maibé tanba sira ho neon la halo tuir Maromak, neʼe katak sira halo sala no la simu Maromak nuʼudar sira-nia Ukun-Naʼin. Sira-nia desizaun neʼe lori susar boot.—Génesis 3:16-19.
3. Oinsá mak Adão no Eva nia desizaun kona ita?
Kuandu Adão no Eva halo tiha sala, sira la perfeitu tan no sira habelar kondisaun la perfeitu neʼe ba sira-nia bei-oan hotu. Kona-ba Adão, Bíblia hatete: “Sala tama iha mundu liuhusi ema ida, no mate tanba sala. Nuneʼe ema hotu mate.”—Roma 5:12.
Ita hasoru susar tanba razaun oioin. Dala ruma ita hasoru susar tanba desizaun la diʼak neʼebé ita rasik halo ka tanba ema seluk nia desizaun neʼebé la diʼak. Dala ruma ita hasoru susar tanba ita iha fatin no tempu neʼebé sala.—Lee Eclesiastes 9:11.
KEʼE KLEʼAN
Aprende kona-ba tanbasá ita bele fiar katak terus no buat aat hotu laʼós mai husi Maromak, no nia sente oinsá kona-ba ita-nia terus.
4. Terus mai husi neʼebé?
Ema barak hanoin katak Maromak mak ukun mundu neʼe, maibé neʼe loos ka lae? Loke VÍDEO.
Lee Tiago 1:13 no 1 João 5:19, depois koʼalia hamutuk kona-ba pergunta tuirmai:
Terus no buat aat mai husi Maromak ka lae?
5. Rezultadu husi Satanás nia ukun
Lee Génesis 3:1-6, depois koʼalia hamutuk kona-ba pergunta tuirmai:
Satanás koʼalia lia-bosok saida?—Haree versíkulu 4 no 5.
Oinsá mak Satanás duun katak Jeová lakohi fó buat neʼebé diʼak ba ema?
Tuir Satanás nia hanoin, ema presiza Jeová nuʼudar sira-nia Ukun-Naʼin atu bele moris kontente ka lae?
Lee Eclesiastes 8:9, depois koʼalia hamutuk kona-ba pergunta tuirmai:
Tanba Jeová laʼós ukun-naʼin ba mundu neʼe, mundu nia situasaun sai oinsá?
Uluk Adão no Eva perfeitu no moris iha Paraízu. Maibé sira rona liu ba Satanás no kontra hasoru Jeová
Tanba sira kontra, ikusmai sala, terus no mate tama iha mundu
Jeová sei halakon tiha sala, terus no mate. Ema sei sai perfeitu fali no moris iha Paraízu
6. Jeová hanoin ita-nia terus
Oinsá ita hatene katak Maromak hanoin ita-nia terus? Hanoin toʼok kona-ba buat neʼebé Liurai David no apóstolu Pedro hakerek. Lee Salmo 31:7 no 1 Pedro 5:7, depois koʼalia hamutuk kona-ba pergunta tuirmai:
Tanba hatene katak Jeová haree no hanoin ita-nia terus, neʼe halo Ita sente oinsá?
7. Maromak sei halakon ema nia terus hotu
Lee Isaias 65:17 no Apokalipse 21:3, 4, depois koʼalia hamutuk kona-ba pergunta tuirmai:
Hodi hatene katak Maromak sei halakon no hadiʼa buat aat hotu iha mundu neʼe, oinsá mak neʼe halo Ita sente kmaan?
Ita hatene ka lae?
Bainhira Satanás koʼalia lia-bosok primeiru, nia hafoʼer Jeová nia naran hodi halo ema hanoin katak Jeová mak Ukun-Naʼin neʼebé la iha domin. Lakleur tan kuandu Jeová halakon ema nia terus hotu, nia sei hatudu katak nia mak Ukun-Naʼin neʼebé diʼak liu hotu. Hodi halo nuneʼe, nia sei halo santu ninia naran. Atu halo santu Jeová nia naran mak buat neʼebé importante tebes iha universu neʼe.—Mateus 6:9, 10.
EMA BALU DEHAN: “Buat diʼak no aat hotu mai husi Maromak.”
Ita sei hatán saida?
PONTU IMPORTANTE
Terus no buat aat barak neʼebé akontese iha mundu neʼe tanba Diabu Satanás, Adão no Eva nia hahalok. Jeová hanoin tebes kona-ba ita-nia terus, no lakleur tan nia sei halakon terus hotu.
Rezumu
Satanás koʼalia lia-bosok saida ba Eva?
Tanba Adão no Eva kontra Maromak, oinsá mak ida-neʼe kona ita hotu?
Oinsá mak ita hatene katak Jeová hanoin ita-nia terus?
BUKA-HATENE LIUTÁN
Aprende saida mak Bíblia nia hanorin kona-ba sala.
Aprende liután kona-ba lia-bosok neʼebé Diabu Satanás koʼalia iha jardín Eden.
“Tanbasá Maromak husik ita hetan terus?” (Informasaun husi Livru Haklaken)
Haree resposta sira neʼebé bele halo ita sente kmaan.
“Tanbasá Holocaust akontese? Tanbasá Maromak la hapara ida-neʼe?” (Informasaun iha jw.org/tdt)
Haree saida mak mane ida aprende kona-ba susar neʼebé haleʼu nia.