LISAUN 55
Apoia Ita-nia kongregasaun
Ema millaun ba millaun iha mundu tomak ho kontente adora Jeová iha kongregasaun rihun ba rihun. Sira hafolin matadalan neʼebé sira simu, no ho laran apoia kongregasaun iha dalan oioin. Ita mós sente hanesan neʼe kona-ba Ita-nia kongregasaun ka lae?
1. Oinsá mak Ita bele uza tempu no forsa atu apoia kongregasaun?
Ita hotu bele apoia malu iha kongregasaun laran. Porezemplu, iha ka lae ema ruma neʼebé idade ona? Ita bele ajuda lori sira bá tuir reuniaun ka lae? Ka Ita bele ajuda sira iha dalan seluk, hanesan bá kompras ka hamoos sira-nia uma? (Lee Tiago 1:27.) Ita mós bele ajuda hamoos no tau matan ba ita-nia Reuniaun-Fatin. La iha ema ida mak obriga ita atu halo buat sira-neʼe. Domin ba Maromak no irmaun-irmán sira mak book ita atu ‘fó ita-nia an ho hakarak rasik’.—Salmo 110:3.
Testemuña neʼebé batizmu ona bele apoia kongregasaun iha dalan seluk tan. Irmaun sira neʼebé kumpre kritéria bele serbí nuʼudar atan ka katuas ba kongregasaun. No irmaun-irmán sira mós bele serbí nuʼudar pioneiru atu apoia serbisu haklaken. Testemuña balu bele hola parte atu ajuda harii fatin adorasaun ka muda ba kongregasaun neʼebé presiza ajuda liután.
2. Oinsá mak ita bele uza osan ka sasán neʼebé ita iha atu apoia kongregasaun?
Ita bele ‘hahiʼi Jeová ho ita-nia sasán neʼebé folin-boot’. (Provérbios 3:9) Ita kontente atu fó osan ka sasán ruma nuʼudar kontribuisaun atu apoia ita rasik nia kongregasaun no serbisu haklaken iha mundu tomak. (Lee 2 Korinto 9:7.) Ita-nia kontribuisaun mós uza atu ajuda iha tempu dezastre. Irmaun-irmán barak planu nanis atu “tau ketak buat ruma” nuʼudar sira-nia kontribuisaun. (Lee 1 Korinto 16:2.) Ita bele fó kontribuisaun liuhusi kaixa kontribuisaun iha reuniaun-fatin ka liuhusi online iha donate.jw.org. Jeová fó mai ita oportunidade atu hatudu ita-nia domin ba nia liuhusi buat neʼebé ita iha.
KEʼE KLEʼAN
Haree saida deʼit mak Ita bele halo atu apoia kongregasaun.
3. Ita bele fó buat neʼebé ita iha
Jeová no Jesus hadomi ema neʼebé fó ho laran. Porezemplu, Jesus hafolin feto-faluk kiak ida neʼebé fó buat neʼebé nia iha nuʼudar kontribuisaun. Lee Lucas 21:1-4, depois koʼalia hamutuk kona-ba pergunta tuirmai:
Ita presiza fó osan barak ka lae atu halo Jeová kontente?
Jeová no Jesus sente oinsá bainhira ita fó kontribuisaun ho laran?
Atu hatene kontribuisaun sira sei uza iha dalan oinsá, loke VÍDEO. Depois koʼalia hamutuk kona-ba pergunta tuirmai.
Oinsá mak Jeová nia organizasaun uza kontribuisaun atu apoia kongregasaun iha mundu tomak?
4. Ita bele halo serbisu nuʼudar voluntáriu
Iha Bíblia nia tempu, Jeová nia povu serbisu ho badinas atu tau matan ba sira-nia fatin adorasaun. No neʼe laʼós deʼit hodi fó osan nuʼudar kontribuisaun. Lee 2 Krónikas 34:9-11, depois koʼalia hamutuk kona-ba pergunta tuirmai:
Oinsá mak povu Izraél hotu ajuda tau matan ba Jeová nia uma ka fatin adorasaun?
Atu haree oinsá Testemuña ba Jeová halo tuir ezemplu husi Bíblia, loke VÍDEO. Depois koʼalia hamutuk kona-ba pergunta tuirmai.
Tanbasá importante atu tau matan ba ita-nia Reuniaun-Fatin atu moos nafatin no iha kondisaun neʼebé diʼak?
Ita bele ajuda iha dalan saida deʼit?
5. Irmaun sira bele kumpre kritéria atu halaʼo knaar barak liután
Bíblia enkoraja mane Kristaun sira atu hakaʼas an halo buat hotu neʼebé sira bele hodi apoia kongregasaun. Atu haree ezemplu ida, loke VÍDEO. Depois koʼalia hamutuk kona-ba pergunta tuirmai.
Saida mak book Rui atu hakaʼas an apoia liután kongregasaun?
Bíblia esplika kona-ba kritéria neʼebé irmaun sira presiza kumpre atu bele serbí nuʼudar atan no katuas ba kongregasaun. Lee 1 Timóteo 3:1-13, depois koʼalia hamutuk kona-ba pergunta tuirmai:
Irmaun ida presiza kumpre kritéria saida deʼit atu bele serbí nuʼudar atan ka katuas?
Ninia família presiza hatudu hahalok oinsá?—Haree versíkulu 4 no 11.
Kongregasaun sei hetan benefísiu saida kuandu irmaun sira hakaʼas an kumpre kritéria sira-neʼe?
KARIK EMA SEI HUSU: “Testemuña ba Jeová hetan osan husi neʼebé atu halaʼo sira-nia atividade?”
Ita sei hatán oinsá?
PONTU IMPORTANTE
Jeová hafolin tebes ita-nia hakaʼas an atu fó ita-nia tempu, forsa, no buat naran deʼit neʼebé ita iha hodi bele apoia kongregasaun.
Rezumu
Oinsá mak ita bele uza tempu no forsa atu apoia kongregasaun?
Oinsá mak ita bele uza osan ka sasán neʼebé ita iha atu apoia kongregasaun?
Ita hakarak apoia kongregasaun iha dalan saida deʼit?
BUKA-HATENE LIUTÁN
Haree tanbasá mak ohin loron Maromak la husu atu fó porsentu sanulu.
“Saida mak Bíblia hatete kona-ba fó porsentu sanulu?” (Informasaun iha jw.org/tdt)
Bíblia fó knaar balu ba mane neʼebé hetan ona batizmu. Maibé oinsá se feto ida neʼebé hetan ona batizmu mak presiza halo knaar sira-neʼe?.
Komprende arranju ulun nian iha kongregasaun ka lae? (Livru Haklaken, Fevereiru 2021)
Haree Testemuña sira neʼebé aten-brani no halo sakrifísiu atu lori livru ba maluk fiar-naʼin sira.
Haree oinsá Testemuña ba Jeová la hanesan ho organizasaun relijiaun seluk kona-ba halibur kontribuisaun.