LISAUN 56
Haburas unidade iha kongregasaun
Kuandu ita hamutuk ho maluk Kristaun, ita sente hanesan Liurai David neʼebé dehan: “Diʼak tebes no kmanek loos bainhira maun-alin sira hela hamutuk ho unidade!” (Salmo 133:1) Maibé unidade la mosu mesak deʼit. Ita hotu presiza halo buat ruma atu haburas unidade neʼe.
1. Tanbasá unidade iha Maromak nia povu mak espesiál tebes?
Se Ita tuir reuniaun iha rai seluk, Ita sei sente kmaan no kontente maski la komprende língua. Tanbasá? Tanba ita estuda Bíblia hodi uza publikasaun neʼebé hanesan iha fatin hotu no ita mós hakaʼas an atu hatudu domin ba malu. Maski ita hela iha fatin naran deʼit, ita hotu “bolu Jeová nia naran, hodi adora nia ho unidade”.—Sofonias 3:9.
2. Saida mak Ita bele halo atu haburas unidade?
“Hadomi malu tebetebes bá husi laran.” (1 Pedro 1:22) Oinsá mak ita bele halo tuir konsellu neʼe? Duké fokus ba ema seluk nia fraku, diʼak atu tau atensaun ba sira-nia hahalok diʼak. Duké ransu deʼit ho ema neʼebé iha hanoin hanesan ho Ita, koko toʼok atu ransu ho irmaun-irmán seluk. Ita mós bele hakaʼas an atu halakon sentimentu diskriminasaun husi ita-nia laran.—Lee 1 Pedro 2:17.a
3. Saida mak Ita sei halo kuandu iha problema ho maluk Kristaun ida?
Ita iha unidade, maibé ita hotu la perfeitu. Dala ruma ita halo ema seluk laran-kraik ka laran-kanek. Tan neʼe Maromak nia Liafuan dehan: “Kontinua . . . fó perdua ba malu. . . . Hanesan Jeová prontu atu fó perdua ba imi ho laran tomak, imi mós tenke halo nuneʼe.” (Lee Koloso 3:13.) Ita hakanek Jeová nia laran dala barak, maibé nia sempre fó perdua mai ita. Tan neʼe, nia hakarak ita atu kontinua fó perdua ba ita-nia maluk sira. Se Ita rekoñese katak Ita hakanek ona ema ruma nia laran, halo buat ruma atu hadiʼa problema neʼe.—Lee Mateus 5:23, 24.b
KEʼE KLEʼAN
Buka-hatene saida deʼit mak ita bele halo atu haburas unidade no dame iha kongregasaun laran.
Saida mak Ita presiza halo atu hadame malu?
4. Halakon sentimentu diskriminasaun
Ita hakarak hadomi ita-nia maluk Kristaun hotu. Maibé karik ita sente susar atu habelun ho ema neʼebé la hanesan ho ita. Saida mak bele ajuda? Lee Apóstolu 10:34, 35, depois koʼalia hamutuk kona-ba pergunta tuirmai:
Jeová simu ema oioin nuʼudar ninia Testemuña. Oinsá mak Ita bele halo tuir Jeová nia ezemplu bainhira ransu ho ema neʼebé la hanesan ho Ita?
Hahalok diskriminasaun hanesan saida mak ema barak hatudu iha ita-nia área? Tanbasá ita presiza hadook an husi ida-neʼe?
Lee 2 Korinto 6:11-13, depois koʼalia hamutuk kona-ba pergunta tuirmai:
Oinsá mak Ita bele habelun ho irmaun-irmán sira neʼebé la hanesan ho Ita?
5. Fó perdua ho laran no halo dame
Jeová la presiza ita atu fó perdua ba nia tanba nia perfeitu. Maski nuneʼe, nia sempre prontu atu fó perdua mai ita ho laran-luak. Lee Salmo 86:5, depois koʼalia hamutuk kona-ba pergunta tuirmai:
Eskritura neʼe hatudu saida kona-ba Jeová?
Tanbasá mak Ita agradese ba dalan neʼebé Jeová fó perdua ba Ita?
Situasaun saida deʼit mak bele halo susar mai ita atu nafatin iha dame ho ema seluk?
Oinsá mak ita bele halo tuir Jeová nia ezemplu no nafatin iha unidade ho ita-nia irmaun-irmán sira? Lee Provérbios 19:11, depois koʼalia hamutuk kona-ba pergunta tuirmai:
Kuandu ema ruma halo Ita la kontente ka hakanek Ita-nia laran, saida mak Ita bele halo atu hadiʼa situasaun neʼe?
Dala ruma ita hakanek ema seluk nia laran. Kuandu ida-neʼe akontese, ita presiza halo saida? Loke VÍDEO, depois koʼalia hamutuk kona-ba pergunta tuirmai.
Irmán iha vídeo neʼe halo saida atu hadame malu?
6. Fokus ba irmaun-irmán sira-nia hahalok diʼak
Kuandu ita koñese didiʼak ita-nia irmaun-irmán sira, ita bele hatene sira-nia hahalok diʼak no mós sira-nia fraku. Oinsá mak ita bele fokus ba sira-nia hahalok diʼak? Loke VÍDEO, depois koʼalia hamutuk kona-ba pergunta tuirmai.
Saida mak bele ajuda Ita fokus ba irmaun-irmán sira-nia hahalok diʼak?
Jeová fokus ba ita-nia hahalok diʼak. Lee 2 Krónikas 16:9a, depois koʼalia hamutuk kona-ba pergunta tuirmai:
Hodi hatene katak Jeová fokus ba Ita-nia hahalok diʼak, neʼe halo Ita sente oinsá?
Maski fatuk-diamante tohik, maibé nafatin furak no iha folin-boot. Hanesan neʼe mós, maski ita-nia irmaun-irmán hotu la perfeitu, maibé sira iha folin-boot ba Jeová
EMA BALU DEHAN: “Antes haʼu perdua ema neʼe, nia mak tenke husu uluk deskulpa.”
Tanbasá mak ita presiza prontu atu fó perdua ba ema seluk?
PONTU IMPORTANTE
Ita bele haburas unidade iha kongregasaun laran hodi fó perdua no hatudu domin ba irmaun-irmán hotu.
Rezumu
Oinsá mak Ita bele halakon sentimentu diskriminasaun?
Saida mak Ita sei halo kuandu iha problema ho maluk Kristaun ida?
Tanbasá mak Ita hakarak halo tuir Jeová nia ezemplu kona-ba fó perdua ba ema seluk?
BUKA-HATENE LIUTÁN
Aprende oinsá mak Jesus nia ai-knanoik ida bele ajuda ita atu la tesi-lia ba ema seluk.
Se ita sente ita la sala, neʼe katak ita la presiza husu deskulpa ka lae?
“Husu deskulpa—Xave ida atu hetan dame” (Livru Haklaken, 1 Novembru 2002)
Haree oinsá ema balu aprende atu la diskrimina ema seluk.
Haree oinsá mak Ita bele rezolve problema ho ema seluk antes estraga dame iha kongregasaun.
a Apéndise 6 esplika oinsá mak domin bele book ema Kristaun atu kuidadu tebes hodi la hadaʼet moras ba ema seluk.
b Apéndise 7 esplika oinsá atu rezolve problema kona-ba negósiu no buat legál.