Pergunta husi lee-naʼin

◼ Liurai Saul jura katak soldadu neʼebé han antes funu remata sei hetan malisan. Maibé tuirmai Jonatan han bani-been, neʼe halo Jeová la kontente ka lae?

Saul la hatudu matenek bainhira nia halo juramentu ho ansi. No Bíblia la dehan katak Jeová la kontente ho Jonatan kuandu nia han bani-been.

Ita bele lee istória neʼe husi Primeiru Samuel 14:24-45. Jonatan dirije tropa Izraél sira atu funu hasoru sira-nia inimigu, ema Filístia. Liurai Saul dehan: “Malisan ba ema neʼebé han ai-han ruma antes kalan no antes haʼu selu fali ba haʼu-nia inimigu sira!” (1 Sam 14:24) Tanba Jonatan la hatene katak ninia aman halo ona juramentu neʼe, no tanba nia kole loos, Jonatan han bani-been. Tropa Izraél sira seluk mós kole no halo sala hodi oho karau sira no han naan hamutuk ho raan. Saul harii altár atu halo sakrifísiu hodi taka tropa sira-nia sala, maibé nia la hatene katak ninia oan-mane mós han ona bani-been.

Bainhira Saul husu Jeová nia matadalan atu bele kontinua halo funu, Jeová la hatán. Liuhusi Tumim (karik neʼe mak dada sorteiu iha dalan neʼebé sagradu), Saul foin hatene katak ninia oan-mane Jonatan han bani-been. Entaun, buat neʼebé Jonatan halo mak sala ka lae?

Hanoin toʼok kona-ba Saul nia hahalok bainhira nia halo juramentu neʼe. Saul hakarak atu manán ema Filístia laʼós tanba nia hakarak fó glória ba Jeová maibé nia hakarak prova katak nia mak liurai neʼebé forsa boot. Tan neʼe kuandu halo juramentu nia hatete: “Malisan ba ema neʼebé han ai-han ruma antes kalan no antes haʼu selu fali ba haʼu-nia inimigu sira.” Maromak la simu juramentu hanesan neʼe. Tanba juramentu neʼe mak ema Izraél monu ba sala hodi han naan hamutuk ho raan. Se karik, sira bele han bainhira sira hamlaha, sira bele iha kbiit atu duni tuir tropa Filístia sira no kontinua funu toʼo sira manán.

Maski Jeová husik amlulik sira atu uza Tumim hodi hatudu sai katak Jonatan han ona bani-been balu, maibé neʼe la dehan katak Jeová kontente ho Saul nia juramentu. Bíblia la fó sai katak buat neʼebé Jonatan halo mak sala. Tuir loloos, Jonatan prontu atu hetan kastigu-mate tanba la halo tuir juramentu neʼe, maibé ikusmai neʼe la akontese. Tropa Izraél sira dehan katak Jonatan manán funu barak tanba Maromak hamutuk ho nia, no sira anima Saul atu la oho Jonatan. Saul kontinua halo buat neʼebé aat, maibé Jonatan halo buat neʼebé lori kontente ba Jeová.

◼ Ema naʼin-hira mak serbí nuʼudar juís hanesan Sansão no Gideão?

Iha mane naʼin-12 neʼebé simu knaar husi Jeová atu serbí nuʼudar juís ba nasaun Izraél. Sira serbí husi tempu neʼebé Josué mate toʼo tempu neʼebé Samuel serbí nuʼudar profeta.

Durante Moisés no Josué nia tempu, Moisés hili katuas balu atu serbí nuʼudar juís sira no tesi-lia ba kazu ruma. (Éxodo 18:21, 22; Josué 8:33; 23:2) Maibé bainhira Josué mate, ema Izraél para atu adora Jeová no rezultadu mak nasaun seluk halo funu hasoru sira no manán. Juís 2:16 hatete: “Nuneʼe Jeová hili juís sira neʼebé salva sira husi inimigu neʼebé hadau sira-nia sasán.” Mane primeiru neʼebé Jeová hili atu serbí nuʼudar juís no salva ema Izraél mak naran Otniel. (Juís 3:9) Tuirmai mak juís Ehud, Samgar, Barac, Gideão, Tola, Jair, Jefte, Ibzan, Elon, Abdon, no Sansão.

Bíblia mós temi Débora, Eli, no Samuel nuʼudar ema neʼebé tesi-lia ba povu Izraél. (Juís 4:4; 1 Samuel 4:16-18; 7:15, 16) Bíblia temi uluk Débora nuʼudar profeta feto, no tuirmai temi katak nia ajuda Juís Barac atu salva ema Izraél. Eli nia knaar prinsipál mak nuʼudar amlulik boot, laʼós ema neʼebé halo funu hodi salva povu Izraél husi inimigu. (Neemias 9:27) Entaun, maski dala ruma Débora no Eli ajuda atu tesi-lia ba povu Izraél, maibé sira la inklui iha lista husi ema na’in-12 neʼebé Jeová hili atu serbí nuʼudar juís sira. Apóstolu 13:20 dehan katak Jeová “fó juís ba sira toʼo profeta Samuel nia tempu”. Neʼe ajuda ita komprende katak tempu ba juís sira iha rohan, no komprende razaun tanbasá ema la sura Samuel no ninia oan-mane sira nuʼudar juís.​—1 Samuel 8:1.