Imajina moris iha rai neʼebé Maromak promete
Ezemplu diʼak no la diʼak kona-ba labarik sira neʼebé hela iha Silo
Kuandu Ita hanoin kona-ba sidade, knua, ka área sira husi rai neʼebé Maromak promete, karik Ita hanoin kedas kona-ba mane no feto sira husi Bíblia neʼebé hela iha neʼebá. Karik Ita hanoin hanesan neʼe tanba istória barak husi Bíblia temi kona-ba ema adultu sira. Maibé loloos Bíblia mós temi kona-ba labarik sira. Labarik balu hatudu ezemplu diʼak ba ema Kristaun sira no labarik seluk mak hatudu ezemplu neʼebé la diʼak. Dala ruma Ita mós imajina kona-ba labarik sira-neʼe ka lae?
Foto iha leten bele ajuda ita atu imajina labarik sira-nia moris iha tempu neʼebá. Karik foho neʼebé iha klaran mak fatin ba Silo antigu.
Karik Ita hanoin-hetan bainhira ema Izraél tama ba rai neʼebé Maromak promete, foufoun sira harii tenda santu iha Gilgal besik Jerikó. (Josué 4:19) Maibé kuandu rai neʼe fahe tiha ba suku ida-idak, tenda santu neʼebé sentru ba ema Izraél nia adorasaun muda tiha ba Silo. (Josué 18:1) Silo dook maizumenus kilómetru 30 husi Jeruzalein nia parte norte, iha área foho nian husi Efraim. Mane no feto husi rai-Izraél tomak halo viajen ba Silo no ema-lubun boot bele halibur iha rai-tetuk besik fatin neʼebé sira harii tenda santu. (Josué 22:12) Ita bele imajina labarik sira neʼebé mai iha fatin neʼe ka lae?
Labarik balu bá duni Silo. Ezemplu ida mak Samuel neʼebé sei kiʼik. Samuel nia inan-aman Elkana no Ana hela iha knua ida iha foho sorin iha parte oeste. Tinan-tinan, sira halo viajen ba Silo, karik sira mós lori oan sira husi Elkana nia feen-kiʼik. Tuirmai, Jeová haraik bensaun ba Ana hodi fó nia oan-mane ida naran Samuel. Ikusmai, Samuel nia inan-aman lori nia atu hela iha Silo hodi nuneʼe nia bele serbí iha tenda santu hamutuk ho amlulik boot Eli.—1 Samuel 1:1–2:11.
Labarik neʼe presiza halo serbisu balu iha Maromak nia uma, no klaru katak nia iha oportunidade atu saʼe ba foho sira neʼebé besik iha neʼebá. (1 Samuel 3:1, 15) Foho balu nakonu ho ai-oliveira. Iha mós torre kiʼik neʼebé halo husi fatuk no toʼos-naʼin ka bibi-atan sira bele halo seguransa husi neʼebá. Maibé ita mós bele imajina Samuel saʼe ba torre neʼe atu haree vista. (Kompara ho 2 Krónikas 20:24.) No neʼe mak fatin diʼak atu haree se iha animál fuik sira neʼebé atu ataka.
Iha tempu neʼebá, iha ai-hun barak liu se kompara ho ohin loron, inklui mós ai-laran sira neʼebé iha animál fuik barak. (Josué 17:15, 18) Ita bele hatene ida-neʼe husi buat neʼebé akontese depois Eliseu sai nuʼudar Maromak nia profeta ida. Eliseu halo viajen husi Jerikó ba Betel, neʼe katak nia iha área neʼebé dook maizumenus kilómetru 16 iha parte súl husi Silo. Betel mak sentru ba adorasaun falsu ba karau-oan osan-mean. Entaun ema Betel sei simu nia ka lae? (1 Reis 12:27-33; 2 Reis 10:29) Tuir loloos, ema barak iha neʼebá odi Jeová nia profeta sira no neʼe mós fó influénsia ba sira-nia oan sira.
Segundu Reis 2:23, 24 konta katak labarik-mane barak goza Maromak nia profeta hodi dehan: “Oi botak, saʼe bá! Oi botak, saʼe bá!” Eliseu hateke ba sira no “fó-malisan ba sira hodi Jeová nia naran. Tuirmai ursu-inan rua sai husi ai-laran no lees labarik naʼin-42 husi sira-nia leet ba pedasuk.” Ursu-inan sira baibain bele sai siʼak se sira hakfodak ka sente katak sira-nia oan iha perigu laran. (2 Samuel 17:8; Provérbios 17:12; 28:15) Maromak uza animál neʼe atu fó kastigu ba labarik sira neʼebé koʼalia aat ninia profeta tanba neʼe hanesan sira koʼalia aat nia.
Hodi hatene katak dala ruma labarik sira bele hasoru animál fuik sira iha foho-oan sira besik Silo, neʼe ajuda ita hafolin liután fiar neʼebé Samuel nia inan-aman hatudu hodi lori sira-nia oan ba tenda santu.
Jeová nia atan seluk neʼebé mós hatudu ezemplu diʼak kona-ba fiar no laran-metin mak Juís Jefte. Nia hela iha área foho iha Gilead, iha Mota Jordaun nia sorin leste. Jefte laran-manas atu funu hasoru Jeová nia inimigu sira katak ema Amon, no nia promete katak ema primeiru neʼebé sai husi ninia uma atu hasoru nia sei sai nuʼudar sakrifísiu ba Jeová. Ninia oan-feto neʼebé virjen hela mak sai mai atu simu nia. Tan neʼe Jefte lori ninia oan-feto mesak ba tenda santu iha Silo, no ninia oan-feto hela no serbí iha neʼebá ho laran-metin durante ninia moris tomak.—Juís 11:30-40.
Bainhira ita hanoin kona-ba Silo, ita hakarak banati-tuir Samuel no Jefte nia oan-feto neʼebé hatudu domin no laran-metin ba Jeová. No ita lakohi sai hanesan labarik naʼin-42 neʼebé hatudu ezemplu la diʼak hodi goza Maromak nia profeta.—Kompara ho 1 Korinto 10:6, 11.
[Picture Credit Line iha pájina 8]
Pictorial Archive (Near Eastern History) Est.
[Picture Credit Line iha pájina 9]
Pictorial Archive (Near Eastern History) Est.
[Picture Credit Line iha pájina 9]
Safari Zoo, Ramat-Gan, Tel Aviv