“Matenek sei hamutuk ho ema neʼebé haraik an”
“Saida mak Jeová husu ba imi atu halo? . . . Atu laʼo hamutuk ho imi-nia Maromak ho haraik an!”—MIQUEIAS 6:8.
1, 2. Saida mak hahalok haraik an, no oinsá neʼe la hanesan ho hahalok foti an?
APÓSTOLU Paulo iha knaar importante, maibé nia la dada atensaun ba ninia an. Juís Gideão neʼebé aten-brani dehan katak nia mak kiʼik liu husi ninia aman nia umakain. Jesus rekoñese katak iha buat neʼebé nia la hatene no mós buat neʼebé nia la iha direitu atu halo. Ema sira-neʼe ida-idak hatudu haraik an.
2 Hahalok haraik an la hanesan duni ho hahalok foti an. Ema neʼebé haraik an iha hanoin neʼebé loos kona-ba ninia an, ninia abilidade sira, no la hanoin katak nia mak diʼak liu ema seluk ka hanoin an deʼit. Duké foti an, gaba an, no buka oin, ema neʼebé haraik an rekoñese ninia limitasaun sira. Entaun neʼe katak nia hatudu respeitu no hanoin ema seluk nia sentimentu no opiniaun.
3. Iha dalan saida mak matenek “hamutuk ho ema neʼebé haraik an”?
3 Tan neʼe Bíblia hatete: “Matenek sei hamutuk ho ema neʼebé haraik an.” (Provérbios 11:2) Ema neʼebé haraik an mak matenek tanba nia halo tuir Maromak, no nia hasees an husi hahalok foti an neʼebé bele hamoe nia. (Provérbios 8:13; 1 Pedro 5:5) Maromak nia atan barak hatudu tanbasá importante atu hatudu haraik an. Mai ita aprende kona-ba ezemplu tolu neʼebé temi iha parágrafu primeiru.
Paulo mak “ajudante” no “atan”
4. Paulo iha priviléjiu saida deʼit?
4 Iha apóstolu sira-nia tempu, ema barak koñese no respeitu apóstolu Paulo. Durante ninia serbisu haklaken, nia halo viajen dook kilómetru rihun ba rihun liuhusi tasi no rai, no nia mós harii kongregasaun foun oioin. Jeová fó ba Paulo vizaun oioin no mós abilidade atu koʼalia língua seluk. (1 Korinto 14:18; 2 Korinto 12:1-5) Jeová mós dirije Paulo atu hakerek karta 14 neʼebé ohin loron mak parte ba Eskritura Lian Gregu. Klaru katak Paulo kumpre buat barak liu fali apóstolu sira seluk.—1 Korinto 15:10.
5. Saida mak Paulo halo neʼebé hatudu katak nia haraik an?
5 Maski Paulo halo serbisu barak ba Jeová, maibé nia la dada atensaun ba ninia an no la foti an. Paulo hatete kona-ba ninia an: “Haʼu kiʼik liu fali apóstolu sira seluk, no haʼu la merese atu bolu nuʼudar apóstolu ida, tanba uluk haʼu fó-terus ba Maromak nia kongregasaun.” (1 Korinto 15:9) Tanba uluk Paulo fó-terus ba ema Kristaun, nia rekoñese katak tan deʼit Maromak nia laran-diʼak neʼebé boot mak nia bele iha relasaun diʼak ho Jeová no serbí Jeová. (João 6:44; Éfeso 2:8) Tan neʼe, maski Paulo kumpre buat barak iha ninia serbisu ba Jeová, maibé nia la haree ninia an diʼak liu fali ema seluk.—1 Korinto 9:16.
6. Oinsá Paulo hatudu haraik an kuandu hamutuk ho ema Kristaun iha Korinto?
6 Ita bele haree ho klaru Paulo nia hahalok haraik an bainhira nia hamutuk ho ema Kristaun iha Korinto. Haree hanesan sira balu admira ho ema neʼebé sira hanoin iha pozisaun importante, hanesan Apolo, Cefas, no Paulo. (1 Korinto 1:11-15) Maibé Paulo lakohi sira atu gaba nia no nia mós la aproveita situasaun neʼe atu hetan buat diʼak. Bainhira nia vizita sira, nia koʼalia ho sira “hodi la uza liafuan aas”. Kona-ba ninia an no ninia maluk sira, Paulo hatete: “Ami hakarak atu ema haree ami nuʼudar ajudante ba Kristu no atan neʼebé tau matan ba Maromak nia segredu santu.”a—1 Korinto 2:1-5; 4:1.
7. Oinsá Paulo hatudu haraik an kuandu nia fó konsellu?
7 Paulo mós hatudu haraik an kuandu nia presiza fó konsellu makaʼas no matadalan. Nia husu ema Kristaun atu rona ba nia tanba “Maromak nia laran-sadiʼa” no domin laʼós tanba nia mak apóstolu ida. (Roma 12:1, 2; Filemon 8, 9) Tanbasá Paulo halo ida-neʼe? Tanba nia haree sira nuʼudar ninia “maluk serbisu-naʼin” no laʼós atu domina sira-nia fiar. (2 Korinto 1:24) Klaru katak tanba Paulo hatudu haraik an, tan neʼe ema Kristaun iha tempu neʼebá hadomi tebes nia.—Apóstolu 20:36-38.
Hanoin neʼebé loos kona-ba ita-nia priviléjiu sira
8, 9. (a) Tanbasá ita presiza iha hanoin neʼebé loos kona-ba ita-nia an? (b) Oinsá mak ema neʼebé iha knaar hatudu haraik an?
8 Paulo hatudu ezemplu diʼak ba ema Kristaun ohin loron. Maski ita iha responsabilidade oioin, maibé ita labele hanoin katak ita mak diʼak liu fali ema seluk. Paulo hatete: “Se ema ruma hanoin katak nia ema importante maski tuir loloos lae, nia lohi ninia an rasik.” (Galásia 6:3) Tanbasá? Tanba “ema hotu halo ona sala no labele haleno Maromak nia glória”. (Roma 3:23; 5:12) Loos duni, ita hotu mak sala-naʼin no mate tanba Adão nia sala. Knaar neʼebé ita simu la troka ita-nia kondisaun nuʼudar sala-naʼin. (Eclesiastes 9:2) Hanesan Paulo, ita bele iha relasaun diʼak ho Jeová no simu knaar ruma tan deʼit Jeová nia laran-diʼak neʼebé boot.—Roma 3:12, 24.
9 Tan neʼe, ita labele gaba an ka hanoin katak ita mak espesiál tanba buat neʼebé ita halo iha Jeová nia serbisu. (1 Korinto 4:7) Bainhira ita presiza fó konsellu ka matadalan ba ema seluk, ita haree ema neʼe nuʼudar maluk serbisu-naʼin, no lakohi domina sira. No se ita halo knaar ruma ho diʼak, ita labele husu ema seluk atu gaba ka admira ita. (Provérbios 25:27; Mateus 6:2-4) Klaru katak dala ruma ema gaba ita maski ita la espera ida-neʼe. Kuandu ema gaba ita, ita lakohi hanoin katak ita mak diʼak liu fali buat neʼebé loos.—Provérbios 27:2; Roma 12:3.
10. Oinsá mak irmaun-irmán sira neʼebé ema seluk haree nuʼudar la importante mak “riku ho fiar”?
10 Bainhira ita simu knaar ruma iha kongregasaun, ita labele hanoin ita mak ema neʼebé importante liu ka kongregasaun hetan susesu tanba ita. Karik ita mak matenek atu hatoʼo diskursu. (Éfeso 4:11, 12) Maski nuneʼe, se ita haraik an, ita sei rekoñese katak ema laʼós deʼit aprende lisaun importante husi diskursu sira iha reuniaun. Porezemplu, ita bele aprende husi inan neʼebé haboot oan mesak no sempre tuir reuniaun ho ninia oan. Ita bele aprende husi ema neʼebé mai reuniaun maski sira sente depresaun ka folin-laek. Ita mós bele aprende husi joven sira neʼebé serbí Jeová maski sira hetan influénsia aat iha eskola no fatin seluk. (Salmo 84:10) Karik ema seluk la haree irmaun-irmán sira-neʼe nuʼudar ema importante no sira la hetan gaba. Karik ema seluk la nota kuandu sira tahan ho laran-metin. Maski nuneʼe, sira “riku ho fiar” hanesan ho ema neʼebé iha responsabilidade iha kongregasaun. (Tiago 2:5) Jeová hadomi ita tanba ita laran-metin, laʼós tanba knaar neʼebé ita iha.—Mateus 10:22; 1 Korinto 4:2.
Gideão mak “ema neʼebé la importante liu” iha ninia aman nia umakain
11. Bainhira Maromak nia anju koʼalia ba Gideão, oinsá mak Gideão hatudu haraik an?
11 Gideão mak mane joven ida neʼebé forte husi suku Manasés, no nia moris durante tempu neʼebé ema Izraél hasoru susar barak. Durante tinan hitu, ema Midian mak fó-terus ba ema Izraél. Maibé Jeová deside ona atu salva ninia povu. Tan neʼe, anju ida mosu ba Gideão no dehan: “Ó funu-naʼin neʼebé kbiit boot, Jeová hamutuk ho ó.” Gideão mak haraik an, tan neʼe bainhira anju neʼe gaba nia, nia la konkorda ho anju nia liafuan. Ho respeitu, nia hatete ba anju neʼe: “Deskulpa, haʼu-nia naʼi, se Jeová hamutuk ho ami, entaun tanbasá mak buat hotu neʼe akontese ba ami?” Anju hatete ba Gideão: “Ó sei salva Izraél husi ema Midian nia liman.” Gideão nia reasaun mak oinsá? Nia la aproveita oportunidade neʼe hodi hetan naran-boot nuʼudar eroi ida, maibé nia hatán: “Deskulpa, Jeová. Oinsá mak haʼu bele salva Izraél? Haʼu-nia umakain mak kiʼik liu iha Manasés, no haʼu mak ema neʼebé la importante liu iha haʼu-nia aman nia umakain.” Gideão haraik an duni!—Juís 6:11-15.
12. Oinsá mak Gideão hatudu matenek bainhira nia halaʼo ninia knaar?
12 Antes Jeová haruka Gideão ba funu, Jeová koko nia. Oinsá? Jeová haruka Gideão atu sobu rahun ninia aman nia altár ba Baal, no tesi tiha ai-riin lulik neʼebé iha altár neʼe nia sorin. Atu halo nuneʼe Gideão laʼós deʼit presiza aten-brani maibé mós presiza hatudu haraik an no matenek. Tanba Gideão lakohi dada ema nia atensaun, entaun nia halo ida-neʼe iha kalan. Nia mós halo knaar neʼe ho kuidadu. Nia lori atan naʼin-sanulu hamutuk ho nia, atu nuneʼe sira balu bele hein nuʼudar guarda no sira seluk bele ajuda nia harahun altár no ai-riin.b Ho Jeová nia bensaun, Gideão konsege kumpre knaar neʼe, no ikusmai Maromak uza nia atu salva ema Izraél husi ema Midian.—Juís 6:25-27.
Hatudu haraik an no matenek
13, 14. (a) Oinsá mak ita bele hatudu haraik an bainhira ita simu priviléjiu iha Jeová nia organizasaun? (b) Tanbasá irmaun Alexander mak ezemplu diʼak kona-ba hatudu haraik an?
13 Iha buat barak neʼebé ita bele aprende husi Gideão nia haraik an. Porezemplu, bainhira ita simu priviléjiu ruma, ita-nia reasaun mak oinsá? Ita sei hanoin katak ita mak ema neʼebé importante liu ka lae? Ka ho haraik an ita husu Jeová atu ajuda ita kumpre knaar neʼe? Ita bele aprende husi irmaun Alexander H. Macmillan neʼebé mate iha tinan 1966. Nia mak irmaun neʼebé iha esperansa atu bá lalehan. Loron ida, irmaun Charles T. Russell neʼebé nuʼudar prezidente primeiru ba Watch Tower Society atu halo viajen, entaun nia husu irmaun Alexander nia hanoin kona-ba sé mak bele dirije organizasaun bainhira nia la iha. Maski loloos irmaun Alexander bele rekomenda ninia an rasik, maibé nia la halo nuneʼe. Ikusmai, irmaun Charles husu irmaun Alexander se nia prontu atu halaʼo knaar neʼe. Tinan barak liutiha irmaun Alexander konta kona-ba situasaun neʼe no dehan: “Haʼu hamriik bilán deʼit. Haʼu hanoin didiʼak no halo orasaun kona-ba neʼe. Tuirmai haʼu fó-hatene nia katak haʼu kontente halo buat hotu neʼebé haʼu bele atu ajuda nia.”
14 Lakleur depois neʼe, irmaun Charles mate, no presiza ema ida atu troka ninia pozisaun nuʼudar prezidente ba Watch Tower Society. Tanba irmaun Alexander mak halaʼo knaar neʼe bainhira irmaun Charles la iha, tan neʼe irmaun ida dehan ba nia: “Alexander, agora fasil deʼit ba ó atu sai prezidente. Ó mak irmaun Charles nia reprezentante espesiál kuandu nia la iha, no uluk nia dehan ba ami katak ami presiza rona ba ó. Agora nia mate ona. Haree hanesan ó mak ema neʼebé loos atu halo knaar neʼe.” Irmaun Alexander hatán: “Irmaun, neʼe laʼós hanoin neʼebé loos. Neʼe mak Jeová nia organizasaun, no nia mak sei deside sé mak sei dirije ninia organizasaun. No haʼu fiar katak haʼu laʼós ema neʼebé diʼak atu halaʼo knaar neʼe.” Tuirmai, irmaun Alexander rekomenda fali irmaun seluk atu halaʼo knaar neʼe. Hanesan Gideão, nia hatudu haraik an hodi iha hanoin neʼebé loos kona-ba ninia an. Diʼak mós ba ita atu banati-tuir sira-nia ezemplu.
15. Iha dalan saida deʼit mak ita bele hatudu haraik an no matenek bainhira haklaken?
15 Ita mós presiza hatudu haraik an bainhira ita halaʼo ita-nia knaar. Gideão hatudu matenek no nia hakaʼas an hodi la provoka situasaun atu nuneʼe ema la sai hirus. Ita mós hakarak hatudu haraik an no matenek kuandu ita koʼalia ba ema seluk iha serbisu haklaken. Ita halo funu espirituál atu “sobu rahun buat neʼebé metin hanesan moru” no “hanoin neʼebé sala”. (2 Korinto 10:4, 5) Maski nuneʼe, ita nafatin presiza koʼalia ho respeitu ba ema seluk no labele koʼalia iha dalan neʼebé halo ema sai hirus lalais. Ita mós presiza respeitu ema seluk nia hanoin, koʼalia kona-ba tópiku neʼebé ita bele konkorda malu, no fokus ba mensajen pozitivu husi Bíblia.—Apóstolu 22:1-3; 1 Korinto 9:22; Apokalipse 21:4.
Jesus hatudu ezemplu diʼak liu kona-ba haraik an
16. Saida mak Jesus halo neʼebé hatudu katak nia iha hanoin neʼebé loos kona-ba ninia an?
16 Jesus Kristu mak hatudu ezemplu neʼebé diʼak liu kona-ba haraik an.c Maski Jesus besik tebes ho ninia Aman, maibé nia prontu atu rekoñese katak iha buat balu neʼebé nia la iha direitu atu halo. (João 1:14) Porezemplu, kuandu Tiago no João nia inan husu atu ninia oan-mane naʼin-rua tuur iha Jesus nia sorin iha Jesus nia ukun, Jesus hatete: “Kona-ba tuur iha haʼu-nia liman-loos no liman-karuk, laʼós haʼu mak deside.” (Mateus 20:20-23) Iha situasaun seluk, Jesus mós koʼalia nakloke hodi dehan: “Haʼu labele halo buat ida tuir haʼu-nia hakarak rasik . . . haʼu la buka haʼu-nia hakarak rasik, maibé Ida neʼebé haruka haʼu mai nia hakarak.”—João 5:30; 14:28; Filipe 2:5, 6.
17. Iha dalan saida deʼit mak Jesus hatudu haraik an kuandu hamutuk ho ema seluk?
17 Jesus mak ema neʼebé diʼak liu hotu, no Jeová mós fó ba nia podér no responsabilidade neʼebé boot. Maski nuneʼe, Jesus hatudu haraik an kuandu hamutuk ho ninia dixípulu sira. Nia la koko halo dixípulu sira hanoin katak nia mak matenek liu hodi hatudu sai ninia koñesimentu neʼebé barak. Nia hatudu laran-diʼak ba sira no komprende katak dala ruma sira kole, hamlaha, no presiza deskansa. (Mateus 15:32; 26:40, 41; Marcos 6:31) Entaun maski Jesus mak perfeitu, maibé nia la espera atu ema seluk hatudu hahalok perfeitu. Nia nunka husu ninia dixípulu sira atu halo buat neʼebé liu fali sira-nia kbiit. (João 16:12) Tan neʼe, ema barak sente kmaan kuandu hamutuk ho nia!—Mateus 11:29.
Banati-tuir Jesus nia ezemplu kona-ba haraik an
18, 19. Oinsá ita bele banati-tuir Jesus nia haraik an (a) iha dalan neʼebé ita haree ita-nia an, no (b) iha dalan neʼebé ita haree ema seluk?
18 Jesus neʼebé perfeitu deʼit hatudu haraik an, sá tan ita neʼebé la perfeitu. Dala barak ema neʼebé la perfeitu lakohi rekoñese katak sira-nia podér iha limitasaun. Maibé ema Kristaun presiza banati-tuir Jesus hodi hakaʼas an atu hatudu haraik an. Ita presiza hatudu haraik an hodi prontu atu fó responsabilidade ba ema seluk kuandu sira kumpre ona kritéria, no ita mós prontu atu halo tuir matadalan husi ema neʼebé dirije iha ita-nia leet. Tanba ita hotu prontu atu serbisu hamutuk no apoia malu, arranju hotu iha kongregasaun bele laʼo “iha dalan neʼebé loloos no tuir arranju”.—1 Korinto 14:40.
19 Se ita haraik an, ita sei la espera atu ema seluk halo buat neʼebé liu fali sira-nia kbiit no ita sei hanoin kona-ba sira-nia presiza. (Filipe 4:5) Karik ita iha abilidade ka matenek ruma neʼebé ema seluk la iha. Maski nuneʼe, se ita haraik an, ita sei la espera ema seluk atu halo tuir deʼit buat neʼebé ita hakarak. Ita presiza rekoñese katak ema ida-idak iha ninia limitasaun, tan neʼe ita la espera ita-nia irmaun-irmán sira atu halo buat hotu ho perfeitu. Pedro hakerek: “Buat neʼebé importante liu mak imi tenke hadomi malu tebetebes, tanba ema neʼebé iha domin, sempre prontu atu fó perdua ba sala barak.”—1 Pedro 4:8.
20. Saida mak bele ajuda ita atu la hatudu foti an?
20 Ita aprende ona katak matenek mak hamutuk ho ema haraik an. Maibé oinsá se Ita nota katak dala ruma Ita foti an ka la fasil ba Ita atu hatudu haraik an? Keta sai laran-kraik. Banati-tuir David neʼebé halo orasaun hodi hatete: “Hanetik Ita-nia atan atu la halo hahalok aat ho foti an; keta husik hahalok sira-neʼe domina haʼu.” (Salmo 19:13) Bainhira ita banati-tuir mane fiar-naʼin sira hanesan Paulo, Gideão, no Jesus Kristu, Ita sei sente rasik katak liafuan sira tuirmai neʼe mak loos: “Matenek sei hamutuk ho ema neʼebé haraik an.”—Provérbios 11:2.
[Nota-rodapé]
a Liafuan Gregu neʼebé tradús nuʼudar “ajudante” bele refere ba atan sira neʼebé tuur iha ró boot nia parte okos no hean ró neʼe. Maibé “atan” ka “administradór” iha responsabilidade barak liután, hanesan tau matan ba ninia naʼi nia umakain tomak. Maski nuneʼe, tuir naʼi ida nia haree, atan ka administradór mak hanesan deʼit ho ajudante neʼebé serbisu iha ró.
b Bainhira Gideão hatudu matenek no kuidadu, neʼe la dehan katak nia taʼuk-teen. Tuir loloos, Ebreu 11:32-38 hatudu katak Gideão aten-brani duni tanba nia mak ida husi ema neʼebé ‘hetan kbiit boot’ no “sai kbiit boot iha funu”.
c Jeová la iha limitasaun, tan neʼe dalan neʼebé nia hatudu haraik an la hanesan ho ema.—Salmo 18:35.
Ita hanoin-hetan ka lae?
• Saida mak haraik an?
• Oinsá mak ita bele banati-tuir Paulo nia haraik an?
• Saida mak ita bele aprende kona-ba haraik an husi Gideão nia ezemplu?
• Oinsá Jesus hatudu ezemplu neʼebé diʼak liu kona-ba haraik an?
[Dezeñu iha pájina 15]
Paulo hatudu haraik an, tan neʼe ninia maluk Kristaun hadomi nia
[Dezeñu iha pájina 17]
Gideão hatudu matenek nuʼudar nia halo ninia knaar husi Maromak
[Dezeñu iha pájina 18]
Maromak nia Oan-Mane Jesus hatudu haraik an iha buat hotu