Feto sira neʼebé halo Jeová nia laran kontente
“Haʼu hein katak Jeová sei haraik bensaun ba ó tanba buat neʼebé ó halo ona, no ó sei simu kolen neʼebé perfeitu husi Jeová.”—RUTE 2:12.
1, 2. Ita bele hetan benefísiu saida hodi hanoin kleʼan kona-ba feto sira husi Bíblia nia tempu neʼebé halo Jeová nia laran kontente?
FETO naʼin-rua neʼebé hamtaʼuk Maromak lakohi halo tuir Faraó nia orden. Fiar book feto-aat ida atu tau ninia moris iha perigu laran hodi proteje espiaun Izraél naʼin-rua. Feto ida neʼebé ulun-mamar no haraik an salva ema barak nia moris no hanetik David atu la fakar ema nia raan. Feto-faluk ida tau fiar ba Maromak Jeová no hatudu laran-luak hodi fó ninia hahán ikus ba Maromak nia profeta. Neʼe mak ezemplu balu deʼit husi Bíblia kona-ba feto sira neʼebé halo Jeová nia laran kontente.
2 Jeová kontente ho feto sira-neʼe no haraik bensaun ba sira. Ida-neʼe hatudu katak buat neʼebé importante liu ba Jeová mak ema ida-idak nia hahalok no relasaun ho Jeová, laʼós ema neʼe mak mane ka feto. Ohin loron, ema barak tau fokus liu ba buat fíziku nian, no neʼe halo susar ba ita atu tau fokus ba ita-nia relasaun ho Jeová. Maibé iha irmán atus ba atus neʼebé hatudu liuhusi sira-nia hahalok katak ita bele duni tau uluk ita-nia relasaun ho Jeová. Feto Kristaun sira-neʼe hatudu fiar, matenek, laran-luak, no hahalok diʼak seluk tan hodi banati-tuir feto fiar-naʼin sira neʼebé temi iha Bíblia. Klaru, mane Kristaun mós hakarak banati-tuir ezemplu husi feto sira-neʼe. Entaun, atu halo ida-neʼe, mai ita keʼe kleʼan Bíblia nia istória kona-ba feto sira-neʼe.—Roma 15:4; Tiago 4:8.
Feto naʼin-rua neʼebé la halo tuir Faraó nia orden
3, 4. (a) Tanbasá Sifrá no Puá la halo tuir Faraó nia orden atu oho labarik-mane Ebreu hotu neʼebé foin moris? (b) Oinsá mak Jeová fó kolen ba parteira naʼin-rua neʼebé hamtaʼuk nia no hatudu aten-brani?
3 Depois Funu Mundiál Segundu, ema barak neʼebé hola parte iha masakre hetan julgamentu iha Nuremberg, maibé sira barak defende an hodi hatete katak sira halo tuir deʼit orden husi xefe sira. Maibé Sifrá no Puá la hanesan neʼe. Sira naʼin-rua mak parteira Izraél nian neʼebé hela iha rai-Ejitu kuandu Faraó laran-aat ida mak ukun. Ita la hatene Faraó neʼe nia naran. Faraó sente taʼuk tanba ema Ebreu sai barak liután ba beibeik. Tan neʼe nia haruka parteira naʼin-rua neʼe atu oho labarik-mane Ebreu hotu neʼebé foin moris. Saida mak sira halo? Bíblia dehan: “Sira la halo tuir buat neʼebé liurai Ejitu dehan ba sira. No sira husik oan-mane sira moris.” Tanbasá mak feto sira-neʼe la taʼuk ba Faraó? Tanba sira “hamtaʼuk Maromak loos”.—Éxodo 1:15, 17; Génesis 9:6.
4 Sin, parteira sira-neʼe tau fiar ba Jeová, no Jeová sai sira-nia “eskudu” hodi proteje sira husi Faraó neʼebé hirus. (2 Samuel 22:31; Éxodo 1:18-20) Jeová mós haraik bensaun seluk ba sira. Nia fó kolen ba Sifrá no Puá hodi sira bele iha sira-nia oan rasik. Jeová mós haruka hakerek-naʼin Bíblia atu hakerek sira-nia naran no konta buat neʼebé sira halo atu nuneʼe jerasaun sira tuirmai bele lee no hatene kona-ba sira. Maibé la iha ema ida mak hatene liurai aat neʼe nia naran.—Éxodo 1:21; 1 Samuel 2:30b; Provérbios 10:7.
5. Oinsá mak feto Kristaun ohin loron hatudu hahalok hanesan Sifrá no Puá? Oinsá Jeová sei fó kolen ba sira?
5 Ohin loron, iha ka lae feto sira hanesan Sifrá no Puá? Iha duni! Feto barak hatudu hahalok hanesan Sifrá no Puá hodi haklaken ho aten-brani Bíblia nia mensajen iha nasaun sira neʼebé bandu haklaken tanba “liurai nia orden”. Sira prontu atu tama komarka ka tau sira-nia an iha perigu laran. (Ebreu 11:23; Apóstolu 5:28, 29) Tanba hadomi Maromak no ema, sira la husik buat ida hanetik sira atu haklaken liafuan diʼak kona-ba Maromak nia Ukun. Tan neʼe sira barak tenke tahan hasoru ema neʼebé kontra lia-loos no fó-terus ba sira. (Marcos 12:30, 31; 13:9-13) Hanesan ho Sifrá no Puá, Jeová haree didiʼak feto sira-nia hahalok diʼak no aten-brani, no nia sei hatudu domin ba sira hodi hakerek sira-nia naran iha “livru moris nian” se sira tahan toʼo rohan ho laran-metin.—Filipe 4:3; Mateus 24:13.
Feto-aat ida troka ninia hahalok no halo Jeová kontente
6, 7. (a) Raab hatene saida kona-ba Jeová no Ninia povu? Neʼe book Raab atu halo saida? (b) Oinsá mak Maromak hatudu katak nia kontente ho Raab?
6 Iha tinan 1473 AEC, feto-aat ida naran Raab hela iha ema Kanaan nia sidade Jerikó. Nia hatene didiʼak kona-ba Jeová no Jeová nia povu. Bainhira espiaun Izraél naʼin-rua bá Raab nia uma atu subar, Raab bele konta kona-ba oinsá ema Izraél sai husi rai-Ejitu liuhusi milagre maski neʼe akontese tinan 40 liubá! Nia mós hatene buat oioin neʼebé foin akontese, hanesan ema Izraél manán hasoru ema Amoreu nia Liurai Sihon no Og. Istória sira-neʼe book Raab atu halo saida? Nia hatete ba espiaun sira: “Haʼu hatene katak Jeová sei fó rai neʼe ba imi, . . . tanba Jeová, imi-nia Maromak, mak Maromak iha lalehan no iha rai.” (Josué 2:1, 9-11) Sin, buat neʼebé Raab rona kona-ba Jeová kona duni ninia laran no book nia atu tau fiar ba Jeová.—Roma 10:10.
7 Raab nia fiar neʼebé metin book nia atu halo buat ruma. Nia simu espiaun sira husi povu Izraél “ho dame”, no nia mós halo tuir sira-nia matadalan bainhira ema Izraél ataka Jerikó. (Ebreu 11:31; Josué 2:18-21) Ita hatene katak Jeová kontente ho Raab nia fiar no hahalok, tanba Jeová dirije dixípulu Tiago atu hakerek kona-ba ema nia ezemplu diʼak no temi Raab nia naran hamutuk no Ninia belun Abraão.Tiago hakerek: “Nuneʼe mós ho feto-aat Raab, Maromak haree nia nuʼudar ema laran-loos liuhusi hahalok, bainhira nia simu espiaun sira ho laran-diʼak no haruka sira fila liuhusi dalan seluk.”—Tiago 2:25.
8. Oinsá mak Jeová haraik bensaun ba Raab neʼebé hatudu fiar no halo tuir?
8 Jeová haraik bensaun oioin ba Raab. Nia salva Raab no ema seluk neʼebé buka protesaun iha Raab nia uma, katak “ninia aman nia umakain no sira hotu neʼebé hamutuk ho nia”. Jeová mós husik sira atu hela “iha rai-Izraél”, no ema Izraél haree sira hanesan maluk Izraél. (Josué 2:13; 6:22-25; Levítico 19:33, 34) Maibé laʼós neʼe deʼit, Jeová mós fó ba nia priviléjiu atu sai beiʼala ba Jesus Kristu. Jeová hatudu duni domin neʼebé laran-metin ba feto Kanaan ida neʼebé uluk adora maromak falsu sira.a—Salmo 130:3, 4.
9. Oinsá feto balu ohin loron bele hetan kmaan bainhira aprende kona-ba Jeová nia hanoin ba Raab no feto Kristaun balu iha tempu uluk?
9 Hanesan ho Raab, feto Kristaun balu husi apóstolu sira-nia tempu toʼo ohin loron mós husik ona hahalok la morál atu halo Maromak kontente. (1 Korinto 6:9-11) Sira balu moris iha situasaun la diʼak hanesan iha Kanaan neʼebé nakonu ho hahalok la morál, no sira hanoin katak hahalok hanesan neʼe la sala. Maibé tanba sira hetan koñesimentu neʼebé loos husi Bíblia no haburas sira-nia fiar, sira troka sira-nia hahalok. (Roma 10:17) Tan neʼe, Bíblia hatete katak “Maromak la moe kona-ba sira bainhira sira bolu nia nuʼudar sira-nia Maromak”. (Ebreu 11:16) Neʼe mak buat neʼebé folin-boot tebes!
Feto ida neʼebé hatudu matenek hetan bensaun
10, 11. Abigail hasoru situasaun saida tanba Nabal ho David nia hahalok?
10 Feto fiar-naʼin barak iha tempu antigu mós hatudu katak sira iha kbiit atu tetu didiʼak, no sira mak folin-boot ba Jeová nia povu. Ezemplu ida mak Abigail. Nia kaben ho mane Izraél riku ida naran Nabal. Tanba Abigail iha kbiit atu tetu ho didiʼak, neʼe salva ema barak nia moris no mós hanetik David neʼebé sei sai liurai atu la halo sala hodi fakar ema nia raan. Istória neʼe hakerek iha 1 Samuel kapítulu 25.
11 David ho ninia maluk sira tau tenda besik Nabal nia bibi-lubun, no loron-kalan sira ho laran-diʼak hein no proteje Nabal nia bibi hodi la husu kolen ba Nabal. Bainhira David nia hahán sai menus, nia haruka mane joven naʼin-sanulu ba Nabal atu husu hahán balu. Neʼe mak oportunidade ba Nabal atu hatudu agradese ba David no hatudu respeitu ba nia nuʼudar liurai neʼebé Jeová hili ona. Maibé Nabal la halo nuneʼe. Nabal sai hirus makaʼas, insulta David, no haruka mane joven sira-neʼe fila ho liman-mamuk. Bainhira David rona kona-ba neʼe, nia halibur mane naʼin-400 neʼebé kaer armas atu bá vinga Nabal. Abigail rona kona-ba buat neʼebé Nabal halo, no hatudu matenek. Primeiru, nia haruka lalais hahán ba David hodi halo David sente kalma. No tuirmai Abigail rasik bá hasoru David.—Versíkulu 2-20.
12, 13. (a) Oinsá mak Abigail hatudu katak nia iha kbiit atu tetu didiʼak no laran-metin ba Jeová no ba liurai neʼebé Jeová hili? (b) Saida mak Abigail halo kuandu fila ba uma? Oinsá ninia situasaun troka?
12 Abigail ho haraik an husu David atu hatudu laran-sadiʼa, no nia hatudu respeitu neʼebé kleʼan ba David neʼebé Jeová hili nuʼudar liurai. Abigail hatete: “Jeová mak sei harii duni umakain ida ba haʼu-nia naʼi no neʼe sei metin ba nafatin, tanba haʼu-nia naʼi halo daudaun Jeová nia funu.” Nia mós hatete katak Jeová sei foti David nuʼudar ulun-naʼin ba Izraél. (Versíkulu 28-30) Abigail mós hatudu aten-brani hodi fó sai katak se David la kontrola an no vinga Nabal ho ninia umakain, David bele hetan sala kona-ba fakar ema nia raan. (Versíkulu 26, 31) David rekoñese ninia sala tanba Abigail hatudu haraik an, respeitu kleʼan, no iha hanoin neʼebé loos. David hatete: “Fó hahiʼi ba Jeová, Izraél nia Maromak, neʼebé haruka ó mai hasoru haʼu ohin! Maromak sei haraik bensaun ba ó tanba ó-nia ulun-mamar! Haʼu hein katak Maromak sei haraik bensaun ba ó tanba ohin ó hanetik haʼu atu la oho ema.”—Versíkulu 32, 33.
13 Bainhira Abigail fila ba uma, nia koko atu koʼalia ba ninia laʼen kona-ba buat neʼebé akontese. Maibé Nabal “lanu todan loos”. Entaun, Abigail hein toʼo Nabal oin-moos no ikusmai konta ba nia. Nabal nia reasaun mak oinsá? Nia hakfodak no ninia isin sai maten. Liutiha loron sanulu, Maromak hakotu Nabal nia moris. Bainhira David rona kona-ba neʼe, nia husu atu kaben ho Abigail tanba nia admira no respeitu Abigail. Abigail simu ida-neʼe no sai David nia feen.—Versíkulu 34-42.
Ita bele banati-tuir Abigail ka lae?
14. Ita hakarak banati-tuir Abigail nia hahalok saida deʼit?
14 Ita hakarak banati-tuir Abigail nia hahalok diʼak sira ka lae? Karik Ita hakarak hatudu hahalok matenek bainhira hasoru situasaun susar. Ka karik Ita hakarak atu aprende koʼalia ho kalma no la ulun-toos bainhira ita hirus. Se nuneʼe, diʼak atu halo orasaun ba Jeová hodi husu ninia ajuda. Jeová promete atu fó matenek no kbiit atu tetu didiʼak ba ema hotu neʼebé “kontinua husu ho fiar”.—Tiago 1:5, 6; Provérbios 2:1-6, 10, 11.
15. Iha situasaun saida deʼit mak feen Kristaun sira presiza hatudu hahalok hanesan Abigail?
15 Hahalok diʼak hanesan neʼe mak importante liuliu se feen ida nia laʼen la serbí Jeová no la halo tuir Bíblia nia matadalan. Karik laʼen neʼe mak lanu-teen. Ita espera katak mane sira hanesan neʼe sei troka sira-nia hahalok. Mane barak troka ona sira-nia moris tanba sira-nia feen hatudu hahalok neʼebé moos, laran-maus, no respeitu neʼebé kleʼan.—1 Pedro 3:1, 2, 4.
16. Oinsá feen Kristaun ida hatudu katak nia hafolin ninia relasaun ho Jeová?
16 Maski Ita hasoru susar oioin iha uma laran, maibé hanoin-hetan bá katak Jeová sempre prontu atu apoia Ita. (1 Pedro 3:12) Tan neʼe, hakaʼas an atu hametin Ita-nia relasaun ho Jeová. Halo orasaun hodi husu matenek no laran neʼebé kalma. Sin, hakbesik liután ba Jeová hodi estuda Bíblia, halo orasaun, medita, no ransu beibeik ho maluk Kristaun sira. Maski Nabal la respeitu Maromak Jeová, maibé Abigail la husik ida-neʼe afeta ninia domin ba Maromak no ninia hanoin kona-ba liurai neʼebé Maromak hili. Nia halo tuir prinsípiu neʼebé loos. No maski irmán ida nia laʼen serbí Jeová ho laran-metin, nia rasik mós presiza hakaʼas an atu hametin ninia relasaun ho Jeová. Bíblia haruka laʼen sira atu tau matan ba sira-nia feen iha dalan espirituál no fíziku, maski nuneʼe feen ida-idak mós tenke ‘hakaʼas an atu hetan ninia salvasaun ho taʼuk no nakdedar’.—Filipe 2:12; 1 Timóteo 5:8.
Nia hetan “kolen hanesan ho buat neʼebé profeta simu”
17, 18. (a) Elias husu saida ba feto-faluk iha Sarepta, no oinsá ida-neʼe koko feto neʼe nia fiar? (b) Feto-faluk neʼe halo saida? Jeová fó kolen saida ba nia?
17 Ita bele haree katak Jeová hafolin tebes ema neʼebé apoia adorasaun neʼebé loos liuhusi dalan neʼebé Jeová tau matan ba feto-faluk kiak ida iha profeta Elias nia tempu. Iha Elias nia tempu, mosu bailoro naruk no ema barak nia hahán sai menus, inklui mós feto-faluk ida ho ninia oan-mane neʼebé hela iha Sarepta. Bainhira sira atu han sira-nia hahán ikus, bainaka ida mai no neʼe mak profeta Elias. Elias husu feto neʼe atu halo buat neʼebé susar. Maski Elias hatene feto neʼe nia situasaun, maibé nia husu feto neʼe atu tunu “paun fuan kiʼik ida” ba nia hodi uza mina no trigu uut ikus. Elias mós dehan: “Jeová, Izraél nia Maromak, dehan: ‘Sanan-rai boot trigu nian sei la sai mamuk, no sanan-rai kiʼik mina nian sei la sai maran toʼo loron neʼebé Jeová halo udan tun ba rai leten.’”—1 Reis 17:8-14.
18 Se Ita hasoru situasaun neʼebé hanesan ho feto neʼe, Ita sei halo saida? Feto-faluk neʼe fiar katak Elias mak Jeová nia profeta, tan neʼe nia “halo tuir Elias nia liafuan”. Jeová fó kolen saida ba nia tanba hatudu laran-luak? Durante tempu bailoro, Jeová halo milagre hodi fó hahán ba feto-faluk neʼe, ninia oan, no mós Elias. (1 Reis 17:15, 16) Maski nia laʼós ema Izraél, nia simu “kolen hanesan ho buat neʼebé profeta simu”. (Mateus 10:41) Maromak nia Oan-Mane Jesus mós gaba feto-faluk neʼe nia ezemplu diʼak bainhira nia koʼalia ho ema Nazaré neʼebé la iha fiar.—Lucas 4:24-26.
19. Iha dalan saida deʼit mak feto Kristaun ohin loron banati-tuir feto-faluk iha Sarepta? Jeová sente oinsá kona-ba feto sira-neʼe?
19 Ohin loron, feto Kristaun barak mós hatudu hahalok hanesan ho feto-faluk iha Sarepta. Porezemplu, irmán barak neʼebé kiak no presiza tau matan família hatudu laran-luak ba katuas área ho ninia feen. Irmán seluk fó hahán ba pioneiru sira, ajuda maluk sira neʼebé iha susar laran, ka uza sira-nia tempu no rikusoin atu apoia Jeová nia organizasaun. (Lucas 21:4) Jeová haree buat neʼebé sira halo ka lae? Sin! “Maromak nunka hatudu hahalok aat hodi haluha imi-nia serbisu no imi-nia domin neʼebé imi hatudu ona ba ninia naran, tanba imi serbí ona no kontinua serbí ema santu sira.”—Ebreu 6:10.
20. Iha lisaun tuirmai, ita sei aprende saida?
20 Iha Jesus nia tempu, feto fiar-naʼin balu hetan priviléjiu atu serbí Jesus no ninia apóstolu sira. Iha lisaun tuirmai, ita sei aprende kona-ba oinsá feto sira-neʼe halo Jeová nia laran-kontente. No ita mós sei aprende kona-ba irmán sira neʼebé serbí Jeová ho laran tomak maski hasoru susar oioin.
[Nota-rodapé]
a Mateus temi feto naʼin-haat nia naran iha Jesus nia liña jerasaun, neʼe mak Tamar, Raab, Rute, no Maria. Maromak nia Liafuan konta kona-ba feto sira-neʼe hotu ho respeitu.—Mateus 1:3, 5, 16.
Revizaun
• Oinsá mak feto sira tuirmai neʼe halo Jeová nia laran kontente?
• Sifrá no Puá
• Raab
• Abigail
• Feto-faluk iha Sarepta
• Oinsá mak medita kona-ba feto sira-neʼe nia ezemplu bele ajuda ita rasik? Fó toʼok ezemplu.
[Dezeñu]
Feto fiar-naʼin barak serbí Maromak no la halo tuir “liurai nia orden”
[Dezeñu]
Tanbasá Raab mak ezemplu diʼak kona-ba fiar?
[Dezeñu]
Ita mós hakarak banati-tuir Abigail nia hahalok diʼak saida deʼit?
[Dezeñu]
Feto Kristaun barak ohin loron hatudu hahalok hanesan ho feto-faluk iha Sarepta