Laʼo ba oin hodi sai ema maduru—“Jeová nia loron boot besik ona”
“Mai ita laʼo ba oin hodi sai ema maduru.”—EBREU 6:1.
1, 2. Iha apóstolu sira-nia tempu, oinsá mak ema Kristaun iha Jeruzalein no Judeia iha oportunidade atu “halai ba foho”?
BAINHIRA Jesus iha rai, ninia dixípulu sira hakbesik ba nia no husu: “Sinál saida mak sei hatudu katak Ita toʼo ona mai no mundu neʼe nia rohan mai ona?” Atu hatán ba pergunta neʼe, Jesus fó sai profesia ida neʼebé ikusmai sai loos ba dala primeiru iha apóstolu sira-nia tempu. Jesus koʼalia kona-ba akontesimentu espesífiku neʼebé hatudu katak mundu nia rohan besik loos ona. Bainhira haree akontesimentu neʼe, “ema neʼebé iha Judeia tenke halai ba foho”. (Mateus 24:1-3, 15-22) Jesus nia dixípulu sira rekoñese sinál neʼe no halo tuir Jesus nia mandamentu ka lae?
2 Liutiha besik tinan 30, iha tinan 61 EC, apóstolu Paulo hakerek konsellu neʼebé makaʼas ba ema Kristaun Ebreu sira neʼebé hela iha Jeruzalein no área besik neʼe. Maski iha tempu neʼebá Paulo no ninia maluk Kristaun sira seidauk hatene, maizumenus tinan lima tuirmai, sira haree duni sinál kona-ba “terus boot” foin hahú. (Mateus 24:21) Iha tinan 66 EC, Céstio Galo dirije tropa Roma hodi ataka sidade Jeruzalein no besik loos ona atu manán. Maibé sira husik Jeruzalein derrepente deʼit, no neʼe loke oportunidade ba ema iha sidade laran atu halai ba fatin seguru.
3. Paulo fó konsellu saida ba ema Kristaun Ebreu? Tanbasá?
3 Ema Kristaun sira-neʼe presiza matenek atu rekoñese akontesimentu sira no tempu neʼebé loos atu halai hodi halo tuir Jesus nia avizu. Maibé ema balu sai “neineik atu komprende”. Sira mak hanesan bebé espirituál neʼebé presiza “susubeen”. (Lee Ebreu 5:11-13.) Ema balu neʼebé laʼo tuir lia-loos tinan barak ona mós haree hanesan “hadook an husi Maromak neʼebé moris”. (Ebreu 3:12) Sira balu sai “toman” atu falta reuniaun Kristaun sira kuandu “loron neʼe besik daudaun ona”. (Ebreu 10:24, 25) Tan neʼe, Paulo fó konsellu tuirmai iha tempu neʼebé loos, hodi dehan: “Agora ita aprende ona hanorin báziku kona-ba Kristu, tan neʼe mai ita laʼo ba oin hodi sai ema maduru.”—Ebreu 6:1.
4. Tanbasá mak importante atu matan-moris no hametin ita-nia relasaun ho Jeová? Saida mak bele ajuda ita atu halo nuneʼe?
4 Ita moris daudauk iha tempu neʼebé Jesus nia profesia sei kumpre ba dala ikus. “Jeová nia loron boot”, katak loron neʼebé Jeová sei halakon Satanás nia sistema mak “besik ona”. (Sofonias 1:14) Tan neʼe, agora mak tempu neʼebé ita tenkesér matan-moris no hametin ita-nia relasaun ho Jeová. (1 Pedro 5:8) Ita halo nuneʼe duni ka lae? Se ita mak ema Kristaun maduru, neʼe sei ajuda ita atu tau atensaun nafatin ba ita-nia situasaun iha tempu importante neʼe.
Ema Kristaun maduru mak oinsá?
5, 6. (a) Ema Kristaun maduru mak ema hanesan saida? (b) Atu bele laʼo ba oin hodi sai ema maduru, ita presiza hakaʼas an iha parte rua saida?
5 Bainhira Paulo anima ema Kristaun Ebreu atu laʼo ba oin hodi sai ema maduru, nia mós esplika kona-ba ema Kristaun maduru mak ema hanesan saida. (Lee Ebreu 5:14.) “Ema maduru” sei la kontente deʼit ho “susubeen”, maibé sira han “ai-han toos”. Tan neʼe, sira hatene Bíblia nia lia-loos báziku no mós “buat kleʼan”. (1 Korinto 2:10) Liután neʼe, sira treinu sira-nia kbiit atu hanoin hodi uza beibeik, ka aplika buat neʼebé sira hatene ona iha sira-nia moris, no neʼe ajuda sira atu hatene buat diʼak no buat aat. Bainhira sira presiza halo desizaun ruma, treinu hanesan neʼe ajuda sira atu hatene Bíblia nia prinsípiu saida deʼit mak kona sira-nia situasaun no oinsá mak bele aplika prinsípiu sira-neʼe.
6 Paulo hakerek: “Ita presiza tau atensaun liután ba buat neʼebé ita rona ona, atu nuneʼe ita labele laʼo sees husi fiar.” (Ebreu 2:1) Ita bele laʼo sees husi fiar, ka husik ita-nia fiar namlele maski ita la rekoñese. Atu buat neʼe labele akontese ba ita, ita presiza tau “atensaun liután” kuandu estuda Bíblia mesak ka kuandu tuir reuniaun. Tan neʼe, ita ida-idak presiza husu ba ita-nia an: ‘Haʼu gosta deʼit hanorin báziku ka lae? Haʼu tuir deʼit haʼu-nia toman espirituál, maibé la halo ida-neʼe ho laran tomak ka lae? Oinsá mak haʼu bele laʼo ba oin duni iha lia-loos?’ Atu bele laʼo ba oin hodi sai ema maduru, ita presiza hakaʼas an iha parte rua. Ita presiza hatene didiʼak Maromak nia Liafuan no presiza mós atu aprende halo tuir.
Hatene didiʼak Maromak nia Liafuan
7. Se ita hatene didiʼak Maromak nia Liafuan, neʼe lori benefísiu saida mai ita?
7 Paulo hakerek: “Ema hotu neʼebé hemu nafatin susubeen, nia la hatene liafuan neʼebé hanorin kona-ba hahalok loos, tanba nia sei hanesan labarik kiʼik.” (Ebreu 5:13) Atu sai ema maduru, ita presiza hatene didiʼak Maromak nia liafuan, ka ninia mensajen. Ita bele hetan Maromak nia mensajen iha Bíblia, tan neʼe ita presiza estuda didiʼak Bíblia no publikasaun sira husi “atan laran-metin no matenek”. (Mateus 24:45-47) Hodi hatene Maromak nia hanoin iha dalan hanesan neʼe bele ajuda ita atu treinu ita-nia kbiit atu hanoin. Porezemplu, ema Kristaun ida naran Orchida hatete: “Konsellu ida neʼebé fó impaktu boot ba haʼu-nia moris mak kona-ba lee Bíblia beibeik. Haʼu presiza maizumenus tinan rua atu lee Bíblia tomak, maibé neʼe halo haʼu sente hanesan foin mak koñese haʼu-nia Kriadór. Haʼu aprende kona-ba ninia dalan, buat neʼebé nia gosta no la gosta, nia iha forsa boot toʼo neʼebé, no ninia matenek kleʼan toʼo neʼebé. Lee Bíblia loroloron ajuda haʼu atu tahan tempu neʼebé susar liu iha haʼu-nia moris.”
8. Oinsá mak kbiit boot husi Maromak nia Liafuan bele book ita?
8 Kuandu ita lee beibeik Maromak nia Liafuan, ita bele husik ninia “kbiit boot” mak book ita. (Lee Ebreu 4:12.) Lee iha dalan hanesan neʼe bele forma ita-nia neon no laran no ita bele halo Jeová kontente liután. Ita sente Ita presiza halo oráriu hodi fahe tempu barak liután atu lee Bíblia no medita kona-ba buat neʼebé Ita lee ka lae?
9, 10. Hatene didiʼak Maromak nia Liafuan, neʼe katak sá? Fó toʼok ezemplu.
9 Atu bele hatene didiʼak Bíblia, la toʼo atu hatene deʼit liafuan husi Bíblia. Ema Kristaun sira neʼebé hatudu hahalok hanesan labarik kiʼik iha Paulo nia tempu karik iha ona koñesimentu balu kona-ba Maromak nia Liafuan. Maibé sira la aplika ida-neʼe toʼo bele rekoñese katak koñesimentu neʼe iha folin duni. Sira la uza sira-nia koñesimentu atu dirije sira-nia an rasik no halo desizaun matenek iha sira-nia moris.
10 Atu hatene didiʼak Maromak nia Liafuan, neʼe katak hatene buat neʼebé Bíblia hatete no aplika ida-neʼe ba ita-nia moris. Oinsá mak bele halo ida-neʼe? Mai ita hanoin ezemplu ida husi irmán ida naran Kyle. Loron ida, Kyle diskute malu ho ninia maluk serbisu ida. Entaun saida mak nia halo atu rezolve problema neʼe? Kyle esplika: “Eskritura ida neʼebé haʼu hanoin-hetan kedas mak Roma 12:18, neʼebé dehan: ‘Se bele karik, hakaʼas an atu moris iha dame ho ema hotu.’ Tan neʼe haʼu husu nia atu koʼalia hamutuk depois oras serbisu.” Ida-neʼe lori rezultadu diʼak tebes, no maluk sira seluk iha serbisu-fatin mós admira ho dalan neʼebé Kyle rezolve problema. Kyle hatete: “Haʼu aprende katak hodi aplika Bíblia nia prinsípiu sira sempre lori rezultadu diʼak.”
Aprende atu halo tuir
11. Saida mak hatudu katak la fasil atu halo tuir kuandu hasoru situasaun susar?
11 Dala ruma la fasil atu aplika buat neʼebé ita aprende husi Eskritura sira, liuliu kuandu hasoru situasaun susar. Porezemplu, lakleur depois Jeová salva ema Izraél husi rai-Ejitu, ema Izraél “hahú haksesuk malu ho Moisés” no “kontinua koko Jeová”. Tanbasá? Tanba la iha bee atu hemu. (Éxodo 17:1-4) No depois sira halo aliansa ho Maromak no promete atu halo tuir “liafuan hotu neʼebé Jeová hatete”, la toʼo fulan rua, sira kontra ukun-fuan no adora fali maromak falsu. (Éxodo 24:3, 12-18; 32:1, 2, 7-9) Karik neʼe akontese tanba sira taʼuk katak Moisés sei husik sira kleur atu simu matadalan iha Foho Horeb. Karik sira hanoin ema Amalec sira sei mai ataka no la iha dalan atu defende an, liuliu tanba la iha Moisés neʼebé uluk hiʼit liman no halo sira manán. (Éxodo 17:8-16) Karik nuneʼe duni, maibé realidade mak ema Izraél “lakohi halo tuir” Jeová. (Apóstolu 7:39-41) Paulo anima ema Kristaun atu “hakaʼas an” hodi nuneʼe “labele tuir ezemplu aat husi sira neʼebé la halo tuir”, hanesan ema Izraél neʼebé sente taʼuk bainhira atu tama ba rai neʼebé Maromak promete.—Ebreu 4:3, 11.
12. Oinsá mak Jesus aprende atu halo tuir? Neʼe lori benefísiu saida?
12 Atu bele laʼo ba oin hodi sai ema maduru, ita presiza hakaʼas an atu halo tuir Jeová. Ezemplu ida mak Jesus Kristu, nia aprende atu halo tuir liuhusi terus neʼebé nia hasoru. (Lee Ebreu 5:8, 9.) Antes mai toʼo mundu, Jesus halo tuir ona ninia Aman. Maibé atu kumpre buat neʼebé ninia Aman hakarak nia atu halo iha mundu, neʼe envolve hetan terus iha dalan fíziku no mentál. Tanba Jesus halo tuir iha situasaun neʼebé susar tebes, neʼe halo Jesus “sai perfeitu” atu simu pozisaun foun neʼebé Maromak prepara ona ba nia, neʼe mak pozisaun nuʼudar Liurai no Amlulik Boot.
13. Saida mak hatudu katak ita aprende ona atu halo tuir?
13 Oinsá ho ita? Ita deside metin duni atu halo tuir Jeová maski hasoru susar oioin ka lae? (Lee 1 Pedro 1:6, 7.) Maromak fó sai konsellu neʼebé klaru kona-ba morál, laran-moos, dalan atu uza ita-nia nanál, lee no estuda Bíblia, tuir reuniaun sira no hola parte iha serbisu haklaken. (Josué 1:8; Mateus 28:19, 20; Éfeso 4:25, 28, 29; 5:3-5; Ebreu 10:24, 25) Ita halo tuir Jeová kona-ba buat sira-neʼe maski hasoru situasaun susar ka lae? Se ita halo tuir, neʼe hatudu katak ita laʼo ba oin duni atu sai ema maduru.
Sai ema Kristaun neʼebé maduru lori benefísiu saida?
14. Fó toʼok ezemplu kona-ba oinsá mak ema maduru bele hetan protesaun.
14 Se ema Kristaun ida iha kbiit atu hanoin no treinu ona atu hatene buat neʼebé loos no sala, neʼe sei proteje nia iha mundu neʼebé “la hatene morál neʼebé loos”. (Éfeso 4:19) Hanoin toʼok ezemplu ida husi irmaun ida naran James, neʼebé hafolin tebes livru sira kona-ba Bíblia no lee beibeik. Nia hetan serbisu ida, maibé ninia maluk iha serbisu-fatin mak mesak feto. James hatete: “Maski sira barak la iha morál neʼebé diʼak, maibé haʼu haree feto ida hatudu hahalok diʼak no interese ba lia-loos husi Bíblia. Maibé bainhira ami rua mesak deʼit iha kuartu, nia komesa book haʼu iha dalan seksuál. Foufoun, haʼu hanoin nia halimar deʼit, maibé susar duni atu hapara nia. Haʼu hanoin-hetan kedas esperiénsia husi Livru Haklaken kona-ba irmaun ida neʼebé hasoru tentasaun hanesan neʼe iha serbisu-fatin. Informasaun neʼe temi ezemplu husi José ho Potifar nia feen.b Haʼu dudu feto neʼe, no nia halai sai.” (Génesis 39:7-12) James sente kontente tanba buat aat la akontese no nia bele mantein konxiénsia neʼebé moos.—1 Timóteo 1:5.
15. Kuandu ita sai ema maduru, oinsá mak ida-neʼe ajuda ita atu hametin ita-nia laran?
15 Kuandu ita sai ema maduru, neʼe lori benefísiu ba ita-nia an tanba ita bele hametin ita-nia laran no hasees an nafatin husi ‘hanorin oioin neʼebé lori ita laʼo sala dalan’. (Lee Ebreu 13:9.) Kuandu ita hakaʼas an atu laʼo ba oin iha dalan espirituál, ita-nia neon sei fokus nafatin ba “buat sira neʼebé importante liu”. (Filipe 1:9, 10) Hodi halo nuneʼe, ita sei agradese liután ba Maromak no buat hotu neʼebé nia halo mai ita. (Roma 3:24) Ema Kristaun ida neʼebé treinu ona ninia “kbiit atu komprende” bele haburas sentimentu agradese no iha relasaun diʼak ho Jeová.—1 Korinto 14:20.
16. Saida mak ajuda irmán ida atu ‘hametin ninia laran’?
16 Irmán ida naran Louise hatete katak depois nia hetan batizmu, foufoun nia hanoin barak liu oinsá ema seluk haree kona-ba nia. Nia dehan: “Haʼu la halo buat ida neʼebé sala, maibé haʼu ladún laran-manas atu serbí Jeová. Haʼu rekoñese katak haʼu presiza halo mudansa balu se haʼu hakarak serbí Jeová ho buat hotu neʼebé haʼu iha. Mudansa neʼebé boot liu mak atu tau haʼu-nia laran tomak ba haʼu-nia adorasaun.” Louise hakaʼas an duni atu ‘hametin ninia laran’, no neʼe lori benefísiu boot bainhira nia hetan problema kona-ba ninia saúde. (Tiago 5:8) Louise hatete: “Haʼu presiza hakaʼas an tebes, maibé haʼu bele hakbesik duni ba Jeová.”
‘Halo tuir husi laran’
17. Tanbasá mak importante ba ema Kristaun iha apóstolu sira-nia tempu atu halo tuir Jesus nia avizu?
17 Paulo nia konsellu atu “laʼo ba oin hodi sai ema maduru” salva duni ema Kristaun sira neʼebé hela iha Jeruzalein no Judeia iha tempu uluk. Sira neʼebé halo tuir konsellu neʼe haburas sira-nia kbiit atu hanoin, no rekoñese sinál neʼebé Jesus fó ona atu “halai ba foho”. Bainhira tropa Roma mai haleʼu Jeruzalein no tama sidade neʼe, sira rekoñese duni “buat foʼer neʼebé hamosu susar hamriik iha fatin santu”, no hatene katak neʼe mak tempu atu halai. (Mateus 24:15, 16) Hodi halo tuir Jesus nia avizu, sira halai sai husi sidade Jeruzalein antes sidade neʼe harahun tiha, no tuir livru husi matenek-naʼin ida kona-ba istória naran Eusébio hakerek katak, ema Kristaun sira-neʼe hela fali iha sidade Pela iha área foho iha Gilead. Hodi halo nuneʼe, sira konsege sees husi dezastre boot tebes neʼebé kona sidade Jeruzalein.
18, 19. (a) Tanbasá mak importante tebes ba ita atu halo tuir iha ita-nia tempu? (b) Ita sei aprende saida iha informasaun tuirmai?
18 Se ita mós laʼo ba oin hodi sai ema maduru no iha ona toman atu halo tuir Jeová nia matadalan, neʼe sei salva ita kuandu Jesus nia profesia kona-ba “terus boot” sai loos iha futuru. (Mateus 24:21) Iha tempu neʼebá, ita sei prontu atu halo tuir matadalan urjente husi “atan neʼebé laran-metin” ka lae? (Lucas 12:42) Sin, importante tebes ba ita atu aprende ‘halo tuir husi laran’!—Roma 6:17.
19 Atu sai ema maduru, ita presiza treinu ita-nia kbiit atu hanoin. Ita halo ida-neʼe hodi hakaʼas an atu hatene didiʼak Maromak nia Liafuan no aprende atu halo tuir. Liuliu joven sira hasoru susar oioin kuandu sira hakaʼas an atu sai ema Kristaun neʼebé maduru. Iha informasaun tuirmai, ita sei koʼalia kona-ba oinsá mak joven sira bele tahan hasoru susar oioin ho susesu.
[Nota-rodapé]
a Naran balu laʼós naran neʼebé loos.
b Haree informasaun “Dibentengi untuk Menolak Perbuatan Salah”, iha Menara Pengawal 1 Outubru 1999.
Ita aprende saida?
• Ema Kristaun neʼebé maduru mak ema hanesan saida? Oinsá mak ita bele sai hanesan neʼe?
• Atu laʼo ba oin hodi sai ema maduru, oinsá mak hatene didiʼak Maromak nia Liafuan bele ajuda ita?
• Oinsá mak ita bele aprende atu halo tuir?
• Sai ema maduru lori benefísiu saida deʼit mai ita?
[Dezeñu]
Aplika Bíblia nia konsellu ajuda ita atu rezolve problema iha dalan neʼebé diʼak
[Dezeñu]
Halo tuir Jesus nia avizu salva duni ema Kristaun sira iha tempu uluk