Oinsá atu Maromak nafatin simu ita maski situasaun troka
IHA buat ruma neʼebé troka iha Ita-nia moris ka lae? Ita sente susar atu simu buat sira-neʼe? Ita hotu hasoru ona ka sei hasoru situasaun hanesan neʼe. Tan neʼe, ezemplu husi ema neʼebé moris iha tempu uluk bele ajuda ita atu hatene hahalok diʼak neʼebé bele ajuda ita atu hasoru situasaun sira-neʼe.
Porezemplu, hanoin toʼok kona-ba David no kona-ba buat barak neʼebé troka iha ninia moris. Nia bibi-atan no nia sei tinan kiʼik kuandu Samuel kose mina ba nia atu sai liurai iha futuru. Maski nia sei joven, nia prontu atu halo funu hasoru jigante Filístia naran Golias. (1 Sam 17:26-32, 42) Tuirmai, Liurai Saul konvida David atu hela iha liurai nia uma, no liurai mós foti nia nuʼudar ulun ba tropa sira. Karik David nunka hanoin katak buat barak hanesan neʼe sei akontese iha ninia moris; ka nia mós la hatene saida mak sei akontese tuirmai.
David nia relasaun ho Saul sai susar tebes. (1 Sam 18:8, 9; 19:9, 10) Atu salva nia moris, David tenke halai beibeik hodi subar an no halo ida-neʼe ba tinan balu. Kuandu David ukun nuʼudar liurai ba Izraél, iha buat barak mós troka iha ninia moris, liuliu depois nia halo sala boot no nia koko atu subar ninia sala hodi halo planu atu oho ema seluk. Rezultadu husi neʼe mak ninia família hetan susar barak. Porezemplu, David nia oan Absalão kontra hasoru nia. (2 Sam 12:10-12; 15:1-14) Maski nuneʼe, depois David arrepende sala boot neʼebé nia halo, Maromak Jeová perdua nia no simu fali nia.
Ita-nia situasaun mós bele troka. Porezemplu, problema saúde, ekonomia, susar iha família, ka ita rasik nia hahalok mós bele troka ita-nia situasaun iha ita-nia moris. Se nuneʼe, hahalok saida deʼit mak bele ajuda ita atu bele hasoru situasaun sira-neʼe?
Haraik-an ajuda ita
Haraik-an envolve hahalok hakruʼuk an. Haraik-an neʼebé loos bele ajuda ita atu haree ema seluk no ita-nia an rasik mak ema oinsá. Se ita rekoñese ema seluk nia hahalok no buat diʼak neʼebé sira halo, ita sei hafolin tebes sira no buat neʼebé sira halo. Nuneʼe mós, haraik-an bele ajuda ita atu komprende tansá buat ruma akontese ba ita no hatene oinsá atu tahan hasoru buat sira-neʼe.
Saul nia oan, Jónatas, mak ezemplu diʼak kona-ba haraik-an. Ninia situasaun troka no nia la bele kontrola ida-neʼe. Kuandu Samuel hatete ba Saul katak Maromak Jeová sei hasai reinu husi Saul, nia la hatete katak Jónatas mak sei troka fali Saul nuʼudar liurai. (1 Sam 15:28; 16:1, 12, 13) Maromak hili David atu sai liurai ba Izraél, laʼós Jónatas. Tanba Saul la halo tuir Maromak, ida-neʼe mós kona Jónatas. Maski Jónatas la envolve ho hahalok aat neʼebé Saul halo ona, maibé nia la troka ninia aman atu sai nuʼudar liurai. (1 Sam 20:30, 31) Oinsá mak Jónatas sente kona-ba situasaun neʼe? Nia rai odi tanba nia lakon oportunidade neʼe no nia sai laran-moras ba David ka lae? Lae. Maski nia idade boot liu no iha esperiénsia barak liu, maibé nia apoia David. (1 Sam 23:16-18) Haraik-an ajuda Jónatas komprende kona-ba sé mak hetan Maromak nia bensaun, no la hanoin demais kona-ba ninia an. (Rom 12:3) Jónatas komprende saida mak Maromak Jeová hakarak husi nia no simu Maromak nia desizaun kona-ba ida-neʼe.
Loos katak kuandu buat barak troka iha ita-nia moris, ida-neʼe mós lori susar. Ba tinan balu, Jónatas sai belun ho David, ema neʼebé Maromak Jeová hili atu sai liurai. Iha tempu neʼebé hanesan, Jónatas mós hamutuk ho ninia aman Saul, ema neʼebé ukun daudauk maibé Maromak Jeová la simu ona nuʼudar liurai ba Izraél. Karik situasaun neʼe halo Jónatas sente estrese nuʼudar nia hakaʼas an atu halo Maromak nia hakarak hodi Maromak nafatin simu nia. Situasaun neʼebé troka iha ita-nia moris mós karik bele halo ita hanoin barak no sente taʼuk. Maibé, se ita hakaʼas an atu komprende Maromak Jeová nia hanoin, ita sei bele kontinua serbí nia ho laran-metin maski ita-nia situasaun troka.
Importante atu hatene buat neʼebé ita bele ka la bele halo
Ema neʼebé haraik-an la dehan katak nia rekoñese ninia fraku ka hatene buat neʼebé nia bele ka la bele halo.
David hatene buat neʼebé nia bele ka la bele halo. Maski Maromak Jeová hili ona David atu sai liurai, maibé ba tinan balu David seidauk bele ukun nuʼudar liurai. Bíblia la hatete katak Maromak Jeová esplika ba David kona-ba razaun tansá David seidauk ukun nuʼudar liurai. Maski situasaun neʼe karik susar, maibé ida-neʼe la halo nia hanoin barak. Nia hatene buat neʼebé nia bele ka la bele halo, no nia komprende katak Maromak Jeová mak husik situasaun neʼe akontese. Tan neʼe, maski David iha oportunidade atu oho Saul hodi bele salva nia moris, maibé nia la halo ida-neʼe, no nia hapara ninia maluk Abisai atu oho Saul.—1 Sam 26:6-9.
Dala ruma ita haree situasaun ruma neʼebé mosu iha ita-nia kongregasaun rasik neʼebé ita la komprende, ka tuir ita-nia hanoin katuas sira ladún rezolve situasaun neʼe iha dalan neʼebé diʼak. Hodi hatene katak iha buat neʼebé ita bele ka la bele halo sei ajuda ita atu rekoñese katak Jesus mak Ulun ba kongregasaun no katak nia dirije liuhusi katuas sira neʼebé tau matan kongregasaun. Atu Maromak Jeová nafatin simu ita, ita sei hein ba nia atu dirije kongregasaun liuhusi Jesus Kristu ka lae? Ita sei hein ba Maromak maski ida-neʼe la fasil atu halo?—Prov 11:2.
Laran-maus ajuda ita
Laran-maus ajuda ita atu tahan susar sira ho pasiénsia no atu la sai hirus, la rai odi, no la halo aat fali ba ema. La fasil atu haburas hahalok laran-maus. Eskritura ida iha Bíblia hatete katak “ema laran-maus sira iha rai” simu konvite atu “buka hahalok laran-maus”. (Sof 2:3) Laran-maus besik hanesan ho hahalok haraik-an, maibé laran-maus envolve hahalok seluk tan, hanesan laran-diʼak no kalma hodi la hirus lalais. Ema neʼebé laran-maus prontu atu simu treinu no halo tuir hanorin sira, no ida-neʼe bele halo nia laʼo ba oin iha lia-loos.
Oinsá mak laran-maus ajuda ita atu hasoru situasaun neʼebé troka iha ita-nia moris? Karik ita mós hatene katak ema barak haree situasaun neʼebé troka iha sira-nia moris mak hanesan buat la diʼak. Maibé tuir loloos, situasaun neʼebé troka mak oportunidade ba ita atu simu treinu liután husi Maromak Jeová. Moisés nia moris mak ezemplu kona-ba ida-neʼe.
Kuandu Moisés tinan 40, nia haburas ona hahalok diʼak sira. Nia hatudu katak nia hanoin kona-ba Maromak nia povu nia diʼak no nia prontu atu husik buat ruma hodi ajuda ema seluk. (Ebr 11:24-26) Maibé, antes Maromak Jeová hili nia atu ajuda ema Izraél atu sai husi rai-Ejitu, Moisés tenke hasoru situasaun neʼebé troka hodi haburas liután ninia hahalok laran-maus. Nia tenke halai husi Ejitu no moris iha rai-Midian ba tinan 40, nia laʼós tan ema importante ona, nia halo serbisu nuʼudar bibi-atan. Rezultadu mak saida? Situasaun neʼe halo nia sai ema diʼak liután. (Núm 12:3) Nia aprende atu tau uluk Maromak Jeová nia hakarak liu fali ninian.
Ezemplu ida kona-ba Moisés nia laran-maus mak kuandu Maromak Jeová hatete katak Nia sei la simu tan nasaun neʼebé kontra Nia beibeik no sei halo Moisés nia bei-oan sira sai nasaun neʼebé boot. (Núm 14:11-20) Moisés mak nuʼudar lia-naʼin ba nasaun. Ninia liafuan hatudu katak nia hanoin liu mak kona-ba Maromak nia naran diʼak no kona-ba ninia maun-alin sira nia diʼak duké ninia an rasik. Atu Moisés bele halaʼo knaar nuʼudar ulun ba nasaun no nuʼudar lia-naʼin, nia presiza hahalok laran-maus. Bíblia konta katak Miriam no Aarão muramura hasoru Moisés, maibé Bíblia mós hatete katak Moisés mak “ema laran-maus liu ema hotu-hotu”. (Núm 12:1-3, 9-15) Moisés ho laran-maus tahan deʼit sira-nia liafuan aat. Saida mak akontese se Moisés la laran-maus?
Iha tempu seluk, Maromak Jeová haraik ninia espíritu ba mane Izraél balu, no sira hatoʼo profesia. Josué, ema neʼebé ajuda Moisés, sente katak mane sira-neʼe halo buat neʼebé laloos. Maibé, Moisés haree situasaun neʼe hanesan Maromak Jeová haree no nia la taʼuk atu lakon ninia pozisaun. (Núm 11:26-29) Se Moisés la laran-maus, nia sei simu Maromak Jeová nia arranju foun neʼe ka lae?
Laran-maus ajuda Moisés halaʼo didiʼak ninia knaar neʼebé Maromak fó no uza didiʼak ninia pozisaun. Maromak Jeová konvida nia atu saʼe ba Foho Horeb nia leten no depois hamriik iha povu nia oin. Maromak koʼalia ba Moisés liuhusi anju ida no hili nia atu sai lia-naʼin ba Maromak nia aliansa. Tanba Moisés laran-maus, ida-neʼe ajuda nia atu simu ninia situasaun neʼebé troka, no atu halo Maromak nia hakarak hodi Maromak nafatin simu nia.
Oinsá ho ita? Atu ita laʼo ba oin, hahalok laran-maus mak importante. Ema hotu neʼebé hetan knaar espesiál no iha responsabilidade iha Maromak nia povu nia leet, presiza hatudu laran-maus. Hahalok laran-maus ajuda ita atu sees husi hahalok foti an kuandu ita-nia situasaun troka no sei ajuda ita atu hasoru situasaun foun ho hanoin neʼebé loos. Dalan neʼebé ita hasoru situasaun foun mak importante tebes. Ita sei simu situasaun neʼebé troka ka lae? Ita bele haree ida-neʼe nuʼudar oportunidade ba ita atu laʼo ba oin? Karik situasaun hanesan neʼe mak oportunidade diʼak ba ita atu haburas liután hahalok laran-maus!
Tuir loloos, situasaun sei troka beibeik iha ita-nia moris. Dala ruma la fasil atu komprende tansá buat ruma akontese tanba ita-nia fraku no ita-nia sentimentu bele halo susar mai ita atu haree situasaun hanesan Maromak Jeová haree. Maski nuneʼe, kuandu ita rekoñese ita-nia fraku ka hatene buat neʼebé ita bele ka la bele halo, kuandu ita haraik an, no kuandu ita laran-maus, buat sira-neʼe sei ajuda ita atu simu situasaun neʼebé troka no atu kontinua halo Maromak nia hakarak hodi Maromak nafatin simu ita.
[Liafuan neʼebé foti husi pájina 4]
Haraik-an neʼebé loos bele ajuda ita atu haree ita-nia an rasik mak ema oinsá
[Liafuan neʼebé foti husi pájina 5]
Laran-maus importante tebes atu ita laʼo ba oin
[Dezeñu iha pájina 5]
Moisés tenke hasoru situasaun neʼebé troka hodi haburas liután ninia hahalok laran-maus