Joven sira, hametin imi-nia hakarak atu serbí Aman Jeová
“Hanoin bá ó-nia Kriadór Boot iha ó-nia tempu joven.”—ECLE 12:1.
1. Labarik sira iha Izraél mós hetan konvite saida?
MAIZUMENUS tinan 3.500 liubá, profeta Moisés haruka Izraél nia amlulik no ulun-naʼin sira: “Halibur povu hamutuk, mane no feto no labarik sira . . . , hodi sira bele rona no hodi sira bele aprende, tanba sira tenke taʼuk ba Jeová, imi-nia Maromak, no halo tuir liafuan hotu husi ukun-fuan neʼe.” (Deut 31:12) Ida-neʼe hatudu katak sira neʼebé tenke mai atu halibur hamutuk atu halaʼo adorasaun mak mane, feto, no labarik sira. Sin, joven sira mós inklui ho sira neʼebé Moisés haruka atu halibur hamutuk hodi rona, aprende, no halo tuir Maromak Jeová nia hanorin.
2. Oinsá mak Maromak Jeová hatudu katak nia hanoin joven kristaun sira iha apóstolu sira-nia tempu?
2 Iha apóstolu sira-nia tempu, Maromak Jeová kontinua hatudu katak nia hanoin joven sira neʼebé adora nia. Porezemplu, iha apóstolu Paulo nia karta balu ba kongregasaun sira, Maromak haleno nia atu hakerek konsellu neʼebé hatoʼo liuliu mak ba joven sira. (Lee Efeso 6:1; Koloso 3:20.) Joven kristaun neʼebé halo tuir konsellu sira-neʼe hafolin liután sira-nia Aman iha lalehan neʼebé hadomi sira no simu ninia bensaun.
3. Oinsá mak joven sira ohin loron hatudu katak sira hakarak serbí Maromak?
3 Ohin loron, joven sira mós hetan konvite atu halibur hamutuk atu adora Maromak Jeová ka lae? Sin, sira hetan! Tan neʼe, Maromak nia povu kontente tebes atu haree joven barak iha mundu tomak serbí Maromak hodi halo tuir Paulo nia konsellu neʼebé hatete: “Ita hanoin oinsá ita bele hakaʼas malu atu hadomi no halo hahalok diʼak, hodi la haluha atu halibur an, nuʼudar balun halo daudaun ona, maibé fó laran-manas ba malu; liuliu tan imi haree katak loron neʼe besik ona mai.” (Ebr 10:24, 25) Liután neʼe, labarik barak haklaken lia-foun diʼak kona-ba Maromak nia Reinu hamutuk ho sira-nia inan-aman. (Mt 24:14) No tinan-tinan joven rihun ba rihun hatudu katak sira hadomi Maromak Jeová ho laran hodi hetan batizmu no sira haksolok ho bensaun neʼebé sira hetan tanba sai Jesus nia dixípulu.—Mt 16:24; Mc 10:29, 30.
Simu konvite neʼe agora
4. Bainhira mak joven sira bele simu Maromak nia konvite atu serbí nia?
4 Eclesiastes 12:1 hatete: “Hanoin bá ó-nia Kriadór Boot iha ó-nia tempu joven.” Iha idade saida mak joven sira tenke simu konvite atu adora no serbí Maromak Jeová? Eskritura la koʼalia kona-ba tinan. Tan neʼe, keta dada an hodi hanoin katak imi sei kiʼik liu atu rona ba Maromak Jeová no atu serbí nia. Maski imi mak idade kiʼik ka boot, importante atu imi simu konvite neʼe agora kedas.
5. Oinsá mak inan-aman sira bele ajuda sira-nia oan atu laʼo ba oin iha lia-loos?
5 Joven barak simu ajuda husi sira-nia inan-aman ka husi inan ka aman deʼit atu laʼo ba oin iha lia-loos. Se nuneʼe, sira hanesan ho Timóteo iha tempu Bíblia nian. Husi kiʼik kedas, Timóteo nia inan Eunice no ninia avó-feto Lóide hanorin nia kona-ba sagrada eskritura. (2 Tim 3:14, 15) Nuneʼe mós, joven sira-nia inan-aman hanorin sira hodi estuda Bíblia ho sira, halo orasaun ho sira, lori sira ba reuniaun iha kongregasaun no reuniaun boot sira, no hola parte iha serbisu haklaken hamutuk. Tuir loloos, hanorin joven sira kona-ba Maromak nia dalan mak knaar importante neʼebé inan-aman sira simu husi Maromak Jeová rasik. Joven sira, imi hafolin imi-nia inan-aman nia domin no laran-diʼak neʼebé sira hatudu ba imi ka lae?—Prov 23:22.
6. (a) Tuir Salmo 110:3, adorasaun iha dalan saida mak halo Maromak Jeová kontente? (b) Agora ita sei estuda kona-ba saida deʼit?
6 Maibé, nuʼudar joven sira sai boot, Aman Jeová hakarak sira atu “hatene loloos buat neʼebé Maromak hakarak, buat neʼebé diʼak, bele simu no loos”, hanesan Timóteo halo. (Rom 12:2) Se Ita halo ida-neʼe, Ita sei hola parte iha atividade kongregasaun nian laʼós tanba inan-aman mak haruka, maibé tanba Ita rasik hakarak atu halo tuir Maromak. Se Ita serbí Aman Jeová ho Ita-nia hakarak rasik, Ita sei halo nia sente laran-kontente. (Sal 110:3) Entaun, oinsá mak Ita bele hatudu katak Ita hakarak hametin Ita-nia hakarak atu rona ba Maromak Jeová no halo tuir ninia matadalan? Ita sei estuda dalan tolu atu Ita bele halo ida-neʼe. Buat tolu neʼe mak kona-ba estuda, orasaun, no hahalok. Mai ita haree buat sira-neʼe ida ba ida.
Hatene didiʼak Aman Jeová
7. Ezemplu diʼak saida mak Jesus fó kona-ba estuda Eskritura sira? Saida mak ajuda nia atu halo ida-neʼe?
7 Dalan primeiru atu hatudu katak Ita hakarak hametin Ita-nia hakarak atu serbí Aman Jeová mak hodi lee Bíblia loroloron. Lee Bíblia beibeik mak importante ba Ita-nia presiza atu adora Maromak no atu hetan koñesimentu kona-ba Maromak nia Liafuan. (Mt 5:3) Jesus fó ezemplu kona-ba neʼe. Loron ida kuandu nia sei tinan 12, ninia inan-aman hetan nia iha templu, nia “tuur hela iha ema matenek sira leet, hodi rona no husu sira”. (Lc 2:44-46) Nuʼudar labarik, Jesus haburas tiha ona ninia hakarak atu hatene no komprende Eskritura sira. Saida mak ajuda nia atu halo ida-neʼe? Karik buat neʼebé ajuda Jesus mak husi kiʼik kedas nia hetan hanorin kona-ba Maromak husi ninia inan, Maria, no ninia aman hakiak, José, tanba sira mak Maromak nia atan.—Mt 1:18-20; Lc 2:41, 51.
8. (a) Bainhira mak inan-aman presiza hanorin sira-nia oan atu hadomi Maromak nia Liafuan? (b) Konta toʼok esperiénsia ida neʼebé hatudu katak importante atu fó treinu ba oan sira husi kiʼik kedas.
8 Hanesan neʼe mós, inan-aman kristaun ohin loron rekoñese katak sira presiza hanorin beibeik sira-nia oan atu nuneʼe husi kiʼik kedas sira-nia oan bele haburas hakarak atu hatene lia-loos husi Bíblia. (Deut 6:6-9) Irmán ida naran Rubi halo ida-neʼe lakleur depois ninia oan primeiru, José, moris. Loron-loron, nia lee ba ninia oan Livru Istória husi Bíblia. Nuʼudar José sai boot, ninia inan ajuda nia atu dekor eskritura balu. Buat diʼak saida mak José hetan husi treinu ida-neʼe? Lakleur depois nia hatene koʼalia, nia bele konta istória barak husi Bíblia ho ninia liafuan rasik. No kuandu nia tinan lima, nia hatoʼo ninia diskursu primeiru iha Eskola Serbisu Teokrátiku.
9. Tanbasá mak importante atu lee Bíblia no hanoin kleʼan kona-ba buat neʼebé Ita lee?
9 Atu kontinua laʼo ba oin iha lia-loos, imi joven sira presiza sai toman atu lee Bíblia loroloron, no kontinua halo ida-neʼe iha imi-nia moris tomak. (Sal 71:17) Tansá mak lee Bíblia sei ajuda Ita atu laʼo ba oin iha lia-loos? Haree saida mak Jesus hatete iha ninia orasaun ba ninia Aman: “Neʼe mak moris rohan laek: hatene Ita nuʼudar Maromak loos mesak deʼit, no Jesus Kristu neʼebé Ita haruka mai.” (Joao 17:3) Loos duni, nuʼudar Ita hatene diʼak liután kona-ba Maromak Jeová, Ita sei haree nia nuʼudar Ita-nia Aman no sei hametin liután Ita-nia domin ba nia. (Ebr 11:27) Tan neʼe, kuandu Ita lee parte balu husi Bíblia, uza oportunidade ida-neʼe atu aprende liután kona-ba Maromak Jeová. Husu Ita-nia an: ‘Istória neʼe hanorin haʼu saida kona-ba Jeová nuʼudar Aman? Oinsá mak istória neʼe hatudu Maromak nia domin no ninia hanoin ba haʼu?’ Uza tempu atu hanoin kleʼan kona-ba pergunta sira-neʼe sei ajuda Ita atu hatene saida mak Maromak Jeová nia hanoin, nia sentimentu, no saida mak nia hakarak Ita atu halo. (Lee Provérbios 2:1-5.a) Hanesan joven Timóteo, Ita mós sei ‘fiar buat neʼebé Ita hatene ona’ husi Eskritura sira, no ida-neʼe sei book Ita atu adora Maromak Jeová ho laran.—2 Tim 3:14.
Orasaun hametin Ita-nia domin ba Aman Jeová
10, 11. Oinsá mak orasaun ajuda Ita atu hametin Ita-nia hakarak atu serbí Maromak?
10 Dalan segundu atu bele hametin Ita-nia hakarak atu serbí Aman Jeová ho laran mak hodi halo orasaun. Salmo 65:2 hatete: “Oh, Ita neʼebé rona orasaun, ba Ita deʼit mak ema oioin sei mai.” Maski Maromak halo deʼit aliansa ho ninia povu Izraél, maibé ema husi rai seluk mós bá iha Maromak nia templu atu hakbesik ba nia iha orasaun. (1 Reis 8:41, 42) Maromak la fihir ema. Ema sira neʼebé halo tuir ninia ukun-fuan bele fiar katak nia sei rona ba sira-nia orasaun. (Prov 15:8) Klaru katak Maromak rona “ema oioin” nia orasaun, inklui mós joven sira.
11 Koʼalia no rona ba malu mak importante atu iha relasaun diʼak nuʼudar belun. Karik Ita gosta atu koʼalia kona-ba Ita-nia hanoin no Ita-nia sentimentu ba Ita-nia belun. Hanesan neʼe mós, hodi hatoʼo orasaun husi laran, Ita koʼalia ba Ita-nia Kriadór Boot. (Flp 4:6, 7) Fó sai ba Aman Jeová buat hotu neʼebé Ita sente hanesan kuandu Ita koʼalia ba Ita-nia aman ka inan rasik ka ba Ita-nia belun. Tuir loloos, dalan neʼebé Ita halo orasaun mós hatudu oinsá Ita sente kona-ba Maromak Jeová. Ita sei haree katak nuʼudar Ita hametin liután Ita-nia relasaun ho Maromak Jeová nuʼudar belun, Ita-nia orasaun sei sai diʼak liután.
12. (a) Tanbasá mak orasaun neʼebé husi laran la envolve deʼit liafuan? (b) Saida mak sei ajuda Ita atu haree rasik katak Maromak Jeová besik Ita?
12 Hanoin-hetan katak Ita-nia orasaun neʼebé husi laran la envolve deʼit liafuan, maibé envolve mós Ita-nia sentimentu. Hatudu Ita-nia domin, respeitu, no katak Ita tau fiar tomak ba Aman Jeová iha Ita-nia orasaun. Nuʼudar Ita haree oinsá mak Maromak Jeová hatán Ita-nia orasaun, Ita sei haree rasik katak “Maromak Jeová besik ba ema neʼebé bolu nia”. (Sal 145:18) Sin, Maromak Jeová sei hakbesik ba Ita, sei ajuda Ita atu kontra hasoru Diabu no sei ajuda Ita atu halo desizaun neʼebé loos iha Ita-nia moris.—Lee Tiago 4:7, 8.
13. (a) Oinsá mak iha relasaun neʼebé besik ho Maromak ajuda irmán ida? (b) Oinsá mak iha relasaun neʼebé besik ho Maromak ajuda Ita atu la tuir deʼit Ita-nia kolega sira?
13 Hanoin toʼok oinsá mak iha relasaun neʼebé besik ho Maromak Jeová ajuda irmán ida naran Cherie. Kuandu nia sei tuir eskola sekundária, nia hetan prémiu barak tanba nia matenek iha eskola no diʼak liu hotu iha desportu. Kuandu nia ramata eskola, nia hetan oportunidade atu simu bolsa-estudu hodi bele bá universidade. Cherie hatete: “Haʼu gosta tebes oportunidade neʼe, no treinadór no kolega eskola sira obriga haʼu beibeik atu simu ida-neʼe.” Maibé, nia hatene katak hodi bá universidade, nia presiza uza nia tempu barak liu atu estuda no atu prepara ba jogu desportu nian, ida-neʼe sei fó nia tempu uitoan deʼit atu serbí Maromak Jeová. Saida mak Cherie halo? Nia hatete: “Depois halo tiha orasaun ba Aman Jeová, haʼu deside atu la simu bolsa-estudu neʼe no haʼu komesa serbí nuʼudar pioneiru regulár.” Agora, nia serbí nuʼudar pioneiru ba tinan lima ona. Nia hatete: “Haʼu la sente katak haʼu lakon buat ida. Hodi hatene katak haʼu halo desizaun neʼebé halo Aman Jeová kontente, ida-neʼe mós halo haʼu kontente. Tuir loloos, se ita tau uluk Maromak nia Reinu iha ita-nia moris, buat sira seluk sei fó liután ba ita.”—Mt 6:33.
Hahalok diʼak hatudu katak Ita “moos iha laran”
14. Tanbasá mak Ita-nia hahalok diʼak importante iha Maromak Jeová nia oin?
14 Dalan terseiru atu hatudu katak Ita serbí Aman Jeová ho laran mak liuhusi Ita-nia hahalok. Maromak Jeová haraik bensaun ba joven sira neʼebé moos iha dalan morál. (Lee Salmo 24:3-5.b) Samuel nuʼudar joven ida la halo tuir hahalok aat husi Amlulik Boot Eli nia oan sira. Samuel nia hahalok diʼak halo Maromak no mós ema seluk haree no hanoin diʼak kona-ba nia. Bíblia hatete: “Durante tempu neʼe, labarik Samuel sai boot ba beibeik no sai kmanek liu iha Jeová nia oin no ema nia oin.”—1 Sam 2:26.
15. Tanbasá mak importante atu ita kontinua halo hahalok diʼak?
15 Hanesan apóstolu Paulo hatete, ita moris iha mundu neʼebé nakonu ho ema neʼebé hanoin deʼit sira-nia an, foti an, refila sira-nia inan-aman, la hatene fó agradese, fuik, loko an, buka sira rasik nia ksolok liu fali hadomi Maromak. (2 Tim 3:1-5) Tanba ita hela iha mundu neʼebé aat, ida-neʼe bele halo susar ba ita atu hatudu ezemplu diʼak kona-ba hahalok diʼak. Maibé, kuandu ita halo buat neʼebé loos no lakohi halo tuir hahalok aat sira, ita hatudu katak ita apoia Maromak Jeová nia direitu atu ukun. (Jó 2:3, 4) Ita mós sente haksolok tanba ita hatene katak ita simu Aman Jeová nia konvite neʼebé dehan: “Haʼu-nia oan, sai matenek bá, no halo haʼu-nia laran kontente, atu haʼu bele hatán ba ida neʼebé koʼalia aat mai haʼu.” (Prov 27:11) Liután neʼe, tanba ita hatene katak Maromak Jeová simu ita, ida-neʼe sei hametin ita-nia hakarak atu serbí nia.
16. Oinsá mak irmán ida halo Maromak Jeová nia laran kontente?
16 Irmán ida naran Carol kuandu nia sei eskola hela, nia kaer metin ba Bíblia nia matadalan, no ema haree ninia hahalok diʼak neʼe. Saida mak akontese? Carol nia maluk sira iha eskola goza nia, tanba ninia laran neʼebé hetan treinu ona husi Bíblia la husik nia atu tuir selebrasaun loron boot sira no selebrasaun kona-ba nasaun. Iha situasaun sira-neʼe, nia iha oportunidade atu esplika ninia fiar ba ema seluk. Tinan barak depois neʼe, Carol simu karta ida husi ninia maluk eskola, nia maluk neʼe hatete: “Haʼu sempre hein katak haʼu bele koʼalia ho Ita atu hatoʼo obrigadu ba Ita. Haʼu haree Ita-nia hahalok diʼak neʼebé Ita hatudu nuʼudar joven kristaun ida, no mós Ita-nia aten-brani atu halo desizaun atu la tuir selebrasaun loron boot sira. Ita mak Testemuña ba Jeová primeiru neʼebé haʼu hasoru.” Carol nia ezemplu book duni ninia kolega eskola neʼe nia laran, tan neʼe ikusmai nia hahú estuda Bíblia. Iha ninia karta neʼebé nia hakerek ba Carol, nia hatete katak nia hetan ona batizmu ba tinan 40 liu! Hanesan Carol, joven sira neʼebé ho aten-brani kaer metin ba Bíblia nia matadalan bele book ema neʼebé laran-moos atu hakarak hatene kona-ba Maromak Jeová.
Joven sira hahiʼi Maromak Jeová
17, 18. (a) Oinsá mak ita sente kona-ba Joven sira iha ita-nia kongregasaun laran? (b) Joven sira neʼebé adora Maromak loos, sira-nia futuru sei sai oinsá?
17 Ita hotu iha Maromak nia organizasaun iha mundu tomak haksolok tebes atu haree joven rihun ba rihun neʼebé ho laran-manas hola parte iha adorasaun loos! Joven sira-neʼe hametin sira-nia hakarak atu adora Maromak Jeová hodi lee Bíblia loroloron, hodi halo orasaun, no hodi hakaʼas an atu halo tuir Maromak nia hakarak iha sira-nia moris. Joven sira-neʼe fó ksolok ba sira-nia inan-aman no mós ba Maromak Jeová nia atan hotu.—Prov 23:24, 25.
18 Iha futuru, joven sira neʼebé laran-metin sei hamutuk ho ema neʼebé sei hetan salvasaun hodi bele tama iha Maromak nia mundu foun neʼebé nia promete nanis ona. (Apok 7:9, 14) Iha neʼebá, sira sei haksolok ho bensaun barak nuʼudar sira kontinua atu hatudu agradese ba Maromak Jeová, no sira sei bele hahiʼi Nia toʼo tempu neʼebé la bele sura.—Sal 148:12, 13.
[Nota–rodapé]
a Provérbios 2:4, 5: “Se ó kontinua buka ida-neʼe hanesan buka osan-mutin, no kontinua buka ida-neʼe hanesan rikusoin neʼebé subar hela, se nuneʼe ó sei hatene taʼuk ba Jeová, no ó sei hetan matenek husi Maromak.”
b Salmo 24:3-5: “Sé mak bele saʼe ba Jeová nia foho, no sé mak bele hamriik iha ninia fatin santu? Ema naran deʼit neʼebé la halo sala iha ninia liman no neʼebé iha laran moos, no neʼebé la jura ba haʼu-nia moris kona-ba buat neʼebé la iha folin, no mós la jura falsu. Nia sei hetan bensaun husi Jeová no justisa husi ninia Maromak salvasaun nian.”
Ita bele hatán?
• Ohin loron, oinsá mak joven sira bele hola parte iha adorasaun loos?
• Atu ita bele hetan buat diʼak kuandu lee Bíblia, tanbasá mak importante atu hanoin kleʼan?
• Oinsá mak orasaun bele ajuda ita atu hakbesik liután ba Aman Jeová?
• Ema kristaun nia hahalok diʼak bele lori rezultadu diʼak saida?
[Dezeñu iha pájina 5]
Ita iha toman atu lee Bíblia loroloron ka lae?