Oinsá Maromak Jeová uza espíritu santu atu kumpre ninia hakarak
“Haʼu-nia liafuan neʼebé sai husi haʼu-nia ibun . . . sei hetan susesu duni tuir buat neʼebé haʼu hatete tiha ona.”—ISA 55:11.
1. Esplika toʼok dalan rua neʼebé ema kumpre sira-nia hakarak.
HANOIN toʼok katak ema naʼin-rua prepara atu halo viajen ho karreta. Sira naʼin-rua hakarak bá fatin neʼebé hanesan. Ida halo planu nanis atu tuir dalan ida deʼit hodi bele toʼo iha fatin neʼebé nia hakarak atu bá. Ida seluk hatene dalan neʼebé nia sei tuir atu bele toʼo fatin neʼebé nia hakarak, maibé nia mós hatene dalan seluk tan atu toʼo fatin neʼe. Nia prontu atu troka ninia dalan se karik buat ruma akontese. Ida-neʼe hatudu katak maski sira naʼin-rua iha hakarak neʼebé hanesan, maibé dalan neʼebé sira kumpre sira-nia hakarak mak la hanesan. Ida tuir deʼit planu neʼebé nia halo nanis ona, ida seluk hanoin kona-ba oinsá atu kumpre ninia hakarak maski nia presiza troka ninia dalan.
2, 3. (a) Maromak Jeová nia hakarak envolve saida? Saida mak nia halo kuandu Adão no Eva halo sala? (b) Tanbasá mak ita presiza hatene kona-ba dalan neʼebé Maromak halaʼo ninia hakarak?
2 Kuandu Maromak Jeová halaʼo ninia hakarak, nia la kaer metin deʼit ba planu ida, maibé nia halaʼo ninia hakarak tuir situasaun neʼebé mosu. (Ef 3:11) Maromak nia hakarak envolve ninia hakarak horiuluk kedas ba ema no ba rai, neʼe mak atu halo rai neʼe sai hanesan jardín kapás atu ema neʼebé perfeitu bele moris ho dame no kontente ba nafatin. (Gên 1:28) Kuandu Adão no Eva halo sala, Maromak Jeová halo buat ruma tuir situasaun neʼe, nia halo arranju atu ninia hakarak uluk nian bele sai loos. (Lee Gênesis 3:15.) Maromak Jeová deside atu feto neʼebé reprezenta Ninia organizasaun iha lalehan fó moris ba “bei-oan” neʼebé ikusmai sei halakon Satanás no hadiʼa buat aat hotu neʼebé nia halo.—Ebr 2:14; 1 Joao 3:8.
3 La iha kbiit ida iha lalehan no iha rai neʼebé bele hapara Maromak atu kumpre ninia hakarak. (Isa 46:9-11) Tansá mak ida-neʼe loos? Tanba ida-neʼe envolve Maromak Jeová nia espíritu santu. Entaun, tanba forsa boot neʼe mak Maromak nia hakarak “sei hetan susesu duni”. (Isa 55:10, 11) Diʼak atu ita hatene kona-ba dalan neʼebé Maromak halaʼo ninia hakarak no moris tuir ida-neʼe. Ita-nia moris iha futuru depende ba Maromak atu kumpre ninia hakarak. Liután neʼe, hatene oinsá mak Maromak Jeová uzu ninia espíritu santu hametin ita-nia fiar. Agora, mai ita hanoin kona-ba oinsá mak Maromak Jeová uza espíritu santu iha tempu uluk, ohin loron, no iha futuru atu kumpre ninia hakarak.
Maromak uza espíritu santu iha tempu uluk
4. Oinsá mak Maromak Jeová fó sai neineik-neineik ninia hakarak?
4 Iha tempu Bíblia nian, Maromak Jeová fó sai neineik-neineik ninia hakarak. Foufoun, bei-oan neʼebé Maromak promete sei “segredu” hela. (1 Kor 2:7) Maizumenus tinan 2.000 liutiha mak Maromak Jeová koʼalia fali kona-ba bei-oan neʼe. (Lee Gênesis 12:7; 22:15-18.) Maromak Jeová halo promesa ba Abraão kona-ba bei-oan neʼe. Liafuan “liuhusi ó-nia bei-oan” hatudu ho klaru katak bei-oan neʼe sei mai husi Abraão nia bei-oan. Maibé, ita la duvida katak Satanás hakarak tebes atu hatene kona-ba bei-oan neʼe. Maromak nia inimigu neʼe hakarak atu halakon Abraão nia bei-oan hodi nuneʼe Maromak nia hakarak la bele sai loos. Maibé, nia la konsege halo ida-neʼe tanba Maromak uza ninia espíritu. Maromak uza ninia espíritu santu iha dala saida deʼit?
5, 6. Oinsá mak Maromak Jeová uza ninia espíritu atu proteje ema ida-idak neʼebé sai beiʼala ba bei-oan neʼe?
5 Maromak Jeová uza ninia espíritu atu proteje ema ida-idak neʼebé sei sai beiʼala ba bei-oan neʼebé promete ona. Maromak Jeová hatete ba Abrão (Abraão): “Haʼu mak eskudu ba ó.” (Gên 15:1) Maromak nia promesa neʼe sai loos duni. Hanoin toʼok saida mak akontese maizumenus tinan 1919 molok Kristu, kuandu Abraão no Sara hela iha rai-Gerar ba tempu uitoan. Abimélec, liurai husi Gerar hakarak foti Sara atu sai ninia feen tanba nia la hatene katak Sara mak Abraão nia feen. Satanás envolve an iha situasaun neʼe hodi bele hapara Sara no Abraão atu iha oan ka lae? Bíblia la esplika kona-ba neʼe. Buat neʼebé Bíblia hatete mak Maromak Jeová la husik ida-neʼe akontese. Iha mehi, Maromak fó avizu ba Abimélec atu la bele foti Sara nuʼudar nia feen.—Gên 20:1-18.
6 Laʼós tempu neʼe deʼit mak Maromak Jeová proteje Abraão no ninia família. Nia proteje sira ba dala barak. (Gên 12:14-20; 14:13-20; 26:26-29) Ema neʼebé hakerek salmu ida koʼalia kona-ba Abraão no ninia bei-oan sira hodi hatete: “Nia [Jeová] la husik ema ida atu lohi sira, maibé tanba sira mak nia fó kastigu ba liurai sira, hodi hatete: ‘Imi keta book haʼu-nia atan kose-mina sira, no ba haʼu-nia profeta sira, keta halo aat.’”—Sal 105:14, 15.
7. Iha dalan saida deʼit mak Maromak Jeová proteje nasaun Izraél?
7 Liuhusi nia espíritu, Maromak Jeová proteje nasaun Izraél iha tempu uluk iha neʼebé bei-oan neʼebé promete ona sei mosu. Hodi nia espíritu, Maromak Jeová fó ninia Ukun-Fuan ba nasaun Izraél atu sira bele halaʼo adorasaun neʼebé loos no proteje sira husi buat neʼebé estraga sira-nia relasaun ho Maromak, no atu sira moos nafatin iha dalan morál no isin nian. (Êx 31:18; 2 Kor 3:3) Iha Juis sira-nia tempu, Maromak Jeová nia espíritu fó kbiit ba ema balu atu salva Izraél husi sira-nia inimigu. (Juíz 3:9, 10) Durante tinan atus ba atus toʼo tempu neʼebé parte primeiru husi Abraão nia bei-oan Jesus moris, espíritu santu proteje mós Jeruzalein, Belein, no templu, tanba buat sira-neʼe mak parte importante atu kumpre buat neʼebé fó-hatene nanis ona kona-ba Jesus.
8. Saida mak hatudu katak espíritu santu ajuda Jesus iha ninia moris no iha ninia serbisu haklaken?
8 Espíritu santu ajuda Jesus iha ninia moris no iha ninia serbisu haklaken. Hodi proteje Jesus iha Maria nia knotak, espíritu santu halo buat ida neʼebé nunka akontese uluk. Maski Maria la perfeitu, maibé espíritu santu ajuda nia atu iha oan neʼebé perfeitu, no neʼebé laʼós atan ba sala no mate. (Lc 1:26-31, 34, 35) Kuandu Jesus sei bebé, espíritu santu mós proteje nia husi ema neʼebé hakarak oho nia. (Mt 2:7, 8, 12, 13) Kuandu Jesus tinan 30, Maromak kose mina nia ho espíritu santu, neʼe hatudu katak Maromak hili nia atu simu David nia kadunan no haruka nia atu haklaken. (Lc 1:32, 33; 4:16-21) Espíritu santu fó kbiit ba Jesus atu halo milagre sira, inklui kura ema moras, fó-han ema-lubun boot, no halo ema mate moris fali. Buat sira-neʼe hatudu kona-ba bensaun sira neʼebé ita bele hein atu simu kuandu Jesus ukun nuʼudar liurai.
9, 10. (a) Saida mak hatudu katak espíritu santu ajuda Jesus nia dixípulu sira iha tempu uluk? (b) Buat foun saida mak akontese iha apóstolu sira-nia tempu kona-ba Maromak Jeová nia hakarak?
9 Komesa iha Pentekostes 33, Maromak Jeová uza ninia espíritu atu kose mina ba sira neʼebé sai parte segundu ba Abraão nia bei-oan, maski sira barak laʼós Abraão nia bei-oan rasik. (Rom 8:15-17; Gal 3:29) Espíritu santu ajuda Jesus nia dixípulu sira iha tempu uluk hodi fó kbiit ba sira atu haklaken ho laran-manas no atu halo milagre. (Apos 1:8; 2:1-4; 1 Kor 12:7-11) Tanba sira hetan kbiit atu halo milagre, espíritu santu hatudu buat foun kona-ba oinsá Maromak Jeová kumpre ninia hakarak. Maromak Jeová la simu ona ema atu adora nia tuir arranju neʼebé nia halo tinan atus ba atus liubá no neʼebé halaʼo iha templu iha Jeruzalein. Nia agora simu mak kongregasaun kristaun foun neʼebé foin harii. Husi tempu neʼebá, Maromak Jeová kontinua uza kongregasaun kose-mina nian atu kumpre ninia hakarak.
10 Dalan balu neʼebé Maromak Jeová uza espíritu santu iha tempu Bíblia nian mak atu proteje, fó kbiit, no kose mina ema hodi kontinua kumpre ninia hakarak. Maibé, oinsá ohin loron? Oinsá mak Maromak Jeová uza ninia espíritu atu halaʼo ninia hakarak? Ita presiza hatene kona-ba ida-neʼe tanba ita hakarak husik espíritu neʼe dirije ita. Nuneʼe, mai ita haree dalan haat neʼebé Maromak Jeová uza ninia espíritu ohin loron.
Maromak uza espíritu santu ohin loron
11. Saida mak hatudu katak espíritu santu ajuda Maromak nia povu atu sai ema neʼebé moos? Oinsá mak ita hatudu katak ita husik espíritu atu dirije ita?
11 Dalan primeiru neʼebé Maromak uza ninia espíritu santu mak atu ajuda ninia povu atu sai ema neʼebé moos. Maromak Jeová nia povu neʼebé serbí nia iha dalan neʼebé nia simu no neʼebé sei hetan buat diʼak husi ninia hakarak, presiza sai moos iha dalan morál. (Lee 1 Korinto 6:9-10.) Antes ema balu sai kristaun loos, sira halo hahalok aat hanesan sala-foʼer, ka sala-foʼer ho maluk mane ka maluk feto. Ema nia hakarak aat neʼebé lori ba sala karik metin ona iha ema nia laran. (Tgo 1:14, 15) Maski nuneʼe, ema sira-neʼe “fase moos ona”, neʼe hatudu katak sira troka ona sira-nia moris atubele halo Maromak kontente. Saida mak ajuda ema neʼebé hadomi Maromak atu la halo tuir sira-nia hakarak aat? 1 Korinto 6:11 hatete: “Maromak nia espíritu.” Hodi moos nafatin iha dalan morál, ita hatudu katak ita husik espíritu santu atu dirije ita iha ita-nia moris.
12. (a) Tuir Ezequiel nia vizaun, oinsá mak Maromak Jeová dirije ninia organizasaun? (b) Oinsá mak ita hatudu katak ita husik espíritu santu dirije ita?
12 Dalan segundu neʼebé Maromak Jeová uza ninia espíritu mak atu dirije ninia organizasaun tuir dalan neʼebé nia hakarak. Iha Ezequiel nia vizaun, nia haree kuda-karreta iha lalehan, ida-neʼe reprezenta parte husi Maromak Jeová nia organizasaun neʼebé iha lalehan, neʼebé laʼo nafatin hodi la para atu kumpre Maromak Jeová nia hakarak. Forsa saida mak halo kuda-karreta neʼe laʼo ba oin ka muda ba dalan ruma? Espíritu santu. (Eze 1:20, 21) Diʼak atu ita hanoin-hetan katak Maromak Jeová nia organizasaun iha parte rua, ida iha lalehan no ida seluk iha rai. Se espíritu santu mak dirije parte neʼebé iha lalehan, entaun espíritu santu mós dirije parte neʼebé iha rai. Tan neʼe, hodi laran-metin no halo tuir Maromak nia organizasaun iha rai ita hatudu katak ita kontinua laʼo hamutuk ho Maromak Jeová nia organizasaun lalehan nian neʼebé nafatin laʼo bá oin, no ita hatudu katak ita husik espíritu santu dirije ita.—Ebr 13:17.
13, 14. (a) Sé mak inklui husi jerasaun neʼebé Jesus temi? (b) Fó toʼok ezemplu neʼebé hatudu katak espíritu santu mak ajuda ita komprende lia-loos husi Bíblia. (Haree kaixa “Ita laʼo tuir naroman lia-loos nian neʼebé sai moos liu ka lae?”)
13 Dalan terseiru neʼebé Maromak Jeová uza espíritu santu mak atu ajuda ita komprende lia-loos husi Bíblia. (Prov 4:18) Ba tinan barak ona atan “laran-metin no matenek” uza livru ida-neʼe nuʼudar dalan importante liu atu esplika lia-loos husi Bíblia neʼebé neineik-neineik sai moos liu. (Mt 24:45) Porezemplu, hanoin toʼok kona-ba buat neʼebé ita komprende kona-ba sira neʼebé parte husi “jerasaun neʼe” neʼebé Jesus temi. (Lee Mateus 24:32-34.) Jesus koʼalia kona-ba jerasaun ida neʼebé? Iha lisaun ho títulu ‘Kehadiran Kristus—Apa Artinya bagi Saudara?’ esplika katak Jesus la koʼalia kona-ba ema aat, maibé nia koʼalia kona-ba ninia dixípulu sira neʼebé lakleur tan hetan kose-mina ho espíritu santu. Jesus nia dixípulu sira neʼebé hetan kose-mina iha apóstolu sira-nia tempu no iha ita-nia tempu mak sira neʼebé sei haree no komprende sinál neʼe, neʼebé hatudu katak Jesus “besik ona odamatan”.
14 Ida-neʼe katak sá ba ita? Maski ita la bele sukat tinan hira mak “jerasaun neʼe” sei iha, maibé diʼak atu ita hanoin buat balu kona-ba liafuan “jerasaun”. Baibain liafuan “jerasaun” dehan katak ema neʼebé iha tinan oioin neʼebé moris durante tempu ka períodu ida; ida-neʼe laʼós tempu kleur no iha rohan. Ida-neʼe hanesan avó no oan no mós bei-oan neʼebé sai jerasaun ida, maibé jerasaun neʼe la inklui bei-oan ne’ebé moris depois avó neʼe mate. (Êx 1:6) Entaun, oinsá mak ita komprende Jesus nia liafuan kona-ba “jerasaun neʼe”? Jerasaun neʼe mak ema kose-mina sira neʼebé haree sinál komesa sai klaru iha tinan 1914 maibé mate antes terus boot, no mós ema kose-mina sira neʼebé moris depois tinan 1914 maibé moris iha tempu hanesan ho sira neʼebé haree sinál iha tinan 1914, no sira balu sei moris hela kuandu terus boot hahú. Jerasaun neʼe iha hun, no sei iha duni rohan. Akontesimentu oioin neʼebé sai loos tuir sinál neʼebé Jesus temi hatudu ho klaru katak terus boot besik ona atu mai. Tan neʼe, se ita hanoin-hetan nafatin katak terus boot besik ona no se ita matan-moris nafatin, ita hatudu katak ita laʼo tuir naroman lia-loos nian husi Bíblia neʼebé sai moos liu no hatudu katak ita husik espíritu santu dirije ita.—Mc 13:37.
15. Saida deʼit mak hatudu katak espíritu santu mak fó kbiit mai ita atu haklaken lia-foun diʼak?
15 Dalan ida seluk tan neʼebé Maromak uza ninia espíritu santu mak hodi fó kbiit mai ita atu haklaken lia-foun diʼak. (Apos 1:8) Ho ajuda husi espíritu santu mak lia-foun diʼak bele haklaken iha mundu tomak. Karik uluk ita moe no taʼuk no tan neʼe ita hanoin: ‘Haʼu nunka bele bá haklaken husi uma ba uma!’ Maibé ho espíritu santu nia ajuda, agora ita hola parte iha serbisu neʼe ho laran-manas. Espíritu santu mós ajuda Testemuña ba Jeová barak atu kontinua haklaken ho laran-metin maski sira hasoru terus ka ema kontra sira. Buat sira-neʼe hatudu katak Maromak nia espíritu santu deʼit mak bele fó kbiit mai ita atu tahan hasoru susar ruma no atu halo buat neʼebé ita la bele halo ho ita-nia kbiit rasik. (Miq 3:8; Mt 17:20) Hodi hola parte beibeik iha serbisu haklaken, ita hatudu katak ita husik espíritu santu dirije ita.
Maromak uza espíritu santu iha futuru
16. Tanbasá mak ita bele fiar katak Maromak Jeová sei proteje ninia povu durante terus boot?
16 Iha futuru, Maromak Jeová sei uza ninia espíritu santu iha dalan neʼebé boot liu atu kumpre ninia hakarak. Hanoin toʼok oinsá mak Maromak uza ninia espíritu atu proteje ema. Hanesan ita estuda tiha ona, Maromak Jeová uza ninia espíritu atu proteje ema ida-idak iha tempu uluk, no proteje Izraél nuʼudar nasaun. Tan neʼe, ita iha razaun barak atu fiar katak Maromak sei uza ninia espíritu atu proteje ninia povu durante terus boot neʼebé besik ona atu mai. Duké iha hanoin oioin kona-ba oinsá mak Maromak Jeová sei tau matan ita iha tempu neʼebá, ita bele fiar katak Maromak Jeová sei la husik sira neʼebé hadomi nia no nia sei proteje sira liuhusi ninia espíritu santu.—2 Crôn 16:9; Sal 139:7-12.
17. Oinsá mak Maromak Jeová sei uza ninia espíritu santu iha mundu foun?
17 Oinsá mak Maromak Jeová sei uza ninia espíritu santu iha mundu foun? Liuhusi espíritu santu nia kbiit mak sei loke livru foun iha tempu neʼebá. (Apok 20:12) Saida deʼit mak hakerek iha livru sira-neʼe? Neʼe mak buat hotu neʼebé Maromak Jeová hakarak ita atu halo durante tinan rihun ida. Ita hakarak atu hatene saida mak hakerek iha livru sira-neʼe ka lae? Hakarak hatene kona-ba ida-neʼe halo ita hein namanas ba mundu foun. Moris iha tempu neʼebá sei kapás tebetebes tanba bensaun neʼebé ita sei hetan husi Maromak Jeová bainhira nia uza ninia espíritu santu atu kumpre ninia hakarak ba rai no ba ema.
18. Ita hakarak hakaʼas an atu halo saida?
18 Mai ita hanoin-hetan nafatin katak Maromak Jeová nia hakarak sei sai loos duni tanba nia uza ninia espíritu santu, kbiit neʼebé boot liu hotu iha lalehan no rai, atu kumpre ninia hakarak. Maromak nia hakarak neʼe mós kona-ba ita. Tan neʼe, mai ita hakaʼas an atu harohan ba Maromak Jeová atu husu ninia espíritu santu no atu husik ida-neʼe dirije ita. (Lc 11:13) Hodi halo nuneʼe, ita bele moris ba nafatin iha mundu foun hanesan Maromak Jeová hakarak.
[Nota–rodapé]
Gênesis 3:15: “Haʼu sei halo ó odi feto neʼe, no ó-nia bei-oan no feto neʼe nia bei-oan sei odi malu. Nia sei harahun ó-nia ulun no ó sei hakanek ninia ain-tuban.”
Gênesis 22:17, 18: “Haʼu sei haraik duni bensaun ba ó no haʼu sei halo duni ó-nia bei-oan sai barak hanesan fitun iha lalehan no hanesan rai-henek neʼebé iha tasi-ibun; no ó-nia bei-oan sei manán ninia inimigu sira-nia portaun sidade nian. Liuhusi ó-nia bei-oan nasaun hotu iha rai sei hetan duni bensaun, tanba ó rona tiha mai haʼu-nia lian.”
Haree Menara Pengawal 15 Februari 2008, pájina 21-25.
Atu hetan ezemplu kona-ba oinsá mak ema neʼebé uluk moe no taʼuk ikusmai sai laran-manas atu haklaken, haree Menara Pengawal 15 September 1993, pájina 19.
Ita hanoin-hetan?
• Iha dalan saida deʼit mak Maromak Jeová uza ninia espíritu santu iha tempu uluk hodi kontinua kumpre ninia hakarak?
• Oinsá mak Maromak uza ninia espíritu santu ohin loron?
• Oinsá mak Maromak Jeová sei uza ninia espíritu santu iha futuru atu kumpre ninia hakarak?
[Kaixa iha pájina 10]
Ita laʼo tuir naroman lia-loos nian neʼebé sai moos liu ka lae?
Maromak Jeová kontinua atu halo lia-loos sai moos liután ba ninia povu. Hanorin saida deʼit mak sai moos liután neʼebé fó sai iha livru Menara Pengawal?
▪ Iha Jesus nia ai-knanoik kona-ba fermentu, lisaun diʼak saida mak ita bele aprende kona-ba hakat importante sira atu sai Kristu nia dixípulu? (Mt 13:33)—15 Juli 2008, pájina 19-20.
▪ Bainhira mak konvite ba ema kristaun sira neʼebé iha esperansa atu bá lalehan sei ramata?—1 Mei 2007, pájina 30-31.
▪ Adora Maromak Jeová “tuir espíritu” katak sá? (Joao 4:24)—15 Juli 2002, pájina 15.
▪ Iha pátiu ida neʼebé mak ema-lubun boot serbí Maromak? (Apok 7:15)—1 Mei 2002, pájina 30-31.
▪ Bainhira mak sei haketak bibi-malae husi bibi-timur? (Mt 25:31-33)—15 Oktober 1995, pájina 18-28.