Hametin Ita-nia relasaun ho Maromak kuandu tau matan ba família ne’ebé moras

DOUTÓR sira hetan tumór besik Kim nia ruin-kotuk no fó-hatene Kim no Steve, kaben-na’in Testemuña, katak Kim kona moras kankru.a Steve hatete: “Doutór sira halo operasaun atu hasai tumór ne’e, no tuirmai fó radioterapia no kimioterapia ba Kim. Tanba tratamentu ne’e, nia sai fraku tebes to’o susar ba nia atu la’o.”

Hanoin to’ok, Steve sente oinsá nu’udar nia haree ninia feen ne’ebé nia hadomi luta ho moras aat ne’e. Karik Ita-nia belun ka família mós luta moras aat ida, ka luta hasoru problema sira-ne’ebé mosu tanba sai ferik ka katuas. (Ecle 12:1-7) Se nune’e, Ita hatene ona katak atubele tau matan didi’ak ba ema moras, Ita presiza mós tau matan didi’ak ba Ita-nia an. Se Ita-nia relasaun ho Maromak sai fraku, Ita-nia saúde bele sai fraku no Ita bele komesa atu sente triste ka hirus demais. Se hanesan ne’e, Ita labele tau matan ho didi’ak ba ema seluk ne’ebé moras. Entaun, oinsá mak Ita bele tau matan ba Ita-nia responsabilidade kristaun sira, no iha tempu ne’ebé hanesan tau matan ba família ne’ebé moras ka idade boot? Ema seluk husi Ita-nia kongregasaun bele ajuda ka lae? Se bele, oinsá?

Tetu didi’ak

Atu bele nafatin hametin ita-nia relasaun ho Maromak no tau matan ba Ita-nia saúde, maski Ita mós tau matan ba Ita-nia família ne’ebé moras, Ita tenke halo planu kona-ba oinsá Ita uza Ita-nia tempu, no oinsá Ita la bele sai kole liu. Provérbios 11:2 dehan: “Matenek iha hamutuk ho ema ne’ebé haraik-an.” Iha versíkulu ne’e, “haraik-an” katak hatene buat ne’ebé ema ida-idak bele halo no la bele halo. Nune’e, tetu didi’ak kona-ba Ita-nia responsabilidade sira no oinsá Ita uza Ita-nia tempu hodi hatene se Ita halo daudaun buat ne’ebé Ita la iha kbiit atu halo ka lae.

Steve hatudu matenek no haraik-an hodi hanoin didi’ak kona-ba ninia responsabilidade sira. Nia halo serbisu atu buka moris, no nia serbí nu’udar koordenadór ba grupu katuas nian no mós katuas haklaken nian iha ninia kongregasaun husi Testemuña ba Jeová iha rai-Irlanda. Nia mós serbí iha Grupu ne’ebé Komunika ho Ospitál sira iha ninia área. Steve hatete: “Kim nunka kesar katak ha’u ladún fó atensaun ba nia hodi tau matan ba responsabilidade hirak-ne’e. Maibé ha’u rasik hatene katak ha’u halo buat ne’ebé ha’u la iha kbiit atu halo.” Oinsá mak Steve hadi’a situasaun ne’e? Nia hatutan tan: “Depois tetu ho didi’ak no halo orasaun, ha’u deside atu la serbí tan nu’udar koordenadór. Ha’u kontinua serbí nu’udar katuas, maibé hodi husik irmaun seluk hala’o ha’u-nia responsabilidade balu, ha’u bele fó tempu barak liután ba Kim, no fó nia atensaun ne’ebé nia presiza.”

Ikusmai, Kim nia saúde sai di’ak uitoan. Dala ida tan, Steve no Kim hanoin didi’ak kona-ba sira-nia situasaun, no Kim apoia Steve nia desizaun atu simu fali nia responsabilidade sira iha kongregasaun. Steve esplika: “Ami rua-rua aprende ona katak buat ne’ebé ami bele halo depende ba Kim nia saúde. Ha’u agradese tebes ba Aman Jeová tan ninia ajuda, no ba ha’u-nia kaben tanba ho laran nia apoia ha’u maski ninia saúde ladún di’ak.”

No mós hanoin to’ok kona-ba Jerry, ne’ebé serbí nu’udar katuas ne’ebé vizita kongregasaun sira, no ninia kaben, Maria. Sira hakarak serbí nu’udar misionáriu iha rai seluk, maibé sira troka sira-nia planu atubele tau matan ba inan-aman ne’ebé ferik-katuas ona. Maria esplika: “Jerry mak oan mesak, no nia inan-aman presiza ema atu tau matan ba sira. Nune’e, ami deside atu hela nafatin iha rai-Irlanda atu tau matan ba sira. Hodi halo nune’e, ami biban hamutuk ho Jerry nia aman bainhira nia baixa, antes nia mate. Agora ami kontakta Jerry nia inan loroloron, no ami bele bá vizita nia se nia presiza. Jerry nia inan nia kongregasaun mós fó tulun no apoiu, tan ne’e ami bele kontinua hala’o ami-nia knaar atu vizita kongregasaun sira.”

Oinsá ema seluk bele ajuda

Iha 1 Timoteo kapítulu 5, apóstolu Paulo ko’alia kona-ba fó tulun ba feto-faluk ne’ebé ferik iha kongregasaun laran. Nia hakerek: “Ema ne’ebé la tau matan ba parente sira, liuliu ba sira ne’ebé horik hamutuk ho nia, ema ne’e hewai tiha nia fiar no aat liu fali ema ne’ebé fiar-laek.” Paulo fó-hanoin ema kristaun katak atu “monu loos ba Maromak nia laran” sira tenke apoia osan ruma ba sira-nia inan-aman no avó sira ne’ebé ferik-katuas. (1 Tim 5:4, 8) Maibé, ema seluk iha kongregasaun laran mós bele fó tulun, no tuir loloos sira iha responsabilidade atu halo nune’e.

Hanoin to’ok kona-ba ezemplu ida tan. Hokan no Inger mak kaben-na’in ne’ebé ferik-katuas husi rai-Suésia. Hokan hatete: “Bainhira doutór fó-hatene katak ha’u-nia feen kona moras kankru, ami na’in-rua hakfodak tebes. Inger sempre iha saúde di’ak no forte. Agora ami tenke bá ospitál loroloron atu simu tratamentu, no ida-ne’e halo nia sente moras tebes. Durante tempu ne’ebá Inger hela iha uma, no ha’u tenke hamutuk ho nia atu tau matan ba nia.” Oinsá mak Hokan no Inger nia kongregasaun ajuda sira?

Katuas sira iha kongregasaun arranja katak sira bele rona reuniaun kristaun sira hodi uza telefone. No mós, irmaun-irmán sira vizita no telefone beibeik. Sira mós haruka karta sira. Hokan hatete: “Ami sente katak irmaun sira no Aman Jeová ajuda ami. Buat ne’ebé sira halo ajuda ami atu nafatin hametin ami-nia relasaun ho Maromak. Ami kontente tanba ikusmai, Inger sai di’ak fali, no ami bele tuir fali reuniaun sira iha Salaun Reinu.” Kuandu irmaun sira haka’as an atu ajuda ema moras no ferik-katuas iha sira-nia leet, sira hatudu katak sira hanesan ‘belun loos ne’ebé sempre hatudu domin, ne’ebé mosu mai iha tempu susar nia laran’.—Prov 17:17.

Maromak Jeová hafolin Ita-nia haka’as-an

Tuir loloos, susar atu tau matan ba família ne’ebé moras. Maibé, Liurai David hakerek: “Haksolok ba ema ne’ebé hatudu laran-di’ak ba ema ki’ik.” (Sal 41:1) Ema ki’ik bele inklui ema ne’ebé presiza ajuda tanba sira moras.

Tanbasá mak sira ne’ebé tau matan ba família ne’ebé moras bele haksolok? Provérbios 19:17 dehan: “Nia ne’ebé hatudu laran-di’ak ba ema ki’ik fó empresta ba Maromak Jeová, no Maromak sei selu fali ninia hahalok di’ak.” Maromak ne’ebé loos iha interese ba ninia fiar-na’in ne’ebé moras, no nia haraik bensaun no ajuda sira. David mós kanta: “Maromak Jeová rasik sei ajuda [fiar-na’in] kuandu nia moras no latan iha toba-fatin; nia toba-fatin hotu Ita sei troka duni iha tempu nia moras.” (Sal 41:3) Sira ne’ebé tau matan ba ema moras ho domin, ita bele fiar katak se sira hasoru susar ruma, Maromak Jeová sei ajuda.

Sin, kuandu ita tau matan ba família ne’ebé moras, ida-ne’e halo Maromak Jeová kontente! Maski ita tenke haka’as an atu halo nune’e, maibé ita bele tau fiar ba Bíblia nia liafuan ne’ebé hatete: “Sakrifísiu sira-ne’e mak sakrifísiu ne’ebé monu loos ba Maromak nia laran.”—Ebr 13:16.

[Nota–rodapé]

[Dezeñu iha pájina 18]

Nafatin hametin ita-nia relasaun ho Maromak no simu ajuda husi ema seluk