Tansá susar atu hatene didiʼak Maromak?

IHA inimigu ida neʼebé hakarak hanetik ita atu hatene Maromak Jeová nia naran no atu iha relasaun neʼebé besik ho Maromak. Sé mak inimigu aat neʼe? Bíblia hatete katak “maromak mundu neʼe nian mak taka tiha ema fiar-laek sira-nia hanoin”. Mundu aat neʼe nia maromak mak Diabu, Satanás. Nia hakarak ita atu nafatin iha nakukun laran atu ita la bele hetan naroman husi ‘matenek Maromak nia glória nian’. Satanás lakohi ita atu hatene didiʼak Maromak Jeová. Maibé, oinsá mak Satanás taka ema nia hanoin?—2 Korinto 4:4-6.

Satanás uza relijiaun falsu atu hanetik ema atu hatene didiʼak Maromak. Porezemplu iha tempu uluk, ema judeu balu la halo tuir Eskritura sira, maibé sira hili atu halo tuir tradisaun neʼebé hanorin atu la uza Maromak nia naran. Antes Jesus mai iha rai, ulun-naʼin sira husi relijiaun judeu haruka ema neʼebé iha knaar atu lee Eskritura Sagrada ba públiku atu labele temi Maromak nia naran, maibé uza liafuan ida seluk, neʼe mak Adonai, katak “Naʼi”. La iha dúvida katak toman ida-neʼe halo povu dook husi Maromak no la bele iha relasaun diʼak ho Nia. Ema barak la hetan oportunidade atu iha relasaun neʼebé besik ho Maromak. Maibé, oinsá ho Jesus? Saida mak ninia hanoin kona-ba Maromak Jeová nia naran?

Jesus no sira neʼebé tuir nia fó-hatene Maromak nia naran

Jesus hatete ba nia Aman iha orasaun: “Haʼu fó-hatene tiha . . . Ita-nia naran, no haʼu sei fó-hatene liután.” (Joao 17:26) Tanba Jesus fó-hatene Maromak nia naran, klaru katak nia temi Maromak nia naran dala barak. Porezemplu, Jesus hatete sai Maromak nia naran kuandu nia lee, ka esplika parte balu husi Eskritura Ebraiku neʼebé temi naran importante neʼe. Nuneʼe, Jesus uza Maromak nia naran beibeik, hanesan deʼit profeta hotu neʼebé mai uluk nia. Se karik ema judeu ruma iha toman ona atu la uza Maromak nia naran durante tempu neʼebé Jesus halaʼo ninia serbisu haklaken, Jesus la halo tuir sira-nia tradisaun. Jesus kritika ho makaʼas ulun-naʼin relijiaun hodi hatete: “Imi halakon Maromak nia futar-lia nia folin tan imi-nia lisan.”—Mateus 15:6.

Depois Jesus mate no moris hiʼas fali, ema sira neʼebé tuir Jesus ho laran-metin kontinua atu fó-hatene Maromak nia naran. (Haree kaixa “Ema kristaun primeiru uza Maromak nia naran ka lae?”) Iha loron Pentekostes iha tinan 33, loron neʼebé kongregasaun kristaun foin hahú, apóstolu Pedro koʼalia ba ema-lubun judeu no ema seluk husi rai oioin neʼebé tuir fali relijiaun judeu nian, no temi husi Joel nia profesia hodi hatete: “Ema hotu-hotu neʼebé bolu Naʼi nia naran sei hetan maksoin.” (Apostolu 2:21; Joel 2:32) Ema kristaun iha tempu uluk ajuda ema husi nasaun barak atu hatene didiʼak Maromak. Tan neʼe mak, iha reuniaun ida neʼebé apóstolu sira hamutuk ho katuas sira iha Jeruzalein, dixípulu Tiago hatete: “Maromak hanoin . . . atu halibur husi jentiu sira povu ida ba Nia naran.”—Apostolu 15:6, 14.

Maski nuneʼe, Maromak nia inimigu la rende an. Kuandu apóstolu hotu mate, Satanás komesa kedas atu habelar hanorin bosok neʼebé la tuir lia-loos. (Mateus 13:38, 39; 2 Pedro 2:1) Porezemplu, hakerek-naʼin kristaun naran Justin Martyr foin moris iha tempu neʼebé apóstolu João foin mate, João mak apóstolu ida neʼebé mate ikus. Maski nuneʼe, Justin hakerek beibeik katak Ida neʼebé fó buat hotu mak “Maromak ida neʼebé naran la iha”.

Kuandu ema kristaun neʼebé kontra lia-loos halo kópia husi Testamentu Foun, klaru katak sira hasai Maromak Jeová nia naran husi eskritura no troka fali ho liafuan gregu Kyrios, katak “Naʼi”. Ida-neʼe mós akontese ho Testamentu Tuan. Ulun-naʼin sira husi relijiaun judeu neʼebé kontra lia-loos la lee ona ba públiku Maromak nia naran, tan neʼe kuandu sira halo kópia husi eskritura, sira troka naran neʼe ho Adonai dala 130 liu. No mós, tradusaun Bíblia neʼebé Jerónimo tradús ba lia-latín no hotu iha tinan 405, no neʼebé ema hanaran Vulgata, mós la uza Maromak nia naran.

Ema koko nafatin atu halakon Maromak nia naran

Ohin loron, matenek-naʼin sira hatene katak Maromak Jeová nia naran mosu iha Bíblia dala 7.000 liu. Nuneʼe, tradusaun balu neʼebé ema barak uza iha Maromak nia naran, hanesan Bíblia katólika A Bíblia de Jerusalém iha lia-portugés, Bíblia katólika La Biblia Latinoamérica iha lia-españól, no mós Bíblia Reina-Valera iha lia-españól. Tradusaun balu hakerek Maromak nia naran nuʼudar “Yahweh”, ka “Javé”.

Triste tanba igreja barak neʼebé selu atu halo tradusaun Bíblia obriga matenek-naʼin neʼebé tradús atu la hatama Maromak nia naran. Porezemplu, iha karta ida ba Bispu katóliku sira, ho data 29 Juñu 2008, Vatikanu hatete: “Husi tinan balu liubá komesa mosu toman atu temi Izraél nia Maromak nia naran.” Iha karta neʼe hatoʼo lei neʼebé hatete: “Maromak nia naran . . . labele uza no temi.” Lei neʼe mós hatete: “Atu tradús eskritura husi Bíblia ba língua ohin loron nian, . . . tetragrama [katak letra haat husi lia-ebraiku neʼebé reprezenta Maromak nia naran] tenke tradús hodi uza liafuan Adonai/Kyrios, katak ‘Naʼi.’” Ida-neʼe hatudu ho klaru katak Vatikanu nia lei neʼe mak atu halakon Maromak nia naran.

Relijiaun Protestante sira mós la hatudu respeitu ba Maromak Jeová nia naran. Iha tinan 1978, Relijiaun Protestante selu atu halo tradusaun Bíblia naran New International Version iha lia-inglés, no ninia reprezentante ida hatete: “Jeová mak naran ida neʼebé uza deʼit ba Maromak no tuir loloos ami tenke uza naran neʼe. Maibé, tanba ami gasta osan dolar 2.250.000 atu halo tradusaun neʼe, se karik ami tau Maromak nia naran, ida-neʼe hanesan deʼit soe osan ba bee-dalan tanba ema sei la uza tradusaun neʼe.”

Igreja sira iha Amérika Latina mós hanetik ema atu hatene Maromak nia naran. Matenek-naʼin ida naran Steven Voth, neʼebé organizasaun United Bible Societies (UBS) uza atu ajuda halo tradusaun Bíblia, hatete: “Buat ida neʼebé relijiaun Protestante sira iha Amérika Latina haksesuk malu beibeik mak kona-ba uza ka la uza naran Jehová . . . Maibé, igreja Pentekostál foun ida neʼebé sai boot ba daudaun . . . husu [organizasaun UBS] atu halo tradusaun Bíblia Reina-Valera, edisaun husi tinan 1960, maibé la ho naran Jehová. Sira hakarak uza mak Señor [Naʼi].” Tuir Steven Voth, foufoun kuandu sira husu atu halo tradusaun foun hanesan neʼe, organizasaun UBS la simu buat neʼebé sira husu, maibé ikusmai sira halo duni edisaun Bíblia Reina-Valera foun “hodi la uza naran Jehová”.

Hasai Maromak nia naran husi Bíblia hodi troka fali ho “Naʼi”, ida-neʼe hanetik ema neʼebé lee Bíblia atu hatene didiʼak Maromak. Troka Maromak nia naran hanesan neʼe, halo ema bilán. Porezemplu, se ema neʼebé lee Bíblia hetan deʼit títulu “Naʼi”, karik sira la hatene se ida-neʼe kona-ba Maromak Jeová ka kona-ba ninia Oan, Jesus. Porezemplu, eskritura neʼebé apóstolu Pedro temi David nia liafuan hatete: “Jeová dehan ba haʼu-nia Naʼi [Jesus neʼebé moris hiʼas fali]: ‘Tuur tiha iha haʼu-nia liman-kuana,’” maibé Bíblia barak tradús: “Naʼi dehan ba haʼu Naʼi.” (Apostolu 2:34, NIV, Liafuan diak ba imi) No mós, hakerek-naʼin ida naran David Clines iha ninia livru Yahweh and the God of Christian Theology, hatete: “Tanba ema kristaun la hatene kona-ba Yahweh, rezultadu ida mak sira hatene deʼit kona-ba Kristu.” Tan neʼe, ema barak neʼebé bá igreja ladún hatene katak kuandu Jesus halo orasaun, nia hatoʼo orasaun ba Jeová, Maromak neʼebé loos, no katak Jesus iha relasaun besik ho Maromak Jeová.

Satanás hakaʼas an atu taka ema nia hanoin atu sira la hatene kona-ba Maromak. Maski nuneʼe, Ita bele hatene didiʼak Maromak Jeová.

Ita bele hatene didiʼak Maromak Jeová

Klaru katak Satanás koko makaʼas atu halakon Maromak nia naran, no nia ho matenek uza relijiaun falsu atubele halo ida-neʼe. Maski nuneʼe, ita bele fiar katak la iha kbiit ruma iha lalehan ka iha rai neʼebé bele hapara Naʼi Jeová, Ukun-Naʼin Boot Liu Hotu, hodi fó sai ninia naran ba ema neʼebé hakarak hatene lia-loos kona-ba nia no ninia hakarak ba ema neʼebé laran-metin ba nia.

Testemuña ba Jeová sei kontente atu ajuda Ita hatene oinsá Ita bele hakbesik ba Maromak liuhusi estuda Bíblia. Sira halo tuir Jesus nia ezemplu, neʼebé hatete ba Maromak: “Haʼu fó-hatene tiha ba sira Ita-nia naran.” (Joao 17:26) Nuʼudar Ita lee no hanoin didiʼak eskritura sira neʼebé hatudu knaar oioin neʼebé Maromak Jeová halaʼo atubele fó bensaun ba ema hotu, ita sei aprende mós kona-ba ninia hahalok furak sira.

Iha Bíblia nia tempu, Job neʼebé laran-metin, nia haksolok ho “relasaun neʼebé besik ho Maromak”, no Ita mós bele. (Jó 29:4) Hodi aprende Maromak nia Liafuan, Ita bele duni hatene didiʼak Maromak Jeová. Ida-neʼe sei ajuda Ita atu fiar katak Maromak Jeová sei halo tuir buat neʼebé nia hatete kona-ba ninia naran nia arti, neʼe mak: “Haʼu sei sai saida deʼit neʼebé haʼu hakarak.” (Êxodo 3:14) Nuneʼe, nia sei halo sai loos buat hotu neʼebé nia promete ona ba ema.