‘Mai ita fó prezente ba naʼi Jeová’
KUANDU ema ida hatudu laran-luak ba Ita, oinsá mak Ita bele hatudu fali katak Ita hafolin ninia hahalok neʼe? Haree toʼok oinsá mak tropa nia ulun sira iha nasaun Izraél hatudu sira-nia agradese depois sira manán tiha funu hasoru ema Midian. Funu neʼe halaʼo lakleur depois ema Izraél halo sala hodi adora Baal husi Peor. Maromak ajuda nia povu hodi manán funu neʼe, no buat neʼebé sira hadau husi ema Midian, sira fahe balu ba soldadu naʼin-12.000 neʼebé halo funu no balu ba ema Izraél seluk. Tuirmai, hodi halo tuir buat neʼebé Maromak Jeová hatete, soldadu sira fahe fali ba amlulik sira sasán balu neʼebé sira simu ona, no ema Izraél seluk mós fahe fali ba ema levita sira sasán balu neʼebé sira simu.—Núm 31:1-5, 25-30.
Maibé, tropa nia ulun sira hakarak halo buat seluk tan. Sira hatete ba Moisés: “Ita-nia atan sira sura tiha mane lubun neʼebé ami lori ba funu no ami haree katak la iha ema ida mak lakon husi ami leet.” Nuneʼe sira deside atu fó osan-mean no sasán furak sira seluk ba Maromak Jeová nuʼudar prezente. Osan-mean hotu sura hamutuk kilograma 190.—Núm 31:49-54.
Ohin loron, ema barak mós hatudu katak sira hafolin tebes buat neʼebé Maromak Jeová halo ona ba sira. Liután neʼe, ema neʼebé laʼós Maromak nia atan mós halo nuneʼe. Porezemplu, hanoin toʼok kona-ba xofér bís nian ida neʼebé lori Testemuña sira neʼebé mai husi rai seluk atu tuir reuniaun boot internasionál nian neʼebé halaʼo iha Bologna, rai-Itália, iha tinan 2009. Tanba nia mak xofér neʼebé diʼak, ema sira neʼebé saʼe bís neʼe hakerek karta ida ba nia atu hatudu sira-nia agradese no sira mós fó osan uitoan hamutuk ho livru Tuir Loloos, Saida mak Bíblia Hanorin? Xofér neʼe hatete: “Haʼu kontente tebes atu simu karta neʼe no livru, maibé haʼu fó fali osan, tanba haʼu hakarak fó osan neʼe nuʼudar kontribuisaun hodi nuneʼe imi bele kontinua halaʼo imi-nia serbisu neʼebé imi halo daudauk. Maski haʼu laʼós Testemuña ba Jeová ida, maibé haʼu hakarak fó kontribuisaun tanba haʼu haree katak buat sira neʼebé imi halo mak tanba imi-nia domin ba ema.”
Dalan ida atu hatudu katak Ita hafolin buat neʼebé Maromak Jeová halo mak hodi fó kontribuisaun atu apoia Testemuña ba Jeová nia serbisu haklaken neʼebé halaʼo iha mundu tomak. (Mt 24:14) Iha kaixa tuirmai sei hatudu dalan sira kona-ba oinsá ema balu fó kontribuisaun.