Hatudu ita-nia an prontu!
“Matan-moris bá, basá imi la hatene iha sá oras Oan-Mane sei mai.”—MT 24:44.
1, 2. (a) Saida mak Bíblia fó-hatene nanis neʼebé bele kompara ho tigre neʼebé ataka? (b) Hatene buat neʼebé sei akontese book ita atu halo saida?
BA TINAN barak mane ida hetan naran-boot tanba nia matenek atu treinu tigre no hatudu tigre sira-neʼe ba ema barak. Nia iha relasaun diʼak ho tigre sira-neʼe. Mane neʼe dehan: “Kuandu animál ida tau fiar ba ita, ita sente katak ita hetan prezente neʼebé furak liu.” Maibé, iha loron 3 Outubru 2003, sira-nia relasaun diʼak neʼe ramata. Derrepente deʼit ninia tigre mutin ida, neʼebé todan kilograma 172, ataka nia. Tanba tigre neʼe ataka derrepente deʼit, mane neʼe la prontu.
2 Ita bele kompara situasaun neʼe ho buat neʼebé Bíblia fó-hatene nanis kona-ba “balada” fuik nia ataka, no tan neʼe ita presiza duni atu sai prontu. (Lee Apokalipse 17:15-18.) Balada neʼe sei ataka saida? Balada fuik neʼebé mean reprezenta Nasoins Unidas, no balada nia “dikur sanulu” reprezenta governu sira hotu, no buat sira-neʼe sei fila hodi ataka no halakon Babilónia Boot neʼebé reprezenta relijiaun falsu hotu. Ema sei hakfodak tanba derrepente deʼit Satanás nia mundu neʼe fahe nia an rasik. Entaun, bainhira mak balada neʼe sei ataka? Tuir loloos, ita la hatene loron no oras neʼebé ida-neʼe sei akontese. (Mt 24:36) Maski nuneʼe, ita hatene katak tempu badak liu ona no sei akontese derrepente deʼit. (Mt 24:44; 1 Kor 7:29) Tan neʼe, importante duni atu halo ita-nia an prontu, hodi nuneʼe kuandu balada neʼe ataka no Kristu mai atu fó kastigu ba ema aat, nia sei salva ita! (Lc 21:28) Atu sai prontu, ita bele aprende husi Maromak nia atan sira neʼebé laran-metin. Sira hatudu sira-nia an prontu nafatin, no tan neʼe sira haree ho matan rasik oinsá Maromak kumpre ninia promesa sira. Ita hakarak duni atu halo tuir sira-nia ezemplu, loos ka lae?
Hatudu an prontu hanesan Noé
3. Situasaun saida mak halo susar ba Noé atu serbí Maromak ho laran-metin?
3 Maski Noé hela iha mundu neʼebé aat tebes, maibé nia hatudu nia an prontu atu haree Maromak kumpre ninia promesa. Hanoin toʼok kona-ba susar neʼebé Noé hasoru! Nia hela iha tempu neʼebé anju sira troka sira-nia isin sai ema no hola feto bonita sira nuʼudar feen. Tuir loloos, relasaun hanesan neʼe la tuir Maromak nia hakarak. Entaun, rezultadu mak sira iha oan neʼebé iha isin-boot hanesan jigante no oan sira-neʼe uza sira-nia forsa boot atu halo taʼuk ema. (Gên 6:4) Jigante sira-neʼe halo aat no hamosu violénsia iha fatin hotu neʼebé sira bá. Nuneʼe, buat aat mak domina mundu, no ema nia hanoin no hahalok sai aat tebes. Tan neʼe, Naʼi Jeová, Ukun-Naʼin Boot Liu Hotu, halo desizaun hodi hili tempu atu halakon mundu aat iha tempu neʼebá.—Lee Gênesis 6:3,a 12.b
4, 5. Iha dalan saida deʼit mak situasaun iha ita-nia tempu hanesan ho Noé nia tempu?
4 Jesus fó-hatene nanis katak situasaun iha ita-nia tempu sei sai hanesan ho situasaun iha Noé nia tempu. (Mt 24:37) Porezemplu, ita mós haree oinsá mak anju aat sira book ema. (Apok 12:7-9, 12) Iha Noé nia tempu, anju aat sira-neʼe troka sira-nia isin hodi sai ema, maibé ohin loron sira la bele halo ida-neʼe. Maski nuneʼe, anju aat sira-neʼe hakaʼas an atu kontrola ema hotu. Sira book ema atu halo buat aat oioin, maibé ema barak la hatene kona-ba neʼe. Sira kontente duni atu haree ema halo hahalok seksuál neʼebé foʼer.—Ef 6:11, 12.
5 Maromak nia Liafuan koʼalia kona-ba Diabu nuʼudar ida neʼebé “oho ema”, no koʼalia mós katak Diabu “iha kbiit atu oho”. (Joao 8:44; Ebr 2:14) Maski nuneʼe, nia la iha kbiit atu hasai rasik ema nia moris. Maibé, Diabu bele lohi ema atu halo hahalok aat. Nia kuda iha ema nia laran hakarak atu oho ema seluk. Porezemplu, husi labarik naʼin-142 neʼebé moris iha rai-Estadus Unidus, iha naʼin-ida mak sei mate tanba ema oho. Entaun, tanba mundu sai nakonu ho violénsia, ita bele fiar duni katak Maromak Jeová haree ona no nia sei halakon buat sira-neʼe hanesan nia halo iha Noé nia tempu.
6, 7. Oinsá mak Noé no ninia família hatudu katak sira fiar no iha taʼuk ba Maromak?
6 Iha tempu neʼebé loos, Maromak fó-hatene Noé kona-ba ninia desizaun atu halo rai-nabeen ba mundu hodi halakon buat moris hotu. (Gên 6:13, 17) Maromak Jeová haruka Noé atu harii arka ka ró ida neʼebé hanesan kaixote boot. Noé no ninia família komesa halo serbisu atu harii arka neʼe. Saida mak ajuda sira atu halo tuir Maromak no hatudu sira-nia an prontu kuandu Maromak nia loron tesi-lia nian mai?
7 Noé no ninia família iha fiar neʼebé metin no iha taʼuk ba Maromak, no neʼe book sira atu halo tuir buat neʼebé Maromak haruka sira atu halo. (Gên 6:22; Ebr 11:7) Nuʼudar família nia ulun, Noé nafatin hatudu nia an prontu ka matan-moris hodi hakbesik an nafatin ba Maromak no la envolve an iha hahalok aat sira neʼebé ema halo iha tempu neʼebá. (Gên 6:9) Nia hatene katak ninia família presiza proteje sira-nia an hodi la halo tuir hahalok aat neʼebé ema seluk halo. Sira labele hanoin demais kona-ba halaʼo moris loroloron nian. Tuir loloos, Maromak fó sira serbisu ida neʼebé importante liu, no tan neʼe família hotu presiza uza sira-nia kbiit tomak atu halo serbisu neʼe.—Lee Gênesis 6:14, 18.c
Noé no nia família hatudu an prontu
8. Saida mak hatudu katak Noé nia família mós hatudu laran-metin ba Maromak?
8 Maski Bíblia konta buat barak liu kona-ba Noé tanba nia mak família nia ulun, maibé klaru katak ninia feen no ninia oan-mane sira no sira-nia feen mós adora Maromak Jeová. Porezemplu, profeta Ezequiel hatete katak se Noé moris iha Ezequiel nia tempu karik, ninia oan sira mós sei la hetan salvasaun tan deʼit buat loos neʼebé ninia aman halo. Tuir loloos, Noé nia oan sira mós tinan toʼo ona atu halo desizaun rasik atu halo tuir ka la halo tuir Maromak. Tan neʼe, sira rasik presiza hatudu katak sira hadomi Maromak no Maromak nia dalan sira. (Eze 14:19, 20) Noé nia família halo tuir buat neʼebé nia hatete, hatudu fiar hanesan ninian, no sira mós la husik ema seluk nia hahalok atu hanetik sira atu halo serbisu neʼebé Maromak fó ba sira.
9. Ohin loron, oinsá mak ema barak hatudu fiar hanesan Noé nian?
9 Ohin loron, ita mós sente kontente duni atu haree ita-nia irmaun sira iha mundu tomak hakaʼas an atu tau matan ba sira-nia família hodi banati-tuir Noé nia ezemplu. Sira komprende katak la toʼo atu fó deʼit ai-han, roupa, hela-fatin no edukasaun ba sira-nia família. Sira mós tenke ajuda ema ida-idak iha família laran atu kontinua iha relasaun diʼak ho Maromak. Hodi halo nuneʼe, sira hatudu katak sira prontu ona ba buat neʼebé lakleur tan Maromak Jeová sei halo.
10, 11. (a) Kuandu Noé no nia família iha arka laran, karik sira sente oinsá? (b) Ita bele husu ita-nia an pergunta saida?
10 Noé, hamutuk ho ninia feen, ninia oan sira, no sira-nia feen karik halo serbisu maizumenus ba tinan 50 atu harii arka neʼe. Nuʼudar sira halo daudauk serbisu neʼe, klaru katak sira tama-sai arka neʼe nia laran ba dala barak. Sira presiza taka arka neʼe nia laran no liʼur ho alkatraun hodi bee la bele tama, sira lori tama ai-han iha laran, no sira mós lori tama animál sira. Hanoin toʼok oinsá sira sente kuandu ikusmai loron neʼebé sira hein mosu mai! Iha loron 17 husi fulan segundu iha tinan 2370 molok Kristu, Noé no ninia família tama iha arka laran. Maromak Jeová rasik taka arka nia odamatan, no udan komesa tau. Neʼe laʼós udan boot baibain neʼebé mosu iha ita-nia tempu. Bee sira hotu iha lalehan monu tun mai rai, no bee kona arka neʼe. (Gên 7:11, 16) Ema neʼebé iha arka neʼe nia liʼur mate, maibé ema neʼebé iha arka nia laran hetan salvasaun. Oinsá mak Noé nia família sente? Sin, sira sente agradese duni ba Maromak. Maibé, ita mós bele fiar katak karik sira hanoin: ‘Diʼak tebes katak ita laʼo ho Maromak loos no hatudu ita-nia an prontu!’ (Gên 6:9) Agora, hanoin toʼok kona-ba oinsá ita sei sente bainhira ita hetan salvasaun hodi liu funu Armagedon. Ita sei sente agradese duni, loos ka lae?
11 La iha buat ida neʼebé bele hapara Maromak neʼebé forsa boot liu hotu atu kumpre ninia promete atu halakon Satanás nia mundu aat neʼe. Entaun, husu ba ita-nia an: ‘Haʼu fiar ho laran tomak katak buat hotu neʼebé Maromak promete sei sai loos, no katak ida-neʼe sei akontese tuir tempu neʼebé Maromak hili tiha ona ka lae?’ Se ita fiar duni, importante atu hatudu ita-nia an prontu no hanoin nafatin kona-ba “Maromak nia loron” neʼebé besik ona atu mai.—2 Ped 3:12.
Moisés matan-moris nafatin
12. Saida deʼit mak bele hanetik Moisés atu la hanoin uluk kona-ba Maromak?
12 Mai ita hanoin kona-ba ezemplu ida tan. Moris diʼak neʼebé Moisés hetan iha rai-Egiptu mak buat neʼebé ema barak mehi atu hetan. Tanba Liurai Faraun nia oan-feto mak hakiak Moisés, klaru katak ema respeitu duni nia, no nia mós hetan hahán, roupa, no hela-fatin neʼebé diʼak liu. Liután neʼe, nia hetan edukasaun boot. (Lee Apostolu 7:20-22.) Loron ida karik nia mós bele simu rikusoin barak liu nuʼudar liman-rohan.
13. Saida mak ajuda Moisés atu hatudu nia an prontu atu halo Maromak nia hakarak?
13 Ita bele fiar katak hanorin neʼebé Moisés nia inan-aman fó ba nia kuandu nia sei kiʼik, ajuda nia atu haree katak ema Egiptu nia adorasaun ba maromak falsu la iha folin. (Êx 32:8) Edukasaun neʼebé Moisés simu, no mós rikusoin neʼebé nia iha, la halo nia atu husik adorasaun loos. Klaru katak nia hanoin kleʼan kona-ba buat neʼebé Maromak promete nanis ba ninia beiʼala sira, no nia hakarak duni atu hatudu nia an prontu atu halo Maromak nia hakarak. Tan neʼe mak Moisés hatete ba Israel nia oan sira: “Jeová, . . . Abraão nia Maromak, Isaac nia Maromak no Jacob nia Maromak, mak haruka haʼu ba imi.”—Êx 3:15; lee Êxodo 3:17.d
14. Saida mak koko Moisés nia fiar no aten-brani?
14 La hanesan estátua sira iha rai-Egiptu neʼebé reprezenta maromak sira neʼebé la moris, Moisés hatene ho klaru katak Jeová mak Maromak neʼebé loos no moris. Moisés halaʼo ninia moris hanesan nia “haree Ida neʼebé matan la haree”. Nia fiar katak Maromak sei halo ninia povu sai livre, maibé nia la hatene bainhira mak ida-neʼe sei akontese. (Ebr 11:24, 25, 27) Kuandu nia haree ema Egiptu ida baku atan Israel ida, nia defende atan neʼe, no ida-neʼe hatudu katak nia iha hakarak atu haree ema Israel sai livre. (Êx 2:11, 12) Maibé, tanba ida-neʼe seidauk tempu ba Maromak Jeová atu salva ema Israel, Moisés tenke halai no moris nuʼudar refujiadu iha rai dook. Karik susar duni ba nia atu moris iha rai-fuik duké moris diʼak iha liurai Egiptu nia uma neʼebé furak. Maski nuneʼe, Moisés hatudu nia an prontu hodi halo tuir matadalan hotu neʼebé Maromak Jeová fó ba nia. Nuneʼe, depois Moisés hela tiha ba tinan 40 iha rai-Midian, Maromak uza nia atu salva povu Israel. Tempu toʼo ona ba Maromak atu fó serbisu importante ida ba Moisés atu halo, no atu halo serbisu neʼe iha dalan neʼebé Maromak hakarak. Moisés halo tuir Maromak hodi fila ba rai-Egiptu. (Êx 3:2, 7, 8, 10) Moisés mak “ema neʼebé laran-maus liu ema hotu”, no kuandu nia fila fali ba rai-Egiptu nia presiza fiar no aten-brani atu bele hasoru Liurai Faraun. (Núm 12:3) Nia halo ida-neʼe, laʼós dala ida deʼit, maibé dala barak. Moisés presiza hasoru beibeik Liurai Faraun nuʼudar Maromak fó malisan ida-idak ba nasaun Egiptu. Tuir loloos, Moisés la hatene dala hira tan mak nia tenke hamriik fali iha Liurai Faraun nia oin.
15. Maski Moisés hasoru susar, saida mak book nia atu nafatin hahiʼi Maromak?
15 Moisés hasoru susar barak nuʼudar nia dirije nasaun Israel durante tinan 40 tuirmai, neʼebé hahú husi tinan 1513 toʼo tinan 1473 molok Kristu. Maski nuneʼe, nia sempre buka oportunidade atu hahiʼi Maromak Jeová, no ho laran tomak nia mós fó laran-manas ba ninia maluk ema Israel atu halo buat neʼebé hanesan. (Deut 31:1-8) Tanbasá? Tanba nia hanoin liu Maromak Jeová nia naran no ninia direitu atu ukun duké hanoin deʼit kona-ba nia an rasik. (Êx 32:10-13; Núm 14:11-16) Hanesan neʼe mós kuandu ita hasoru susar, ita tenke apoia nafatin Maromak nia ukun hodi fiar katak ninia dalan sira mak loos liu, matenek liu no diʼak liu fali dalan seluk. (Isa 55:8-11; Jer 10:23) Ita sente duni hanesan neʼe ka lae?
Matan-moris bá!
16, 17. Tanbasá mak Marcos 13:35-37 book duni ita-nia hanoin?
16 Jesus hatete: “Loke matan bá! Matan-moris bá, . . . basá imi la hatene wainhira tempu neʼe sei toʼo mai.” (Mc 13:33) Jesus fó avizu neʼe kuandu nia koʼalia kona-ba sinál neʼebé sei hatudu katak mundu aat neʼe besik ona atu ramata. Hanoin toʼok kona-ba Jesus nia liafuan ikus husi profesia neʼe, neʼebé Marcos hakerek: “Matan-moris neon-naʼin bá, basá imi la hatene wainhira uma-naʼin sei mai: iha loraik, iha kalan fahe-rua, iha rai-hun mutin ka iha dadeer; atu wainhira nia tekiteki mai, nia la hetan imi dukur hela. Buat neʼebé haʼu dehan ba imi, haʼu dehan ba ema hotu: matan-moris bá!”—Mc 13:35-37.
17 Jesus nia avizu neʼe book ita-nia hanoin, loos ka lae? Jesus temi kona-ba parte haat neʼebé ema seguransa troka malu kuandu hein iha kalan. Parte ikus neʼebé hahú husi tuku tolu dadeer toʼo loro-matan saʼe mak tempu neʼebé susar liu ba ema atu matan-moris. Ema neʼebé matenek kona-ba halo planu funu nian hanoin katak tempu neʼe mak diʼak liu atu ataka inimigu, tanba iha tempu neʼe mak bele hetan sira “dukur hela”. Nuneʼe mós, ohin loron karik susar liu ba ita atu matan-moris nafatin. Mundu neʼebé ita hela bá toba-dukur hela hodi la simu mensajen kona-ba Maromak nia Ukun. Tan neʼe, ita presiza duni atu “matan-moris bá” no “loke matan bá” hodi hein mundu nia rohan no ita-nia salvasaun!
18. Nuʼudar Testemuña ba Jeová, ita iha oportunidade espesiál atu halo saida?
18 Mane neʼebé temi uluk iha lisaun neʼe la mate kuandu tigre ataka nia. Maibé, Bíblia fó-hatene ho klaru katak relijiaun falsu no buat seluk tan iha mundu aat neʼe sei lakon hotu kuandu Maromak nia loron boot toʼo mai. (Apok 18:4-8) Hanesan ho Noé no ninia família, Maromak nia atan hotu presiza hatene katak importante tebes atu hatudu sira-nia an prontu ba Maromak Jeová nia loron. Ita hela iha mundu neʼebé ema la hafolin Maromak, iha mestre relijiaun falsu sira, no mós ema neʼebé la fiar katak Maromak iha, no sira hotu hatudu katak sira la respeitu ita-nia Kriadór liuhusi sira-nia koʼalia. Ita lakohi sira-nia hanoin atu kona ita. Mai ita hanoin kleʼan kona-ba ezemplu diʼak sira neʼebé ita estuda ona, no nafatin sai prontu atu bele defende no hahiʼi Jeová neʼebé mak “Maromak ba maromak sira hotu”. Sin, Jeová mak “Maromak neʼebé boot, kbiit-naʼin no halo ema taʼuk”.—Deut 10:17.
[Nota–rodapé]
a Kona-ba “tinan atus ida ruanulu” neʼebé temi iha Gênesis 6:3, haree Livru Haklaken 15 Dezembru 2010, pájina 30.
b Gênesis 6:3: “Tuirmai Jeová hatete: ‘Haʼu-nia pasiénsia ba ema sei la hela ba nafatin tanba nia mak isin deʼit. Tan neʼe, ninia loron sira sei toʼo tinan atus ida ruanulu.’ 12 Entaun Maromak hateke ba rai no, haree! rai sai aat ona, tanba buat moris hotu iha rai halo aat ona sira-nia dalan.”
c Gênesis 6:14: “Halo ba ó-nia an rasik arka ida hodi uza ai-gofer. Ó sei halo kuartu sira iha arka, no ó tenke taka arka neʼe nia laran no liʼur ho alkatraun. 18 No haʼu halo haʼu-nia aliansa ho ó; no ó tenke tama ba arka, ó no ó-nia oan-mane sira no ó-nia feen no ó-nia oan-mane sira-nia feen sira hamutuk ho ó.”
d Êxodo 3:17: “No tan neʼe haʼu hatete: Haʼu sei lori imi sai husi susar neʼebé imi hetan husi ema Egiptu no lori imi atu tama iha rai ema Kanaan nian, no ema Hete, no ema Amon, no ema ferizeu, no ema heveu, no mós ema Jebus nian, ba rai ida neʼebé nakonu ho susubeen no bani-been.”
Ita hanoin-hetan?
• Tanbasá mak Noé presiza ajuda ninia família atu tau uluk Maromak nia serbisu?
• Oinsá mak ita-nia tempu hanesan ho Noé nian?
• Maski Moisés hasoru susar, tanbasá mak nia hanoin nafatin kona-ba buat neʼebé Maromak Jeová promete?
• Eskritura saida deʼit mak book Ita atu matan-moris nafatin?
[Dezeñu iha pájina 25]
Noé no ninia família prontu atu halo Maromak Jeová nia serbisu
[Dezeñu iha pájina 26]
Maromak nia promete sira ajuda Moisés atu nafatin matan-moris