Maromak uza organizasaun ida ka lae?

BUAT hotu neʼebé Maromak kria, nia organiza ho didiʼak. Porezemplu, hanoin toʼok kona-ba siklu naturál hanesan siklu bee, karbonu, oksijéniu, no nitrojéniu. Siklu sira-neʼe halo mundu nia bee no anin moos nafatin.a Maromak organiza siklu sira-neʼe iha dalan neʼebé furak tebes, loos ka lae?—1 Korinto 14:33.

Maromak organiza ho didiʼak buat hotu iha mundu no iha lalehan, inklui mós kriatura espíritu sira. Maromak organiza anju sira atu halaʼo ninia hakarak. Iha Bíblia, profeta Daniel haree vizaun ida kona-ba neʼe. Nia haree anju-lubun boot halibur iha Maromak nia oin, nia hatete: “Iha rihun ida dala rihun ida neʼebé serbí nia, no rihun sanulu dala rihun sanulu neʼebé hamriik iha nia futar oin.” (Daniel 7:9, 10) Hanoin toʼok, Maromak organiza anju neʼebé maizumenus hamutuk juta atus ida liu, atu sira bele halo tuir Maromak nia hakarak no ajuda ninia atan sira iha rai!—Salmo (Mazmur) 91:11.

Maski ita-nia Kriadór, Maromak Jeová, mak Ida neʼebé organiza buat hotu-hotu, nia la hanoin deʼit kona-ba halo ukun-fuan ka lei atu hatodan ita. Maibé tuir Bíblia, ita-nia Kriadór mak Maromak haksolok nian neʼebé hanoin kona-ba ninia kriatura hotu. (1 Pedro 5:7) Ita bele haree ho klaru kona-ba neʼe liuhusi dalan neʼebé Maromak organiza ema Israel antigu no ema kristaun iha tempu uluk.

Maromak organiza nasaun Israel antigu

Maromak Jeová uza Moisés atu arranja ema Israel atu sira bele sai prontu hodi halaʼo adorasaun loos. Hanoin toʼok kona-ba oinsá mak ema Israel arranja sira-nia hela-fatin kuandu sira laʼo rai iha rai-fuik maran Sinai. Se karik, família ida-idak mak bele hili rasik fatin neʼebé sira hakarak harii sira-nia tenda, buat hotu sei sai runguranga loos. Maromak Jeová fó matadalan neʼebé klaru kona-ba iha neʼebé mak suku ida-idak bele harii sira-nia hela-fatin. (Números [Bilangan] 2:1-34) Moisés nia Ukun-Fuan mós esplika kona-ba saúde no oinsá atu moris iha dalan neʼebé moos, porezemplu, ukun-fuan kona-ba hakoi foʼer kuandu bá sentina.—Deuteronômio (Ulangan) 23:12, 13.

Kuandu ema Israel tama tiha ona iha rai neʼebé Maromak promete, nia organiza buat oioin ba sira nuʼudar nasaun ida. Maromak fahe nasaun neʼe ba suku 12, no mós suku ida-idak simu rai atu hela. Ukun-Fuan sira-neʼebé Maromak Jeová fó ba nasaun Israel liuhusi Moisés esplika buat hotu kona-ba sira-nia moris, hanesan adorasaun, kaben, família, edukasaun, fila-liman, ai-han, halo toʼos no hakiak animál. Maski iha ukun-fuan balu neʼebé inklui buat ida-idak neʼebé sira tenke halo, maibé ukun-fuan sira-neʼe hatudu Maromak Jeová nia domin ba ninia povu no ajuda sira atu moris kontente. Hodi halo tuir buat neʼebé Maromak Jeová organiza, ema Israel simu ninia bensaun.—Salmo 147:19, 20.

Maski Moisés mak ulun-naʼin neʼebé matenek, atu hetan susesu la depende ba ninia matenek rasik, maibé depende ba nia laran-metin ba buat neʼebé Maromak organiza. Porezemplu, oinsá mak Moisés hili dalan atu ema Israel bele laʼo iha rai-fuik maran? Maromak Jeová mak hatudu dalan hodi uza koluna (riin) kalohan nian iha loron no koluna ahi nian iha kalan. (Êxodo [Keluaran] 13:21, 22) Maski Maromak uza ema atu dirije, maibé nia rasik mak organiza no fó matadalan ba nia povu. Ida-neʼe mós hanesan iha apóstolu sira-nia tempu.

Maromak organiza ema kristaun iha tempu uluk

Liuhusi apóstolu no dixípulu sira-nia haklaken ho laran-manas, sira konsege harii kongregasaun iha fatin barak iha rai-Ásia no Europa. Maski kongregasaun sira-neʼe namkari iha fatin oioin, maibé kona-ba arranju kongregasaun nian, sira la tuir deʼit sira ida-idak nia hakarak. Duké halo ida-neʼe, sira halo tuir matadalan neʼebé sira simu husi apóstolu sira. Porezemplu, apóstolu Paulo fó knaar ba Tito atu bá kongregasaun Kreta hodi “bele halo loos buat hotu neʼebé sei kuran iha neʼebá”. (Tito 1:5) Paulo hakerek ba kongregasaun iha Korinto katak iha irmaun balu neʼebé “matenek atu organiza” ka sai “organizadór sira”. (1 Korinto 12:28, The New Testament in Modern Speech; The Bible in Contemporary Language) Maibé, sira organiza hodi halo tuir sé-nia matadalan? Paulo hatete katak “Maromak halo” ka “organiza” kongregasaun sira.—1 Korinto 12:24; The Riverside New Testament.

Sira neʼebé simu knaar atu tau matan ba kongregasaun kristaun laʼós hanesan ukun-naʼin ba sira-nia maluk fiar-naʼin. Maibé, sira mak “maluk nuʼudar Maromak nia serbisu-naʼin” neʼebé halo tuir matadalan husi Maromak nia espíritu santu, no sira mós tenke ‘sai ezemplu ba sira-nia luhan’. (1 Korinto 3:9; 1 Pedro 5:2, 3) Entaun, sé mak kongregasaun nia ulun? “Kreda nia ulun” laʼós ema baibain neʼebé sala-naʼin, maibé Jesus Kristu neʼebé moris hiʼas tiha ona.—Efeso 1:22.

Kuandu kongregasaun iha Korinto komesa halo buat neʼebé la hanesan fali ho kongregasaun sira seluk, Paulo hakerek: “Saida? Maromak futar-lia mai husi imi? Ka lia neʼe mosu ba deʼit imi mesamesak?” (1 Korinto 14:36) Paulo husu pergunta sira-neʼe atu hadiʼa sira-nia hanoin neʼebé sala, no ajuda sira atu komprende katak sira la bele halo buat ruma hodi tuir sira-nia hakarak. Kongregasaun sira sai buras no aumenta ba beibeik kuandu sira halo tuir matadalan neʼebé Maromak fó liuhusi apóstolu sira.—Apostolu 16:4, 5.

Maromak hatudu nia domin

Oinsá ho ohin loron? Ema balu hakarak adora iha uma deʼit no lakohi tuir relijiaun ida. Maibé, Bíblia hatudu katak Maromak sempre uza organizasaun ida atu halaʼo ninia hakarak. Nia organiza ninia atan sira iha Israel antigu, no nia mós organiza ema kristaun iha tempu uluk atu adora nia.

Se nuneʼe, klaru katak ohin loron Maromak Jeová sei organiza nafatin ninia povu hanesan nia halo iha tempu uluk, loos ka lae? Sin, hodi organiza ninia povu atu serbisu hamutuk hatudu katak nia hadomi no hanoin sira. Ohin loron, Maromak Jeová uza nafatin ninia organizasaun hodi kumpre ninia hakarak ba ema. Oinsá mak ita bele hatene ninia organizasaun? Hanoin toʼok kona-ba informasaun tuirmai neʼe.

▪ Organizasaun neʼebé halo knaar espesiál ida. (Mateus 24:14; 1 Timoteo 2:3, 4) Jesus haruka ninia dixípulu sira atu haklaken lia-foun diʼak kona-ba Maromak nia Reinu, ka Ukun ba nasaun sira hotu. Atu kumpre knaar ida-neʼe, presiza duni organizasaun ida neʼebé bele arranja serbisu neʼe iha mundu tomak. Porezemplu, la susar atu fó ai-han ba ema ida deʼit, maibé atu fó ai-han ba ema rihun ba rihun, ita presiza organizasaun ida ho ema neʼebé bele serbisu hamutuk ho unidade. Atu kumpre sira-nia knaar, ema kristaun neʼebé loos “serbí [Maromak] hamutuk ida deʼit”. (Sofonias [Zefanya] 3:9) Se la iha organizasaun atubele arranja buat hotu, ema husi nasaun, língua, no kultura oioin bele serbisu hamutuk ho unidade ka lae? Klaru katak Maromak uza duni organizasaun ida.

▪ Organizasaun neʼebé apoia no fó laran-manas ba fiar-naʼin sira. Se ema ida saʼe foho mesak deʼit, nia rasik bele deside atu laʼo tuir dalan neʼebé nia hakarak. Maibé se nia monu no hetan kanek, ida-neʼe perigu ba nia tanba la iha ema neʼebé bele ajuda nia. Nuneʼe, ladún matenek atu ema laʼo mesamesak. (Provérbios [Amsal] 18:1) Hanesan mós ho Maromak nia organizasaun. Atu fiar-naʼin kristaun sira bele halo tuir Jesus nia mandamentu, sira tenke ajuda no apoia malu. (Mateus 28:19, 20) Liuhusi kongregasaun kristaun, sira bele hetan hanorin husi Bíblia, treinu, no laran-manas neʼebé ajuda sira halaʼo nafatin sira-nia knaar no la rende an. Se reuniaun kristaun la iha karik, ita bá neʼebé loos atu adora Maromak Jeová, no ita simu hanorin kona-ba Maromak husi neʼebé loos?—Ebreu 10:24, 25.

▪ Organizasaun neʼebé ajuda fiar-naʼin atu serbí Maromak ho unidade. Jesus nia bibi sira-neʼebé ‘rona ba nia lia’, sai “bibi luhan ida deʼit”, hodi halo tuir nia nuʼudar sira-nia ulun. (Joao 10:16) Sira la namkari hodi forma igreja ka grupu sira-neʼebé ketaketak; sira mós la haketak malu tanba fiar la hanesan. Maibé, sira hotu iha “neon ida deʼit”. (1 Korinto 1:10) Atu haburas unidade, buat hotu tenke arranja ho didiʼak, neʼe katak ita presiza organizasaun ida. Organizasaun ida neʼebé iha unidade mak bele hetan Maromak nia bensaun.—Salmo 133:1, 3.

Domin ba Maromak no ba lia-loos husi Bíblia dada ema rihun ba rihun atu tuir organizasaun neʼebé halo tuir buat neʼebé Bíblia hanorin, inklui buat neʼebé temi iha leten. Testemuña ba Jeová mak organizasaun neʼebé iha unidade, no sira hakaʼas an atu halo tuir Maromak nia hakarak. Tan neʼe, sira bele tau fiar ba Maromak nia promete: “Haʼu sei horik hamutuk ho sira no book an iha sira leet, no Haʼu sei sai sira-nia Maromak, no sira sei sai Haʼu-nia povu.” (2 Korinto 6:16) Ita mós bele hetan bensaun furak neʼe hodi adora Maromak Jeová hamutuk ho ninia organizasaun.

[Nota–rodapé]

[Dezeñu iha pájina 29]

Maromak organiza didiʼak ema Israel nia hela-fatin

[Dezeñu iha pájina 31]

Presiza organizasaun ida atubele halaʼo serbisu haklaken iha mundu tomak

Haklaken uma ba uma

Fó ajuda kuandu dezastre mosu

Reuniaun boot sira

Harii reuniaun-fatin ba adorasaun