Ukun-naʼin mundu neʼe nian la bele subar tan

IHA loron ida Jesus dehan ba ema balu: “Liurai mundu neʼe nian sei duni sai.” Nia hatutan tan katak “ukun-naʼin mundu neʼe nian la iha kbiit atu ukun” nia, no mós katak ukun-naʼin mundu neʼe nian hetan “tesi lia ona”. (Joao 12:31; 14:30; 16:11) Entaun, Jesus koʼalia kona-ba sé?

Klaru katak kuandu Jesus temi kona-ba “ukun-naʼin mundu neʼe nian”, nia la koʼalia kona-ba ninia Aman, Maromak Jeová. Entaun, sé mak “ukun-naʼin mundu neʼe nian”? Oinsá mak Maromak sei “tesi lia” no “duni sai” nia?

“Ukun-naʼin mundu neʼe nian” hatudu sé mak nia

Hanesan kriminozu neʼebé matenek foti an kona-ba ninia kbiit, Satanás mós foti an kona-ba ninia kbiit. Nia halo ida-neʼe kuandu nia tenta Jesus, Maromak nia Oan, hodi hatudu ba nia “reinu hotu-hotu raiklaran nian”. Depois Satanás hatete: “Haʼu sei fó ba ó kbiit no sira-neʼe nia glória tomak neʼebé saran hotu tiha ona mai haʼu atu fó ba ida neʼebé haʼu hakarak. Neʼe duni, ó adora haʼu karik, buat sira-neʼe hotu ó-nian.”—Lucas 4:5-7.

Se Diabu mak buat aat iha ema nia laran, oinsá mak ita bele esplika tentasaun neʼebé Jesus hasoru? Saida mak tenta Jesus? Iha buat ruma neʼebé aat iha nia laran neʼebé tenta nia ka lae? Ka, Jesus sente laran la metin depois nia hetan batizmu ka lae? Se nuneʼe, oinsá mak Bíblia bele dehan katak “la iha sala iha nia”? (1 Joao 3:5) Jesus hatene katak Satanás iha kbiit atu ukun mundu, tan neʼe nia dehan katak Diabu mak “ukun-naʼin mundu neʼe nian” no mós Diabu mak ida neʼebé “oho ema” no nia mak “bosok-teen”.—Joao 14:30; 8:44.

Maizumenus tinan 60 depois Diabu tenta Jesus, apóstolu João mós fó-hanoin ba ema kristaun sira katak Diabu iha kbiit boot hodi dehan katak “mundu tomak sei iha aat-naʼin nia ukun”. Liután neʼe, João hatete katak Diabu “bosok raiklaran tomak”. (1 Joao 5:19; Apokalipse 12:9) Nuneʼe, Bíblia hatudu ho klaru katak Diabu mak “ukun-naʼin mundu neʼe nian”. Maibé iha dalan saida deʼit mak nia ukun mundu?

Ukun-naʼin mundu neʼe nian fó kbiit ba nia liman-ain sira

Kuandu apóstolu Paulo hakerek karta ba ema kristaun, nia koʼalia kona-ba funu neʼebé sira halo, no nia hatudu ho klaru sé mak sira-nia inimigu hodi dehan: “Ita la luta hasoru raan no isin, maibé hasoru governu sira, hasoru kbiit-naʼin sira, hasoru ukun-naʼin sira mundu neʼe nian neʼebé iha nakukun laran, hasoru grupu espíritu neʼebé aat iha lalehan.” (Efeso 6:12, MF) Entaun, ita la halo funu hasoru ema, maibé ita luta hasoru “grupu espíritu neʼebé aat”, neʼebé ita la bele haree.

Tuir tradusaun Bíblia sira seluk, “grupu espíritu neʼebé aat” la arti katak buat aat iha ema nia laran, maibé ida-neʼe kona-ba anju aat sira-neʼebé iha kbiit boot. Porezemplu, Bíblia balu tradús liafuan neʼe temi nuʼudar “espíritu aat sira iha leten” (Lembaga Alkitab Indonesia), no “espíritu aat sira iha lalehan” (Bíblia Sagrada Para o Terceiro Milénio da Encarnação). Entaun, ida-neʼe hatudu katak Diabu Satanás mós uza anju aat sira-neʼebé “husik sira-nia kadunan” iha lalehan atu halo tuir Satanás nia hakarak.—Judas 6.

Livru Daniel iha Bíblia laran hatudu katak husi tempu uluk, “ukun-naʼin sira mundu neʼe nian” kontrola mundu neʼe. Iha tinan 537 molok Kristu, ema judeu sira-neʼebé sai dadur iha Babilónia fila fali ba Jerusalém. Tanba Daniel hanoin tebes ninia maluk sira-neʼe, nia halo orasaun ba Maromak kona-ba sira durante semana tolu. Maromak haruka anju ida atu fó kmaan ba Daniel. Anju neʼe fó-hatene ba Daniel tanbasá nia la mai lalais, hodi dehan: “Ulun-naʼin neʼebé ukun rai-Pérsia hamriik kontra hasoru haʼu ba loron ruanulu-resin-ida.”—Daniel 10:2, 13.

Sé mak “ulun-naʼin neʼebé ukun rai-Pérsia” neʼe? Klaru katak anju neʼe la koʼalia kona-ba Liurai Ciro neʼebé ukun rai-Pérsia iha tempu neʼebá tanba nia apoia Daniel no ninia povu. Liután neʼe, oinsá mak liurai ida bele halo funu hasoru kriatura espíritu ida ba semana tolu? Bíblia hatudu katak anju sira iha kbiit boot tanba Maromak uza anju ida deʼit atu oho soldadu hamutuk naʼin-185.000 iha kalan ida nia laran. (Isaías [Yesaya] 37:36) Se nuneʼe, “ulun-naʼin neʼebé ukun rai-Pérsia” mak kriatura espíritu ida, neʼebé simu kbiit husi Diabu atu ukun rai-Pérsia tomak. Iha versíkulu balu tuirmai, Maromak nia anju hatete ba Daniel katak nia sei halo funu hasoru “ulun-naʼin neʼebé ukun rai-Pérsia” dala ida tan, no mós halo funu hasoru “ulun-naʼin neʼebé ukun rai-Grésia”.—Daniel 10:20.

Entaun, husi informasaun neʼebé ita foin lee, ida-neʼe hatudu kona-ba saida? Ida-neʼe hatudu katak anju aat sira iha duni, no sira mak ‘ukun-naʼin mundu neʼe nian’, neʼebé ema la bele haree. Sira mak ukun mundu neʼe hamutuk ho Diabu Satanás, nuʼudar sira-nia ulun. Maibé husi tempu uluk toʼo agora, saida mak sira hakarak halo ba ema?

Ukun-naʼin mundu neʼe hatudu sai ninia hahalok

Iha livru ikus, Apokalipse, apóstolu João koʼalia kona-ba Jesus, nuʼudar arkanju Miguel manán funu iha lalehan, hasoru Diabu Satanás no ninia anju aat sira. João fó sai rezultadu aat neʼebé akontese iha mundu tanba Jesus duni sai sira, hodi dehan: “Susar ba imi, rai no tasi; basá Diabu tun tiha ba imi ho laran-nakali, tanba nia hatene katak nia loron sira toʼo ona rohan.”—Apokalipse 12:9, 12.

Iha dalan saida deʼit mak Diabu hatudu katak nia laran-nakali tebes? Hanesan kriminozu neʼebé halo buat aat naran deʼit atu kumpre sira-nia hakarak, Diabu no ninia anju aat sira hakarak duni atu halo aat ba ema no estraga rai. Diabu hatene katak nia iha tempu uitoan deʼit, tan neʼe nia uza bisnis boot sira atu haburas hahalok kaan-teen hodi book ema nia hakarak atu hola sasán barak. Rezultadu mak bisnis boot sira hasai no gasta lalais rai nia rikusoin neʼebé estraga ambiente no fó ameasa ba ema nia moris.—Apokalipse 11:18; 18:11-17.

Husi tempu ulukliu, Diabu hatudu ninia hakarak atu ukun mundu neʼe hodi uza buat polítiku nian no relijiaun sira. Livru Apokalipse hatudu buat polítiku nian nuʼudar balada fuik neʼebé simu “kbiit” atu ukun husi Diabu. Apokalipse mós hatudu kona-ba relasaun diʼak entre polítiku ho relijiaun no kompara ida-neʼe hanesan hahalok sala-foʼer. (Apokalipse 13:2; 17:1, 2) Hanoin toʼok kona-ba ema rihun ba rihun neʼebé mate tanba hetan terus makaʼas, halo ema sai atan, funu entre nasaun ho nasaun, no entre suku ho suku. Buat aat sira-neʼebé ema halo mak hahalok baibain deʼit ka lae? Ka, iha buat ruma neʼebé kontrola ema atu halo hahalok aat sira-neʼe?

Bíblia hatudu ho klaru sé loos mak kontrola ukun-naʼin no governu sira iha mundu neʼe. Maski ema iha mundu hatene ka la hatene, sira haleno Satanás nia hahalok hodi halo buat aat naran deʼit. Maibé toʼo bainhira mak ema hetan terus iha Diabu nia ukun nia okos?

Lakleur tan Satanás sei lakon

Atividade sira-neʼebé Kristu halo kuandu nia iha mundu, hatudu katak lakleur tan Diabu Satanás no ninia anju aat sira sei lakon. Porezemplu, kuandu ninia dixípulu sira konta kona-ba oinsá sira duni sai espíritu aat sira, nia dehan: “Haʼu foin haree Satanás monu husi lalehan hanesan rai-lakan.” (Lucas 10:18) Liafuan sira-neʼe hatudu katak Jesus haksolok hodi hatene iha futuru, nia nuʼudar arkanju Miguel iha lalehan, sei halo funu no manán hasoru ida-neʼebé ukun-naʼin ba mundu neʼe. (Apokalipse 12:7-9) Buat neʼebé Bíblia fó-hatene nanis hatudu katak Jesus manán funu neʼe iha tinan 1914.a

Husi tinan neʼe, Diabu hatene katak ninia tempu hela uitoan deʼit. Maski ‘mundu tomak sei iha ninia ukun’, ohin loron iha ema kristaun neʼebé loos, neʼebé la husik Satanás atu kontrola sira. Ema kristaun sira-neʼe aprende husi Bíblia neʼebé ajuda sira atu hatene sé loos mak Diabu no matan-moris kona-ba ninia lasu sira. (2 Korinto 2:11) Sira hetan esperansa husi apóstolu Paulo nia liafuan neʼebé hatete: “Maromak dame nian sei harahun Satanás.”b—Roma 16:20.

Lakleur tan Satanás sei lakon! Kuandu Kristu ukun mundu ho domin, ema neʼebé loos sei halo mundu tomak sai hanesan jardín furak. Violénsia, odi, no hahalok kaan-teen sei la iha ona. Bíblia hatete: “Buat uluk nian [ema] sei la hanoin-hetan fali.” (Isaías [Yesaya] 65:17) Ema sira-neʼebé sai livre husi ukun-naʼin mundu neʼe nian sei sente kmaan tebes!

[Nota–rodapé]

[Liafuan ne’ebé foti husi pájina 9]

Kuandu Kristu ukun mundu ho domin, ema neʼebé loos sei halo mundu tomak sai hanesan jardín furak