Konsellu diʼak kona-ba moris nuʼudar ema neʼebé kaben no la kaben
“Haʼu dehan neʼe ba imi . . . atu haburas [buat neʼebé] diʼak no atu imi bele serbí Naʼi hodi la fahe imi-nia neon.”—1 KOR 7:35.
1, 2. Tanbasá mak ita presiza buka Bíblia nia konsellu kona-ba moris nuʼudar ema neʼebé kaben no la kaben?
HAKSOLOK, estrese, no laran-susar mak sentimentu neʼebé dala ruma mane sente iha sira-nia relasaun ho feto, ka feto sente iha sira-nia relasaun ho mane. Tanba ita iha sentimentu hanesan neʼe, ita presiza buka Maromak nia konsellu. Maibé, iha mós razaun seluk tan atu buka Maromak nia konsellu. Porezemplu, ema kristaun balu neʼebé kontente atu moris nuʼudar ema neʼebé la kaben, karik sente katak ninia família ka kolega hakaʼas nia atu buka kaben. Ema kristaun seluk karik hakarak atu kaben, maibé seidauk hetan ema neʼebé diʼak ba nia. Ema kristaun balu tan neʼebé sei namora hela mós presiza konsellu husi Bíblia atu prepara an atu simu responsabilidade nuʼudar kaben-naʼin. No mós, ema kristaun neʼebé seidauk kaben, no sira neʼebé kaben ona, presiza proteje sira-nia an husi hahalok sala-foʼer.
2 Importante tebes atu halo tuir Maromak nia konsellu kona-ba situasaun sira-neʼe, tanba ida-neʼe kona ita-nia relasaun ho Maromak Jeová no mós lori haksolok ba ita ida-idak. Iha 1 Korinto kapítulu 7, apóstolu Paulo fó konsellu kona-ba moris nuʼudar ema neʼebé kaben no la kaben. Nia fó konsellu kona-ba neʼe tanba nia hakarak irmaun-irmán sira atu halo buat neʼebé loos no atu kontinua serbí Maromak Jeová ho laran tomak ‘hodi la fahe sira-nia neon’. (1 Kor 7:35) Nuʼudar ita koʼalia kona-ba Paulo nia konsellu, mai ita haree oinsá mak ita bele serbí Jeová diʼak liután maski ita seidauk kaben ka kaben ona.
Desizaun neʼebé ita rasik tenke halo
3, 4. (a) Se ema ruma hakaʼas ninia kolega ka família neʼebé klosan atu kaben, problema saida deʼit mak bele mosu? (b) Oinsá mak Paulo nia ezemplu ajuda ita atu iha hanoin neʼebé loos kona-ba kaben?
3 Iha apóstolu sira-nia tempu, ema judeu sira fiar katak importante tebes atu kaben. Ohin loron, ema barak mós hanoin hanesan neʼe. Dala barak, se mane ka feto ida nia tinan komesa boot maibé seidauk kaben, ninia kolega ka família karik sente katak sira presiza fó konsellu kona-ba kaben. Porezemplu, karik sira fó laran-manas ba nia atu hakaʼas an atu buka kaben. Sira mós karik fó opiniaun kona-ba ema ruma neʼebé bele sai ninia pár, ka dala ruma arranja atu nia bele hasoru malu ho ema neʼe. Maibé, halo hanesan neʼe bele hamoe nia, halo nia laran-kanek, no estraga sira-nia relasaun nuʼudar kolega diʼak.
4 Paulo nunka hakaʼas ema seluk atu kaben ka la kaben. (1 Kor 7:7) Maski nia kontente atu serbí Jeová nuʼudar ema neʼebé la kaben, maibé nia hatudu respeitu ba ema seluk nia direitu se sira hakarak kaben. Ohin loron, ema kristaun ida-idak mós iha direitu atu deside rasik se sira kaben ka la kaben. Tan neʼe, ema seluk labele hakaʼas sira kona-ba ida-neʼe.
Moris kontente nuʼudar ema neʼebé la kaben
5, 6. Tanbasá mak Paulo fó laran-manas ba ema kristaun atu la kaben?
5 Paulo nia liafuan ba ema kristaun iha Korinto hatudu katak ema neʼebé la kaben bele serbí Maromak ho diʼak. (Lee 1 Korinto 7:8.) Maibé, neʼe la dehan katak Paulo hanoin nia diʼak liu fali kaben-naʼin sira, hanesan ulun-naʼin igreja sira balu hanoin. Duké hanoin nuneʼe, Paulo esplika katak ema neʼebé la kaben nia situasaun fó oportunidade ba sira atu serbí Maromak iha dalan neʼebé kaben-naʼin sira la bele. Oinsá?
6 Dala barak, ema kristaun neʼebé la kaben bele halaʼo knaar ruma iha Jeová nia serbisu, maibé susar ba ema neʼebé kaben atu halaʼo knaar neʼe. Porezemplu, Paulo simu knaar espesiál atu sai “apóstolu ba jentiu sira”. (Rom 11:13) Ita bele lee kona-ba Paulo nia esperiénsia iha Apostolu kapítulu 13 toʼo 20. Nia laʼo rai dook hamutuk ho maluk kristaun sira seluk atu haklaken iha área foun no harii kongregasaun barak. Nia mós hasoru susar barak neʼebé ita ohin loron la hasoru. (2 Kor 11:23-27, 32, 33) Maibé nia prontu atu tahan hasoru susar sira-neʼe atubele ajuda ema barak sai Jesus nia dixípulu, no ida-neʼe lori haksolok ba nia. (1 Tes 1:2-7, 9; 2:19) Se Paulo iha feen ka oan karik, nia bele halo buat sira-neʼe hotu ka lae? Karik la bele.
7. Konta toʼok ezemplu husi irmán klosan sira neʼebé uza sira-nia situasaun atu halaʼo serbisu haklaken.
7 Ohin loron mós, ema kristaun barak neʼebé la kaben uza sira-nia situasaun atu halaʼo serbisu haklaken. Porezemplu, irmán klosan naʼin-rua iha rai-Bolívia, naran Sara no Limbania, sira muda ba aldeia kiʼik ida neʼebé tinan barak ona Testemuña la bá haklaken iha neʼebá. Maski aldeia neʼe seidauk iha eletrisidade, maibé neʼe la problema ba sira. Sira hatete katak ema iha aldeia neʼe gosta lee livru tanba sira la iha rádiu ka televizaun. Ema balu hatudu livru tuan tebes neʼebé sira uluk simu husi Testemuña ba Jeová, no hatete katak sira sei lee livru sira-neʼe toʼo agora. Besik ema hotu neʼebé irmán sira-neʼe hasoru hakarak hatene liután kona-ba Bíblia, tan neʼe susar ba irmán sira-neʼe atu vizita uma hotu iha área neʼe. Señora ferik ida hatete: “Haʼu sente mundu nia rohan besik ona tanba ikusmai Testemuña ba Jeová mai toʼo ami-nia fatin.” Lakleur, ema balu husi aldeia neʼe komesa tuir reuniaun kongregasaun nian.
8, 9. (a) Tanbasá mak Paulo hatete katak diʼak atu serbí Maromak nuʼudar ema neʼebé la kaben? (b) Oportunidade diʼak saida mak ema kristaun neʼebé la kaben bele hetan?
8 Klaru katak ema kristaun neʼebé kaben ona mós hetan rezultadu diʼak husi sira-nia serbisu haklaken iha área neʼebé susar atu haklaken. Maibé knaar balu neʼebé ladún susar ba ema klosan, dala ruma susar tebes ba kaben-naʼin sira ka sira neʼebé iha oan. Kuandu Paulo hakerek karta ba kongregasaun sira, nia hatene katak sei iha serbisu barak atu habelar lia-foun diʼak. Nia mós hakarak ninia maluk kristaun sira atu haksolok hodi ajuda ema seluk atu sai dixípulu hanesan nia halo. Tan neʼe, nia fó laran-manas ba sira atu serbí Jeová nuʼudar ema neʼebé la kaben.
9 Irmán klosan ida neʼebé serbí nuʼudar pioneiru iha rai-Estadus Unidus hatete: “Ema balu fiar katak ema neʼebé la kaben la bele moris kontente. Maibé haʼu hatene katak relasaun diʼak ho Jeová mak lori haksolok ba ita-nia moris. Maski moris nuʼudar ema neʼebé la kaben hanesan sakrifísiu ida ba sira, maibé se uza situasaun neʼe ho didiʼak, ida-neʼe bele sai hanesan prezente kapás tebes.” Nia hatete katak moris nuʼudar ema neʼebé la kaben la hanetik ema atu moris kontente maibé loke dalan atu moris kontente. Nia dehan: “Haʼu hatene katak Jeová hatudu domin ba ema hotu, maski kaben ka la kaben.” Agora, irmán neʼe serbí Jeová iha rai seluk neʼebé presiza haklaken-naʼin barak liután. Se Ita seidauk kaben, Ita bele ka lae hola parte barak liután atu hanorin lia-loos ba ema seluk? Se Ita bele, Ita sei haree katak Ita-nia moris nuʼudar ema neʼebé la kaben sei sai hanesan prezente folin-boot husi Jeová.
Ema neʼebé hakarak kaben
10, 11. Oinsá mak Jeová ajuda sira neʼebé hakarak kaben maibé seidauk hetan ema neʼebé diʼak ba sira?
10 Depois moris nuʼudar ema klosan ba tinan balu, Jeová nia atan balu ikusmai karik deside atu buka kaben. Tanba sira hakarak hetan ema neʼebé diʼak ba sira, sira husu Jeová nia ajuda.—Lee 1 Korinto 7:36.a
11 Se Ita hakarak kaben ho ema neʼebé serbí Jeová ho laran tomak, kontinua halo orasaun kona-ba neʼe. (Flp 4:6, 7) Maski Ita sente katak Ita hein kleur tebes, Ita labele laran-tun. Jeová hatene buat neʼebé Ita presiza, no se Ita tau fiar ba nia, nia sei ajuda Ita atu tahan hasoru Ita-nia susar.—Ebr 13:6.
12. Tanbasá mak ema kristaun presiza hanoin didiʼak se ema ruma husu atu kaben ho nia?
12 Maibé, oinsá se ema ruma neʼebé ladún iha relasaun diʼak ho Jeová ka ema neʼebé la’ós Testemuña mak husu atu kaben ho Ita? Se ida-neʼe akontese ba Ita, hanoin-hetan katak se Ita foti desizaun sala kona-ba neʼe, susar neʼebé karik kona Ita depois kaben bele sai aat liu fali sentimentu mesak neʼebé Ita hasoru daudauk nuʼudar ema klosan. Hanoin-hetan mós katak ita kaben dala ida, metin ba nafatin. (1 Kor 7:27) Tan neʼe, Ita labele foti desizaun atu kaben tanba deʼit Ita sente katak ida-neʼe mak Ita-nia oportunidade ikus. Sin, Ita lakohi duni halo desizaun neʼebé ikusmai halo Ita arrepende.—Lee 1 Korinto 7:39.
Prepara an ba moris kaben nian
13-15. Sira neʼebé atu kaben presiza koʼalia ba malu uluk kona-ba buat importante saida deʼit?
13 Maski Paulo fó laran-manas ba ema kristaun atu serbí Jeová nuʼudar ema neʼebé la kaben, maibé nia la hatún sira neʼebé deside atu kaben. Duké hatún, ninia konsellu ajuda sira atu hatene realidade kona-ba moris nuʼudar kaben-naʼin no oinsá atu moris kaben nian bele metin ba nafatin.
14 Ema balu presiza hadiʼa sira-nia hanoin kona-ba moris kaben nian. Kuandu sira namora hela, karik sira hanoin katak sira-nia domin ba malu espesiál tebes, sira sente katak la iha ema seluk neʼebé hadomi malu hanesan neʼe. Sira hahú sira-nia moris kaben nian hodi fiar katak sei la iha buat ida neʼebé estraga sira-nia moris kontente. Maibé loloos, ida-neʼe la tuir realidade. Maski tempu romántiku lori haksolok ba sira-nia moris kaben nian, maibé neʼe la toʼo atu rezolve problema no susar neʼebé kaben-naʼin sira hasoru.—Lee 1 Korinto 7:28.b
15 Depois kaben tiha, laʼen no feen barak hakfodak, ka laran-tun, kuandu foin hatene katak sira-nia hanoin la hanesan kona-ba buat neʼebé importante iha sira-nia moris. Porezemplu, karik sira iha hanoin neʼebé la hanesan kona-ba osan, atividade halimar nian ka hela-fatin. No karik sira mós iha hanoin neʼebé la hanesan kona-ba vizita família dala hira. Liután neʼe, ema ida-idak iha fraku neʼebé bele halo sira-nia kaben sai hirus. Tan neʼe, kuandu sira namora hela, sira presiza koʼalia kona-ba buat sira-neʼe antes atu kaben. Selae, aban-bainrua problema bele mosu iha sira-nia moris kaben nian.
16. Tanbasá mak feen-laʼen presiza apoia malu?
16 Atubele iha moris kaben nian neʼebé kontente, feen-laʼen presiza apoia malu atu halaʼo sira-nia responsabilidade. Sira presiza iha hanoin neʼebé hanesan kona-ba fó dixiplina ba oan, no mós kona-ba oinsá atu tau matan ba inan-aman neʼebé idade ona. Maski família ida-idak hasoru situasaun susar oioin, maibé feen-laʼen labele husik situasaun sira-neʼe halo sira hadook malu. Hodi halo tuir Bíblia nia konsellu, ida-neʼe sei ajuda sira atu rezolve problema barak, atu tahan ho problema sira neʼebé susar atu halakon, no atu sira kontinua moris kontente.—1 Kor 7:10, 11.
17. Tanbasá mak ema neʼebé kaben “hanoin kona-ba sasán mundu neʼe nian”?
17 Paulo esplika liután kona-ba moris kaben nian iha 1 Korinto 7:32-34. (Lee.) Ema neʼebé kaben “hanoin kona-ba sasán mundu neʼe nian”, hanesan ai-han, hatais, uma, no buat seluk tan liu fali kuandu sira sei klosan. Tanbasá? Porezemplu, kuandu irmaun ida sei klosan, karik nia uza ninia tempu no forsa barak ba serbisu haklaken. Maibé depois kaben tiha, nia presiza fahe ninia tempu no forsa neʼe atu tau matan ba ninia feen no atu halo feen kontente. Hanesan neʼe mós ho feen. Jeová komprende katak tempu no forsa neʼebé feen-laʼen uluk uza ba Ninia serbisu kuandu sira sei klosan agora sai menus, tanba sira presiza uza tempu no forsa neʼe atu fó ksolok ba malu no atu hametin sira-nia moris kaben nian.
18. Kuandu kaben ona, feen no laʼen presiza halo mudansa saida kona-ba atividade halimar nian?
18 Maibé, oinsá kona-ba tempu ba atividade halimar nian neʼebé uluk sira uza kuandu sira sei klosan? Se kaben-naʼin sira presiza hamenus tempu no forsa neʼebé sira uza ba Jeová nia serbisu atu hametin sira-nia moris kaben nian, sira mós presiza hamenus tempu no forsa neʼebé sira uluk uza ba atividade halimar nian. Se laʼen uza tempu barak atu halo desportu ho ninia kolega hanesan tempu neʼebé nia sei klosan, nia feen sei sente oinsá? Ka oinsá laʼen sei sente se nia feen uza tempu barak atu halo atividade oioin ho ninia kolega sira hanesan tempu neʼebé nia sei klosan? Karik nia sei sente mesak, la kontente, no sente katak nia kaben la hadomi nia. Atu ida-neʼe labele akontese, kaben-naʼin sira presiza halo buat hotu neʼebé sira bele atu hametin sira-nia relasaun nuʼudar feen-laʼen.—Ef 5:31.
Moos iha dalan morál
19, 20. (a) Tanbasá mak moris nuʼudar ema neʼebé kaben la toʼo atu proteje ita husi hahalok sala-foʼer? (b) Perigu saida mak bele mosu se kaben-naʼin sira dook malu ba tempu kleur?
19 Maromak Jeová nia atan sira hakaʼas an atu moos nafatin iha dalan morál. Balu foti desizaun atu kaben hodi labele monu ba hahalok imorál. Maibé, moris nuʼudar ema neʼebé kaben la toʼo atu proteje sira husi hahalok sala-foʼer. Iha Bíblia nia tempu, ema neʼebé hela iha sidade laran hetan protesaun tanba moru boot haleʼu sidade neʼe. Maibé perigu atu sai ba liʼur tanba bele hasoru ema neʼebé halo krime. Ukun-fuan sira neʼebé Jeová fó ba kaben-naʼin sira mak hanesan moru ida atu proteje sira. Nuneʼe, sira bele hetan protesaun husi sala-foʼer só kuandu sira halo tuir ukun-fuan sira-neʼe.
20 Iha 1 Korinto 7:2-5, Paulo esplika kona-ba neʼe hodi hatudu katak feen deʼit mak iha direitu atu halo relasaun seksuál ho ninia laʼen, nuneʼe mós ho laʼen. Eskritura neʼe mós hatete katak sira ida-idak presiza “halo tuir nia knaar”, katak fó ba nia kaben ninia direitu seksuál nian. Maibé, se laʼen no feen dook malu ba tempu kleur, sira la bele halo tuir sira-nia knaar neʼe. Porezemplu, se feen bá feriadu iha fatin ida no laʼen bá fatin seluk, ka laʼen bá serbisu iha fatin dook, ida-neʼe bele hamosu perigu tanba se laʼen ka feen la hanoin kona-ba ninia kaben nia presiza kona-ba relasaun seksuál, no sira ida “la bele ukun an”, Satanás bele aproveita situasaun neʼe atu intenta sira atu monu ba sala-foʼer. Jeová haraik bensaun ba família nia ulun neʼebé tau matan didiʼak ba nia família hodi la tau moris kaben nian iha perigu laran.—Sal 37:25.
Halo tuir Bíblia nia konsellu
21. (a) Tanbasá mak susar atu halo desizaun kona-ba kaben ka la kaben? (b) Oinsá mak konsellu iha 1 Korinto kapítulu 7 bele ajuda ita?
21 Desizaun neʼebé susar tebes atu halo mak desizaun kona-ba kaben ka la kaben. Ita sei hasoru problema oioin iha ita-nia moris tanba ita hotu sala-naʼin. No mós, maski Jeová haraik bensaun ba nia povu, dala ruma ita sei sente laran-tun. Maibé, hodi halo tuir konsellu iha 1 Korinto kapítulu 7, ita bele hamenus problema iha ita-nia moris. Maski ita kaben ka la kaben, ita bele duni halo kontente Maromak Jeová. (Lee 1 Korinto 7:37, 38.c) Bensaun kapás liu iha ita-nia moris mak atu Maromak simu ita. Sin, Jeová bele simu ita agora no mós iha futuru bainhira ita moris iha mundu foun. Iha tempu neʼebá, mane no feto sei la hasoru tan problema ka susar neʼebé sira hasoru ohin loron.
[Nota–rodapé]
a 1 Korinto 7:36 (MF): “Maibé, se ema ruma hanoin katak nia halo buat neʼebé la loos kona-ba ninia moris virjen, se nia liu ona tempu foin-saʼe nian, no nuneʼe mak nia hakarak halo, husik nia halo buat neʼebé nia hakarak; nia la halo sala. Husik sira kaben.”
b Atu hetan informasaun liután, haree livru Halaʼo Moris Kontente nuʼudar Família, kapítulu 2, parágrafu 16-19.
c 1 Korinto 7:37, 38 (MF): “37 Maibé, se ema ida deside ona iha nia laran, katak nia la iha presiza, maibé iha kbiit atu ukun ninia hakarak rasik no halo tiha desizaun neʼe iha nia laran, atu tahan nafatin ninia moris virjen, nia halo buat neʼebé diʼak. 38 Neʼe duni, nia neʼebé husik ninia moris virjen hodi kaben halo buat neʼebé diʼak, maibé nia neʼebé la husik ninia moris virjen hodi kaben sei halo buat neʼebé diʼak liu.”
Ita bele hatán?
• Tanbasá mak ita labele hakaʼas ema seluk atu kaben?
• Se Ita seidauk kaben, oinsá mak Ita bele uza didiʼak Ita-nia tempu?
• Oinsá mak ema neʼebé sei namora bele prepara ba moris kaben nian?
• Tanbasá mak moris nuʼudar ema neʼebé kaben la toʼo atu proteje sira husi hahalok sala-foʼer?
[Dezeñu iha pájina 14]
Ema klosan neʼebé uza sira-nia tempu hodi aumenta serbisu haklaken hetan haksolok
[Dezeñu iha pájina 16]
Kuandu Ita kaben ona, Ita presiza halo mudansa saida deʼit iha Ita-nia moris?