Tanbasá mak Testemuña ba Jeová haklaken husi uma ba uma?

▪ Iha Bíblia laran, ita bele hetan Jesus nia mandamentu tuirmai neʼe ba ninia dixípulu sira. Jesus hatete: “Neʼe duni, laʼo bá, hanorin nasaun hotu-hotu.” (Mateus 28:19, 20) Eskritura neʼe ba ema kristaun hotu ka lae? Jesus nia dixípulu sira iha tempu uluk komprende katak mandamentu neʼe ba ema kristaun hotu. Porezemplu, apóstolu Pedro hatete: “Jesus haruka ami atu haklaken ba povu no fó sasin.” (Apostolu 10:42) No apóstolu Paulo hatete: “Knaar ida-neʼe saran tiha mai haʼu hodi obriga; no haʼu la haklaken evanjellu karik, susar boot mai haʼu!”—1 Korinto 9:16.

La’ós Paulo no Pedro deʼit mak halo tuir Jesus nia mandamentu neʼe, maibé ema kristaun hotu iha tempu neʼebá. Sira haree serbisu haklaken nuʼudar buat neʼebé importante liu. (Apostolu 5:28-32, 41, 42) Ohin loron, Testemuña ba Jeová mós halo serbisu importante neʼe. Mensajen neʼebé sira haklaken hanesan deʼit ho mensajen neʼebé Jesus haklaken iha tempu uluk. Neʼe mak liafuan diʼak kona-ba “reinu lalehan nian”, ka kona-ba Maromak nia Ukun.—Mateus 10:7.

Sé deʼit mak presiza rona mensajen kona-ba Maromak nia Ukun? Jesus nia liafuan hatudu katak mensajen neʼe presiza haklaken ba ema hotu iha mundu tomak. Jesus hatete ba ninia dixípulu sira: “Imi sei sai haʼu-nia sasin . . . toʼo rai nia rohan.” (Apostolu 1:8) Nia mós hatete katak antes mundu neʼe ramata, “lia-foun reinu nian neʼe, ema sei haklaken iha mundu tomak hodi fó sasin”. (Mateus 24:14) Atu halo ida-neʼe, ema kristaun sira iha apóstolu sira-nia tempu hakaʼas an atu koʼalia ba ema hotu, laʼós deʼit ba ema neʼebé sira koñese ka ba ema neʼebé la iha relijiaun. (Koloso 1:23; 1 Timoteo 2:3, 4) Hanesan neʼe mós, ohin loron Testemuña ba Jeová hakaʼas an atu haklaken ba ema hotu.a

Saida mak dalan neʼebé diʼak liu atu habelar mensajen kona-ba Maromak nia Ukun? Jesus hatene dalan diʼak liu oinsá atu haklaken ba ema barak. Nia haruka ninia dixípulu sira atu haklaken iha sidade no knua sira, no mós iha ema nia uma. (Mateus 10:7, 11, 12) Depois Jesus mate no moris hiʼas fali, ninia dixípulu sira kontinua atu haklaken iha ema “sira-nia uma”, ka husi uma ba uma. (Apostolu 5:42) Hanesan Jesus, sira mós haklaken iha fatin públiku no iha fatin naran deʼit neʼebé sira hetan ema. (Joao 4:7-26; 18:20; Apostolu 17:17, MF) Ohin loron, Testemuña ba Jeová haklaken ba ema hotu hodi uza dalan sira hanesan neʼe.

Jesus hatudu katak laʼós ema hotu sei rona. (Mateus 10:14; 24:37-39) Ida-neʼe sei halo ema kristaun laran-tun toʼo sira la hakaʼas an ona atu haklaken ka lae? Hanoin toʼok rai-nakdoko boot foin akontese. No Ita ajuda atu buka ema sira neʼebé lakon. Se Ita hetan ema uitoan deʼit, Ita sei la kontinua ona atu buka vítima sira seluk ka lae? Lae, Ita sei hakaʼas an nafatin. Ita sei halo nuneʼe tanba sei iha esperansa atu salva ema nia moris, maski ema ida deʼit. Hanesan neʼe mós, Jesus hakarak ninia dixípulu sira atu hakaʼas an nafatin hodi kontinua haklaken, tanba sei iha esperansa atu hetan ema neʼebé hakarak rona liafuan diʼak kona-ba Maromak nia Ukun. (Mateus 10:23; 1 Timoteo 4:16) Hodi haklaken husi uma ba uma atu buka ema sira hanesan neʼe, Testemuña ba Jeová hatudu domin ba Maromak no ba ema. Sira komprende katak atu ema sira-neʼe hetan salvasaun, sira presiza duni rona mensajen kona-ba Maromak nia Ukun no halo tuir Maromak.—Mateus 22:37-39; 2 Tesalonika 1:8.

Livru neʼebé Ita lee daudaun neʼe, fó sai kona-ba Bíblia nia mensajen. Se Ita hakarak hetan informasaun liután, bele koʼalia ho Testemuña ba Jeová kuandu sira vizita Ita, ka bele kontaktu livru ida-neʼe nia editora sira.

[Nota–rodapé]