Sira fó sira-nia an ho hakarak rasik—Iha rai-Brazíl

TINAN balu liubá, irmán Rúbia (1), neʼebé agora tinan 30 ona, bá vizita irmán Sandra (2) neʼebé serbí nuʼudar pioneiru regulár iha kongregasaun kiʼik ida iha parte súl iha rai-Brazíl. Iha neʼebá, buat ida book makaʼas Rúbia nia laran toʼo nia halo mudansa iha ninia moris. Saida mak akontese ba nia? Mai ita haree buat neʼebé irmán Rúbia hatete.

“HAʼU LA BELE FIAR BUAT NEʼEBÉ HAʼU RONA”

“Irmán Sandra lori haʼu atu bá vizita feto ida neʼebé estuda Bíblia. Durante estudu, feto neʼe hatete: ‘Mana Sandra, iha serbisu-fatin, haʼu-nia kolega naʼin-tolu hakarak estuda Bíblia, maibé haʼu hatete ba sira atu hein toʼo tempu neʼebé Ita bele estuda ho sira tanba Ita okupadu tebes ho estudante barak iha tinan neʼe.’ Haʼu la bele fiar buat neʼebé haʼu rona. Ema neʼebé hakarak hatene kona-ba Jeová presiza hein tempu kleur toʼo komesa atu estuda Bíblia! Iha haʼu-nia kongregasaun fali, atu hetan estudu ida deʼit mós susar. Iha tempu neʼebé haʼu tuur hela iha estudante neʼe nia uma, haʼu sente kedas katak haʼu hakarak duni atu ajuda ema iha vila neʼe. Ikusmai, haʼu husik sidade neʼebé uluk haʼu hela no muda fali ba vila neʼebé Sandra halo serbisu pioneiru.”

Irmán Rúbia nia desizaun neʼe lori rezultadu saida? Nia hatete: “La toʼo fulan rua husi tempu neʼebé haʼu muda bá neʼebá, haʼu iha ona estudante Bíblia hamutuk 15, no lakleur tan, haʼu mós sai hanesan Sandra neʼebé presiza husu ema neʼebé hakarak estuda atu hein!”

NIA HANOIN DIDIʼAK KONA-BA NIA RASIK NIA SERBISU HAKLAKEN

Irmaun Diego (3), neʼebé agora tinan 20 liu, uluk nia bá vizita pioneiru naʼin-rua iha vila ida naran Prudentópolis iha parte súl iha rai-Brazíl, no ida-neʼe book nia atu hanoin didiʼak kona-ba nia rasik nia serbisu haklaken. Nia hatete: “Iha tempu neʼebá, haʼu ladún hola parte iha haʼu-nia kongregasaun, haʼu mós haklaken uitoan deʼit hanesan fulan ida oras balu deʼit. Maibé, kuandu haʼu vizita pioneiru sira-neʼe no rona ba sira-nia esperiénsia, haʼu kompara sira-nia laran-manas ba serbisu haklaken ho haʼu-nian, tuir loloos, haʼu ladún laran-manas atu haklaken. Maibé haʼu haree oinsá sira kontente, haʼu mós sente haʼu hakarak haʼu-nia moris sai kontente hanesan sira-nian.” Lakleur, Diego mós komesa serbí nuʼudar pioneiru.

Se imi mós joven Testemuña neʼebé haklaken no tuir reuniaun sira, imi sente hanesan irmaun Diego ka lae? Imi sente katak serbisu haklaken mak buat neʼebé imi tenke halo deʼit no la sente laran-manas? Se nuneʼe, imi bele ka lae, halo mudansa ruma iha imi-nia moris atu haklaken ho haksolok iha fatin neʼebé presiza haklaken-naʼin barak liután? Karik imi lakohi husik imi-nia moris agora nian neʼebé diʼak. Maibé, irmaun-irmán joven barak halo nuneʼe duni. Sira ho aten-brani troka sira-nia hanoin kona-ba sira-nia planu atu bele serbí Jeová iha dalan neʼebé diʼak liután. Mai ita hanoin kona-ba irmaun Bruno nia ezemplu.

DIRIJE ORKESTRA KA HANORIN BÍBLIA?

Tinan balu liubá, irmaun Bruno (4), neʼebé agora tinan 28 ona, nia estuda múzika iha eskola neʼebé naran-boot, no ninia planu mak atu sai ema neʼebé dirije orkestra. Nia aprende múzika ho diʼak tebes toʼo dala barak nia simu konvite husi grupu orkestra ida atu serbisu hamutuk. Ninia moris iha futuru haree hanesan diʼak tebes. Maibé Bruno hatete: “Maski nuneʼe, haʼu sente katak buat ruma kuran iha haʼu-nia moris. Haʼu dedika an tiha ona ba Jeová, maibé haʼu hatene katak haʼu la fó haʼu-nia moris tomak ba nia, no ida-neʼe halo haʼu sente ladún diʼak. Liuhusi orasaun, haʼu hatete sai kona-ba haʼu-nia sentimentu neʼe ba Jeová, no haʼu mós koʼalia ho irmaun sira iha kongregasaun neʼebé iha ona esperiénsia. Haʼu hanoin didiʼak kona-ba haʼu-nia situasaun no deside atu tau uluk serbisu haklaken iha haʼu-nia moris duké múzika. Depois, haʼu husik eskola no bá serbí iha fatin neʼebé presiza duni haklaken-naʼin barak liután.” Bruno nia desizaun lori rezultadu saida?

Bruno muda ba vila ida naran Guapiara ho populasaun maizumenus ema naʼin-7.000, neʼebé dook maizumenus kilómetru 260 husi sidade São Paulo. Neʼe mak mudansa boot duni. Bruno hatete: “Haʼu muda ba uma kiʼik neʼebé la iha jeleira, televizaun, no internét. Maibé haʼu hetan fali buat neʼebé uluk haʼu la iha, neʼe mak toʼos kiʼik no ai-hun sira neʼebé fó fuan!” Bruno serbí iha kongregasaun kiʼik ida iha neʼebá, no semana ida dala ida nia saʼe motór atu bá haklaken iha fatin dook hodi lori ninia pasta ho ai-han, bee, no livru sira. Uluk, ema barak iha área neʼe seidauk rona lia-foun diʼak. Bruno hatete: “Haʼu halaʼo estudu Bíblia hamutuk 18, no kuandu haʼu haree oinsá estudante sira-neʼe troka sira-nia moris, ida-neʼe halo haʼu kontente tebes!” Nia mós hatutan tan: “Agora, haʼu sente katak haʼu hetan ona buat neʼebé uluk haʼu kuran iha haʼu-nia moris, neʼe mak haksolok neʼebé ita hetan hodi tau uluk Maromak nia hakarak iha ita-nia moris. Se haʼu halo tuir haʼu-nia planu uluk hodi buka rikusoin, haʼu sei nunka hetan haksolok hanesan neʼe.” Maibé atu buka moris iha vila Guapiara, Bruno halo serbisu saida? Ho oin-midar, nia hatete: “Haʼu hanorin toka viola.” Sin, nia nafatin serbisu ho múzika.

“HAʼU TENKESÉR HELA IHA FATIN NEʼE”

Irmán Mariana (5), neʼebé agora besik tinan 30, uluk nia mós iha situasaun hanesan ho Bruno. Nia serbisu nuʼudar advogadu no manán osan barak, maibé nia la sente kontente. Nia hatete: “Haʼu sente katak haʼu hakaʼas an deʼit atu ‘duni anin’.” (Ecle 1:17) Irmaun-irmán balu fó laran-manas ba nia atu hanoin kona-ba foti pioneiru. Mariana hanoin didiʼak kona-ba neʼe, no nia deside atu bá vila Barra do Bugres neʼebé besik rai-Bolívia, dook tebetebes husi ninia rai, hamutuk ho ninia kolega sira naran Bianca (6), Caroline (7), no Juliana (8), hodi ajuda kongregasaun iha neʼebá ba fulan balu. Tuirmai, saida mak akontese ba Mariana?

Mariana hatete: “Haʼu-nia planu mak atu hela iha neʼebá fulan tolu deʼit. Maibé, kuandu fulan tolu neʼe besik atu ramata, haʼu halaʼo estudu Bíblia 15! Klaru katak estudante sira-neʼe presiza nafatin atu hetan ajuda hodi bele laʼo ba oin iha lia-loos. Tan neʼe, haʼu la brani atu hatete ba sira katak haʼu sei bá fali haʼu-nia rai. Haʼu tenkesér hela iha fatin neʼe.” No ida-neʼe mak buat neʼebé irmán naʼin-haat neʼe halo. Entaun, mudansa neʼe halo Mariana nia moris sai kontente ka lae? Nia hatete: “Jeová uza haʼu atu ajuda ema hodi hadiʼa sira-nia moris, ida-neʼe halo haʼu sente diʼak. Hodi hatene katak haʼu uza haʼu-nia tempu no forsa ba buat neʼebé iha folin duni, ida-neʼe lori haksolok mai haʼu.” Irmán Caroline mós fó sai oinsá irmán naʼin-haat neʼe sente, hodi dehan: “Iha kalan kuandu atu toba, haʼu-nia laran kontente tebes tanba haʼu uza haʼu-nia moris atu halo Maromak nia hakarak. Buat neʼebé haʼu hanoin liu iha haʼu-nia moris mak kona-ba oinsá atu ajuda haʼu-nia estudante Bíblia sira. Hodi haree sira laʼo ba oin iha lia-loos, ida-neʼe halo haʼu haksolok tebes. Bíblia hatete: ‘Koko no haree katak Jeová mak diʼak’, no liuhusi haʼu-nia esperiénsia rasik, haʼu hatene katak liafuan neʼe mak loos duni.”—Sal 34:8.

Ita fiar katak Jeová sente kontente tebes hodi haree irmaun-irmán joven barak iha mundu tomak neʼebé “fó sira-nia an ho hakarak rasik” atu haklaken lia-foun diʼak kona-ba ninia Ukun iha fatin dook! (Sal 110:3; Prov 27:11) Sin, sira hotu neʼebé ho hakarak rasik halo serbisu neʼe, sira hetan bensaun barak husi Jeová.—Prov 10:22.

“Ami la kuran buat ida”

Kuandu irmaun João Paulo ho ninia feen irmán Noemi fó sai sira-nia hakarak atu serbí iha fatin neʼebé presiza haklaken-naʼin, irmaun-irmán balu iha kongregasaun hatete buat oioin neʼebé halo sira laran-tun, hanesan: “Se imi muda ba foho, karik imi sei hetan susar kona-ba osan.” “Tanbasá mak imi hakarak muda? Iha ita-nia kongregasaun rasik mós sei iha buat barak neʼebé imi bele halo.” João Paulo hatete: “Sira koʼalia hanesan neʼe tanba hanoin ami, maibé susar ba ami atu la husik liafuan sira-neʼe halo ami laran-tun.” Maibé, João Paulo no Noemi muda ba fatin ida neʼebé presiza haklaken-naʼin, no liutiha tinan barak, sira kontente ho sira-nia desizaun atu aumenta sira-nia serbisu haklaken. João Paulo hatete: “Durante tempu neʼebé haʼu ho haʼu-nia feen hela iha neʼe, ami la kuran buat ida. No kona-ba buat neʼebé ami presiza duni, ami iha barak liu duké uluk ami iha.” Noemi hatutan tan: “Ami-nia hakaʼas-an la saugati deʼit.”

Loos duni, problema ida ba ema neʼebé hela iha vila mak kona-ba buka moris. Oinsá mak irmaun-irmán sira neʼebé muda ba fatin dook buka moris atu tau matan ba sira rasik nia presiza? Sira buka dalan oioin atu halo serbisu. Balu hanorin inglés ka língua seluk, hanorin labarik sira kona-ba matéria eskola, suku roupa, pinta uma, ka halo buat naran deʼit neʼebé sira bele halo. No irmaun-irmán sira neʼebé serbí iha fatin neʼebé presiza haklaken-naʼin sente oinsá? Sira sente katak sira hetan bensaun barak liu fali susar neʼebé sira hasoru!