Sira fó sira-nia an ho hakarak rasik​—iha rai-Méxiku

ITA kontente tebes atu haree irmaun no irmán joven barak halo sira-nia moris simples liu hodi bele aumenta sira-nia serbisu ba Maromak. (Mt 6:22) Sira presiza halo mudansa saida deʼit? Sira hasoru susar saida deʼit? Atu hatene, mai ita haree kona-ba sira balu neʼebé serbí daudauk iha rai-Méxiku.

“AMI PRESIZA HALO MUDANSA”

Irmaun Dustin no irmán Jassa husi rai-Estadus Unidus, sira kaben iha Janeiru 2007. Lakleur depois neʼe, sira-nia mehi sai loos, sira sosa ró ida no hela iha ró neʼe. Sira para ró iha ponte-kais besik vila Astoria, Oregon, Estadus Unidus Amérika. Fatin neʼe mak furak tebes, foho kiʼik sira neʼebé haleʼu kapás tebes no foho tutun sempre iha jelu. Fatin neʼe besik Oseanu Pasífiku. Irmaun Dustin hatete: “Fatin hotu neʼebé Ita haree mak furak tebetebes.” Kaben-naʼin neʼe sente katak sira halaʼo ona moris neʼebé simples no sadere ba Jeová. Sira hanoin: ‘Ami-nia hela-fatin simples, ró neʼe boot metru 7,9 deʼit, ami serbisu tempu balu deʼit no ami tuir kongregasaun neʼebé koʼalia língua seluk, no dala ruma ami serbí nuʼudar pioneiru estra.’ Maibé liutiha tempu balu, sira rekoñese katak sira bosok deʼit sira-nia an. Irmaun Dustin hatete: “Duké apoia ami-nia kongregasaun, ami gasta tempu barak liu atu hadiʼa deʼit ami-nia ró. Ami hatene katak se ami hakarak duni tau Jeová ulukliu iha ami-nia moris, ami presiza halo mudansa.”

Irmán Jassa hatutan tan: “Antes haʼu kaben, haʼu hela iha rai-Méxiku no tuir kongregasaun neʼebé koʼalia lia-inglés. Haʼu kontente serbí iha neʼebá no haʼu hakarak tebes atu bá fali.” Atu hametin sira-nia hakarak atu serbí iha rai seluk, iha sira-nia Adorasaun Família nian, irmaun Dustin no irmán Jassa komesa lee esperiénsia husi ita-nia irmaun no irmán sira neʼebé muda ba rai seluk hodi hola parte iha serbisu koʼa nian. (Joao 4:35) Irmaun Dustin hatete: “Ami mós hakarak atu sai kontente hanesan sira.” Kuandu kolega balu husi rai-Méxiku fó-hatene ba sira katak grupu foun iha neʼebá presiza ajuda, irmaun Dustin no irmán Jassa foti desizaun neʼebé metin. Sira husik sira-nia serbisu, faʼan sira-nia ró, no muda ba rai-Méxiku.

“BUAT DIʼAK TEBES NEʼEBÉ AKONTESE BA AMI”

Irmaun Dustin no irmán Jassa muda ba vila ida naran Tecomán. Besik nafatin Oseanu Pasífiku, maibé dook maizumenus kilómetru 4.345 husi vila Astoria nia parte súl. Irmaun Dustin hatete: “Iha fatin neʼe, ami la sente anin malirin no la haree foho sira neʼebé furak. Iha neʼe manas tebes no ami haree deʼit derok-hun barak toʼo la iha rohan.” Foufoun, sira la bele hetan serbisu. Tanba sira-nia osan sai menus, sira han deʼit etu no koto loroloron. Irmán Jassa hatete: “Maibé, kuandu ami la bele tahan ona ho ai-han neʼe, ami-nia estudante Bíblia sira komesa fó mai ami ai-nanás, haas, hudi, ai-dila, no derok barak.” Ikusmai, kaben-naʼin neʼe hetan serbisu liuhusi internét, husi eskola ida iha rai-Taiwán neʼebé hanorin língua. Osan neʼebé sira manán husi serbisu neʼe natoon ba sira-nia presiza loroloron nian.

Irmaun Dustin no irmán Jassa sente oinsá kona-ba sira-nia moris foun? Sira hatete: “Mudansa neʼe mak buat diʼak tebes neʼebé akontese ba ami. Ami-nia relasaun ba malu no ba Jeová sai metin liután. Loroloron ami halo buat barak hamutuk hanesan haklaken hamutuk, koʼalia ba malu kona-ba oinsá mak ami bele ajuda ami-nia estudante Bíblia sira, no prepara ba reuniaun sira. No mós, ami la sente tan laran-taridu hanesan uluk.” Sira hatutan tan: “Agora ami komprende ho didiʼak liután buat neʼebé Maromak promete iha Salmo 34:8, neʼebé dehan: ‘Koko no haree katak Jeová mak diʼak.’”

SAIDA MAK BOOK EMA RIHUN BA RIHUN ATU FÓ SIRA-NIA AN?

Irmaun no irmán naʼin-2.900 liu, kaben no klosan ho tinan 20 toʼo 30, muda ba rai-Méxiku atu serbí iha kongregasaun sira neʼebé presiza haklaken-naʼin barak liután. Tanbasá mak irmaun-irmán sira-neʼe prontu atu fó sira-nia an atu halo serbisu neʼe? Kuandu ami husu pergunta neʼe ba sira, husi sira barak nia resposta iha razaun tolu neʼebé hanesan. Saida mak razaun sira-neʼe?

Atu hatudu domin ba Jeová no ema seluk. Irmán Leticia hetan batizmu kuandu nia tinan 18. Nia hatete: “Kuandu haʼu dedika haʼu-nia an ba Jeová, haʼu komprende ida-neʼe katak haʼu sei serbí nia ho haʼu-nia laran no moris tomak. Entaun, atu hatudu katak haʼu hadomi duni Jeová ho haʼu-nia laran tomak, haʼu hakarak uza haʼu-nia tempu no forsa iha ninia serbisu.” (Mc 12:30) Irmaun Hermilo neʼebé agora kaben ho irmán Leticia, nia maizumenus tinan 20 deʼit kuandu nia muda atu serbí iha fatin neʼebé presiza haklaken-naʼin barak liután. Nia hatete: “Haʼu rekoñese katak hodi ajuda ema atu hatene lia-loos kona-ba Maromak mak dalan diʼak liu atu hatudu haʼu-nia domin ba ema seluk.” (Mc 12:31) Entaun, nia husik ninia serbisu iha banku no ninia moris diʼak iha sidade neʼebé riku naran Monterrey, no muda fali ba vila neʼebé kiʼik.

Atu hetan haksolok neʼebé loos. Lakleur depois irmán Leticia hetan batizmu, nia hamaluk irmán pioneiru ida atu haklaken iha fatin neʼebé dook husi sidade ba fulan ida nia laran. Irmán Leticia hanoin fila fali: “Haʼu kontente tebes. Hodi haree oinsá ema simu mensajen kona-ba Maromak nia Ukun neʼebé ami fahe ba sira, neʼe fó ksolok loos mai haʼu. Kuandu fulan neʼe ramata, haʼu dehan ba haʼu-nia an: ‘Ida-neʼe mak buat neʼebé haʼu hakarak halo iha haʼu-nia moris!’” Irmán klosan naran Essly, neʼebé agora maizumenus tinan 20 mós sente hanesan neʼe. Buat neʼebé book nia atu hakarak halo serbisu neʼe mak hodi haree oinsá irmaun-irmán sira kontente halaʼo serbisu neʼe. Kuandu nia sei eskola sekundária, nia hasoru irmaun no irmán sira neʼebé badinas haklaken iha fatin sira neʼebé presiza haklaken-naʼin barak liután. Irmán Essly hatete: “Hodi haree irmaun-irmán sira-neʼe sempre kontente, neʼe halo haʼu mós hakarak atu moris hanesan sira.” Irmán barak seluk mós sente hanesan ho irmán Essly. Tuir loloos, irmán klosan naʼin-680 liu serbí iha fatin neʼebé presiza haklaken-naʼin barak liután iha rai-Méxiku. Sira fó ezemplu diʼak duni ba ita hotu!

Atu halaʼo moris neʼebé kontente no iha folin. Kuandu irmán Essly ramata eskola sekundária, nia hetan bolsa-estudu atu bá universidade. Ninia kolega sira hakarak obriga nia atu simu ida-neʼe no atu buka moris baibain hanesan ema seluk halo, katak hetan eskola boot, karreta, no iha tempu atu halo viajen. Maski nuneʼe, irmán Essly la halo tuir konsellu neʼe. Nia hatete: “Haʼu-nia kolega kristaun balu halo duni ida-neʼe, no haʼu haree katak sira la hafolin ona adorasaun ba Maromak nuʼudar buat neʼebé importante liu. Haʼu mós haree katak nuʼudar sira envolve an liután iha buat mundu neʼe nian, sira-nia problema mós aumenta liután. Haʼu hakarak uza haʼu-nia tempu joven atu serbí Jeová ho laran tomak.”

Irmán Essly foti kursu balu neʼebé ajuda nia hetan serbisu atu manán osan neʼebé bele apoia nia iha ninia serbisu pioneiru, no depois neʼe nia muda iha fatin neʼebé presiza duni haklaken-naʼin barak liután. Nia mós aprende língua neʼebé susar tebes, língua neʼebé ema Otomi no Tlapaneco koʼalia. Agora, hodi hanoin fila fali kona-ba tinan tolu neʼebé nia uza atu serbí iha fatin neʼebé dook husi sidade, nia hatete: “Serbí iha fatin neʼebé presiza haklaken-naʼin barak liután fó kontente mai haʼu no halo haʼu sente katak haʼu-nia moris iha folin duni. Liután neʼe, ida-neʼe hametin liután haʼu-nia relasaun ho Jeová.” Irmaun Phillip no irmán Racquel, kaben-naʼin ida neʼebé maizumenus tinan 30 husi rai-Estadu Unidus mós sente hanesan neʼe. Sira hatete: “Tanba mundu neʼe troka beibeik, ema barak sente la hakmatek tanba la hatene sira-nia moris sei sai oinsá. Maibé hodi serbí iha fatin sira neʼebé ema barak simu mensajen husi Bíblia, neʼe halo ami sente katak ami-nia moris iha folin duni. Ami kontente tebes!”

SIRA TAHAN SUSAR OIOIN

Klaru katak serbí iha fatin neʼebé presiza haklaken-naʼin barak liután mós iha susar oioin. Susar ida mak oinsá ita bele hetan osan ba ita-nia presiza. Atu halo nuneʼe, ita presiza prontu atu simu situasaun iha fatin neʼebé ita serbí. Irmán pioneiru ida neʼebé iha esperiénsia barak ona naran Verónica hatete: “Iha fatin ida neʼebé haʼu serbí, haʼu teʼin ai-han no faʼan ho folin baratu deʼit. Iha fatin seluk, haʼu faʼan roupa no tesi fuuk. Agora daudauk, haʼu-nia serbisu mak atu hamoos uma no fó kursu ba inan-aman sira kona-ba oinsá atu koʼalia hamutuk ho sira-nia oan.”

Susar ida seluk mak kuandu ita hela iha rai neʼebé ema nia kostume la hanesan ho Ita-nian. Irmaun Phillip no irmán Racquel hasoru susar hanesan neʼe kuandu sira serbí iha fatin neʼebé koʼalia língua Nahuatl. Irmaun Phillip hatete: “Sira-nia kostume la hanesan duni ho ami-nian.” Saida mak ajuda sira? Irmán Racquel hatete: “Ami haree deʼit ba buat diʼak neʼebé sira halo. Porezemplu, família sira iha relasaun neʼebé besik ba malu, sira hatudu laran-diʼak ba malu, no sira laran-luak. Hodi hela iha fatin neʼe no hodi serbisu hamutuk ho ami-nia maluk kristaun sira, ami aprende duni buat barak.”

PREPARA ITA-NIA AN

Se Ita hakarak atu serbí iha fatin neʼebé dook husi sidade neʼebé presiza ajuda, saida mak Ita bele halo atu prepara Ita-nia an? Irmaun no irmán sira neʼebé iha esperiénsia ona kona-ba neʼe hatete: Antes Ita muda, ulukliu Ita presiza halo Ita-nia moris simples liu no aprende atu sai kontente ho buat neʼebé Ita iha ona. (Flp 4:11, 12) Saida tan mak Ita bele halo? Irmán Leticia hatete: “Haʼu lakohi simu serbisu neʼebé halo haʼu hela metin iha fatin ida deʼit. Haʼu hakarak serbisu neʼebé husik haʼu atu muda iha tempu naran deʼit no iha fatin neʼebé deʼit.” Irmaun Hermilo hatete: “Haʼu aprende atu teʼin, fase no estrika roupa.” Irmán Verónica hatete: “Kuandu haʼu sei hela iha uma ho inan-aman no maun-alin sira, haʼu ajuda atu hamoos uma no haʼu aprende atu prepara hahán simples neʼebé ladún karun. Haʼu mós aprende atu rai didiʼak osan.”

Irmaun Levi no irmán Amelia husi rai-Estadus Unidus no kaben ona ba tinan ualu fó-hatene oinsá mak orasaun ajuda sira atu prepara sira-nia an hodi muda atu serbí iha rai-Méxiku. Irmaun Levi hatete: “Ami sura osan hira mak ami presiza atu serbí iha rai seluk ba tinan ida no husu Jeová iha orasaun atu ajuda ami hetan osan neʼe.” Liutiha fulan balu deʼit, sira konsege rai osan neʼebé sira temi iha sira-nia orasaun, no sira muda duni. Irmaun Levi hatutan tan: “Jeová hatán ona ba ami-nia orasaun, entaun agora ami mós tenke kumpre ami-nia liafuan.” Irmán Amelia hatete: “Foufoun, ami hanoin ami bele serbí iha rai neʼe ba tinan ida deʼit, maibé ami serbí iha fatin neʼe ba tinan hitu tiha ona, no ami la hanoin atu sai! Hodi hela iha fatin neʼe, ami haree ho matan rasik oinsá Jeová ajuda ami. Loron-loron, ami haree buat diʼak barak neʼebé hatudu ninia laran-diʼak.”

Irmaun Adam no irmán Jennifer, kaben-naʼin husi rai-Estadus Unidus neʼebé serbí iha kongregasaun neʼebé koʼalia lia-inglés iha rai-Méxiku, mós dehan katak orasaun mak importante duni. Sira dehan: “Lalika hein situasaun neʼebé diʼak liu. Haburas Ita-nia hakarak atu serbí iha rai seluk hodi halo orasaun, no tuirmai kumpre Ita-nia liafuan. Halo Ita-nia moris simples liu, hakerek karta ba sukursál neʼebé tau matan ba fatin neʼebé Ita hakarak atu serbí, no se Ita hanoin katak Ita iha duni osan neʼebé toʼo ba Ita-nia presiza, muda ba fatin neʼe!”a Se Ita halo nuneʼe, Ita sei kontente no sei hetan duni bensaun barak.