Resposta ba pergunta sira kona-ba Bíblia
Ita bele hetan perdua ba ita-nia sala ka lae?
Ita bele sente katak Maromak sei simu ita
Bíblia hatete katak ema hotu sala-naʼin. Ita simu sala husi mane primeiru, Adão. Tan neʼe mak dala ruma ita halo buat neʼebé la diʼak, no depois neʼe sente triste. Maromak nia Oan, Jesus Kristu, mate ba ita hodi kasu ita-nia sala. Tanba Jesus fó ninia moris nuʼudar sakrifísiu, ita bele hetan perdua. Ida-neʼe mak prezente husi Maromak.—Lee Roma 3:23, 24
Ema balu halo sala neʼebé boot no sira duvida se Maromak bele fó perdua ka lae. Ita bele sente kmaan tanba Bíblia hatete katak Maromak ‘sei kasu ita-nia sala no hamoos ita-nia hahalok aat hotu’. (1 Joao 1:9) Maromak Jeová hakarak atu fó perdua ba ita-nia sala neʼebé boot, maibé ita tenke hatudu hahalok neʼebé loos.—Lee Ebreu 8:12.
Atu hetan perdua, ita tenke halo saida?
Se ita hakarak Maromak Jeová atu fó perdua mai ita, ita tenke aprende kona-ba nia. Ita tenke halo tuir ninia dalan, hanorin no ninia hakarak hotu. (Joao 17:3) Maromak Jeová neʼebé laran-luak, fó perdua ba ema neʼebé arrepende an no troka sira-nia hahalok.—Lee Apostolu 3:19.
Ita bele sente katak Maromak sei simu duni ita. Maromak Jeová hatene ita ema mak fraku deʼit. Nia laran-diʼak no hatudu laran-sadiʼa. Tanba Maromak hatudu domin boot mai ita, neʼe book ita atu aprende liután oinsá mak ita bele halo nia kontente, loos ka lae?—Lee Salmo (Mazmur) 103:13, 14.