Pergunta husi lee-naʼin

Joven ida neʼebé kongregasaun hasai ona bele tuur hamutuk ho ninia inan-aman durante reuniaun ka lae?

Ita la presiza hanoin demais kona-ba tuur-fatin ba ema neʼebé kongregasaun hasai ona. Husi tempu uluk, livru Menara Pengawal fó laran-manas ba inan-aman kristaun atu ajuda sira-nia oan neʼebé kongregasaun hasai ona no hela hamutuk iha uma ida deʼit, hodi nia bele hetan fali relasaun diʼak ho Jeová. Porezemplu, livru Menara Pengawal, 1 Outubru 2001, iha pájina 16 toʼo 18 hatete katak inan-aman bele estuda Bíblia ho sira-nia oan joven neʼebé kongregasaun hasai, neʼebé sei hela hamutuk, tanba hodi halo nuneʼe inan-aman bele ajuda nia atu hadiʼa ninia hahalok.

Kona-ba tuur-fatin iha reuniaun, la sala ba joven neʼebé kongregasaun hasai ona atu tuur hamutuk ho ninia inan-aman. Tanba ita la iha lei katak ema neʼebé kongregasaun hasai ona tenkesér tuur iha kotuk iha Reuniaun-Fatin, joven neʼebé kongregasaun hasai ona bele tuur iha fatin neʼebé deʼit hamutuk ho ninia inan-aman. Se inan-aman hakarak ajuda sira-nia oan atu hametin ninia relasaun ho Jeová, sira sei hakarak ajuda sira-nia oan atu rona didiʼak durante reuniaun. Nuneʼe, karik diʼak liu inan-aman atu tuur hamutuk ho sira-nia oan joven duké husik nia tuur ketak.

Maibé, oinsá ho joven ida neʼebé kongregasaun hasai no la hela iha inan-aman nia uma? Nia bele tuur hamutuk ho inan-aman durante reuniaun ka lae? Ita-nia livru sira fó sai matadalan kona-ba ema kristaun nia haree kona-ba ransu ho família neʼebé kongregasaun hasai, neʼebé hela ketak.a Maibé, tuur hamutuk durante reuniaun ho ema neʼebé kongregasaun hasai mak la hanesan duni ho buka atu ransu ho nia. Se família neʼebé iha lia-loos iha hanoin neʼebé loos ba ema neʼebé kongregasaun hasai ona no sira hakaʼas an atu halo tuir Bíblia nia matadalan kona-ba neʼe, ita la iha razaun atu hanoin barak kona-ba tuur-fatin.—1 Kor 5:11, 13; 2 Joao 11.

Maski ema neʼebé kongregasaun hasai mak tuur hamutuk ho ninia família ka ema seluk iha kongregasaun, ita lalika hanoin barak, naran nia hatudu hahalok neʼebé diʼak. Se kongregasaun mak halo lei ruma kona-ba neʼe, ida-neʼe bele hamosu problema. Ita hotu iha kongregasaun laran presiza hakaʼas an atu halo tuir Bíblia nia matadalan kona-ba dixiplina neʼe, no ita mós lakohi halo ita-nia irmaun-irmán sira sidi. Se ita hotu halo tuir konsellu neʼe, ita la presiza hanoin demais kona-ba tuur-fatin ba ema neʼebé kongregasaun hasai ona.b