Aprende husi ema levita nia orasaun
“Sira sei hahiʼi Ita-nia naran neʼebé furak.”—NEEMIAS 9:5.
1. Ita sei aprende kona-ba loron espesiál saida? Pergunta saida deʼit mak ita sei koʼalia?
“HAMRIIK, hahiʼi Jeová, imi-nia Maromak husi tempu neʼebé la bele sura toʼo ba nafatin.” Ho liafuan sira-neʼe, ema levita sira konvida Maromak nia povu atu halibur hamutuk hodi halo orasaun ba Jeová. (Neemias 9:4, 5) Sira halibur hamutuk iha Jerusalém iha tinan 455 molok Kristu, iha loron 24 husi fulan hitu naran Tisri. Nuʼudar ita aprende kona-ba loron neʼe neʼebé ema Israel sira halibur hamutuk, mai ita hanoin kona-ba pergunta sira tuirmai: Saida mak ema levita sira halo beibeik atu loron neʼe bele laʼo ho diʼak? Husi ema levita sira-nia orasaun, ita bele aprende saida? Ulukliu, mai ita koʼalia kona-ba buat balu neʼebé akontese antes loron espesiál neʼe.—Salmo (Mazmur) 141:2.
FULAN ESPESIÁL
2. Tanbasá mak ema Israel hatudu ezemplu diʼak mai ita ohin loron?
2 Fulan ida antes ema Israel halibur hamutuk atu halo orasaun neʼe, sira foin ramata hadiʼa Jerusalém nia moru. (Neemias 6:15) Sira halo hotu serbisu neʼe iha loron 52 deʼit. Depois, iha loron primeiru iha fulan tuirmai, fulan-Tisri, sira halibur hamutuk iha fatin públiku atu rona Esdras no ema levita sira lee no esplika Maromak nia Ukun-Fuan. Família sira hamutuk ho labarik sira hamriik hodi rona husi dadeer toʼo loraik. Ema Israel sira-neʼe hatudu ezemplu diʼak mai ita ohin loron. Maski ita bele halibur hamutuk iha Reuniaun-Fatin neʼebé kapás, maibé dala ruma ita mós komesa atu hanoin kona-ba buat seluk durante reuniaun. Maibé ema Israel sira-neʼe hanoin didiʼak kona-ba buat neʼebé sira rona no sira mós tanis bainhira sira hatene katak sira la halo tuir Maromak nia Ukun-Fuan.—Neemias 8:1-9.
3. Ema Israel sira halo tuir liafuan saida?
3 Maibé neʼe laʼós tempu atu fó sai sala sira. Neʼe mak loron festa ba Maromak Jeová no nia hakarak ninia povu atu haksolok iha loron neʼe. (Números [Bilangan] 29:1) Tan neʼe, Neemias hatete ba sira: “Bá, no han ba buat neʼebé bokur no hemu ba buat neʼebé midar, no haruka hahán ba ema neʼebé hahán la iha; tanba loron neʼe mak santu ba ita-nia Naʼi, no keta sente laran-moras, tan Maromak Jeová nia ksolok mak ita-nia abrigu.” Povu sira halo tuir, no “sira haksolok tebetebes” iha loron neʼe.—Neemias 8:10-12.
4. Família nia ulun sira halo saida? Iha loron ida-idak durante selebrasaun neʼe, ema levita sira halo saida?
4 Iha loron tuirmai, família ida-idak nia ulun halibur hamutuk atu estuda Maromak nia Ukun-Fuan hodi hatene se sira halo tuir Maromak nia lei hotu ho didiʼak ka lae. Bainhira sira estuda Ukun-Fuan, sira haree katak loloos sira presiza halaʼo Selebrasaun Tenda nian. Selebrasaun neʼe tenke komesa iha loron 15 husi fulan neʼe no ramata iha loron 22 hodi halibur hamutuk. Tan neʼe, povu sira komesa kedas atu prepara ba festa neʼe. Husi tempu Josué nian, selebrasaun neʼe mak ida neʼebé diʼak liu hotu no sira “haksolok tebetebes”. Iha loron ida-idak durante selebrasaun neʼe, ema levita sira lee Maromak nia Ukun-Fuan ba povu.—Neemias 8:13-18.
LORON ATU FÓ SAI SALA SIRA
5. Antes ema levita sira komesa halo orasaun, Maromak nia povu halo saida?
5 Loron rua depois selebrasaun neʼe hotu tiha, iha loron 24, fulan-Tisri, mak tempu ba povu sira atu fó sai sira-nia sala. Loron neʼe laʼós tempu atu han no haksolok hamutuk. Tanbasá? Tanba Maromak nia povu halo jejún no hatais karón atu hatudu katak sira arrepende an kona-ba la halo tuir Maromak nia Ukun-Fuan. Dala ida tan, ema levita sira lee Maromak nia Ukun-Fuan ba povu sira iha dadeer ba oras tolu. Iha loraik, povu sira “fó sai sira-nia sala no hakruʼuk ba Maromak Jeová”. Iha tempu neʼe mak ema levita sira komesa atu halo orasaun ba povu. —Neemias 9:1-4.
6. Saida mak ajuda ema levita sira atu hatoʼo orasaun neʼebé iha folin? Saida mak ita bele aprende husi sira?
6 Ema levita sira iha toman atu lee Maromak nia Ukun-Fuan beibeik, no ida-neʼe ajuda sira atu prepara orasaun neʼe. Iha parte primeiru husi orasaun neʼe, sira koʼalia kona-ba buat neʼebé Jeová halo, no mós ninia hahalok sira. Iha parte ikus, sira koʼalia kona-ba povu nia sala barak no tanbasá povu Israel la merese atu simu Maromak nia “laran-sadiʼa neʼebé boot”. (Neemias 9:19, 27, 28, 31) Saida mak ita bele aprende husi ema levita sira? Ita tenke lee no hanoin kleʼan kona-ba Maromak nia Liafuan loroloron tanba liuhusi dalan neʼe mak Jeová koʼalia mai ita. No kuandu ita halo orasaun, ita sei iha buat barak tan atu koʼalia ba Maromak Jeová no ita-nia orasaun sei iha folin liután.—Salmo (Mazmur) 1:1, 2.
7. Saida mak ema levita sira husu ba Maromak? Saida mak ita bele aprende husi sira-nia ezemplu?
7 Kuandu ema levita sira atu ramata sira-nia orasaun, sira husu buat ida deʼit. Sira husu: “No agora, oh ami-nia Maromak, Maromak neʼebé boot, kbiit-naʼin, neʼebé halo ema taʼuk, neʼebé halo tuir Ita-nia promete, neʼebé hatudu laran-diʼak nakonu ho domin, la bele husik susar neʼebé ami hetan haree nuʼudar buat neʼebé kiʼik iha Ita-nia oin, no ami-nia liurai sira, ami-nia ema-boot sira, ami-nia amlulik sira, ami-nia profeta sira no ami-nia beiʼala sira no Ita-nia povu hotu husi Asíria nia liurai sira-nia tempu toʼo ohin loron, la bele husik sira-neʼe haree nuʼudar buat neʼebé kiʼik iha Ita-nia oin.” (Neemias 9:32) Ema levita sira hatudu ezemplu diʼak ba ita ohin loron. Kuandu ita halo orasaun, ita presiza fó hahiʼi no hatoʼo agradese ba Jeová antes ita husu buat ruma ba nia.
SIRA HAHIʼI MAROMAK NIA NARAN NEʼEBÉ FURAK
8, 9. (a) Oinsá mak ema levita sira komesa sira-nia orasaun ho haraik-an? (b) Ema levita sira koʼalia kona-ba tropa rua saida?
8 Ema levita sira hatudu haraik-an. Maski sira hatoʼo orasaun neʼebé furak, maibé sira sente katak sira-nia liafuan la toʼo atu fó ba Jeová glória neʼebé nia merese atu simu. Tan neʼe, sira komesa atu halo orasaun kona-ba povu Israel hotu hodi hatete: “Sira sei hahiʼi Ita-nia naran neʼebé furak, neʼebé aas liu hahiʼi hotu.”—Neemias 9:5.
9 Sira hatutan tan hodi dehan: “Ita mesak deʼit mak Jeová; Ita mak halo lalehan, no buat neʼebé aas liu lalehan, no lalehan nia tropa sira, mundu no buat hotu neʼebé iha nia laran, tasi no buat hotu neʼebé iha nia laran; no Ita proteje nafatin sira-nia moris; no tropa lalehan nian hakruʼuk ba Ita.” (Neemias 9:6) Ho liafuan sira-neʼe, ema levita sira temi buat furak neʼebé Jeová kria. Nia kria lalehan no lalehan nia “tropa sira”, katak fitun rihun ba rihun. Nia mós kria buat hotu iha ita-nia rai neʼebé kapás no halo buat hotu neʼe moris nafatin. Sira mós temi kona-ba tropa seluk, “tropa lalehan nian”, neʼe mak Jeová nia anju sira. (1 Reis [Raja-Raja] 22:19; Jó [Ayub] 38:4, 7) Anju sira neʼe hatudu haraik-an hodi halo tuir Maromak nia hakarak no serbí ema sala-naʼin iha rai. (Ebreu 1:14) Ohin loron, ita mós serbí Jeová ho unidade hanesan tropa ida. Ita tenke banati-tuir anju sira hodi serbí Jeová ho haraik-an.—1 Korinto 14:33, 40.
10. Saida mak ita aprende husi buat neʼebé Jeová halo ba Abraão?
10 Depois neʼe, ema levita sira koʼalia kona-ba buat neʼebé Maromak halo ba Abrão. Jeová troka ninia naran ba Abraão neʼebé iha arti katak “lubun-boot nia aman”, maski nia tinan 99 ona no la iha oan. (Gênesis [Kejadian] 17:1-6, 15, 16) Maromak mós promete ba Abraão katak ninia bei-oan sira sei hela iha rai Kanaan. Ema levita sira temi kona-ba oinsá Jeová halo tuir ninia promete hodi dehan: “Ita mak Jeová, Maromak neʼebé loos, ida neʼebé hili Abrão no lori nia sai husi ema Kaldeia nia rai Ur no fó ba nia naran Abraão. No Ita haree katak nia laran-metin ba Ita; no Ita halo aliansa ho nia atu fó ba nia ema Kanaan nia rai, . . . atu fó ba ninia bei-oan sira; no Ita kumpre Ita-nia liafuan tanba Ita hatudu justisa.” (Neemias 9:7, 8) Dala ruma ita ema haluha buat neʼebé ita promete. Maibé ita bele banati-tuir ita-nia Maromak hodi hakaʼas an atu halo tuir ita-nia promesa sira.—Mateus 5:37.
BUAT FURAK NEʼEBÉ JEOVÁ HALO BA NINIA POVU
11, 12. Esplika toʼok Jeová nia naran iha arti saida? Saida mak Jeová halo ba ninia povu neʼebé hatudu katak nia iha direitu atu iha naran neʼe?
11 Jeová nia naran iha arti katak “Nia sei sai saida deʼit neʼebé nia hakarak”. Neʼe katak Jeová serbisu nafatin hodi buat neʼebé nia promete bele sai loos. Ezemplu ida kona-ba neʼe mak kuandu nia halo tuir ninia promete ba Abraão nia bei-oan sira, neʼebé sai nasaun Israel. Kuandu sira sei atan iha rai-Egiptu, Maromak promete katak sira sei sai livre no hela iha rai neʼebé nia promete. Maski tuir ema nia haree ida-neʼe la bele duni, maibé Jeová nafatin halo buat neʼebé nia presiza atu ninia promesa sai loos. Liuhusi neʼe, Maromak hatudu katak nia iha direitu atu iha naran furak Jeová.
12 Ema levita sira temi kona-ba buat balu neʼebé Jeová halo ba ninia povu: “Ita haree oinsá ami-nia beiʼala sira hetan terus iha rai-Egiptu, no Ita rona sira-nia halerik iha Tasi Mean. Depois, Ita fó sinál no milagre hasoru Faraun no ninia atan sira hotu no ema hotu iha ninia rai, tanba Ita hatene katak sira hatudu foti-an hasoru sira; no Ita halo Ita-nia naran boot hanesan mós iha ohin loron. No Ita hafahe tasi hodi sira bele hakur tasi iha rai maran; no sira neʼebé duni sira, Ita soe sira hanesan fatuk ba tasi boot laran.” Ema levita sira hatutan tan hodi koʼalia kona-ba oinsá Jeová ajuda ninia povu atu manán rai neʼebé nia promete: “No Ita manán ema neʼebé hela iha rai-Kanaan.” Depois, sira hatete katak Maromak nia povu “hadau sidade sira neʼebé seguru no rai-bokur no foti uma sira neʼebé nakonu ho sasán diʼak, bee-posu sira, toʼos-uvas no ai-oliveira sira no ai-hun sira neʼebé fó fuan barak, no sira komesa han toʼo bosu no sai bokur” no sira moris haksolok ho buat neʼebé Maromak fó ba sira.—Neemias 9:9-11, 24, 25.
13. Depois ema Israel sai husi rai-Egiptu, saida mak Jeová halo ba sira? Maibé saida mak povu Israel la halo?
13 Jeová mós halo buat barak tan atu halo tuir ninia promete sira. Porezemplu, lakleur depois ema Israel sai husi rai-Egiptu, Jeová fó ba sira ukun-fuan no hanorin sira adorasaun neʼebé loos. Ema levita sira hatete iha sira-nia orasaun: “Ita tun ba Foho Sinai no koʼalia ba sira husi lalehan no fó ba sira Ita-nia tesi-lia neʼebé loos no ukun-fuan lia-loos nian, konsellu neʼebé diʼak no lei sira.” (Neemias 9:13) Jeová hili ema Israel nuʼudar ninia povu no nia hakarak fó ba sira rai neʼebé nia promete. Tan neʼe nia hanorin sira atu iha hahalok neʼebé hatudu katak sira bele lori ninia naran. Maibé lakleur, sira la halo tuir ona Jeová nia ukun-fuan sira.—Lee Neemias 9:17.a
EMA ISRAEL PRESIZA DIXIPLINA
14, 15. (a) Oinsá mak Jeová hatudu laran-sadiʼa ba ema Israel? (b) Saida mak ita aprende husi dalan neʼebé Jeová tau matan ba ninia povu?
14 Ema levita nia orasaun koʼalia kona-ba sala rua neʼebé ema Israel halo depois sira promete ona atu halo tuir Maromak nia Ukun-Fuan iha foho Sinai. Tanba sira halo sala sira-neʼe, loloos sira merese atu mate iha rai-fuik maran. Maibé Jeová hatudu laran-sadiʼa ba sira no nia nafatin tau matan ba sira. Iha sira-nia orasaun sira hahiʼi Jeová hodi hatete: “Ba tinan 40 Ita fó hahán ba sira iha rai-fuik maran. Sira la kuran buat ida. Sira-nia roupa la sai bosan, no sira-nia ain la sai moras.” (Neemias 9:19, 21) Ohin loron, Jeová mós tau matan ba ita-nia presiza sira hodi ita bele serbí nia ho laran-metin. Ita lakohi atu sai hanesan ema Israel rihun ba rihun neʼebé mate iha rai-fuik maran tanba sira lakon sira-nia fiar ba Jeová no la halo tuir nia. Sira-nia ezemplu aat neʼe fó avizu mai ita.—1 Korinto 10:1-11.
15 Triste tebes katak ema Israel sira neʼebé tama ba rai neʼebé Maromak promete la hatudu laran-metin ba Jeová. Sira komesa atu halaʼo adorasaun ba maromak Kanaan nian neʼebé envolve halo sala-foʼer no hasaʼe sira-nia oan nuʼudar sakrifísiu. Tan neʼe, Jeová husik ema Israel nia inimigu atu trata aat sira. Maibé kuandu sira arrepende an, Jeová fó perdua ba sira no ajuda sira atu manán hasoru inimigu sira-neʼe. Ida-neʼe akontese beibeik. (Lee Neemias 9:28, 31.b) Ema levita sira hatete: “Durante tinan barak Ita hatudu pasiénsia ba sira no fó sasin ba sira hodi Ita-nia espíritu liuhusi profeta sira, maibé sira la see tilun. Ikusmai Ita entrega sira ba povu husi rai seluk nia liman.”—Neemias 9:30.
16, 17. (a) Saida mak rezultadu kuandu ema Israel komesa fali atu kontra Jeová? (b) Ema Israel fó sai sira-nia sala saida? Sira promete atu halo saida?
16 Kuandu ema Israel sai livre husi dadur iha Babilónia, sira komesa atu kontra fali Jeová. Ida-neʼe lori rezultadu saida? Ema levita sira hatete iha sira-nia orasaun: “Haree! Ohin ami mak atan, no kona-ba rai neʼebé Ita fó ba ami-nia beiʼala sira atu han ninia ai-han no buat diʼak, haree! ami mak atan iha rai neʼe, no rai neʼe fó hahán barak ba liurai sira neʼebé Ita foti atu ukun ami tanba ami-nia sala sira, no . . . ami iha susar tebes nia laran.” Sin, ema Israel sai atan iha rai neʼebé Maromak fó ba sira.—Neemias 9:36, 37.
17 Ho liafuan sira-neʼe, ema Israel dehan katak Maromak la hatudu justisa ba ninia povu ka lae? Lae duni. Sira hatete: “Ita mak loos kona-ba buat hotu neʼebé ami hasoru, Ita laran-metin maski ami mak halo hahalok aat.” (Neemias 9:33) Sira ramata sira-nia orasaun hodi promete ho laran katak sira sei halo tuir Maromak nia Ukun-Fuan. (Lee Neemias 9:38;c 10:29) Sira hakerek sira-nia juramentu iha dokumentu ida no ulun-naʼin judeu naʼin-84 mak asina.—Neemias 10:1-27.
18, 19. (a) Ita presiza saida atu tama ba mundu foun? (b) Ita presiza halo orasaun nafatin kona-ba saida? Tanbasá?
18 Se ita hakarak atu sai ema neʼebé Jeová simu iha mundu foun, ita presiza Jeová atu dixiplina ita. Apóstolu Paulo husu: “Oan ida neʼebé mak nia aman la hanorin ho dixiplina?” (Ebreu 12:7) Se ita simu dixiplina husi Jeová no serbí nia nafatin ho laran-metin, ita hatudu katak ita husik nia atu fó treinu ba ita. No se ita halo sala neʼebé boot, ita hatene katak Jeová sei fó perdua ba ita se ita arrepende an ho laran no simu ninia dixiplina ho haraik-an.
19 Lakleur tan, Maromak Jeová sei halo buat barak neʼebé furak liu fali tempu neʼebé nia salva ema Israel husi rai-Egiptu. Iha tempu neʼe, ema hotu sei hatene katak Maromak Jeová mak Maromak neʼebé boot liu. (Ezequiel [Yehezkiel] 38:23) Kuandu Maromak halo santu ninia naran, ema hotu neʼebé laran-metin ba nia sei tama duni mundu foun, hanesan ema Israel sira tama duni ba rai neʼebé Maromak promete ba sira. (2 Pedro 3:13) Nuneʼe, mai ita halo orasaun nafatin atu Maromak nia naran neʼebé furak bele sai santu.Lisaun tuirmai sei koʼalia kona-ba orasaun ida tan neʼebé bele ajuda ita atu hetan Maromak nia bensaun agora no ba nafatin.
a Neemias 9:17: “Sira lakohi rona, no sira haluha milagre kmanek sira neʼebé Ita hatudu ba sira, maibé sira ulun-toos no sira hili ulun-naʼin atu lori sira ba Egiptu atu sai atan fali. Maibé Ita mak Maromak neʼebé fó perdua, laran-sadiʼa, la hirus lalais, no iha laran-diʼak neʼebé nakonu ho domin, no Ita la husik sira.”
b Neemias 9:28, 31: “28 Maibé kuandu sira sente seguru, sira halo fali buat neʼebé aat ba Ita, no Ita husik sira ba inimigu nia liman neʼebé haterus sira. Depois, sira fila fali no bolu Ita atu ajuda sira, no Ita rona sira husi lalehan, no Ita salva sira fila-fila tanba Ita hatudu laran-sadiʼa neʼebé boot. 31 No tanba Ita hatudu laran-sadiʼa neʼebé boot, Ita la halakon sira ka husik sira; tanba Ita mak Maromak neʼebé laran-sadiʼa.”
c Neemias 9:38: “Tanba ida-neʼe, ami halo daudaun juramentu neʼebé metin, neʼebé hakerek ona, no ami-nia ema-boot sira, ami-nia levita sira no amlulik sira fó sasin hodi tau karimbu.”