Halo tuir Jeová nia bibi-atan sira
“Rona imi-nia naʼi-ulun sira no halo tuir buat neʼebé sira dehan ba imi, basá . . . sira tau matan ba imi.”—EBREU 13:17.
1, 2. Tanbasá mak Jeová kompara nia an hanesan bibi-atan?
JEOVÁ kompara nia an hanesan bibi-atan. (Ezequiel [Yehezkiel] 34:11-14) Ida-neʼe bele ajuda ita atu komprende kona-ba Jeová mak Maromak hanesan saida. Bibi-atan neʼebé diʼak sente katak nia mak iha responsabilidade ba ninia bibi sira-nia moris. Nia lori sira ba fatin atu sira bele han no hemu, no nia mós koʼus bibi-oan. (Salmo [Mazmur] 23:1, 2; Isaías [Yesaya] 40:11) Loron-kalan nia tau matan no proteje sira husi animál fuik. (1 Samuel 17:34, 35; Lucas 2:8) Nia buka bibi sira neʼebé laʼo dook husi luhan no tau matan ba sira neʼebé hetan kanek.—Ezequiel (Yehezkiel) 34:16.
2 Iha tempu antigu, Maromak nia povu barak mak serbisu nuʼudar bibi-atan no toʼos-naʼin. Tan neʼe sira bele komprende tanbasá mak Jeová kompara nia an hanesan bibi-atan. Sira hatene katak bibi sira presiza ema atu tau matan ba sira hodi bele moris. Hanesan neʼe mós, ema presiza Jeová atu dirije no tau matan ba sira. (Marcos 6:34) Selae, sira sei terus no lakon. Sira la hatene buat neʼebé loos ka sala, no la iha ida atu proteje sira. Sira hanesan “bibi neʼebé bibi-atan la iha”. (1 Reis [Raja-Raja] 22:17) Maibé ba Jeová nia povu, nia fó buat neʼebé sira presiza.
3. Iha lisaun neʼe, ita sei aprende kona-ba saida?
3 Ita mós bele komprende tanbasá mak Jeová hanesan bibi-atan. Ita hatene katak nia tau matan didiʼak ba ninia povu ohin loron. Iha lisaun neʼe, ita sei aprende kona-ba oinsá mak nia dirije ita no tau matan ba ita-nia presiza. Ita mós sei koʼalia kona-ba saida mak ita tenke halo atu hetan buat diʼak kuandu Jeová dirije ita ho domin.
BIBI-ATAN DIʼAK FOTI EMA SELUK ATU AJUDA NIA
4. Oinsá mak Jesus tau matan ba Jeová nia bibi sira?
4 Jeová foti Jesus atu sai Ulun ba kongregasaun kristaun. (Efeso 1:22, 23) Jesus mak “bibi-atan diʼak” no nia hanesan ho ninia Aman. Jesus hadomi ema kristaun nuʼudar bibi sira no nia tau matan ba sira. Nia mós saran ninia moris ba sira. (Joao 10:11, 15) Jesus nia sakrifísiu mak hanesan prezente espesiál ba ita hotu! (Mateus 20:28) Jeová nia hakarak mak ema hotu neʼebé hatudu fiar ba Jesus “la bele lakon, maibé hetan moris rohan-laek”!—Joao 3:16.
5, 6. (a) Ohin loron, sé mak Jesus hili atu tau matan ba ninia bibi sira? Saida mak bibi sira presiza halo atu simu Jesus nia tau matan? (b) Tanbasá mak importante liu atu halo tuir matadalan husi katuas sira?
5 Oinsá mak bibi sira hatudu katak Jesus Kristu mak sira-nia bibi-atan? Jesus hatete: “Haʼu-nia bibi sira rona haʼu-nia lia; haʼu hatene sira, no sira tuir haʼu.” (Joao 10:27) Bibi sira rona ba Bibi-Atan Diʼak nia lian hodi halo tuir ninia matadalan. Neʼe envolve halo tuir ema neʼebé Jesus hili atu ajuda nia tau matan ba luhan. Iha tempu uluk, Jesus hili ninia apóstolu no dixípulu sira atu tau matan ba ema neʼebé tuir nia. Jesus haruka sira atu hanorin no fó-han ninia “bibi-oan” sira. (Lee Joao 21:15-17; Mateus 28:20) Nuʼudar sira haklaken liafuan diʼak, ema barak tan sai Jesus nia dixípulu sira. Jesus halo arranju hodi ema kristaun neʼebé fiar metin ona tau matan ba kongregasaun sira.—Efeso 4:11, 12.
6 Apóstolu Paulo hatete ba katuas kongregasaun sira iha Efeso: “Espíritu santu hili ona imi nuʼudar ulun no bibi-atan, atu tau matan ba Maromak nia kongregasaun.” (Apostolu 20:28, MF) Ohin loron, katuas sira hetan sira-nia knaar liuhusi espíritu santu. Tanbasá mak ita hatene ida-neʼe? Tanba sira kumpre kritériu sira neʼebé hakerek iha Maromak nia Liafuan neʼebé nia espíritu mak leno. Tan neʼe, kuandu ita halo tuir katuas sira, ita hatudu respeitu ba Jeová no Jesus, Bibi-atan sira neʼebé diʼak liu hotu. (Lucas 10:16) Ho razaun ida-neʼe mak ita prontu atu halo tuir katuas sira. Maibé iha mós razaun seluk tan tanbasá ita halo tuir sira-nia matadalan.
7. Oinsá mak katuas sira ajuda ita atu nafatin iha relasaun diʼak ho Jeová?
7 Matadalan no laran-manas neʼebé katuas sira fó ba irmaun-irmán sira, sempre mai husi Bíblia. Katuas sira lakohi atu manda irmaun-irmán sira kona-ba oinsá mak sira halaʼo sira-nia moris. (2 Korinto 1:24) Katuas sira hakarak ajuda sira atu foti desizaun rasik tuir Bíblia nia matadalan. Hodi halo hanesan neʼe, katuas sira ajuda kongregasaun atu hakmatek no sai ida deʼit. (1 Korinto 14:33, 40) Bíblia hatete katak katuas sira “tau matan ba imi”. Sira hakarak ema ida-idak iha kongregasaun laran atu nafatin besik ba Jeová. Tan neʼe, sira prontu hodi ajuda irmaun ka irmán ida neʼebé atu halo ka halo ona desizaun neʼebé ladiʼak. (Galasia 6:1, 2; Judas 22) Sin, iha razaun barak tanbasá mak ita hakarak rona ba sira neʼebé dirije ita.—Lee Ebreu 13:17.
8. Iha dalan saida mak katuas sira proteje kongregasaun?
8 Apóstolu Paulo, nuʼudar bibi-atan neʼebé domin, fó avizu ba ninia maluk sira iha sidade Koloso: “Haree bá katak ema ida la halo imi sai atan hodi lohi imi ho liafuan neʼebé mai husi matenek ema nian, no husi neon sira neʼebé ukun mundu neʼe, laʼós husi Kristu.” (Koloso 2:8) Avizu neʼe ajuda ita atu hatene razaun seluk tanbasá importante atu halo tuir katuas sira-nia matadalan. Sira proteje ita husi ema neʼebé hakarak hadook ita husi Jeová. Apóstolu Pedro hatete katak “profeta bosok” no “mestre bosok sira” sei koko atu halo “ema sira neʼebé fiar namlele” hodi monu no la halo tuir Jeová. (2 Pedro 2:1, 14) Ohin loron, katuas sira mós fó avizu hanesan neʼe, kuandu kongregasaun presiza. Nuʼudar ema kristaun neʼebé matenek, katuas sira iha esperiénsia barak iha sira-nia moris. Sira hetan sira-nia knaar tanba sira komprende didiʼak Eskritura no sira bele hanorin lia-loos husi Bíblia. (1 Timoteo 3:2; Tito 1:9) Husi sira-nia tempu iha lia-loos, no matenek husi Bíblia, sira bele fó matadalan neʼebé diʼak ba irmaun-irmán sira.
Hanesan bibi-atan proteje ninia luhan, katuas sira mós proteje Maromak nia bibi sira (Haree parágrafu 8)
BIBI-ATAN DIʼAK PROTEJE NO FÓ-HAN BIBI SIRA
9. Iha dalan saida deʼit mak Jesus dirije no fó-han kongregasaun ohin loron?
9 Jeová uza ninia organizasaun atu hanorin no dirije irmaun no irmán sira hotu iha mundu tomak. Ita hetan Bíblia nia konsellu barak husi ita-nia livru sira. Dala ruma, ita-nia organizasaun mós fó matadalan ba katuas kongregasaun sira liuhusi karta ka husi katuas sira neʼebé iha knaar atu vizita kongregasaun sira. Liuhusi dalan sira neʼe, bibi sira bele simu matadalan neʼebé klaru.
10. Kuandu ema ida hadook an husi kongregasaun, katuas sira iha responsabilidade saida?
10 Bibi-atan sira iha kongregasaun iha responsabilidade atu proteje no tau matan ba bibi sira. Katuas sira liuliu hanoin no hakarak ajuda sira neʼebé fiar sai fraku ka halo sala neʼebé boot. (Lee Tiago 5:14, 15.) Karik ema balu mós hadook an husi kongregasaun hodi la serbí ona Maromak. Bibi-atan neʼebé diʼak sei halo saida atu ajuda ema hanesan neʼe? Nia sei hakaʼas an atu buka ema sira-neʼe no fó laran-manas ba sira atu fila fali ba kongregasaun. Jesus hatete: “Aman iha lalehan lakohi atu kiʼik oan sira-neʼe ida lakon.”—Mateus 18:12-14.
OINSÁ MAK ITA PRESIZA HAREE KATUAS SIRA-NIA SALA?
11. Tanbasá mak susar ba ema balu atu halo tuir katuas sira?
11 Jeová no Jesus mak nuʼudar Bibi-Atan neʼebé perfeitu, maibé ema neʼebé sira uza atu tau matan ba kongregasaun mak ema sala-naʼin. Dala ruma, ida-neʼe halo susar ba ema balu atu halo tuir katuas sira. Karik sira hanoin: ‘Katuas sira mós sala-naʼin, hanesan deʼit ho ita. Tanbasá mak ita presiza rona ba sira?’ Maski katuas sira mós dala ruma halo sala, maibé ita labele hanoin liu kona-ba sala sira neʼebé sira halo.
12, 13. (a) Ema balu neʼebé iha responsabilidade iha Bíblia laran, sala saida deʼit mak sira halo? (b) Tanbasá mak Jeová hakarak katak ninia Liafuan koʼalia nakloke kona-ba ninia atan sira-nia sala?
12 Bíblia koʼalia nakloke kona-ba ema neʼebé Jeová uza iha tempu uluk atu dirije ninia povu. Sira mós halo sala. Porezemplu, Jeová hili David nuʼudar Israel nia liurai, maibé tempu balu liutiha neʼe, nia halo sala hasoru Maromak. Nia toba hamutuk ho feto neʼebé kaben ona, depois nia oho feto neʼe nia laʼen. (2 Samuel 12:7-9) No hanoin toʼok kona-ba apóstolu Pedro. Maski nia hetan knaar neʼebé importante iha kongregasaun, maibé nia mós halo sala neʼebé sériu. (Mateus 16:18, 19; Joao 13:38; 18:27; Galasia 2:11-14) Husi Adão ho Eva nia tempu, la iha ema ida neʼebé perfeitu, só deʼit Jesus.
13 Tanbasá mak Jeová hakarak katak ninia Liafuan koʼalia nakloke kona-ba ninia atan sira-nia sala? Razaun ida mak atu hatudu katak nia nafatin bele dirije ninia povu hodi uza ema neʼebé sala-naʼin. Tuir loloos, husi tempu uluk, Jeová sempre halo ida-neʼe. Tan neʼe, maski katuas sira sala-naʼin, maibé la bele uza ida-neʼe nuʼudar razaun atu muramura hasoru sira-nia matadalan. Jeová hakarak ita atu hatudu respeitu no halo tuir sira.—Lee Êxodo (Keluaran) 16:2, 8.a
14, 15. Saida mak ita bele aprende husi dalan neʼebé Jeová fó matadalan ba ninia povu iha tempu uluk?
14 Importante tebes katak ita halo tuir katuas sira. Tanbasá? Hanoin toʼok kona-ba tempu uluk kuandu Jeová fó matadalan ba ninia povu hodi sira bele tahan durante tempu susar. Porezemplu, kuandu povu Israel sai husi rai-Egiptu, Maromak uza Moisés no Aarão atu fó matadalan neʼebé importante ba sira. Nó mós, atu sira la mate kuandu Maromak fó malisan númeru 10, sira presiza halo tuir matadalan. Matadalan neʼe mak prepara hahán espesiál, oho bibi ida no uza nia raan hodi hisik ba odamatan leten no riin. Maromak mak koʼalia kedas ba povu ka lae? Lae, sira presiza rona ba povu nia ulun sira, ka katuas sira neʼebé simu matadalan husi Moisés. (Êxodo [Keluaran] 12:1-7, 21-23, 29) Iha dalan hanesan neʼe mak Jeová uza Moisés no katuas sira seluk atu dirije ninia povu. Ohin loron, Jeová uza katuas kongregasaun sira atu halo nuneʼe.
15 Karik ita bele hanoin kona-ba tempu seluk neʼebé Maromak uza ema ka anju sira atu fó matadalan ba ninia povu. Dala barak, matadalan neʼebé sira simu, salva sira-nia moris. Iha situasaun sira-neʼe, Maromak fó knaar ba ema seluk atu koʼalia hodi ninia naran no fó-hatene ba ninia povu saida mak sira presiza halo kuandu hasoru tempu neʼebé perigu. Kuandu Armagedon mai, ita bele fiar katak Jeová sei halo hanesan neʼe. Maski nuneʼe, katuas sira neʼebé iha knaar atu reprezenta Maromak nia organizasaun presiza kuidadu katak sira la uza sala kbiit neʼebé Jeová fó ba sira.
“BIBI LUHAN IDA DEʼIT HO BIBI-ATAN IDA DEʼIT”
16. Saida mak “lian” neʼebé ita presiza rona?
16 Jeová nia povu sira mak hanesan “bibi luhan ida deʼit” neʼebé iha “bibi-atan ida deʼit”, neʼe mak Jesus Kristu. (Joao 10:16) Jesus hatete katak nia sei hamutuk ho ninia dixípulu sira “toʼo mundu nia rohan”. (Mateus 28:20) Nuʼudar Liurai iha lalehan, Jesus iha kbiit atu kontrola buat hotu neʼebé sei akontese antes tempu neʼebé nia halakon Satanás nia mundu. Oinsá mak ita bele iha unidade nafatin no sente seguru iha Maromak nia organizasaun? Bíblia hatán hodi dehan: “Ó sei rona lian ida husi ó-nia kotuk dehan: ‘Ida-neʼe mak dalan. Laʼo tuir nia bá.’” “Lian” neʼebé ita rona inklui buat neʼebé Jeová hanorin ita husi Bíblia no buat neʼebé Jeová no Jesus hatete liuhusi bibi-atan sira neʼebé sira foti.—Lee Isaías (Yesaya) 30:21;b Apokalipse 3:22.
Katuas sira buka atu proteje família sira neʼebé iha inan ka aman deʼit husi perigu kona-ba ransu ho ema aat (Haree parágrafu 17, 18)
17, 18. (a) Tanbasá mak Maromak nia povu iha perigu laran, maibé ita bele fiar saida? (b) Ita sei aprende saida iha lisaun tuirmai?
17 Bíblia hatete katak Satanás mak hanesan ‘leaun ida neʼebé laʼo mai laʼo bá hodi buka atu han ema ruma’. (1 Pedro 5:8) Hanesan animál fuik neʼebé hamlaha, nia hakarak atu ataka luhan, hodi hein ba bibi neʼebé fraku ka dook husi ninia luhan. Tan neʼe mak ita hakarak atu nafatin besik ba kongregasaun no ba ita-nia Bibi-atan. (1 Pedro 2:25) Eskritura iha Apokalipse 7:17 koʼalia kona-ba ema neʼebé sei moris liu terus boot. Neʼe hatete katak Jesus sei “sai sira-nia Bibi-Oan no nia sei lori sira ba bee-matan bee moris nian; no Maromak sei hamaran sira-nia matabeen.” Ida-neʼe mak promete neʼebé kapás tebes neʼebé ita bele fiar!
18 Katuas sira-nia responsabilidade atu tau matan ba kongregasaun mak importante tebes. Tan neʼe, katuas ida-idak bele husu ba ninia an: ‘Oinsá mak haʼu bele tau matan ba Jesus nia bibi iha dalan neʼebé diʼak?’ Ita sei hatán pergunta neʼe iha lisaun tuirmai.
a Êxodo 16:2, 8: “2 No povu Israel hotu hahú muramura hasoru Moisés no Aarão iha rai-fuik maran. 8 No Moisés hatutan tan: ‘Jeová mak sei fó ba imi naan atu han iha kalan no paun iha dadeer atu han toʼo bosu, tanba Jeová rona ba imi-nia muramura hasoru nia. Ami mak sé? Imi-nia muramura la hasoru ami, maibé hasoru Jeová.’”
b Isaías 30:21: “Se ó lakon dalan no laʼo sees ba karuk ka ba loos, ó sei rona lian ida husi ó-nia kotuk dehan: ‘Ida-neʼe mak dalan. Laʼo tuir nia bá.’”