Sira uza Bíblia atu hatán haʼu-nia pergunta hotu

HAʼU-NIA MORIS ULUK NIAN:

Bainhira haʼu moris, haʼu no haʼu-nia família hela iha kintál kiʼik iha fatin rurál naran Galicia, iha rai-España nia parte norueste. Haʼu mak oan númeru haat husi oan naʼin-ualu. Ami-nia família moris ho kontente. Iha tempu neʼebá, família sira sempre haruka sira-nia oan ida ka liu atu tama semináriu ka konventu. Husi ami-nia família, haʼu no haʼu-nia biin tama konventu no mane ida tama semináriu.

Bainhira haʼu tinan 13, haʼu tama konventu ida iha sidade Madríd. Haʼu-nia biin ida mós tama ona konventu neʼe. Iha konventu neʼe, ema la hatudu interese ba malu. Ema la habelun malu. Iha neʼebá, iha deʼit regra sira, orasaun no ema hotu sériu tebes. Dadeer-saan ami halibur hamutuk iha kapela atu medita, maibé baibain haʼu-nia neon mamuk deʼit. Tuirmai, ami kanta knananuk igreja nian no tuir misa, buat hotu neʼe halo iha lian Latina. Haʼu la komprende buat ida no sente katak Maromak dook tebes husi haʼu. Iha konventu ami labele koʼalia ba malu. Kuandu haʼu no haʼu-nia biin hasoru malu, ami bele temi deʼit: “Ave Maria.” Madre sira fó lisensa ba ami atu koʼalia ba malu ba minutu 30 deʼit kuandu ami han hotu. Neʼe la hanesan duni ho haʼu-nia moris neʼebé kontente ho haʼu-nia família. Haʼu sente mesamesak no tanis beibeik.

Maski haʼu nunka sente besik ba Maromak, maibé haʼu sai madre bainhira haʼu tinan 17. Tuir loloos, haʼu halo tuir deʼit ema seluk nia hakarak, maibé lakleur deʼit haʼu komesa duvida katak Maromak hili duni haʼu atu sai madre. Bainhira haʼu fó sai haʼu-nia duvida, madre sira hatete katak ema neʼebé duvida sei bá infernu. Maski nuneʼe, haʼu duvida nafatin. Haʼu hatene katak Jesus Kristu la hadook an husi ema seluk. Nia sai okupadu atu hanorin no ajuda ema seluk. (Mateus 4:23-25) Bainhira haʼu tinan 20, haʼu hatene katak haʼu la iha tan razaun atu kontinua sai madre. Haʼu hakfodak bainhira madre superiora hatete katak se haʼu duvida, diʼak liu haʼu sai husi konventu. Haʼu hanoin katak nia taʼuk se haʼu fó influénsia ba ema seluk. Tuirmai, haʼu sai husi konventu.

Bainhira haʼu fila fali ba uma, haʼu-nia inan-aman la hirus. Maibé tanba la iha serbisu iha ami-nia sidade kiʼik, haʼu muda ba rai-Alemaña. Haʼu-nia alin-mane ida hela iha neʼebá. Nia sai membru ba grupu Komunista no ema hotu husi grupu neʼe mak ema Españól. Haʼu kontente atu apoia ema neʼebé luta ba serbisu-naʼin nia direitu no mós feto sira-nia direitu. Tan neʼe, haʼu sai ema Komunista no ikusmai kaben ho mane ida husi grupu neʼe. Haʼu hanoin katak haʼu halo buat ruma neʼebé bele ajuda ema seluk. Haʼu fahe Komunista sira-nia panfletu no hola parte iha demonstrasaun sira.

Maibé, liutiha tempu balu, haʼu sai laran-kraik. Dala barak, haʼu sente katak ema Komunista sira la halo tuir buat neʼebé sira hanorin. Haʼu sente duni ida-neʼe bainhira joven balu husi ami-nia grupu sunu Konsuladu España nian iha sidade Frankfurt iha tinan 1971. Sira halo ida-neʼe atu protesta ukun-naʼin ida iha rai-España neʼebé hatudu hahalok la justu. Maibé haʼu hanoin katak neʼe laʼós dalan neʼebé loos atu fó sai sira-nia hanoin.

Bainhira ami-nia oan primeiru moris, haʼu fó-hatene haʼu-nia laʼen katak haʼu sei la tuir tan grupu Komunista nia enkontru. Haʼu sente mesamesak tanba haʼu-nia belun sira la vizita haʼu no haʼu-nia bebé. Haʼu komesa hanoin kona-ba tanbasá ita moris. Ita presiza duni hakaʼas an atu halo mundu sai diʼak liután ka lae?

OINSÁ BÍBLIA TROKA HAʼU-NIA MORIS:

Iha tinan 1976, Testemuña naʼin-rua mai haʼu-nia uma no fó ba haʼu publikasaun kona-ba Bíblia. Sira ema Españól. Bainhira sira vizita haʼu ba dala segundu, haʼu komesa husu pergunta barak ba sira kona-ba tanbasá ema hetan terus, tanbasá ema hatudu hahalok todan ba sorin no tanbasá mundu la iha justisa. Haʼu hakfodak bainhira sira uza Bíblia atu hatán haʼu-nia pergunta hotu. Haʼu kontente atu bele estuda Bíblia ho sira.

Foufoun, haʼu hakarak aumenta koñesimentu deʼit. Maibé tuirmai haʼu-nia hanoin troka bainhira haʼu no haʼu-nia laʼen komesa tuir reuniaun husi Testemuña ba Jeová iha Reuniaun-Fatin. Iha tempu neʼebá, ami iha ona oan naʼin-rua. Testemuña sira tula ami ba reuniaun sira no mós ajuda tau matan ba ami-nia oan durante reuniaun. Haʼu komesa sente besik ba Testemuña sira.

Maski nuneʼe, haʼu nafatin iha dúvida balu kona-ba relijiaun. Haʼu deside atu vizita haʼu-nia família iha rai-España. Haʼu-nia tiu ida mak padre no nia koko anima haʼu atu la estuda tan Bíblia. Maibé Testemuña sira iha neʼebá ajuda tebes haʼu. Sira hatán haʼu-nia pergunta hotu husi Bíblia, hanesan ho Testemuña sira iha rai-Alemaña. Haʼu deside metin atu hahú fali estuda Bíblia bainhira haʼu fila ba rai-Alemaña. Maski haʼu-nia laʼen deside atu la estuda tan, maibé haʼu kaer metin ba haʼu-nia desizaun. Iha tinan 1978 haʼu hetan batizmu nuʼudar Testemuña ba Jeová.

BUAT DIʼAK NEʼEBÉ HAʼU HETAN:

Bainhira haʼu hetan koñesimentu neʼebé loos husi Bíblia, neʼe ajuda haʼu-nia moris atu iha objetivu. Porezemplu, 1 Pedro 3:1-4 anima feen sira atu “hakruʼuk” ba sira-nia laʼen “ho respeitu kleʼan” no haburas “laran-maus” neʼebé iha folin boot tuir Maromak nia haree. Prinsípiu sira-neʼe ajuda haʼu atu halaʼo didiʼak haʼu-nia knaar nuʼudar feen no inan.

Tinan 35 liu ona husi tempu neʼebé haʼu sai Testemuña. Haʼu kontente tebes atu serbí Maromak hamutuk ho irmaun-irmán sira, no haʼu mós kontente tebes tanba haʼu-nia oan naʼin-haat husi naʼin-lima mós serbí Jeová.