Resposta ba pergunta sira kona-ba Bíblia

Sé mak ukun mundu neʼe?

Ema barak fiar katak Maromak mak ukun mundu neʼe. Maibé se hanesan neʼe, mundu neʼe sei nakonu ho terus ka lae? (Deuteronômio [Ulangan] 32:4, 5) Tuir Bíblia nia hanorin, iha aat-naʼin ida neʼebé kontrola mundu neʼe.—Lee 1 João 5:19.

Saida mak akontese hodi aat-naʼin neʼe bele kontrola mundu? Iha tempu ulukliu, anju ida kontra hasoru Maromak no book ema primeiru, Adão no Eva atu kontra mós Maromak. (Gênesis [Kejadian] 3:1-6) Anju neʼe mak Satanás. Hodi rona no halo tuir anju neʼe, Adão no Eva husik Satanás ukun fali sira. Maromak Forsa Boot Liu Hotu mesak deʼit mak Ida neʼebé iha direitu atu ukun. Maibé Maromak hakarak ema atu apoia ninia ukun ho hakarak rasik tanba hadomi nia. (Deuteronômio [Ulangan] 6:6; 30:16, 19) Maibé triste tebes tanba ohin loron Satanás lohi ema barak atu halo desizaun sala hanesan kaben-naʼin primeiru.—Lee Apokalipse 12:9.

Sé mak bele rezolve ema nia problema sira?

Maromak sei husik Satanás atu ukun nafatin mundu neʼe ka lae? Lae! Maromak sei uza Jesus atu harahun buat aat hotu neʼebé Satanás halo. Nuneʼe, liuhusi Jesus, Maromak sei hadiʼa fali buat hotu.—Lee 1 João 3:8.

Ho Maromak nia forsa, Jesus sei halakon Satanás. (Roma 16:20) Depois, Maromak sei ukun ema iha mundu no halo ema hotu moris iha dame no kontente. Nuneʼe buat hotu sei sai diʼak, hanesan ninia hakarak uluk nian ba ema iha mundu.—Lee Apokalipse 21:3-5.