Resposta ba pergunta sira kona-ba Bíblia
Jesus halo ema mate moris fali, neʼe tebes duni ka lae?
Jesus fó moris-hiʼas ba Lázaro, neʼebé mate ba loron haat ona
Kona-ba Jesus halo ema mate moris fali, neʼe hakerek duni iha Bíblia laran, laʼós ema mak inventa deʼit. Bíblia fó sai ho loloos kona-ba fatin no tempu neʼebé milagre sira-neʼe akontese. Porezemplu, iha tinan 31, Jesus ho ema-lubun laʼo husi Kafarnaum atu bá sidade Naim. Bainhira foin atu tama ba sidade neʼe, sira haree ema-lubun seluk, leba hela mate-isin atu bá hakoi, no Jesus fó moris-hiʼas ba ema mate neʼe. Ita bele fiar katak istória neʼe tebes duni, tanba hakerek ona iha Maromak nia Liafuan Bíblia, no mós tanba sasin-naʼin barak mak haree.—Lee Lucas 7:11-15.
Jesus mós fó moris-hiʼas ba ninia belun Lázaro, neʼebé mate ba loron haat ona. Ita bele fiar duni ba istória neʼe tanba iha tempu neʼebá mós ema barak mak haree Jesus halo ida-neʼe.—Lee João 11:39-45.
Tanbasá mak Jesus halo ema mate moris fali?
Jesus halo ema mate moris fali tanba nia laran-sadiʼa no hanoin ema. No mós tanba Jesus iha kbiit neʼebé boot tebes toʼo nia bele halakon mate. Kbiit neʼe nia simu husi ninia Aman Jeová, neʼebé fó moris ba buat hotu-hotu.—Lee João 5:21, 28, 29.
Ho milagre sira neʼebé Jesus halo, neʼe hametin liután ita-nia fiar tanba Jesus promete ona katak loron ida nia sei fó moris-hiʼas ba ema rihun ba rihun neʼebé mate ona. Laʼós ba “ema diʼak” deʼit, maibé mós “ema aat” neʼebé uluk la hatene Maromak neʼebé loos. Bainhira sira moris fali, sira sei iha oportunidade atu aprende kona-ba Maromak Jeová no hadomi Nia.—Lee Apóstolu 24:15.